Aia Mwakuri Aine n Ikotakiia Iteraera
I karababa te bubuti ni burabeti nakoimi, aine n te Ekaretia, ni kanakoraoa kanoan taai aika a na roko n ibuobuoki n ikotakiia Iteraera ake uamaenako.
E kakukurei rokou irarikimi, mwaneu aika kam tangiraki. Tao n te taneiai ae nako kam bae n iangoia bwa aekakira au namakin ibukimi ma rianakon ami konabwai mai ieta are kam bwaintangiraaki iai.
N te bong teuana inanon taetaeu nakoia kaain te taromauri i Amerika Maiaki, I rangin kukurei ibukin atuun au marooro, ao n te tai ae rangin kakawaki, I taku, “N aron te tina ae tengaun natina, I kona n tuangi ngkami anne …” Ao ngkanne I a katoka au marooro.
I aki ataia ae I taekina te taeka ae te tina. Au tia raitaeka, e taku n ana iango bwa e bure ae I taekinna, e bita te taeka ae te tina nakon te karo, ngaia a aikoa ataia kaain te taromauri ae I kananonaai ae kanga ngai te tina. Ma e ongo kainnabau ae Wendy, ao e kukurei n au kairua ae akea kantaningakina.
N te tai anne, ni kakantaningaakin nanou ae korakora ni karaoa te bitaki n te aonaaba—n aron ae tii te tina ae e karaoia—I kabwarabwaraa ma nanou ae kakatonga. N au tai ni maiu, ngkana I titirakinaki bukin tera ngkai I rineia bwa N na riki bwa te taokita, au kaeka n taainako bon ti te arona: “Ibukina bwa I aki kona n rineia ae N na riki bwa te tina.”
Taiaoka ataia bwa n te tai are I kamanena te taeka ae te tina, I aki tii taetae ibukiia aine ake a tia ni kariki ke n tabekiia ataei n natiniia n te maiu aei. I taetae ibukiia ni kabane naati aine ake a ikawai irouia ara Karo ake i Karawa. Aine n tatabemaniia bon te tina ae tamaroa ibukin rikina mai karawa ae akea tokina.
Ngaia n te tairiki aei, n aron te karo ae tengaun natina—ruaman natina aine ao temanna natina te mwaane—ao n aron ae te Beretitenti n te Ekaretia, I tataro bwa kam na namakinna bwa korakorara au namakin ibukimi—antai ngkami ao te tamaroa are kam karaoia. Akea temanna ae e kona ni karaoa are e kona te aine ae raoiroi ni karaoia. Akea temanna ae e kona ni katootonga ana anainano te tina.
Mwaane a kona ni uota ana tangira te Tama are i Karawa ao te Tia Kamaiu nakoia tabeman. Ma iai irouia aine te bwaintituaraoi ae e rangin kakawaki—te bwaintangira mai karawa. Iai ami konabwai n namakina kainnanon temanna—ao nningai ae a kainnanoia iai. Kam kona ni buoka, karaua nanon, n reireina, ao ni kakorakora temanna n tai are e rangin kainnanoa iai buokana teuanne ke neienne.
Aine a noori bwaai aika a kaokoro nakoia mwaane, ao o, ti kainnanoa ami nonoori! Rikimi e na kairi ami iango n iangoia moa tabeman, n iangoa bwa te mwakuri are e karaoaki iai mwiina iaoia tabeman.
Tinara ae mimitong ae Nei Ewa—ma ana atatai ae moan te kakawaki ibukin ana babaire Tamara are i Karawa—are e waakina te bwai ae ti nanonna ae ‘‘te Bwaka.” Ana rinerine ae wanawana ao n ninikoria ao ana iango ni boutoka Atam a kawaaka ana babaire ni kakukurei te Atua. A kangaraoa rokora ikai iaon te aba ngaira n tatabemaniira, ni karekei rabwatara, ao ni kakoaua bwa ti rineia bwa ti na tei ibukin Iesu Kristo ngkai, n aron are ti karaoia n te maiu are imwaain aei.
Mwaaneu aika kam tangiraki, iai bwaintituaraoi n tamnei iroumi ao nanomi ae koaua ni karaoan bwaai. N te tairiki aei I kaumaki ngkami, ma au kantaninga ma nanou ni kabane, n tataro n atai ami bwaintituaraoi n te tamnei—ni karikirakei, ni kamanenai, ao ni karababai, n riaon are kam kona ni karekea. Kam na bita te aonaaba ngkai kam karaoia.
N aroia aine, kam kaungai nanoia tabeman ao ni katea te kainibaire n ami katooto ae e tau. N na angani ngkami tabeua rongorongo iaon uoua oin ara katanoata ake a karaoaki n ara kabanea ni maungatabu. Ngkami, mwaaneu, kam kakawaki ibukin baikanne.
Te moan, te mwakuri n ibuobuoki. Te kabanea ni kakawaki ni kainibaire ibukin te mwakuri n ibuobuoki bon ara Tia Kamaiu, Iesu Kristo. N ae ataaki, bon aine, ao boni ngaiia n taainako, a kaan ma te kainibaire anne nakoia mwaane. Ngkana kam ibuobuoki ma te koaua, kam ira ami namakin ni kan buoka temanna riki ae e namakina ana tangira te Tia Kamaiu. Oin te namakin n te mwakuri n ibuobuoki e anaaki irouia aine aika a raoiroi. I ataia aine aika a tataro ni katoa bong, “Antai ae Ko na anganai bwa N na buokia n te bong aei?”
Imwaain te katanoata n Eberi 2018 ibukin te kawai ae rietaata man tabu n tabeakinaia tabeman, aia mwakuri tabeman mwaane bwa a na kanikinaea ae tabeia n te reirei n te mweenga n te namwakaina e a “tia ao ni manga karaoa are imwina.
Ma ngkana kam namakinna bwa e kainnanoa buokana te aine are kam kawaria. kam waekoa ni kaeka ao ngkanne ni kabanea te namwakaina. N aron anne, bwa man aron am reirei ni kakawari e na karikirakea nanora ni kan ibuobuoki.
Te kauoua, n te kabanea ni maungatabu n ae nako, ti a manga moan baronga te kooram n te Nakoanibonga ae te Merekitereka. Ngkana ti tataroakinna bwa e na kanga arora ni buokiia mwaane n te Ekaretia e na kakorakora riki katabeakiia, ti karaurau raoi n iangoa ana katooto te Bootaki n Aine.
N te Bootaki n Aine, aine n rooro aika a kakaokoro ao te tai ni maiu a uaia ni bootaki. Ni katoa waakin te maiu iai kaangaanga inanona, ao ma, kam mena ikanne, ni katoa Tabati, ni kaai ni bootaki, n rikirake ao ni kaai n reirei taekan te euangkerio, ao a karaoa te bitaki ni koaua inanon te aonaaba.
Ngkai, n iriira ami katooto, kaain te Nakoanibonga ae te Merekitereka ngaiia unimwaanen te kooram. Mwaane aikai a karinanaki n aia ririki man 18 nakon 98 (ke iaona riki) ma te katitabooaki ni kaokoron te nakoanibonga ao taneiai akea a karaoaki n te Ekaretia. Taari aikai a kona ngkai ni kakorakora te reitaki n itaritari, ni kaai n reirei, ao ni kakabwaiaiia tabeman n ae e korakora riki.
N Tuun ae nako, Ngai ma Titita Nelson ti taetae nakoia kairake n te Ekaretia. Ti kaoiia bwa a na kaaina ana taanga ni buaka te Uea ibukiia kairake n ikotakiia Iteraera n iteran te roki aika uoua. Te mwakuri aei n ikotakiia kairake bon te kakaewenako ae e korakora, te waaki ae e korakora, ao te mwakuri ae e korakora iaon te aba n te bong aei!
Bon te mwakuri ae e rangin kainnanoia aine, ibukina bwa aine a kanakoraoa kanoan taai aika a na roko. Ngaia n te tairiki aei I karababa te bubuti ni burabeti nakoimi, aine n te Ekaretia, bwa kam na kanakoraoa kanoan taai aika a na roko n ibuobuoki n ikotakiia Iteraera ake uamaenako.
N aanga ra ae ko kona ni moanna mai iai?
I anga aua taian kakao:
Te moan, I kaoi ngkami bwa kam na ira te 10 ni bong n aki mamatam n aki wareki taian rongorongo ke n taabo ake a kanakoaki iai are e na kabuakakai ma ni kabarekai ami iango. Tataro bwa kam na ataia bwa tera taian kairoro ake kam na kanakoi n tain aki mamatam. Mwin te aki mamatam ae 10 bongina ko na kubanako iai. Tera ae ko nooria imwin ae ko na aki manga kabanea am tai iaon warekan ao katokaan taian rongorongo n ana nonoori te aonaaba are e a tia ni kaikoaka tamneim? Iai te bitaki n te tabo are ko mena iai ngkai ni kabanea am tai ma korakoram iai? A tia ni bitaki baike ko moanibwai—e ngae ngke tii teutana? I kaumaki ngkami bwa kam na kakoroa nanon te namakin ane e kaoti.
Te kauoua, I kaoi ngkami bwa kam na wareka ana Boki Moomon imarenan ae ngkai ao n tokin te ririki. Ngkana e taraa n angabuaka ma ake kam kataia ni karaoi inanon maiumi, ngkana kam butimwaea te kakao aei ma nanomi ni koaua, e na buoki ngkami te Uea ni kakaea angami bwa e aonga n reke. Ao, ngkai kam kamatebwai ma te nano n tataro, I berita bwa e na kaukaki karawa ibukimi. E na kakabwaiai ngkami te Uea ma rikiraken ana kairi te Tamnei ao te kaotioiti.
Ngkai kam wareware, I kan kaungai ngkami bwa kam na kanikinaei taian kibu are a taekina ke a kaineti nakon te Tia Kamaiu. Ngkanne, kakarabakaukina taekan Kristo ma nanom ni koaua, kimwareirei iroun Kristo, ao tataekina Kristo ma ami utu ao raoraomi.1 Ngkami ma ngaiia a na kaniiaki riki nakon te Tia Kamaiu rinanon te waaki aei. Ao taian bitaki, ma taian kakai naba, a nang moanna n riki.
N te ingabong aei e karaoaki te katanoata ni kaeti ma kaetieti aika boou iaon te Tabati ao ae aanaki iaan te mweenga, te karikiram ae e boutokaki n Ekaretia. Ngkami, mwaaneu aika a tangiraki, ngkami kakoroan nanon te waaki ae boou aei, te konabwai n anga reirei ibukin te euangkerio. Taiaoka reireiniia te koraki ake ko tangiriia ake ko reiakin man booki aika tabu. Reireiniia bwa a na kanga n rairaki nakon te Tia Kamaiu ibukin Ana kamaiu ao mwaakana ni kaitiaki ngkana a kairua. Ao reireiniia bwa ana kanga ni kamanena mwaakan Ana nakoanibonga ni katoa bong inanon maiuia.
Te kateniua, katea te banna n nanakon te tembora ni katoa tai. Aei e na kainnanoa riki ami anganano inanon maiumi. Ngkana e kamwaitaki te nanako n te tembora e na kona te Uea n reireini ngkami ni kamanena mwaakana are kam bwaintangiraaki iai inanon Ana tembora. Ibukiia te koraki ake a aki maeka irarikin te tembora, I kaoi ngkami bwa kam na kamatebwai ma te nano n tataro ibukin taian tembora inanon booki aika tabu ao n aia taeka burabeti aika a maiu. Ukeuke bwa kam na atatai riki, n oota riki, ni kakorakora riki ami namakin ibukin te tembora nakon are kam karekea mai imwaina.
N ara bootaki n taromauri ibukiia kairake ni kabuta te aonaaba n Tuun ae nako, I taetae iaon te ataeinimwaane are e bitaki maiuna ngke ana karo a bita ana tareboon ae e intanete nakon ae bon tii te tareboon ni kangai. Tinan te ataeinimwaane aei bon te aine ae e ninikoria ao n onimaki. E noora natina te mwaane ae e tionako man ana rinerine are e na kona n totokoa iai nakona ni mitinare. E uoti ana bubuti nakon te tembora ni kan ataia bwa e na kanga n buokaki raoi natina. Ngkanne e kamwakura te namakin are e kaoti.
E taku: “I namakina te Tamnei bwa e kairai bwa N na tuoa ana tareboon natiu n tai aika a onoti ao ni bwaai aika a onoti. I aki ataia bwa N na kanga ni borauakin taian tareboon ake a intanete,ma e kairai te Tamnei rinanon nako bwaai ni kareke rongorongo ae I tuai man kamanena! I ataia bwa te Tamnei e buokiia kaaro ake a ukoukora te kairiiri ni kawakiniia natiia. [N te moantai] e un irou natiu te mwaane. … Ma tii inanon tenibong te bong, ao e karabwaai! E kona n namakina te kaokoro.”
Katein ao anuan natina te mwaane a bitaki n ae kamiimi. E a ibuobuoki riki n te mweenga, e a momoangare riki, ao n roroko riki n te taromauri. E tangiria ni kan beku n te tabo ni bwabetito ao ni katauraoi imwain ana mition.
Au kaaua ni kakao, ibukimi ngkami ake kam a ikawai, bwa kam na mwakuri n te Bootaki n Aine. I kaumaki gkami bwa kam na kamatebwaia ana botoniango te Bootaki n Aine ae ngkai. E kaunganano. E na kairi ngkami ni karikirakea oin ami kantaninga ibukim maiumi. I butingkami naba bwa kam na kakukurei ngkami n taian koaua n ana katanoata te Bootaki n Aine are e boreetiaki 20 te ririki n nako.2 Katotoon te banna ni kabwarabwara aei e tine iaon te oo n aia aobiti te Moan Beretitentii. I kukurei ni katoa te tai are I wareware iai. E kabwarabwara bwa antai ngkami ao kam na riki n aekakira n te tai ae e eti ngkai kam karaoi tabemi ni buoka n ikota Iteraera ae uamaenako.
Mwaaneu aika a tangiraki, ti kainnanoi ngkami! Ti “kainnanoa korakorami, rairakimi, kabaeakimi, ami konabwai ni kairiiri, wanawanami, ao bwanaami,3 Ti aki kona n ikota Iteraera ngkana akea ngkami.
I tangiri ngkami ao I karabwai ngkami ao ngkai kakabwaiai ngkami ma ami konabwai ni mwanuokina te aonaaba ngkai kam ibuobuoki n te mwakuri ae rangin kakawaki man kawaekoaaki. Ni kabane ao ti kona ni karaoi bwaai ake e kainnanoira te Tama are i Karawa bwa ti na karaoi ni katauraoa te aonaaba ibukin Kauaokin Natina.
Iesu bon te Kristo. Aio Ana Ekaretia. I a taekin aikai n aran Iesu Kristo, amen.