Ko Kani Kamaiuaki?
Ibukina bwa iai ana Mwakuri ni Kamaiu Iesu Kristo, ngkana ti rineia bwa ti na rairi nanora ao n anga nanora ae bwanin nakon te Tia Kamaiu, E na kamaiura n te aro n tamnei.
Ngke e a tia ni beku bwa te mitinare inanon tabeua te namwakaina, ara bina ni mwaane ao toana a karaoa aia kamatebwai ngke natira e namakina te maraki n atu ae aki rang korakora. E namakina te angi buaka; n te moan tai e aki kona ni kamwainga angana are te angamaing, imwina e butae newena. Iteran ubuna are te maing e a moanna n tinebu. E kaangaanga taetaena. E ataia bwa iai te kangaanga. Ma e aki ataia bwa iaon kawaina ngkai n reke irouna te boo ae korakora nakon teniua mwakoron kaburorona. E a moanna n raraoma ngke e a boo are iterana. Bwa tawera te ibuobuoki nakon are e rotaki n te boo iai mwina ae korakora nakon maanin karekean te marurung nakoia. Toana are e kakaonimaki e kabaitia ni kakaea te ibuobuoki. Imwin tarebonian 911, e anganna te kakabwaia. Bon te kakai, raroan te amburanti bon ti nimaua te miniti.
Imwin are e kawaekoaki ni karinaki n te onaoraki natira, naake a mwakuri n te onaoraki a kamatebwaia te bwai are riki ao e reke aia reke bwa ana anga te bwainnaoraki nakon natira are e na kona ni katoka korakoran te boo teutana imwin teutana.1 Ma, ngkana arona bwa tiaki aorakina te boo n te tai anne, te bwainnaoraki arei e na iai mwina ae rang korakora, n aron waanakon te raraa inanon te kaburoro. Natira E na karaoa te rinerine. E rineia bwa e na bwainnaoraki. E ngae ngke te marurung raoi e kainnanoi taian korokoro riki ao namwakaina aika a mwaiti, n tokin te tai e oki natira ma ni kabwanina ana mition imwin marurungina man korakoran te boo.
Tamara are i Karawa e korakora ao e atai bwaai nako. E atai ara kaangaanga n te rabwata. E atai marakira n te rabwata ake a reke man te aoraki, te kaangaanga, te kairikaaki, ke te bungiaki ni bwaibwainnanti. E atai ara kaangaanga n ara namakin ake a irekereke ma te maaku, te akea n rao, te nanokawaki, ke te aoraki n te iango. E kinaia aomata nako ake a maraki man te aki motiraoi ke ake a tia ni karaoaki mwakuri buaka nakoia. E atai mamaarara ao kabwakara ao kariri ake iai ara kaangaanga iai.
N te maiu aei ti kataaki bwa e na nooraki ngkana ti na bon rinea te tamaroa iaon te buakaka. Ibukia naake a kawakin Ana tua nako, a na maeka ma Ngaia “n te aro ni kukurei ae aki totoki.”2 Ni buokira n ara kekeiaki n riki n ai Arona, Tamara are i Karawa e anga ni kabane te mwaaka ma te ataibwai nakon Natina, Iesu Kristo. Akea te aoraki ni kaineti ma te rabwata, te namakin ke te tamnei ae e aki kona ni kamaiua Kristo.3
N ana mwakuri te Tia Kamaiu n te aonaaba, koroboki aika tabu a mwanewei kakai aika mwaiti are Iesu Kristo e kabongana Mwaakana mai ieta ni kamaiuia naake a maraki n te aro n rabwata.
Ana Euangkerio Ioane e taekina rongorongon temanna te mwaane ae iai mamaarana ni korakorana inanon 38 te ririki.
“Ngke e noria Iesu bwa e wene, ao ngke E ataia bwa e a mwatare ana bong, E taku nakoina, Ko Kani Kamaiuaki?”
E kaeka te aoraki man taku bwa akea raona are e na buokia n te tai are e nang kainnanoa iai te ibuobuoki.
“E taku Iesu nakoina, teirake, tabeka kiem, ao nakonako.
“Ao ngkai naba ao e kamaiuaki, ao e tabeka kiena, ao n nakonako.”4
Taiaoka tarai baika uoua aika kaokoro mwiia n aron maanin te mwaane aei ni wene n aoraki n akea ae buokia inanon —38 te ririki—ao tawen te kamaiuaki ngke e roko te Tia Kamaiu. Te kamaiuaki bon “ngkekei naba.”
N te katoto riki teuana, te aine are aorakina te nrara inanon 12 te ririki, are “e kabanea [are] ana bwai n anga nakoia taokita, … e roko i akuna, ao e taua buruburun ninirana; ao ngkekei naba aorakina are te nrara e [toki]. …
“Ao E taku Iesu, E bon ringai temanna: ba I ataai ba e otinako te mwaaka mairou.
“Ao te aine, ngke e noria ba e aki raba, ao e roko n ruru, ao e … tuangnga i mataia aomata ni kabaneia bukin ringana … ao tataweni maiuna.”5
Rinanon Ana mwakuri, e reirei Kristo bwa iai Mwaakana iaon te rabwata. Tiaki kona ni bita te tai are e na kamaiuaki iai aorakin rabwatara n ana kamaiu Kristo. E roko te Kamaiuaki ni kainet ma Nanona ao wanawanana. Inanon koroboki aika tabu, tabeman aomata a aoraki inanon irabwai te ririki, tabeman, ni kabane bongin maiuia i aonteaba. Aoraki n te maiu aei e kona ni katamaroaira man karikirakea riki ara onimaki iroun te Atua. Ma n te tai are ti kariaia Kristo bwa e na buokira, E na kakorakoraira n te aro n tamnei n taainako n te aro are ti karekea te kona ae raka riki ni kaitarai rawawatara.
Ae kakaawaki bwa, ti ataia bwa aorakin te rabwata nako, mamaara, ke kabwaka a na kamaiuaki n tain te Maungauti. Anne bon te bwaintangira nakoia aomata nako ae reke man ana Mwakuri ni Kamaiu Iesu Kristo.6
Iesu Kristo e kona ni kamaiua ae e raka riki nakon ae ti rabwatara. E kona naba ni kamaiua tamneira. Inanon koroboki aika tabu ti reiakina aron Kristo ni buokia naake a mamaara tamneia ao arona ni kamaiuia.7 N ara ta ni iangoi baikai, e rikirake ara kantaninga ao ara onimaki ni mwaakan te Tia Kamaiu bwa e na kakabwaiai maiura. E kona ni biti nanora Iesu Kristo, mani kamaiura man korakoran te aki motiraoi ke te bwainikirinaki are tao ti rinanona, ao ni kakorakoraira n te tai n nanokawaki ao ni korakai n te iango, ni karekea te rau are e na buokira ni kaitarai kataakira ni maiura, ni karaui ara iango.
Kristo e kona ni kamaiura ngkana ti bure. Ti bure ngkana ti urua teuana ana tua te Atua ma nanora.8 N te tai are ti bure, a bareka tamneira. Bon akea te bwai ae bareka ae kona ni maeka ma te Atua.9 Karekean te itiaki man te bure [bon te] kamaiuaki n te aro n tamnei.10
Te Atua te Tama e ataia bwa ti na bure, ngaia are E katauraoa te kawai ibukira bwa ti na kamaiuaki. E reirei Unimwaane Lynn G.Robbins: “Te rairannano tiaki Ana babaire n tania te [Atua] n te tai are ti kabwaka iai. Te rairannano bon Ana babaire, n ataakina bwa ti na bon bure.”11 N te tai are ti bure, iai ara tai bwa ti na rinea ae tamaroa man te buakaka. Ti rinea te tamaroa n te tai are ti raira nanora imwin are ti karaoa ae bure. Rinanon Iesu Kristo ao Ana mwakuri ni kamaiu, ti kona ni kamaiuaki man ara bure ao n oki rikaaki ni maeka ma te Atua te Tama ngkana ti raira nanora. Te kamaiuaki n te aro n tamnei e aki reke ngkana akea te bwai ae ti karaoia—e kainnanoa mwaakan te Tia Kamaiu ni kamaiu ao te raira nano raoi mairoun are e karaoa te kairua. Naake a rineia bwa a na aki rairi nanoia, a totokoa te kamaiu are e anga Kristo. Ibukiia, kanga akea te kamaiu ae e a tia ni karaoaki.12
N te tai are I maroro iai ma aomata ake a ukora te rairannano, I mimi n nooria bwa aomata ake a maiu inanon te bure iai aia kaangaanga ni karaoan rinerine aika eti. E na kitania te Tamnei ae Raoiroi, ao n angin te tai e kaangaanga irouia rinean rinerine aika a kania riki iai te Atua. E na iai aia kaangaanga inanon namwakaina ao ririki aika mwaiti, ni maama ke ni maaku ni baika a na riki man aia kairua. N angin te tai a namakinna bwa a aikoa kona ni bitaki ke ni kabwaraki aia bure. I ongo irouia n angin te tai n tibwauai maakuia bwa gkana arona bwa naake a tangiriia a atai baike a tia ni karaoi, a nang aikoa tangiriia ke a nang kitania. N te tai are iai irouia aekan iango aikai, a motikia bwa a na tiku n aroia anne ao n taona tain aia rairannano. E kairua ae a namakinna are e raoiroi riki te aki rairannano ngkai bwa a aonga n aki kammarakia naake a tangiriia. N aia iango e raoiroi riki ae a na maraki imwin te maiu aei nakon are a na rinanon te rairannano ngkai. Tariu ao mwaaneu, bon tiaki te iango ae tamaroa taotaonan am rairannano. Teuare e buakaka n angiin te tai e kabongana te maaku n totokoira mani kamwakuran ara onimaki iroun Iesu Kristo.
N te tai are naake ti tangiriia a atai kairua ake a karaoaki, e ngae ngke a na namakina te maraki ae korakora, ma n angiin te tai a tangiria ni buoka te tia bure ni bitaki ao n raoiakinaki nakon te Atua. Eang, te kamaiuaki n te aro n tamnei e rikirake birimwakana n te tai are e kaota ana bure ao e mena ibuakoia aomata aika tangiriia ao ni buokia bwa a na kiitan aia bure. Taiaoka uringnga bwa e korakora Iesu Kristo ibukina bwa E kamaiuia naba naake a rotaki n te bure ake a Nakoina.13
Unimwaane Boyd K. Packer e taekinna: “A ikoaki tamneira n te tai are ti karaoa te kairua ao ni karaoa te bure. Ao e kaokoro ma rabwatara n aomata bwa, ngkana e tabwanin te waaki n rairannano, akea te mwaaka ae e tiku ibukin ana Mwakuri ni Kamaiu Iesu Kristo. Te berita bon: ‘Nooria, ane e tia n raira nanona man ana bure, e na bon kabwaraaki ana bure, ao Ngai, te Uea, N na aki manga uring ana bure’ [Reirei ao Berita aika Tabu 58:42].”14
N te tai are ti raira nanora “ma nanom ni kabane,”15 “ngkai naba ao e na uotaki te babaire ni kabomwi are e kakannato” nakon maiura.16 E na kamaiura te Tia Kamaiu.
Te mitinare are toan natiu ao taan mwakuri n te onaoraki ake a buoka natira are e boo n te mition a karaoa te mwakuri ngkekei naba. E rineia Natira bwa e na anganaki te bwainnaoraki ibukin te boo. Korakoran te boo are a na kamwauka temanna are a kona n rootia n nikiran maiuna a bitaki. N ai aron aei, baitira n raira nanora ao ni uota ana Mwakuri ni Kamaiu Iesu Kristo nakon maiura, bon baitin naba te kamaiuaki man korakoran te bure.
Beretitenti Russell M. Nelson e anga te kakao aei: “Ngkana ko a tia ni bwaka man maiuakinan te euangkerio , … I kaoko … bwa ko na oki. Tera nako am tabeaianga, tera nako am kaangaanga, iai nnem, n ana Ekaretia te Uea. Ngkoe ao te roro aika a tuai bungiaki a na kakabwaiaaki n am mwakuri ngkai n oki nakon te kawai ae e a tia ni beritanaki.”17
Kamaiuara n te aro n tamnei e kainnanoa are ti na karaoi baike a riai karaoaia ake a kabwarabwaraki iroun ara Tia Kamaiu. Ti riai n aki kawaeremwea! Ti riai ni karaoia n te bong aei! Karaoia ngkai bwa e aonga n aki tutukiko te mwauku n te aro n tamnei man rikiraken tamneira. N au tai n anga au maroro, ngkana ko namakinna bwa ko riai ni bubuti te kabwarabure mairoun temanna ae ko kairua nakoina, I kaoko bwa ko na karaoia. Tuangia bwa tera are ko a tia ni karaoia. Bubuti kabwaraan am bure. Ngkana ko a tia ni karaoa te bure ae kakaiaki are e roota taum n rin n te tembora, I kaoko bwa ko na maroro ma am bitiobi—n are ko kona iai. Tai kawaeremwea.
Tariu ao mwaaneu, Te Atua bon Tamara are i Karawa ae e tangirira. E a tia n anga ni kabane te mwaaka ma te ataibwai nakon Natina ae tangiraki, Iesu Kristo. Mairouna ae, ni kabane aomata a na kamaiuaki n teuana te bong man aorakin te rabwata nako n te maan ae akea tokina. Ibukina bwa iai ana Mwakuri ni Kamaiu Iesu Kristo, ngkana ti rineia bwa ti na rairi nanora ao n anga nanora ae bwanin nakon te Tia Kamaiu, E na kamaiura n te aro n tamnei. Te kamaiuaki anne e kona ni waaki ngkai naba. E a nakoira te rinerine. Ti kan kamaiuaki?
I Kakoaua bwa Iesu Kristo e kabooi ara bure bwa ti aonga ni kamaiuaki. Ma ti riai n rineia n anaa te bwainnaoraki ni kamaiu are E anga. Anaia ngkai naba. Tai kawaeremwea. N aran Iesu Kristo, amen.