Maati 29–Eberi 4

Te Itita

Te Itita: “Ngai Are E Maiu, Ngai Are E Tiringaki”

Te kiraati n te Moanrinan n Tabatin te Itita bon te tai ae koro tamaroana ni buokakiia ataei ni kakorakorai aia onimaki iroun Iesu Kristo ao Ana Mwakuri ni Kamaiu. Ukoukora ana kairiiri te Uea n aron karaoakin anne. Ko na bae ni kunei tabeua iango aika a ibuobuoki inanon te kamataata aei.

Korei Am Namakin

Kaungaa te Tibwatibwa

Kariaia ataei bwa a na tibwauai baike a ataia bwa e aera ngkai ti bukamarua te Itita. Titirakiniia tera ae a karaoia aia utu ni bukamarua Mangautin Iesu Kristo n tain te Itita. Ke kariaia bwa a na tibwauai baike a reiakin ibukin Iesu Kristo ni mweengaia ao ni booki aika tabu.

Reirei te Reirei: Ataei aika a Uarereke

Reirei ao Berita aika Tabu 138:11–17

Bwa ibukin Iesu Kristo, N na manga kautaki.

Ngkai ko reireiniia ataei taekan Mangautin Iesu Kristo, Reirei ao Berita aika Tabu 138:11–17 e kona ni buokiko ni kabwarabwara tera ae nanonaki ni manga kautaki. Kiibu aikai a kona naba ni buoka katean aia onimaki ae a na manga kautaki n te bong teuana.

Waaki ni Kakukurei aika a Kona ni Karaoaki

• Kaota tamnein maten, taunakin ao Mangautin te Tia Kamaiu (taraa Bokin Tamnein te Euangkerio, nambwa. 57, 58, ao 59). Titirakiniia ataei bwa tera ae a ataia ae riki ni kanoan te tai aei. Kaota koauana bwa e mate Iesu ibukira ao ni manga uti man te mate bwa ti aonga ni kona ni bane ni kautaki imwiin matera.

• Iangoa te reirei ma ana bwai ni kakairi are e kona ni buokiia ataei ni kaotaia bwa tera ae e na riki ngkana ti mate (tamneira ma rabwatara a na maenako) ao ngkana ti a uti (tamneira ma rabwatara a na manga ikotaki). N aron te katooto, tera ae e na riki ngkana ti kamwainga te baetere man te tooti ke te inke man te been ni koroboki? Tera ae e na riki ngkana a manga moan ikotaki bwaai aikai?

• Wareware nakoia ataei man Reirei ao Berita aika Tabu 138:17: “Te tamnei ao te rabwata [a na] katiteuanaki n aki manga karaureaki, bwa a aonga ni karekea bwaninin te kimwareirei.” Bukin tera ngkai ti kakaitau ibukin rabwatara? Tibwaua te kimwareirei are ko namakinna n atakina bwa ti na manga uti ao ni manga karekei rabwatara.

• Bootaki anenea te anene ae taekan te Maungauti, n aron “Did Jesus Really Live Again?” ke “Jesus Has Risen” (Aia Boki n Anene Ataei, 64, 70). Anganiia ataei taian tamnei ake a tei ibukin taeka ke kibuntaeka inanon te anene (n aron te katooto, taraa Bokin Tamnein te Euangkerio, nambwa. 59, 60, ao 61), ao kaoiia bwa a na taui ieta aia tamnei ngkana a anenei taeka akanne.

Reirei ao Berita aika Tabu 76:11–24; 110:1–7; Iotebwa Timiti—Rongorongo 1:14–17

Te Burabeti ae Iotebwa Timiti e noora Iesu Kristo.

Teuana te kawai ni buokiia ataei ni kakorakora aia onimaki iroun te Tia Kamaiu bon tibwauakin nakoia ana kakoaua Iotebwa Timi: “E maiu! Bwa ti nooria n angatain te Atua” (Reirei ao Berita aika Tabu 76:22–23).

Waaki ni Kakukurei aika a Kona ni Karaoaki

• Kaota nakoia ataei tamnein ana Moan Kaotioti Iotebwa Timiti (taraa te kamataata n Tianuare 4–10 inanon Nakomai, Iriirai—Ibukiia Aomata n Tatabemaniia ao Utu). Kaoiia ataei bwa a na tuangko te bwai ae riki n te tamnei, ao tuangiia bwa a na kakaea Iesu Kristo. Titirakiniia ataei ngkana a atai tabeua taai are e a tia iai Iotebwa Timiti n noora te Tia Kamaiu. N oin am taeka, karakin taneiai ake a kabwarabwaraaki n Reirei ao Berita aika Tabu 76:11–24; 110:1–7. Tuangiia ataei bwa a kanga tamnei aikai ni katea am onimaki iroun Iesu Kristo.

• Ngkai ataei a karani iteraniba ibukin waaki ni kakukurei n te wiiki aei, wareki nakoia koroboki aika tabu ake a irekereke ma ngaia. Katerei rongorongo ake inanon te tamnei ake a kabwarabwaraaki ni kiibu aikai. Kaota koauana nakoia ataei bwa te Burabeti ae Iotebwa Timiti e noora Iesu Kristo, ao aei teuana bukina ngkai ti ataia bwa e maiu Iesu.

Reirei te Reirei: Ataei aika a Ikawai

Reirei ao Berita aika Tabu 76:11–24; 110:1–10; Iotebwa Timiti—Rongorongo 1:14–17

Te Burabeti ae Iotebwa Timiti e kakoaua bwa e maiu Iesu Kristo.

Ana mwakuri te burabeti ae moan te kakawaki bon kakoauan Iesu Kristo. Buokiia ataei ni katea aia onimaki iroun te Tia Kamaiu man reiakinan ana kakoaua Iotebwa Timiti Ibukina.

Waaki ni Kakukurei aika a Kona ni Karaoaki

• Karaki aika imwiina a kabwarabwarai taai are ngke e kaoti Iesu Kristo nakon Iotebwa Timiti: Reirei ao Berita aika Tabu 76:11–24; 110:1–10; Iotebwa Timiti—Rongorongo 1:14–17. Iaon te burakibooti, korei karinanin koaua ake ti reiakin ibukin te Tia Kamaiu man kiibu aikai. Kaoiia ataei bwa a na kotei kiibu ake a reireia te koaua ake a koreaki iaon te burakibooti. Tera riki ae ti reiakinna ibukin Iesu Kristo man te bwai are e rinanona Iotebwa Timiti?

• Iaon te iteraniba ni waaki ni kakukurein te wiiki aei, buokiia ataei ni katoatoai tamnei ma kiibu ni booki aika tabu. Bukin tera ngkai bon te kakabwaia ataakin ae Iotebwa Timiti e noora te Tia Kamaiu ae e a tia n uti? Tibwaua am koaua ae e maiu Iesu Kristo ao Iotebwa Timiti bon te burabeti.

Reirei ao Berita aika Tabu 63:49; 88:14–17, 27; 138:11, 14–17

Ibukin Iesu Kristo, N na manga uti.

Ko na kanga ni buokiia ataei ni kananoi aia kakaitau ataei ibukin ana bwaintangira te Tia Kamaiu ibukin te mangauti nakoira ni kabane?

Waaki ni Kakukurei aika a Kona ni Karaoaki

• Katabeia ataei n tatabemaniia n teuana te karaki man booki aika tabu aika imwiina: Reirei ao Berita aika Tabu 63:49; 88:14–17, 27; 138:11, 14–17. Kaoiia ataei bwa a na kakaai aia kibu ni kotei kibuntaeka ake a namakinna bwa a katerea rongorongon te Itita. Anganiia bwa a na tibwaua aia iango. Ngkana e tau te tai, kariaia bwa a na karaoi kaati beeba are a kaoti kibuntaeka ake a kunei are a na kona n anganiia aia utu ke raoraoia.

• Titirakiniia ataei bwa a na kanga ni kabwarabwara nakon tariia ke mwaaneia ae uarereke ke nakon raoraoia bwa tera ae nanonaki ni manga kautaki. Ibukin tabeua iango, bootaki wareka Reirei ao Berita aika Tabu 138:14–17, ao iangoi titiraki n aron aikai: Tera ae e na riki nakon tamneira ao rabwatara ngkana ti mate? Tera ae e na riki ngkana ti kautaki? E kanga Iesu Kristo ni karekea te anga n te mangauti?

• Kaota te witeo “Ibukina bwa E Maiu” (ChurchofJesusChrist.org), ao kariaia ataei bwa a na tibwaua aron aia namakin ni bwaai ake e karaoi te Tia Kamaiu ibukiia.

  

  Ana Tataro te Uea, iroun Yongsung Kim

Reirei ao Berita aika Tabu 18:10–13; 19:16–19; 45:3–5; 58:42–43

Ibukin Iesu Kristo, a kona ni kabwaraaki au bure.

N raonaki ma kamaiuakira man te mate n rabwata, Iesu e katauraoa te kawai ibukira ni kamaiuaki man te mate n tamnei—n taekana teuana, ni kabwaraaki ara bure ao n oki nakon mweengan te Atua.

Waaki ni Kakukurei aika a Kona ni Karaoaki

• Koreia iaon te burakibooti uoua atuu ae aekakin aikai: Tera ae e karaoia te Tia Kamaiu ao Tera ae I riai ni karaoia. Kaoiia ataei n tatabemaniia bwa a kakaea teuana mai ibuakon rongorongo aika imwiina ni kakaea te bwai ae e riai ni mena iaan atuu aikai: Reirei ao Berita aika Tabu 18:10–13; 19:16–19; 45:3–5; 58:42–43. Tibwaua kimwareireimi ao ami kakaitau ni bwaai ake e karaoi te Tia Kamaiu ibukira.

• Buokiia ataei bwa a na reiakina te kateniua n taekan te onimaki. Ko kona ni buokiia ni kamatenanoa ni kaoti tamnei ake a nako ma taian kibuntaeka.

• Kaota te tamnei “The Shiny Bicycle” (ChurchofJesusChrist.org), ke karakina oin am karaki n taekan te ataei are e karaoa ana rinerine ae kairua ao imwiina e rairananona. Buokiia ataei ni marooroakina te bwai are e karaoia te ataei inanon te karaki ni karekea kabwaraakin ana bure. E kanga te Tia Kamaiu ni karekea te anga ibukira bwa a na kabwaraaki ara bure?

Kaungaa te Kamatebwai n te Mweenga

Buokiia ataei n iangoa te bwai ae a kona ni karaoia n tuangiia aomata tabeman—ai moarara riki kaain aia utu—bwaai ake e a tia ni karaoi Iesu Kristo ibukira. Ni manga kaitibomi are imwiina, tuangiia bwa a na tibwaua nakoim bwaai ake a tia ni karaoi.

Kanakoraoan Ara Anga reirei

Ataei a na karekea riki ngkana e kaokiokaki. Tai maaku ni kaokioki waaki ni kakukurei n te tai ae mwaiti, riki ma ataei aika a uarereke. Kaokiokana e na buokiia ataei n uringa te bwai are a tia n reiakinna.