Kakawaki ae riao Baireana
N taai aika bati ti kona ni katoong ana wirikiriki aika kakukurei te Tamnei ae Raoiroi, ni kaota koauan kakawakin arora n tamnei.
Inanon kawaran te aba ae Sierra Leone i Aberika Maeao, I iira te boowi ae kairaki iroun te tia kairiiri n te Buraimwari n te titeiki. E kaira te boowi Mariama ma te tangira, te akoi, ao te onimaki bwa e bebete iangoana bwa e a kaman kaaina te Ekaretia. E ngae n anne, Mariama, e a bon tibwa rairaki.
Tarina ae karimwiina e kaaina te Ekaretia ao e kaoa Mariama bwa e na iria nakon te kiraati n te Aro. E rootaki nanon Mariama n te rongorongo. Te reirei bon iaon tuan te itiaki. E butiia mitinare bwa a reireinna riki ao n te tai ae e aki maan e reke ana koaua iroun te Burabeti Iotebwa Timiti. E bwabetitoaki n 2014, ao natina te aine e bwabetitoaki n te namwakaina ae nako. Iangoia, aan reirei aika uoua are e kaira rairakin Mariama bon tuan te itiaki ao te Burabeti Iotebwa Timiti, uoua bwaai aika kotea te aonaaba angin te tai a aranaki bwa aki kakawaki, akea oin te kantaninga iai, ke aki angaraoi. Ma e kakoaua Mariama bwa titebo ngaia ma te bwebwe are e katikaki nakon te oota. E taku, “Ngke I kunea te euangkerio, I bon kuneai.” E kinaa kakawakina rinanon reirei mai ieta. Kakawakina ngkai natin te Atua te aine e kaotaki nakoina rinanon te Tamnei ae Raoiroi.
Ngkai ti na kaitibo ma taari aine n te utu ae Singh mai Inria. Renu, n te atai mai tabona, te moan mairouia niman tarina ni kaaina te Ekaretia, e tibwauai iango aikai.
“Imwaain ae I kakaea taekan te Ekaretia, I aki rangin namakinna ae I kakawaki. Ngai temanna mai buakoia aomata, ao au bootaki ao au katei a aki rangin reireinai ae e mwaiti kakawakiu n arou n aomata. Ngke I reiakina te euangkerio ao n ataia bwa Ngai natin te Atua te aine, e bitai. N te tai ae waekoa I namakina ae I rangin kakawaki—te Atua e a tia ni karikai ao ni karika tamneiu ao maiu ma bonganana ao te kantaninga.
“Imwaain reken te euangkerio inanon maiu, I kataia n taainako ni kaota koauana nakoia tabeman bwa Ngai temanna ae I kakawaki. Ma ngke I reiakina te koaua, bwa Ngai natin te Atua te aine, I aki riai ni kaota koauana nakoia tabeman. I ataia bwa I kakawaki. … Tai iangoia ae akea manenam.”
Beretitenti Thomas S. Monson e taekinna ma te kororaoi ngke e taekin taeka aikai: “Kakawakin te aomata bon ana konabwai n riki n aron te Atua.”1
I kakabwaiaki n ae nako ni kaitibo ma temanna te ataeinaine are e ataa te koaua aei. Arana bon Taiana. I kaitibo ma ngaia n aia Onaoraki Ataein te Buraimwari i Salt Lake City. Taiana bon ataein te reirei n te kauarinan ngke e reke irouna te kaeintia. E ninikoria n ikakorakora inanon 18 te ririki imwaain motirawana tabeua te wiiki n nako. Taiana e kaonaki n te oota ao n te tangira. E kinaaki n aron momoangarena ao kateina ae onoti “e katei baina aika uaai.” Ngke a titiraki tabeman, bukin tera ngkoe, Taiana?” e taku ana kaeka, “Bukin tera tiaki ngai?” Taiana e ukoukora kan rikina n aron ana Tia Kamaiu, are e rangin tangiria. Inanon mwanangara, I reiakinaki bwa e ataa kakawakina Taiana. N ataakina bwa ngaia natin te Atua te aine e anganna te rau ao te ninikoria ni kaitara kataakina n te kawai ae raoiroi are e karaoia.
Mariama, Renu, ao Taiana a reireiniira bwa te Tamnei e na kamatoa nakoira n tatabemaniira nako kakawakira ae tabu. N ataakina ni koaua bwa ngkoe natin te Atua te aine e na roota waakin maium ao ni kairiko n te mwakuri n ibuobuoki are ko anga ni katoa bong. E kabwarabwara Beretitenti W. Kimball ni mimitongin taeika aikai:
“Bon Tamam te Atua. E Tangiriko. Ngaia ma tinam are i karawa ataa kakawakim ae riaon ae baireki. … Kam onoti. Teuana aekakina, e karaoaki n te wanawana ae akea tokina are e anganiko bwa ko na bwaina te maiu ae akea tokina.
“Ko riai n aki nanououa ibukin kakawakim ngkai te aomata ngkoe. Ana babaire te euangkerio n nanona ae bwanin e na katauraoa te tai ibukimi ni kabane ni karokoi ngkami n ami konabwai, are te rikirake ae akea tokina ao te konaa n riki n aron te atua.”2
N na taekina ae kainnanoaki n te kaokoro imarenan taeka aika uoua: kakawaki ao tau. A aki titebo. Kakawakin te Tamnei nanona n atai kakawakira n aron ataakin kakawakira iroun te Tama are i Karawa, tiaki n aron kakawakira iroun te aonaaba. Kakawakira a bairekai imwaain rokora n te aonaaba aei. “Ana tangira te Atua akea tiana ao e teimatoa n aki toki.”3
N te anga teuana, te kororaoi e reke rinanon te ongotaeka. Ngkana ti bure, e karako kakawakira, ma tiaki are ai bon akea bongara! Ti reitinako n rairi nanora ao ni kekeiaki n riki n ai aronIesu ma ara reitaki ae kakawaki. Ngkai e reirei Beretitenti Brigham Young: “Ae karako, te kabanea ni mangori n tamnei iaon te aba … titebo kakawakina ma te aonaaba.”4 E aki kakawaki bwa tera, ti kakawaki n taainako imatan Tamara are i Karawa.
N aki ongea te koaua ae kamiimi aei, iraman mwaitira, man te tai teuana nakon teuana, ma iango aika buakaka ke ara namakin ibukira? I kakoaua. Bon te kamwane ae bebete. Tatan bon tamaia taian kewe, ai moarara riki ngkana ti kaburei tein rikira ma te kantaninga. Ni karinanoi arora e aki buokiira raoi. N oneanmwiina e tuuka rikirakera. Ngkai ti reiakinaki n angin te tai, “Akea ae kona ni karinanoko ma tii ngkana ko bon kariaia.”5 Ti kona ni katoka kabotauan buakakara nakon tamaroan temanna. “Te kabootau e na iraea kukureim.”6
Ni kabotaua te kaokoro, te Uea e kakoauaira bwa ngkana a raoiroi ara iango, E na kakabwaiaira ma te onimaki, te onimaki n ataia bwa antai ngaira. Akea te tai ae e na aki kakawaki n ongo Ana taeka. “E riai te raoiroi ni katamaroa am iango n aki toki,” E taku. E taku, “Ngkanne matoan nanom e na korakora imatan te Atua; ao … te Tamnei ae Raoiroi e na riki bwa raom n taai nako.”7
Te Uea e kaoka rakan te koaua aei nakon te Burabeti Iotebwa Timiti: “Ane e butimwaea te bwai mai iroun te Atua, e riai ni kakoaua bwa mai iroun te Atua; ao e na kimwareirei bwa e warekaki iroun te Atua bwa e tau ni karekea.”8 Ngkana ti namakina te Tamnei, ngkai e kabwarabwaraaki n te kibu aei, ti nooria bwa te bwai are ti namakinna e roko mairoun Tamara are i Karawa. Ti kinaa ao n neboia ibukin kakabwaiaikira. Ngkanne ti kimwareirei bwa ti warekaki bwa ti tau ni butimwaeaki.
Iangoia bwa ngkoa are ko wareki booki aika tabu te ingabong teuana ao te Tamnei e wirikiriki ni karaurau nakoim bwa te bwai are ko warekia e koaua. Ko kona ni kinaa te Tamnei ao ni kukurei bwa ko namakina Ana tangira ao n tau ni karekea?
Tiina, kam na bae ni katorobubua irarikin natimi ae aua aia ririki ngkai e tataro imwaain matuuna iaon ana kainiwene. Ko moanna n namakina te namakin ngkai ko kakauongo. Ko namakina te angibue ao te rau. E uarereke te namakin, ma ko ataia bwa ngkoe, n te tai anne, ko tau ni butimwaea. Ti burenibwai, ngkana arona, ti karekei kaotioti aika bubura n te tamnei inanon maiura; ma n taai aika bati ti kona ni katoong ana wirikiriki aika kakukurei te Tamnei ae Raoiroi, ni kaota koauan kakawakin arora n tamnei.
Te Uea e kabwarabwara te reitaki imarenan kakawakira ao Ana karea ni kamaiu ngke E taku:
“Uringnga bwa e korakora kakawakia aomata imatan te Atua;
“Bwa, nooria, te Uea te Tia Kaboingkami e mate n te rabwata; mangaia ae e rinanon te maraki ibukiia aomata ni kabane, bwa aonga aomata ni kabane n raira nanoia ao nakoina.”9
Taari aine, ibukin te bwai are E karaoia ibukira, “ti kabaeaki nakoina inanon te reitaki n tangira.”10 “Ao e kanakomaiai Tamau bwa I aonga n tabekaki rake iaon te kaibangaki; ao imwiina ngkana I tabekaki rake iaon te kaibangaki, N na burimauniia aomata nakoiu.”11
Te Uea Beniamina e kabwarabwara naba te reitaki ni kabaebae aei ma ara Tia Kamaiu: “Ao nooria e na rinanon te kaririaki, ma marakin te rabwata, te baki, te taka, te korakai, n riaon riki bwaai ake e kona n rinanoi te aomata, are e na aki mate iai; bwa taraia, e na waanako te raraa man bwangabwangan kun rabwatana ni kabuta, e na rawawata korakaina ibukin buakakaia ma aia mwakuri ana botanaomata aika bati n ribaki.”12 Te korakai anne ao mwiin te korakai e na kaoni nanora ma te tangira ao te kakaitau. E taku Unimwaane Paul E. Koelliker, “Ngkai ti kanakoi baika katabetabe ake a katikiira nakon te aonaaba ao ni kamwakura inaomatara n ukoukoria, ti tauraoi ni butimwaai anainano man te teretio ake a na kaniira nakoina.”13 Ngkana ara tangira are ti namakinna ibukin ara Tia Kamaiu ao are E karaoia ibukira e korakora riki nakon korakorara ake ti anga nakon mamaarara, raraoman temanna i bon irouna, ao katei aika bubuaka, ngkanne E na buokiira n tokanikai iaon bwaai ake e karika te korakai inanon maiura. E kamaiuiira man mamaarara.
N na manga katuruturua riki; ngkana e korakora riki ana katikitiki te aonaaba nakon te onimaki ao n onimakinan te Tia Kamaiu, ngkanne ana katikitiki te aonnaba e aonikai ni katoa tai. Ngkana ti rineia n taratara riki iaon ara iango aika buakaka ao n nanououa iaon kakawakira, n oneamwiin ae ti na karikirakea ara reitaki ma te Tia Kamaiu, e na taraa ni kaangaanga n namakina ana wirikiriki te Tamnei ae Raoiroi.
Taari aine, ti na aki burebureaki n arora bwa antai ngaira! Ngkai angin te tai e bebete riki te aoriori n te maiu n tamnei nakon are ti na waakina nako ara konabwai n te tamnei n uringnga ao n ribanai tokin kawaira, ti aki kona ni kabooa te kamonaaki anne ni boong aikai.Ti bia, ngaira taari aine, “ni kakaonimaki iroun Kristo; … e na [tabekiira] rake Kristo, ao ke kainnanona ao matena, … ao ana nanoangao ma ana taotaonakin nano, ao kantaaningan mimitongina ma te maiu are akea tokina, e na tiku n [ara] iango n aki toki.”15 Ngkai e tabekiirarake te Tia Kamaiu nakon te tabo ae rietaata riki, n aki tii noora riki ae antai ngaira ma ti a kaan riki naba ma Ngaia nakon are ti iangoia. I a atong baikai n aran Iesu Kristo ae tabu, amen.