Koaua aika Kakaawaki—Ti Riai ni Karaoi
Te Moan Kaotioti ao te Burabeti Iotebwa Timiti e uoti rabakau ao koaua ake a tau nakon kukureira n te maiu aio ao karietaatakira.
Ngke ai itiua au ririki ni maiu, I titirakina tinau, “Ngkana ko mate ao I mate ao ti nako karawa, ko na bon riki naba bwa tinau?” E aki kantaninga te aekaki n titiaki anne. Ma kaekana n ana kabanea n tamaroa, e taku, “Tiaki, i karawa ti na bane n riki bwaa taari ao mwanera. N na bon aki riki bwa tinam.” Tiaki anne te kaeka ae I kantaningaia.
N taai tabetai imwiin te marooro ae uarereke, uoman ataeinimwane aika roko ni mataroan oon mweengara. Man bukina ae kamimi, e kariaia rokoia tamau. A taku bwa mitinare ngaiia man Ana Ekaretia Iesu Kristo Ibukiia Aika Itiaki Ni Boong aika Kaitira.
Mitinare aikai, are ti a tibwa reiakina araia, a waaki n reireiniia ara utu. I oota raoi n namakinan te kukurei ao te roko n nano ni katoa te tai are a roko iai nakon mwengara. A tuangira bwa te ataeinimwane e nakon te buakonikai ao ni bubutia te Atua bwa e ngaa te ekaretia ae koaua ao e noora te Atua ao Iesu.1 Taian mitinare a kaota nakoira tamnein te kaotioti, ao ngke I noria, I ataia bwa Iotebwa Timiti e a tia n noora te Atua te Tama ao Iesu Kristo. A taku mitinare bwa ibukin te kaotioti, ana Ekaretia Iesu Kristo ae koaua e a manga roko riki i aon te aba.2
A reireiniira naba mitinare ana baire ni kakukurei te Atua ao a kaekai titiraki man ara utu ibukin te aro. A reireiniira bwa utu ni koaua a kona ni manga ikotaki imwin te maiu aio bwa kaaro, tiina ao naati mwane ao aine.
A bwabetitoaki ara utu. Iai taai ni kaangaanga bwa ti a onei ara katei ni kawai, ti a kaaki te maiu ni kawai ao n riki bwa membwa aika kakaonimaki. Ma bukin ana nanoanga ao ana tangira te Atua ao n aia buobuoki taan kairiri aika bati ao membwa, ti tokanikai n rinanona n te moan ririki ni kataaki.
Mirion aika a tia ni kaina te Ekaretia, n ikotaki naba ma aika mwaiti aika rairaki ao ni bwabetitoaki ni katoa wiiki, a tia ni karekea aia koaua n te Moan kaotioti. E kona te Tamnei are Raoiroi ni kaoka te koaua aio nakoira ngkana ti kakorakoraira ni maiuakin taian koaua aika bebete n Ana euangkerio Iesu Kristo.
Te Moan Kaotioti ao te Burabeti Iotebwa Timiti e kaotinakoi raon rabakau ao koaua ake a tau nakon kukureira n te maiu aio ao karietatakira i matan te Atua. N na taekini teniua koaua aika ti karekei ao n riai ni mwakuri iaoia ibukina bwa te ataeinimwane e katorobubua n tataro ma nanona.
E weteia Burabeti te Atua bwa a na Kairira ao ni Kaetira
Te koaua ae riai are ti reiakinna man te Moan Kaotioti ao te Burabeti Iotebwa Timiti bwa te Atua E weteia Burabeti,3 taan mamata, ao taan kaotioti n reirei, ni kairiiri, ni kauring, ao ni kairiira.4 Mwaane aikai bon taan ua rongorongo iaon te aba,5 ma te kariaia n taetae ao ni mwakuri n aran te Uea.6 Man irakin aia reirei, ti na kamanoaki ao ti na karekei rinerine aika kakabwaia inanon ara mwananga n te aonaaba aio.
Ngke I reirei n te Brigham Young Uniwetiri ngke te kairake, ni mitinare ae tuai ni iein ae e a tibwa bane au tai. I ira te tetere n te nakoanibonga n te Maungatabu ni Kabuta inanon te Taebanaeko n te Tembora Tikuea. Beretitenti Ezra Taft Benson, te Beretitenti ngkanne n te Ekaretia, e kaungaia mitinare ake a bane aia tai bwa a na iein ao a na moanibwaia ni maiuia.7 Imwin te tetere, I ataia bwa I a tia ni weteaki bwa N na raira nanou ao ni mwakuria ana reirei te Burabeti.
I motikia bwa N na nako n oki nakon mwengau i abau, Brazil, ni kakaea buu. Imwain mwanangau ni kitana Brazil inanon uoua te namwakaina ni ibuobuoki, I tarebonia tinau ao raoraou tabeman ao a anga te mwaiti ae 10 ataeinaine—aika a tau ni buunaki.
Ngke I a mena i Brazil imwiin iangoana ao tataroakinana ae bati, I kaitibo, kareke tai, kainrouaki nakon, ao ni kataua te bong ni mare nakon temanna te ataeinaine ibuakoia naake I tuangaki araia iaon te riiti. Tiaki tain uruan aia rekooti ataein Provo, Utah, ni kareke tangira ao ni kabaeaki, ma e rang baitii man ana kainibaire Brazil.
Tabeua namwakaina imwiina, I mare ma Elaine. Bon au tangira ni maiu ao te kakabwaia are I rineia.
I aki katautaua bwa aomata ni kabane kam na karaoa te riiti ae aekakina, ma I katautaua bwa—a na mwaiti riki nakon ae taekinaki—bwa ti na aki toki ni karaoa are e taekinna ara burabeti ae maiu
Ana Burabeti te Atua n te tai aei bon Beretitenti Thomas S. Monson, ao ti na kakabwaiaki man irakin raoi nanon ana reirei.
Te Rabakau n Anuan te Atua ae Koaua
Te koaua riki teuana ae ti reiakinna ibukin te Moan Kaotioti ao te Burabeti ae Iotebwa Timiti bon anuan te Atua ni koaua. Tii iangoia bwa ai kakabwaiara ngaira n ataia bwa te Atua bon te aomata ma rabwatana ae te iriko ao te rii ae e kona n ringaki kanga ae iroura,8 bwa ti kona n taromauria te Atua ae bon iai, are ti kona n oota irouna, ao are E a tia ni kaotia ma Natina nakoia Ana Burabeti—burabeti ni kawai ao burabeti inanon boong aika kaitira.9 Bon te Atua are E ongo ara tataro ao e kaekai;10 te Atua are tarataraira mai ieta i karawa11 ao e bon aki toki n tabeaianga n arora n rabwata ao n tamnei; te Atua are anganiira te inaomata n rinerine are ti baireia irouira bwa ti na Rimwina ao n ongeaba nakon Ana tua n akea te kairoroaki;12 te Atua are anganiira kakabwaia ao ni kariaia n rinanoan te kataaki bwa ti aonga n rikirake ao n riki n Ai arona.
Bon te Atua n tangira are e katauraoa ana baire are ti na rinanona ni kona ni karekea te kukurei n te maiu aei ao are akea tokina.
Iesu Kristo Bon Ara Tia Kamaiu
Man te Moan Kaotioti ao te Burabeti are Iotebwa Timiti, ti karekea te wanawana ni koaua ao ana mwakuri ae tabu te Uea ae Iesu Kristo, are bon atibun te maninganinga n ara aro.
Ibukina bwa e karokoaki te mate n te aonaaba, ae koaua n aron ae ti maiu iai ngkai, ti na bane ni mate n te bong teuana. Ana mwakuri te mate teuana bon kabuan rabwatara; ti bon aki kona ni karaoa te bwai teuana ni kaokia. N reitia, ibukina bwa ti bane n ringa te bure n ara tai ni maiu n te maiu n te aonaaba aei, ti na bon aki kona n oki nako matan Tamara are i Karawa.
Kam kona ni iangoa mwiin kanakoakira mai matan te Atua ao n aki manga kona ni karekea rabwatara?
Te Tia Kamaiu ao te Tia Kaboira e kainnanoaki bwa e na kainaomataira man te mate ao te bure. I aan ana kairiri Tamara are i Karawa, E roko Iesu nakon te aonaaba, ni korakai ni mate iaon te kaibangaki, ao ni manga kautaki n te aro bwa ti aonga naba ni kautaki, ao n te rairanano ae korakora ao karaoan ao kawakinan berita, ti na manga roko i matan te Atua.
E kabwarabwara Iakobwa, “Ai korakorara ana raoiroi Atuara, are e a tia ni katauraoa te kawai ibukira are ti kona iai ni birinako mai nanon bain te man ae kakamaku aio; eng, te man ae kakamaku anne, te mate ma mone, are I aranna bwa maten te rabwata, ao maten naba te tamnei.”13.
Iesu bon te Mesia ae taekinaki n te berita, te tia Anga te Tua, Atuaia Iteraera ae Tabu, ara Uea, ara Tia Kamaiu, te Tia Kabooira, ara King, ara Bwai Nako.
Ti bia reitinako ni kabane ni mwakuri iaon koaua aika tau aikai ma te wanawana, n anga ara ongeaba nakon te Atua ao Natina ae Tangiraki. N aran Iesu Kristo, amen.