Te Bowi n te Kaembwa, iroun Worthington Whittredge

Meei 3–9

Reirei ao Berita aika Tabu 46–48

“Ukoukorii Bwaai n Tituaraoi aika Moan te Raraoi”

Iangoiia ataei ake ko rereiniia ngkai ko wareka Reirei ao Berita aika Tabu 46–48. Taraa “Buokan Kainanoia Ataei aika a Uarereke” n moan te boki aio ibukin riki iango aika tamaroa.

Korei Am Namakin

Kaungaa te Tibwatibwa

Kaoiia ataei bwa a na korei tamnein bwaai ake a reiakin n te reirei ae nako ke n mwengaia n te wiki ae nako. Kauringiia ngkana a kainnanoia. Imwina angania te tai n kabwarabwarai aia tamnei.

Reirei te Reirei: Ataei aika a Uarereke

Reirei ao Berita aika Tabu 46:2–6

I kona n buokiia tabeman n namakina te butimwaeaki n te taromauri.

Ngaira ni kabane, n ikotaki ma ataei, ti tangiria n namakina te butimwaeaki ao te tangiraki. Ti na kanga ni kabonganai kiibu aikai n buokiia ataei n butimwaeia aomata n te taromauri?

Waaki ni Kakukurei aika a Kona ni Karaoaki

• Wareka Reirei ao Berita aika Tabu 46:5 n kabaibati, ao tuangiia ataei n oin am taeka bwa tera nanon te kibu aio. Kaota tamneia aomata man mwakoron nako te aonaaba. Titirakiniia ataei bwa antai mairouia aomata aikai ae e tangiriira Tamara are i Karawa bwa ti na kaoiia nakon ara bootaki n taromauri. Buokiia ataei n kataneiaiia ni kaoko ke ni kaoiia i bon imarenaia n kaea bootakin te Ekaretia ke te waaki n kakukurei.

• Tuangiia ataei bwa a na iangoia bwa iai raoraoia ae a na roko n taromauri te moan tai. Buokiia bwa a na iangoi kawai ake a kona iai n buoka raoraoia n namakina te butimwaeaki. Angania te tai bwa a na kataneiaiia bwa tera ae a na kona n taekinna ke n karaoia ngkana a noora raoia anne n rinnako n te tabo n taromauri ke te umwanreirei n te moan tai.

Reirei ao Berita aika Tabu 46:13–26

Tamau are i Karawa e kakabwaiaai ma Ana bwai n tituaraoi.

Ataei n tatabemaniia ake ko reireiniia bon naati aine ke mwaane iroun Tamara are i Karawa, ao E a tia ni kakabwaiaiia ma bwaai n tituaraoi n te tamnei.

Waaki ni Kakukurei aika a Kona ni Karaoaki

• Kabongana Reirei ao Berita aika Tabu 46:13–26 ke “Mwakoro 20: Ana Bwai n Tituaraoi te Tamnei” (Karaki n Reirei ao Berita aika Tabu, 77–80) n kabwarabwaraa nakoia ataei tabeua bwaai n tituraoi aikai are e anganira Tamara are i Karawa rinanon Tamneina ao bukin tera E anga. Ngkana e kona, kaoti bwaai ke tamnei are tei ibukin bwai n tituaraoi nako. Tooki tabeua te tai n titirakinia ataei bwa a kanga bwaai n tituaraoi aikai n kona n kakabwaiaa temanna.

• Angan te ataei te bwai ae kona n tibwaaki, n aron te mwakoro n kariki ke uoua bwaai n takakaro. Tuanga te ataei bwa e na tibwaa te bwai are ko a tia n anganna ma kaain te kiraati. Kabwarabwaraa bwa Tamara are i Karawa e anganiira bwaai n tituaraoi, ao E tangirira bwa ti na kabonganai n kakabwaiaiia tabeman. Tuangiia ataei te tai are ko kakabwaiaaki iai ibukina bwa temanna e tibwaua ana bwai n tituaraoi.

Reirei te Reirei: Ataei aika a Ikawai Riki

Reirei ao Berita aika Tabu 46:8–26

Tamara are i Karawa e anganai bwaai n tituaraoi n kakabwaiaia tabeman.

Bwaai n tituaraoi ake a kabwarabwaraaki n Reirei ao Berita aika Tabu 46—ao bwaai n tituaraoi riki ake tabeua—a roko mairoun te Atua rinanon te Tamnei ae Raoiroi. Ko kona n buokiia ataei n kinai bwaai n tituaraoi ake a tia n anganaki—ao tabeua ake a ukoukorii—ngkai kam bootaki ni kamatebwaia Reirei ao Berita aika Tabu 46 .

Waaki ni Kakukurei aika a Kona ni Karaoaki

• Korei tabeua bwaai n tituaraoi n tamnei iaon te beba are a kuneaki n Reirei ao Berita aika Tabu 46:13–26 ao Taekan te Onimaki 1:7, ao karabai inanon te umwanreirei. Kaoiia ataei n tatabemaniia bwa a na kakaea teuana man beba akekei ao n wareki kiibu n kakaea bwa e mena ia te bwai n tituaraoi are mwaneweaki n koroboki aika tabu. Imwina bootaki n wareka Reirei ao Berita aika Tabu 46:8–9, 12. Bukin tera Tamara are i Karawa e anganiira bwaai n tituaraoi n tamnei?

• Buokiia ataei n korei iaon te burakibooti ana bwaintangira te Tamnei are koreaki n Reirei ao Berita aika Tabu 46. Ngkai a koreaki bwaintangira aikai, maroroakinna bwa a na kanga ni kabonganaaki bwaintangira akanne ni kakabwaiaiia tabeman. “Mwakoro 20: Bwaai n Tituaraoi” (Karaki n Reirei ao Berita aika Tabu, 77–80) a kona n ibuobuoki. Tuangiia ataei bwa iai bwaai n tituaraoi irouia. Kaungaia bwa a na butiia Tamara are i Karawa bwa e na buokiia n kinai aia bwai n tituaraoi ao bwa a na kanga ni kabonganai n buokiia tabeman.

Reirei ao Berita aika Tabu 47:1, 3

I kona n korea rongorongou.

Te Uea e wetea John Whitmer n korea rongorongon te Ekaretia. N te bong aei ao ti rangin ni kakabwaiaki ibukin rongorongon te Ekaretia ake a tia nikawakinaki inanon ririki aika bati.

Waaki ni Kakukurei aika a Kona ni Karaoaki

• Bootaki wareka Reirei ao Berita aika Tabu 47:1, 3, ao tuangiia ataei bwa a na kakaea bwa tera ae tangiria te Uea bwa e na karaoia John Whitmer. Tera nanon te taeka ae “ n taainako” n te kibu 3? Ti kanga ni kakabwaiaki man ataakin rongorongon te Ekaretia?

• Ngkana ataei ake ko reireinia iai aia tieno, tuangiia bwa a na marooroakin bwaai ake a na korei n aia tieno. Ataei a na bon kukurei n ongoraeakina karakinam man am tieno ngke ko uarereke ke ana tieno am bakatibu.

• Kaota nakoia ataei tabeua kawai ake a kona iai n kokorea rongorongon maiuia. Te katooto, a kona n koroboki n te boki, karekei tamnei man te boki n tamnei, taibinna n te kombiuta, ke n karaoa te rawebwanaa ke te rawetamnei. Buokiia ataei ni korei bwaai aika a tamaroa ni koreaki n oin rongorongoia ae onoti, n aron aia koaua iroun Iesu Kristo. Kaoiia ataei bwa a na karaoa te kanikina ke te boutita n uotia nakon mweengaia ma iango aikai n kakauringiia bwa a na korea rongorongoia.

  

  Taian tienoo bon teuana te kawai ae ti kona iai n kawakina rongorongora.

Reirei ao Berita aika Tabu 48:1–4

I kona ni buokiia tabeman man tibwauan te bwai are I a tia n anganaki.

Te Uea e kaungaia Aika Itiaki i Ohio bwa a na buokiia kaain te aro ake tabeman man tibwauan abaia ma aia mwane. Ko na kanga ni kabonganai kiibu aikai ni buokiia ataei n kakaei kawai n tibwauaia ma tabeman baike e a tia n anganiia te Atua?

Waaki ni Kakukurei aika a Kona ni Karaoaki

• Kaota nakoia ataei mwaben Nu Ioki ao Ohio (taraa te kamataata n Eberi 12–18 inanon Nakomai, Iriirai—Ibukiia Aomata n Tatabemaniia ao Utu). Kabwarabwara bwa te Uea e tua nakoia Aika Itiaki i Nu Ioki ao n tabo ake tabeua bwa a na bootaki i Ohio, ma e mwaiti mai irouia ae aki tau ana mwane n katea ana auti n rokona. Buokiia ataei n kakaea n Reirei ao Berita aika Tabu 48:1–4 te bwai are e tua te Uea nakoia Aika Itiaki bwa a na karaoia n ibuobuoki. Titirakiniia ataei bwa tera ae a tangiria ni karaoia n ibuobuoki ngke arona bwa a mamaeka i Ohio n te tai arei. Tera ae ti a tia n anganaki ngkai are ti kona n kabongana ni buokiia tabeman? Ibukin te katooto, taraa “The Coat” (witeo, ChurchofJesusChrist.org).

• Bootaki wareka Reirei ao Berita aika Tabu 48:4 ao kaoiia ataei bwa a na kakaea te bwai are tua te Uea nakoia Aika Itiaki bwa a na karaoia ni buoka Ana mwakuri. Kabwarabwaraa bwa kaikoan te mwane e kona n anganiia te kona n kabooa te aba ao n katea te tembora n te bong teuana. Ti na kanga n kaikoa te mwane ibukina bwa ti aonga n kona n buoka ana mwakuri te Uea? Kaota te witeo ae “First Things First” (ChurchofJesusChrist.org), ao maroroakinna bwa a kanga ataei ake n te tamnei n kakoroa nanon ana tua te Uea n kaikoa te mwane.

Kaungaa te Kamatebwai n te Mweenga

Kaungaiia ataei bwa a na tuangiia kaain aia utu ni mwengaia taekan te bwai n tituaraoi are a namakinna bwa a tia n anganaki. Kaungaia naba ataei bwa a na tataro ao n ukoukora ana bwaintangira te Tamnei are a tangiria ni karikirakea.

Kanakoraoan Ara Anga reirei

Buokiia ataei n reirei man koroboki aika tabu. Ataei aika a uarereke e na aki bati ae a na kona n warekia, ma ko bon kona naba n buokiia n reiakinna man koroboki aika tabu. Te katooto, ko kona ni wareki taeka ao kaoiia bwa a na teirake ke ni katea baia n te tai are a ongo iai te taeka ke te mwakoro n taeka ae onoti.