Ibukina
Ataakina bwa antai ao bukin tera buokaia tabeman e buokiira n ataia bwa kaotakin te tangira ae rietata ao nanora ae babane nakon te Atua.
N te tairiki ae kakaawaki aei, I kaota au tangira ao au kakaitau nakoimi n tatabemani ngkami, tariu aika a tangiraki. E aki kauaroro, taabo ake ti mena iai, ke tera arora, ti bane ni katiteuanaaki n te tairiki aei, ni korakorara, n te kantaninga, ao n te koaua bwa ti tangiraki ao ni kairaki iroun Tamara arei Karawa; ara Tia Kamaiu Iesu Kristo, ao ara burabeti ae maiu, Beretitenti Russell M. Nelson.
Ngke ti moan tekateka, Ngai ma kainnabau ti weteaki iroun ara bitiobi bwa ti na kawara ao ni buoka te utu ae tuai man tataromauri inanon ririki aika a bati. Ti butimwaea te tibwanga ma nanora ao ti nakon aia auti tabeua te bong imwiina. E waekoa ni mataata iroura bwa a aki tangiriia kain te Ekaretia bwa a na kawariia.
Ngaia are rokora are imwiina, ti kawariia ma te raurau ni kuuki, ma te kantaninga are a aonga ni kukurei ni butimwaira. A bon aki. Te taanga aei a taetae nakoira man aia mataroa ae warawara n te tikuriin, are nanona bwa ti aki butimwaeaki. Ma ngke ti a buti n okira mweengara, ti kakoaua bwa n te taina ao ti na kona n tokaninkai ngaia are ti bon ti anganiia aia bwai ni matamtam ae te Rice Krispies.
Kabwakara n nonoori n te itera n tamnei e karekea rotakira ae ti na un iai. Te aki butimwaeaki e karekea te aki mweengaraoi. N te tai ae maan ti a moanna n titirakiniira, “Bukin tera ti karaoa aei? Tera raoi ara kantaninga?”
Unimwaane Carl B. Cook e taekina aei: “Te beku n te Ekaretia … e kona ni kangaanga ngkana ti tuangaki bwa ti na karaoa te bwai teuana ae ti makua, ngkana ti a kua n ibuobuoki, ke ngkana ti weteaki bwa ti na karaoa te bwai ae ti aki nano iai.”1 Ti ataa koauan ana taeka Uninmwaane Cook ngke ti baireia bwa ti na ukora te kairi mai iroun Tamara are i Karawa ae korakora riki ana taratara nakoira.
Ai ngaia are, imwiin te tataro mwaaka ao te kamatebwai, ti a karekea te kaeka nakon ae tera bukin ara mwakuri n ibuobuoki. Iai te bitaki n otara, te bitaki n nano, riki te bwai ae ti taneiai n rinanona man te kaotioti.2 Ngkai ti ukoukora te kairi man koroboki aika tabu, te Uea e reireiniira bwa ti na kanga ni kabebetea te waaki ni buokakiia tabeman ao ni uaana riki. Aio te kibu are ti warekia are e bitii nanora ni kauoman n aron are e tetere: “Ko na tangira te Uea ae Atuam ma nanom ni kabanea, ma marurungim, am iango, ao korakoram ni kabane; n aran Iesu Kristo ko na beku ibukina.”3 E ngae ngke koa rang n taneiai n te kibu aei, e taraa n taetae nakoira n te kawai ae boou man kakaawaki.
Ti a ataia bwa ti kabanei nanora ni kataia ni buokiia te utu aei ao ni buoka ara bitiobi, ma ti riai n titirakiniira ngkana ti bon buokiia man ara tangira ibukin te Uea. Te Uea Beniamina e kamataata riki aei ngke e taekinna, “Taraia, bwa ngkai I taekinna nakoimi ae I a tia ni kabanea au bong ni maiu ni beku ibukimi, ao I aki kamoamoa ngkai I taekinna, bwa I a tia ni beku ibukin te Atua.”4
Ngaia are antai ae e buokiia te Uea Beniamina? Tamara are i Karawa ao te Tia Kamaiu. Ataakina bwa antai ao bukin tera buokaia tabeman e buokiira n ataia bwa kaotakin te tangira ae rietaata ao nanora ae babane nakon te Atua.
Ngkai e tabe ni bitaki ara taratara, ai aron naba ara tataro. Ti moanna n ingainga nakon rokora are imwiina ni kawara te utu aei ibukin ara tangira ibukin te Uea.5 Ti bon karaoia Ibukina. E karaoa te ikakorakora bwa e na beebete. Imwiin namwakaina aika bati ti a tei imatan aia mataroa, a moanna ni kariniira n aia auti. N aron anne, ti a kakaraoa te tataro ao te marooro ae marau iaon te euangkerio n ikotaki. Te iraorao ae reitinako e a rikirake. Ti taromauriia ao ti Tangiria man tangirakiia Natina.
Ko kona ni katanrikaaka am ururing nakon te tai are ko anga am tangira ma koauan te mwakuri ni buoka temanna ae kainnanoia ao ko namakinna bwa am mwakuri e aki nooraki ke tao akea te kakaitau ke tao e bon aki tangiraki? Inanon te tai anne, ko titiraki ibukin bonganan am ibuobuoki? Ngkana eng, e na oneaki mwiin am nanououa n ana taeka te Uea Beniamina ao bon te maraki naba are ko namakinna: “Kam bon beku naba iroun Atuami.”6
Nakon katean te riribai, ti kona ni kateitei, rinanon te ibuobuoki, te reitaki ae kororaoi riki ma Tamara are i Karawa. Ara tangira ibukin ao babanen nanora Nakoina e totokoa te kinaaki ke te kakaitau ao e karekea Ana tangira bwa e na bwaro nakoira ao n rin inanora.
N tabetai ti na tii beku moa man te kantaninga ibukin te beku ke te tibwanga, ma te beku anne e kona ni kairiira nakon te bwai ae rietaata inanora, ni kairiira bwa ti na beku riki inanon te “te kawai ae tamaroa riki”7—n aron ana kakao Beretitenti Nelson nakon te “tetere ae boou riki, te tararua ae e mimitong ao n ibuobuoki nakoia tabeman.”8
Ngkana ti kabanei ara taratara iaon bwaai ni kabane ake e a tia ni karaoia te Atua ibukira, ara ibuobuoki e na kaungaaki man te nano ni kakaitau. Ngkai e moanna ni keerikaaki tabeaiangara iaon aron kabwaiara man ara ibuobuoki, ti bon ataia bwa n onean mwiin te taratara iaon ara beku e na riki bwa karimoaakin moa te Atua.9
Beretitenti M. Russell Ballard e reirei, “Bon ti ngkana ti tangira Atuara ao Kristo ma nanora ni kabane, tamneira, ao ara iango are ti na kona iai n tibwaua te tangira aei ma kain rarikira rinanon te mwakuri n akoi ao n ibuobuoki.”10
Te moan tua man tua ake Tebwina e kabwarabwara te wanawana mai karawa aei: “Ngai te Uea ae Atuam. … Ko na tai Atuana te Atua temanna irarikiu.”11 Nnen te tua aei e buokiira bwa ti na ataia bwa ngkana ti karimoa bwa ara moanibwai, bwaai ni kabane a na bane n nakoraoi—riki ara ibuobuoki nakoia tabeman. Ngkana E anganaki te tabo ae moan te kakaawaki inanon maiura man ara rinerine ake ti rinei, ngkanne E na kona ni kakabwaiai ara mwakuri ibukin kabwaiara ao ibukin kakabwaiakiia tabeman.
Te Uea e reirei, “Tanimai nakoiu n ami iango n taai nako.”12 Ao ni katoa wiiki ti berita bwa ti na karaoa anne—n “ururingnga n tainako.”13 E kona te iango n atua anne ni karaoaki nakon bwaai ni kabane ake ti karaoi? E kona karaoan te beku ae moan te mangori n riki bwa kaotakin ara tangira ao ni babane nanora Nakoina? I kakoaua bwa e kona ao e na bon riki.
Ti kona ni karaoi bwaai nako iaon ara rinan ni mwakuri are ti na karaoi n riki bwa te kawai n neboia. Ti kona n iangoi mwakuri nako bwa te tibwanga ao te tai ni beku Ibukina, riki ngkana tia mena i nuukan tokin te tai, mwakuri, ke taaibwa aika a bareka.
Ngke e taku Amon, “Eng, I ataia bwa bon te akea ngai; ao ni korakorau I bon mamaara: ngaia are N aki kamoamoai, man na kamoamoa iroun Atuau, bwa ni korakorana ao I kona ni karaoi bwaai ni kabane.”14
Ngkana ara beku ibukin te Atua e riki bwa te moanibwai ni maiura, ti na kakeaira, ao n tokin te tai, ti na kinaira raoi.15
Te Tia Kamaiu e reirei te reirei aei n te aro ae beebete man kaineti: “Ngaia are kaotai ami taura imataia te botanaomata aio, bwa a na noori ami mwakuri aika a raraoi Tamami are i karawa iai ao karaoiroa Tamami are i karawa iai”.16
I kan tibwauaia ma ngkami tabeua taeka ni wanawana ake a reke iaon aia ataei ake akea aia karo i Calcutta, Inria: “Ngkana ko akoi, aomata a kona ni bukiniko bwa ko tii taraiko ibon iroum, iango aika aki kaotaki. E aoria ma bwaina te akoi. Tera are ko kabanea am tai ni kateia, temanna e kona n urua n te tai ae waekoa. Ma engaae n anne kanakoraoia raoi. Te bwai ae raoiroi ae ko karaoia n te bong aei, aomata n tabetai a mwaninga nakon te ingabong. E aoria bon karaoa ae raoiroi. Angan te aonaaba ae tamaroa are iroum, ma e kona n aki tau. E aoria angan te aonaaba ae tamaroa are iroum. Ko nooria, n tokin te tai, te bwai ae e kakaawaki bon am reitaki ma te Atua … e aoria bon karaoia.”17
Tariu, bon imarenara n tainako ma te Uea. Ngke e taekinna Beretitenti James E. Faust: “‘Tera te bwai ae rang kainnanoaki riki n aonaaba?’ … ‘Bon tiaki te kainnano ae rang kainnanoaki n te aonaaba bwa aomata nako a na iai arona, ae reitinako, ni katoabong, te reitaki ae reitinako ma te Tia Kamaiu?’ Karekean te reitaki anne e kona ni kabaea karawa ma ngaira, ao akea riki te bwai ae e kona ni karaoa te bitaki ae korakora inanon maiura ngkai ti karekea ataakina ao ootara n reitakira mai ieta ma te Atua.”18
N aron naba aei, e kabwarabwara Aramwa nakon natina, “Eng, tarai am mwakuri ni kabane bwa ko karaoi nakon te Uea, ao taraia bwa taabo nako ake ko kawari, ko nako iai ibukin te Uea; eng, taraia bwa am iango ni kabane a kaineta te Uea; eng, taraia bwa ana namakin nanom e mena iaon te Uea n taai nako.”19
Ao Beretitenti Russell M. Nelson e a tia naba n reireiniira, “Ngkana ti atatai n Ana mwakuri ni kamaiu ae aki kabooaki, ara namakin are ti karaoia te anganano e na taonaki nako n te namakin ae korakora ni kakaitau ni beku ibukina.”20
Tariu, I kakoaua bwa ngkana Iesu Kristo, rinanon mwaakan Ana Mwakuri ni Kamaiu, e mwakuri iaora ao inanora, E a moanna ni mwakuri rinanora ni kakabwaiaiia tabeman. Ti buokiia, ma ti karaoia man tangiria ao ni beku ibukina. Ti riki n aron are e kabwarabwaraaki ni koroboki aika tabu: “A riai mwaane [ao aine] ni ukoukora kainanoia kaain rarikina teuanne [ke neienne], ao ni karaoi bwaai ni kabane ni mata teuana nakon mimitongin te Atua.”21
Tao ara bitiobi e ataia bwa anne te reirei are ngai ma kainnabau ti na reiakinna man taai ake rimoa ao naano ni koaua, e ngae ngke e aki kororaoi, mwakuri n ibuobuoki nakoia natina mwaane ao aine aika a tangiraki. I kaota au koaua i bon irou ni kakoaua tamaroan ao ana tangira are e tibwauaia nakoira riki ngkana ti kataia ni beku ibukina. I a atong baikai n aran Iesu Kristo ae tabu, amen.