“Eberi 12–18. Reirei ao Berita aika Tabu 37–40: ‘Ngkana Kam Aki Katiteuanaaki Tiaki Au Bwai Ngkami,’” Nakomai, Iriirai—Ibukin te Moanrinan: Reirei ao Berita aika Tabu 2021 (2020)
“Eberi 12–18. Reirei ao Berita aika Tabu 37–40,” Nakomai, Iriirai—Ibukin te Moanrinan: 2021
A Mwaing nako Kirtland Aika Itiaki, iroun Sam Lawlor
Eberi 12–18
Reirei ao Berita aika Tabu 37–40
“Ngkana Kam Aki Katiteuanaaki Tiaki Au Bwai Ngkami”
Te Atua e atai kainnanoia ataein n am kiraati aika a na reiakin. Anganna bwa e na kairiko ngkai ko rinei reirei ao waaki ni kakukurei ibukin buokam n reireiniia.
Korei Am Namakin
Kaungaa te Tibwatibwa
Tibwatibwai kaobiin booki aika tabu. Ngkai a taui booki aika tabu ataei, angan temanna te ataei bwa e na tibwaua te bwai are e uringnga teuanne ke neienne n te reirei ae nako ke man warekan booki aika tabu n te mweenga n te wiiki aei.
Reirei te Reirei: Ataei aika a Uarereke
Reirei ao Berita aika Tabu 38:24–27
I kona n tangiriia tabeman.
Te Uea e tangiriia Aika Itiaki ni bootia ni kabane i Ohio ao n itangitangiri imarenaia ni katitebooaki. Ko na kanga ni buokiia ataei n namakina te katiteuanaaki ma n itangitangiri imarenaia?
Waaki ni Kakukurei aika a Kona ni Karaoaki
-
Kabongana te iteraniba ni waaki ni kakukurei n te wiiki aei ni kaotia nakoia ataei bwa ngke e rangi ni boou te Ekretia, te Uea e tuangiia kaain te aro bwa a na bane ni mwaing nako Ohio (taraa naba te mwabe inanon te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu). Te Atua e tangiria bwa a na reireniia aroia n tangiriia ao n nakoraoi imarenaia. Tuangiia ataei aia iango bwa a na kanga ni kaota aia tangira imarenaia.
-
Wareka Reirei ao Berita aika Tabu 38:25 nakoia ataei, ao tuangiia n oin am taeka tera ae nanonaki ni karinea tarim ke mwaanem n ai arom (taraa naba Mataio 7:12). Buokiia bwa a na kaokioka te kibu, n onea mwiin “tarina” ma aran temanna imwiin temanna.
-
Anenea te anene ae taekan te tangira ao ni kairiia naba tabeman, n aron “I’ll Walk with You” ke “We Are Different” (Aia Boki n Anene Ataei, 140–41, 263). Ngkai kam anene, tuangiia ataei bwa a na taui ieta tamneia ataei man taabo nako n te aonaaba.
-
Buokiia ataei bwa a na karaoa te kaotioti ni kaotia ae iai temanna kaain aia kiraati ae boou n te Moanrinan. Ti na kanga ni buoka teuanne ke neienne n namakina te butimwaeaki? A na bae ataei ni kukurei ni karaoa te kaotioti aei ma taoree aika taian bai ke ma tamnei aika a korekoreaki.
Reirei ao Berita aika Tabu 38:22
Ngkana I tauraoi, I riai n aki maaku.
Teuana te kawai ae buokiira iai Tamara are i Karawa n aki maaku bon man reiakinara bwa ti na tauraoi.
Waaki ni Kakukurei aika a Kona ni Karaoaki
-
Kaokiokia tabeua te tai te kibuntaeka ae “Ngkana kam tauraoi ao kam na aki maaku.” (te kibu 30). Imwiin tabeua te tai, katuka te taeka, ao tuangiia ataei bwa a na atonga te taeka are e bua. Tuangiia ataei te tai are ngke ko a tauraoi ibukin te bwai teuana ao arom n tauraoi e buokiko n aki maaku.
-
Buokiia ataei bwa a na iangoi bwaai are e tangiria Tamara are i Karawa bwa a na tauraoi iai, n aron ae a na tia ni bwabetitoaki ke n nako n te tembora. Kabonganai tamnei ke bwaai ni kakairi ni karekei aia iango iai. Marooroakin taekan kawai ake a kona n tauraoi iai, ao tuangiia bwa a na bon korei tamneia ni katauraoi ke ni karaoi bwaai ake a reke n aia iango.
Reirei ao Berita aika Tabu 39:6, 23
I karekea ana bwaintituraoi te Tamnei ae Raoiroioi ngke I kamatoaaki.
Tera ae a kainnanoia ataei n am kiraati bwa aonga n ataa aron karekean ana bwaitituaraoi te Tamnei ae Raoiroi? Ana kaetieti te Uea nakon James Covel n taekan ana otenanti e na kona n ibuobuoki.
Waaki ni Kakukurei aika a Kona ni Karaoaki
-
Kaota tamnein temanna are e a tia ni bwabetitoaki ao n tia ni kamatoaaki (taraa Bokin Tamnein te Euangkerio, nambwa 104, 105). Wareka Reirei ao Berita aika Tabu 39:23, ao tuangiia ataei bwa a na kotea te tamnei ae eti ngkana a ongo ae ko wareka taekan te bwabetito ke te kamatoaaki.
-
Bootaki wareka Reirei ao Berita aika Tabu 39:6, ao kaotii tamnei nakoia ataei ke bwaai ni kakairi are a tei ibukin kawai are ti kakabwaiaaki iai iroun te Tamnei ae Raoiroi (n ikotaki ma ake a taekinaki n te kibu 6). Tuangiia ataei bwa a na ikaruoruo n taui tamnei ieta ke bwaai ni kakairi, ao ngkai a karaoia, kaota am koaua bwa e kanga te Tamnei ae Raoiroi n tia ni kakabwaiako inanon kawai aikai. Buokiia ataei n kinai taai are a namakina iai ana kairoro te Tamnei.
Reirei te Reirei: Ataei aika a Ikawai
Reirei ao Berita aika Tabu 37; 38:31–33
E bootira te Atua bwa e na kakabwaiaira.
Te ikotaki i Ohio bon te anga karea ae korakora ibukin angiia Aika Itiaki n taai ake ngkoa. Te bong aei ti aki tuangaki bwa ti na bootira n teuana te tabo, ma ti bootira kanga ai aroia utu, uoote ao titeiki.
Waaki ni Kakukurei aika a Kona ni Karaoaki
-
Kaotia nakoia ataei te iteraniba ni kakukurei n te wiiki aei ke te mwabe n te te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu. Bootaki wareka Reirei ao Berita aika Tabu 37, ao buokiia ataei ni kakaei taabo iaon te mwabe are a taekinaki inanon te kaotioti. Tera ae a tuangaki Aika Itiaki iroun te Uea bwa a na karaoia?
-
Rinea te kibuntaeka ke te tiententi man Reirei ao Berita aika Tabu 38:31–33 are ko namakinna bwa e kabwarabwaraki iai bukina ngkai e tangiria te Uea bwa e na bootia ni kabane Ana aomata. Kamaenakoi taeka man te tiententi aei ni katobibia te ruu, ao kaoiia ataei bwa a na booti, ao ni katikui raoi ni nneia are a na mena iai, ao kakaea bwa e kaoti iaa te tiententi inanon taian kibu. Bukin tera e tangiria te Uea bwa ti na ikotaki?
Reirei ao Berita aika Tabu 38:24–27
Te Atua e tangiriia Ana aomata bwa a na katiteuanaaki.
Ibukin katauraoaia Aika Itiaki ni ikotaki, e reireiniia te Uea bwa a na taraia i bon imarenaia bwa a katitebooaki ao ni “katiteuanaaki” (te kibu 27). E kanga te kaetieti aei ni kakabwaiaia ataei ake ko reireiniia?
Waaki ni Kakukurei aika a Kona ni Karaoaki
-
Bootaki wareka Reirei ao Berita aika Tabu 38:24–27, ao kaoiia ataei bwa a na korei taeka man kiibu aikai are a namakinna bwa a kakawaki, ni kairaki ma taeka ake a okioki. Bukin tera ngkai te Uea e kaokioki taeka aikai? Anganiia bwa a na tibwauai bwaai ake a korei, ao ni marooroakina te bwai ae a reiakinna man taeka aikai.
-
Buokiia ataei n iangoi taabo are e namakinna temanna bwa e katinanikuaki, n aron ae kaain te Ekaretia ae boou ke ni mwaing nakon te tabo ae boou ke te reirei. Tera ae taekinaki n Reirei ao Berita aika Tabu 38:24–27 n arora ae ti na karaoia nakon temanna are e mena inanon kaangaanga aikai? Karaoa te kaotioti iaon bwaai aika a riki aika a kona ni karaoaki.
-
Tibwaua te reirei ma ana bwai ni kakairi are e kaotia bwa a kanga ni bootaki bwaai ke ni katiteuanaaki, n aron te moimoti ni kunnikai ae karika teuana te rabuna ae waeaki ma te rabuna ke taian rengarenga are a karika teaina te kariki. Tera ae ti reireinaki man katooto aikai n arora ni katiteuanaaki n aroia ana aomata te Atua?
Reirei ao Berita aika Tabu 39–40
I kona ni kawakina au berita.
James Covel e a tia ni karaoa ana berita bwa e na ongeaba iroun te Uea, ma e aki kawakina ana berita. N reiakinan te bwai are e rinanona e kona ni buokiia ataei n uringa kakawakin te ongeaba.
Waaki ni Kakukurei aika a Kona ni Karaoaki
-
Kaoiia ataei bwa a na wareka atuun taian mwakoro ibukin Reirei ao Berita aika Tabu 39 ao 40, ao n tuangiia bwa a na kakimototoa taekana ke n tamnei ake a korei ni bwaai ake a reiakin n rongorongon James Covel.
-
Korei titiraki iaon te burakibooti ake a na buokiia ataei ni kaotaia ni mwakoro 40, n aron Tera ae berita iai James Covel bwa e na karaoia? Bukin tera ngkai e aki kawakina ana berita? Kaoiia ataei bwa a na kakaei kaekaaia inanon mwakoro 40.
-
Buokiia ataei bwa a na uring aia berita ake a karaoi ngke a bwabetitoaki (taraa Motiaea 18:8–10). Buokiia ataei bwa a na korei ni karinani tabeua maakakin ke “raraomaeakinan bwain te aonaaba” (Reirei ao Berita aika Tabu 40:2) are a na tuuka te aomata man kawakinan berita aikai. Kaoiia ataei bwa a na bon korea te rongorongo ae kimototo nakoia bwa te kauring bwa te ongeaba n ana tua Tamara are i Karawa e na buokiia n tokanikai iaon te maaku ke raraomaeakinan bwain te aonaaba. Kaungaia bwa a na kawakina te kauring anne n taabo tabeua are a na kona n nooria iai n taainako.
Kaungaa te Kamatebwai n te Mweenga
Kaoiia ataei bwa a na marooro ma aia karo ke tabeman kaain te utu aroia ni kona n rangi ni katiteuanaaki n aron te utu.
Kanakoraoan Ara Anga reirei
Kamatenanoa te kibu. Iangoia n rinea te rongorongo man booki aika tabu are ko taku bwa e na kona ni kakorakora aia koaua ataei, ao ni buokiia ni kamatenanoa. A kona ataei aika a uarereke ni kamatenanoa mwakoron booki aika tabu ke bon te kibuntaeka.