Te mii ni Burabeti Ibukin Kamauaia Maate

Iroun Beretitenti M. Russell Ballard

Beretitenti ni Bonomwi n te Kooram n Abotoro n te Tengaun ma Uoman

I kakoaua bwa te mii are e karekea Beretitenti Joseph F. Smith e bon koaua. I kakoaua bwa aomata nako a kona n ataia bwa e bon koaua.

Tariu ao mwaneu, au maroro e katauraoaki tabeua te tai imwain motirawan kainnabau ae tangiraki, Barbara. Au utu ao ngai ti karabwai ngkami ibukin ami tangira ao ami ibuobuoki n akoi. I tataro bwa e na kakabwaiai te Uea ngkai I taetae nakoim n te ingabong aei.

Inanon Okitobwa 1918, 100 te ririki n nako, Beretitenti Joseph F. Smith e karekea te miii ni burabeti. Imwiin 65 te ririki ni katean ana mwakuri te Uea n Ana Ekaretia Iesu Kristo ibukiia aika Itiaki ni Boong aika Kaitira, ao tabeua te wiiki imwiina imwain matena n Nobembwa 19, 1918, e tekateka n ana ruu n iangoa ana mwakuri ni kamaiu Kristo ao ni wareka ana kabwarabwara Betero n ana mwakuri te Tia Kamaiu n te aonaaba n tamnei imwiin Taurakina.

E koreia: “Ngke I warekia I bon rangi ni kukurei. … Ngkai I tabe n iangoi bwaai aikai … , a kaukaki matan ootau, ao Tamnein te Uea e tiku i aou, ao I nooriia maate aika uanao”¹ Bwaninin rongorongon te mii e koreaki n Reirei ao Berita aika Tabu mwakoro 138

N na anga tabeua rongorongona bwa ko aonga ni kakaitau riki n ae bwanin te katauraoi ni maiun Joseph F. ni karekean te mii ae moan te tamaroa aei.

Ngke e riki bwa te Beretitenti n te Ekaretia, e nako Nauvoo n 1906 ao e iangoa te ururing are e a tia ni karekea ngke ai tibwa nimaua ana ririki. E taku, “Aio raoi te tabo are I tei iai ngke, [Iotebwa, ai tamau, ao bon tamau, natin Hyrum] a tamwarakeia n aia aoti ni kawaia nako Carthage. N aki ruou man ana aoti tamau e rara nako moa n ana tabo n tekateka ao e tabekai mai iaontano. E arokai ni kabo ao e manga karuoai ao I nooria n nako iaon ana aoti.”²

Imwiina riki Joseph F. ngke e nooriia, tinana, Mary Fielding, e tabekiarake bwa e na nooria ngke a wene ni mate imwiin tiringakiia n te karabuti i Carthage n Tuun 27, 1844.

Uoua te ririki imwiina, Joseph F., n raonaki ma ana utu ao tinana ae kakaonimaki, Mary Fielding Smith, a kiitana mweengana i Nauvoo ni mwananga nako Nebraska n te USA. E ngae ngke e tuai koro 8 ana ririki, Joseph F. e katokaaki iaon temanna te kao mwaane n te tiim ni mananga mai Montrose, Iowa, nakon te Winta Kuatati ao imwiina nakon te Mwanono n te Salt Lake, ao e nang koro 10 ana ririki ngke e roko ikekei. Au kantaninga bwa ngkami ataeinimwaane ao kairake ni mwaane kam ongora ao kam ata te tibwanga ao te kantaninga are e anganaki Joseph F. man rikirakena.

Bon aua te ririki imwina, n 1852, ngke ai 13, tinana ae tangiraki e motirawa—a tiku imwiina Joseph ma tarina ao mwanena n akea aia karo.³

Joseph F. e weteaki bwa e na beku n te mition n atimwakoron Hawaii n 1854 ngke ai 15 ana ririki. N te mition aei, are e waaki nako e raka iaon teniua te ririki, ai bon tibwa moanakin maiuna ni beku n te Ekaretia.

N okina nako Utah, Joseph F. e mare inanon 1859.⁴ Tabeua te ririki ake imwiina, kainnabana e kaonaki ma mwakuri, tibwangan te utu, ao uoua rakan riki katabeana n te mition. N Turai 1, 1866, ngke ai 27 ana ririki, Joseph F. e bitaki maiuna ngke e katabuaki bwa te Abotoro iroun Beretitenti Brigham Young. N Okitobwa n te ririki are imwiina, e riki ngaia bwa te Kauntira n te Tengaun ma Uoman.⁵ E riki ngaia bwa ana kauntira Brigham Young, John Taylor, Wilford Woodruff, ao Lorenzo Snow imwain ae e bon riki ngaia bwa te Beretitenti inanon 1901.⁶

Joseph F. ma kainnabana Julina a butimwaea aia moan nati Mercy Josephine, nakon aia utu.⁷ Ai bon uoua ma te iterana ana ririki ngke e motirawa. Teutana imwiina, Joseph F. e koreia, “Ai bon teuana te namwakaina imwiin ngkoananoa ngke natiu … ae tangiraki Josephine e mate. O! tera ngke arona I kona ni kamaiua bwa e na rikirake bwa te ataeinnaine. I rang kan nonoria ni katoabong ao I a tiku ni maroa. … Te Atua kabwara buren mamaarau ngkana e kairua ngkai I tangiriia natiu aika a uarereke.”⁸

Inanon maiuna, Beretitenti Smith e a tia ni mate tamana, tinana, tarina ao uoman mwanena, buuna aika uoman, ao natina aika tengaun ma teniman. E a bon taneiai ma te nanokawaki ni buaia naake e tangiriia.

Ngke e mate natina te mwaane Albert Jesse, Joseph F. e koroboki nakon mwanena Martha Ann bwa e a tia ni bubutiia te Uea bwa e na kamaiua natina ao e titiraki, “Bukin tera e riki aio? O. te Atua e aera e riki aio?”⁹

E ngae ngke e tataro n te tai anne, Joseph F. akea te kaeka ae karekea ibukina.¹⁰ E tuanga Martha Ann bwa “karawa [e a tara n ae kaanga ai aron] e aki kona ni karekea te kaeka mairoun te Uea” iaon te mate ao te aonaaba n tamnei. E ngae n anne, ana onimaki n ana berita te Uea ae akea tokina a bon matoatoa man nene.

N ana tai te Uea, raon taian kaeka, karaunano, ao te kamatata iaon te aba n tamnei are e nooria e roko iroun Beretitenti Smith rinanon te mii ni burabeti are e karekea inanon Okitobwa, 1918.

Te ririki anne bon te tai ae e kammaraki ibukina. E tang ibukiia maate n te Kauoua ni Buaka n te Aonaaba are e reitinako n te mwaiti ae riaon 20 te mirion aomata. Ni ikotaaki ma, te buti n aoraki ae te buruu ni kabuta te aonaaba e tiringiia e raka iaon 100 te mirion aomata.

N te ririki anne, Beretitenti Smith a manga mate riki teniman kain ana utu aika a rang kakaawaki. Unimwaane Hyrum Mack Smith n te Kooram n Abotoro n te Tengaun ma Uoman, ana moan nati ao n tibu te mwane, e waekoa ni mate man uruakin ana abentikiti.

Beretitenti Smith e koreia: “I a kabi n taetae—[akea te namakin] n te nanokawaki! … E uruaki nanou; ai akea bonganan maiu! … O! I Tangiria! … I rang tangiria n aki toki. Ao ai aroia naba ni kabane natiu mwaane ao aine, ma bon ngaia au moan nati, te moan n uota te kimwareirei nakoiu ao te kantaninga ae akea tokina, te ara ae karineaki ibuakoia mwaane. … Mai kabin nanou I karabwa te Atua ibukina! Ma … O! I kainnanoia! Ti bane ni kainnanoia! Bon ngaia ae rang kakaawaki n te Ekaretia. … Ao ngkai… O! tera ae Nna karaoia! … O! Te Atua buokai!”¹¹

Te namwakaina ae e na roko, buun natin Beretitenti Smith Alonzo Kesler, e mate n te kabuanibwai.¹² Beretitenti Smith e koreia n ana tienoo, “Aio te kabanea ni kakamaku ao ni kauruaki nano ni kabuanibwai ae kamamate, are a tia n rang n nanokawaki iai au utu ni kabane.”¹³

Itiua te namwakain imwiina, n Tebetembwa 1918, buun natin Smith te aine ao tibu te unaine, Ida Bowman Smith, e mate imwiin bungiakin ana kaniiman n nati, ai tamau Hyrum.¹⁴

N Okitobwa 3, 1918, ngke e tia n rinanon te nanokawaki ae korakora iaoia mirion ake a tia ni mate n te aonaaba rinanon te buaka ao te aoraki naba are a mate iai kain ana utu, Beretitenti Smith e karekea te kaotioti mai karawa ae ataaki bwa “te mii ni burabeti ibukin kabooan maiuia maate.”

E taekinna n te kaotioti imwiin te bong ni kaukuuki n te maungatabu ni kabuta n Okitobwa. Marurungin Beretitenti Smith e a tabe ni kekerikaki, ma e a kakimototoa ana taetae: “N na bon aki, I aki kuba, ni kataia n rinnako ni bwaai aika a mwaiti ake a tiku n au iango n te ingabong aei, ao N na bon aki karimwiia te tai ni karokoa tabeua taai aika a na roko, te Uea e na bon tuangko bwaai, ake a mena n au iango, ao ake I namakinii inanou. I tuai ni maeka ni maroa ni [banen] nimaua namwakaina aika a nako. I a tia n teimatoa n namakina tamnein te tataro, ni bubuti, n te onimaki ao n te nanomatoa, ao I a tia ni karekea au reitaki ma Tamnein te Uea n tainako.”¹⁵

Te kaotioti are e karekea n Okitobwa 3 e anganna te karaunano ao katauraoan kaeka nakon ana titiraki aika a mwaiti. Ngaira naba e kona ni karauaki nanora ao n atai bwaai aika a na riki nakoira n taai aika a na roko ngkana ti mate n te aba n tamnei man kamatebwaian kaotioti ma nanora ae tamaroa ibukin maiuakinan maiura ni katoa bong.

Ibuakon bwaai aika a mwaiti ake e noori Beretitenti Smith bon rokon te Tia Kamaiu imwiin matena iaon te kaibangaki. Man te mii ni burabeti are I nooria ao I taekinna:

“Ma nooria, mai i buakoia ake a raoiroi, e baireia ana taanga ao e rineia taan rongorongo, ni kunikaia n te mwaaka ao te kariaiakaki, ao n anganiia te kariaiakaki bwa a na waaki nako ni uota ootan te euangkerio nakoia ake a mena n te rotongitong, ao nakoia tamneia mwaane; [ao aine];¹⁶ ao aio aron tataekinan te euangkerio nakoia maate. …

“Ao ni kabane tuua ake tabeua n te euangkerio ake a kainnanoia bwa a na ataia bwa aonga ngaia n tau ni motikaki taekaia n ai aroia aomata n rabwataia, ma ni maiu n ai aron te Atua n tamneia,

“Ao ni kabane tuua ake tabeua n te euangkerio ake a kainnanoia bwa a na ataia bwa aonga ngaia n tau ni motikaki taekaia n ai aroia aomata n rabwataia, ma ni maiu n ai aron te Atua n tamneia. …

“Naakai ake e reireiniia te Uea, ao e anganiia te mwaaka bwa a na uti, imwin mangautina mai buakoia maate.

“Naakai ake e reireiniia te Uea, ao e anganiia te mwaaka bwa a na uti, imwin mangautina mai buakoia maate, n rin inanon abanuean Tamana, ike a na baunaki iai ma te aki mamate ao te maiu ae akea tokina,

“Ao a na reitanako aia mwakuri man te tai arei n aron ana berita te Uea, ao n riki bwa taan katoong kakabwaia ni kabane ake a kawakinaki ibukiia ake a tangiria.”¹⁷

Inanon te mii, Beretitenti Smith e noora tamana, Hyrum, ao te Burabeti Iotebwa Timiti. E a tia ni koro 74 te ririki imwiin are e a tia n nooria ngke e uarereke i Nauvoo. Ti kona n ti iangoa te kimwareirei aei n noorakin tamana ao ai tamana aika a tangiraki. E bae n tia ni kaungaaki ao ni karauaki nanona ngke e ataia bwa tamnei ni kabane a kateimatoa aekakin rabwataia ae mamate ao ngkai a ingainga n tataninga te bong are a tuangaki n te berita n te bong ni mangauti. Te kaotioti e kaota ae rang n nano riki ao rababan ana baire Tamara are i Karawa ibukiia Natina ao ana tangira ni kamaiu Kristo ao mwaakan Ana Mwakuri ni Kamaiu ae akea kabotauan mwaakana.¹⁸

Inanon te bong ni kanuring n te ka 100 n ririki, I kaoi ngkami bwa kam na wareware ma te iangoraoi n te kaotioti aei. Ao ngkoe naba, e na kakabwaiai ngkami te Uea ma te ota ae tabwanin riki ao te kakaitau ibukin ana tangira te Atua ao Ana baire ni kamaiu ao ni kakukurei Ibukiia natina.

I kakoaua bwa te mii ni burabeti are e karekea Beretitenti Joseph F. Smith e bon koaua. I kakoaua bwa aomata nako a kona ni warekia ao n ataia bwa e bon koaua. Naake aki karekea te atatai aei n te maiu aei a na kona n atai koaua ngkana ni kabane a roko n te aba n tamnei. Ikekei, ni kabane a na tangira neboan te Atua ao te Uea Iesu Kristo ibukin te baire ni kamaiu ae korakora ao te kakabwaia n te berita are te mangauti ngkai rabwata ao tamnei a na manga katiteuanaaki n aki manga maenako.¹⁹

Ai kukureira ngai n ataia bwa e mena ia raou ae Barbara ao tina manga bon kaitiboaki, ma ara utu, n akea tokina. E na kateimatoaira ana rau te Uea ngkai ao n aki toki bon au tataro ae nanorinano n Aran Iesu Kristo, amen.

Bwaai aika a na taraaki

1. Reirei ao Berita aika a Tabu 138:6, 11.

2. Joseph F. Smith, in Preston Nibley, The Presidents of the Church 1959), 228.

3. Taraa Joseph Fielding Smith, Life of Joseph F. Smith1938), 13.

4. E mare ma Levira Clark n 1859, Julina Lambson n 1866, Sarah Richards n 1868, Edna Lambson in 1871, Alice Kimball in 1883, ao Mary Schwartz in 1884.

5. Joseph F. Smith e weteaki bwa temanna riki te kauntira n te Moan Beretitentii (Brigham Young, Heber C. Kimball, ao Daniel H. Wells). E beku naba bwa te kauoman ni kauntira n te Moan Beretitentii ibukiia teniman Beretitenti n te Ekaretia, n ikotaki ma Beretitenti John Taylor, Wilford Woodruff, ao Lorenzo Snow.

6. Joseph F. Smith e beku bwa te kauntira n te Moan Beretitentii n ana tai n tararua Brigham Young ngke e riki ngaia bwa te kauoman ni kauntira n te Moan Beretitenti n ana tai ni Beretitenti John Taylor, Wilford Woodruff, ao Lorenzo Snow. Bon ngaia te moan Beretitenti n tia ni beku n te Moan Beretitentii imwain ae e weteaki bwa te Beretitenti.

7. Mercy Josephine, Joseph F. ana moan nati Iotebwa F., e bungiaki n Aokati 14 1867, ao e mate n Tuun 6, 1870.

8. Joseph F. Smith, journal, July 7, 1870, Te Tabo n Tangoboki n Rongorongon te Ekaretia, Ana Ekaretia Iesu Kristo ibukiia aika Itiaki ni Boong aika Kaitira, Salt Lake City, Utah.

9. Joseph F. Smith to Martha Ann Smith Harris, Aug. 26, 1883, Church History Library; taraa Richard Neitzel Holzapfel ao David M. Whitchurch, My Dear Sister: The Letters between Joseph F. Smith and His Sister Martha Ann (2018), 290–91.

10. Ni katoto aika a bati, te Uea e kaira Joseph F. Smith inanon maiuna ao n ana mwakuri bwa te Abotoro ao te Beretitenti n te Ekaretia rinanon mii, kaotioti, ao mii ni burabeti. N tabetai bwaintangira aika a kakaawaki mairoun te Uea a kawakinaki n ana tieno, kannuring, ao rekooti aika a bwainaki n te Ekaretia.

11. Joseph F. Smith, journal, Jan. 23, 1918, Church History Library; spelling and capitalization modernized; taraa Joseph Fielding Smith, Life of Joseph F. Smith, 473–74.

12. Taraa “A. [P.] Kesler Is Killed in Fall from a Building,” Ogden Standard, Beberuare 5, 1918, 5.

13. Joseph F. Smith, journal, Feb. 4, 1918, Church History Library.

14. “Ida Bowman Smith,” Salt Lake Herald-Republican, Sept. 26, 1918, 4.

15. Joseph F. Smith, in Conference Report, Oct. 1918, 2.

16. Noora te boki n “Tinara ae mimitong Ewa” ao “natina aine aika a mwaiti aika a kakaonimaki ake … a tia n taromauria te Atua ae koaua ao e maiu” (Reirei ao Berita aika Tabu 138:39).

17. Reirei ao Berita aika Tabu 138:30, 33–34, 50–52.

18. Taekan te moan mii are e kaoti n Nobembwa 30, 1918, edition of the Deseret News, 11 te bong imwiin maten Beretitenti Smith, n Nobembwa 19. E boretiaki n Ritembwa Improvement Era ao inanon Tianuare 1919 editions of the Relief Society Magazine, the Utah Genealogical and Historical Magazine, the Young Women’s Journal, ao te Millennial Star

19. E ngae ngke natin te kakaitara a na mangauti, a kona n aki anga te tangira ao te nebonebo nakon Tamara are i Karawa ao Iesu Kristo n aroia naake a karekea mimitongin te abanuea. Taraa Aramwa 11:41; Reirei ao Berita aika Tabu 88:32–35.