Te Koaua ao te Baire
Ngkana ti ukoukora te koaua iaon te aro, ti riai ni kabonganai ana kawai te tamnei aika a riai ibukin te kakae anne.
Kaotioti n taai aikai a kabwarabwara te koaua bwa“te atatai ni bwaai n aroia ngkai, ao n aroia ngkoa, ao n aroia n taai aika a na roko” (Reirei ao Berita aika Tabu 93:24). Aio te kabwarabwara ae kororaoi ibukin te baire ni kamaiu ao “Te Utu: te Katanoata nakon te Aonaaba.”
Ti maeka inanon taai aika e korakora iai te rikirake ao te reitaki iaon taian rongorongo. Ma rongorongo akanne ni kabane aki bane ni koaua. Ti riai n taratara raoi ngkai ti ukoukora te koaua ao n rinei booki n ibuobuoki ibukin te kakae anne. Ti riai n aki kairuruai kakawakin bwain aon te aba ma kariaia bwa bwaai ni kakoaua aika a koaua. Ti riai n taratara raoi ibukin rongorongo ke aomata ake akea rabakauia ae ataaki mai irouia ake a kinaaki n taian tamnei, taan takakaro, ke bwai nako ake a reke man te intanete. Taan rabakau n te rabakau teuana a riai n aki anaaki bwa taan rabakau iaon bwaai tabeua.
Ti riai naba n taratara raoi n ana kaunganano temanna are e katauraoi rongorongo. Anne bukina ae kauringiira iai koroboki aika a tabu ni kaitara te nakoanibonga ake a kewe (taraa 2 Nibwaai 26:29). Ngkana e aki ataaki bwa e nako mai ia te rongorongo, te rongorongo anne e kona n aki onimakinaki.
Ara baire e riai ni boboto iaon rongorongon bwaai ake a tau ni maroroakinaki ao akea burebureana are e nako man te nano.
I.
Ngkana ti kakaea koauan te aro, ti riai ni kabonganai kawai aika a kabonganaaki ibukin te kakae anne: tataro, ana kakoaua te Tamnei ae Raoiroi, ao kamatebwaian koroboki aika tabu ao aia taeka burabeti n taai aikai. I nanokawaki n tainako ngkana I ongo ae ribooti temanna bwa e bua ana onimaki ibukin reirei ni bwain aon te aba. Akanne ake a tia ni karekea te mii n tamnei a kona n rootaki n te mataki n tamnei. N aron ae e taku Beretitenti Henry B. Eyring, “Aia kangaanga e aki reke man te bwai are a ataia, e reke man te bwai are aki kona n nooria.”1
Te kawai n atatai n te tiaienti e kairiira nakon te rabakau n tiaienti. Ma “koaua n te rabakau n tiaienti” bon tiaki tabwanin n te maiu. Naake aki reiakinaki “n te kamatebwai ao n te onimaki naba” (Reirei ao Berita aika Tabu 88:118) e karako otaia n te koaua n te bwai are a kona ni karaoia man te tiaienti. Aio are e katea te tia ni karekean te koaua.
Beretitenti James E. Faust e taku: “Naake a tia ni [bwabetitoaki] a karekea tamneia n te kaangaanga ngkai a ti rinei rabakaun aon te aba ibukin reiakinaia. Ti kakoaua bwa Ana Ekaretia Iesu Kristo Ibukiia Aika Itiaki ni Boong aika Kaitira iai bwanin ana euangkerio Kristo iai, are ana euangkerio bon ngaia oin te koaua ao kakukurei ae akea tokina.”2
Ti kunea te koaua ao teimatoan te kimwareirei man ataakin ao karaoan nanon te koaua bwa antai ngaira, nanon te maiu n rabwata, ao te tabo are ti nako iai ngkana ti mate. Koaua akanne aki kona n reiakinaki man rabakaun te aonaaba ke kawai n tiaienti.
II.
N na taetae ngkai iaon kaokan te koaua n te euangkerio ake bon aan te reirei n Ana Ekaretia Iesu Kristo ibukiia aika a Itiaki ni Boong aika Kaitira. Taiaoka iangoi koaua aikai ma te taratara raoi. A kabwarabwarai angiin ara reirei ao karaoaia, tao n ikotaki ma tabeua aika ti aki rangin ota iai.
Iai te Atua, ae tatangira ae Tamaia tamnei ni kabane aika a tia ni maiu ke aika a maiu.
Rikim ni mwaane ke n aine bon akea tokina. Imwain bungiakira nakon te aonaaba aei, ti bane ni maeka bwa mwaane ao aine aika tamnei i matan te Atua.
Ti a tibwa tia n ongora n te Tabaenako Kuaea n te Tembora Tikuea n anenea “N na Iriira ana Baire te Atua.”3 Aio te baire are e kateia te Atua bwa aonga natina ni kabane ni kona ni waakinako n akea tokina. Te baire anne e rangin ni kakaawaki iroura n tatabemaniira.
Iaan te baire anne, te atua e a tia ni karika te aonaaba aei bwa te tabo are a na kona ni bungiaki iai natina n tamnei nakon ae mamate ni karekea te rabwata ao ni karekea tibwangaia ibukin te rikirake ae akea tokina man karaoan rinerine aika a raraoi.
N te aro bwa e na nano, rinerine n te maiu n rabwata a riai ni karaoaki ni kaitara ana kairoro te raoiroi ao te buakaka. E na iai te kakaitara, n aron naba te tia kakaitara, are e teweaki nako ibukin te kakaitara, e kariaiakaki bwa e na kariiri ao ni kataiia aomata ni kaitara ana baire te Atua.
Oin te kantaninga n ana baire te Atua bwa e na anganiia Natina aia tai n rinea te maiu are akea tokina. Aio are e ti kona n reke man rinanon te rabwata ao, imwiin te mate, man te rikirake imwiin te mate n te aba n tamnei.
Inanon te maiu n rabwata, ti na bon bane ni kaitiakaki man te bure ngkai ti anga ngaira nakon te kariiriaki n te buakaka n te kakaitara, are tokina te mate. Ti butimwaai kakaewenako akanne ngkai ti katan iaan te baire are kamatoaki bwa te Atua Tamara e na katauraoa te Tia Kamaiu, Ana RikiTemanna, are e na kamaiura n te mangauti n te aonaaba nakon te rabwata ae maiu imwiin te mate. Te Tia Kamaiu e na bon katauraoa te mwakuri ni kamaiu ni kaboira ni kabane bwa ti na itiaki man te bure iaon te kainibaire are E kabwarabwara. Kainibaire akanne e raonaki n onimakinan Kristo, te rairannano, bwabetito, te bwaintangira iroun te Tamnei ae Raoiroi, ao otenanti tabeua ake a karaoaki man te kariaiakaki n te nakoanibonga.
Ana baire ae korakora te Atua n te kukurei e karekea te baeranti ae kororaoi imarenan te motikitaeka ae akea tokina ao te nanoanga are ti kona ni karekea man Ana Mwakuri ni Kamaiu Iesu Kristo. E karekea naba nakoira bwa ti na kona ni bitaki nakon karikibwai aika a boou inanon Kristo.
Te Atua n tangira e karoko iroura n tatabemaniira. Ti kakoauaa ae man te kabwara bure rinanon maten ao mangautin Kristo, a konaa iai ., “aomata nako ni kamaiuaki, n te ongeaba nakon tuua ao otenanti n [Ana] Euangkerio” (Taekan te Onimaki 1:3; e kairaki katuruturuana).
Ana Ekaretia Iesu Kristo ibukiia Aika Itiaki ni Boong aika Kaitira e rang kinaaki riki bwa te Ekaretia ae e boboto iaon te utu. Ma te bwai ae e aki rang ni mataata iai bwa te bwai ae boboto iaona te utu e raka riki iaon te reitaki n rabwata. Te reitaki ae akea tokina bon aan naba ara kamatebwai n aron te aro ae koaua. “Te utu e riki n tabu iroun te Atua.”4 Iaan ana baire ae korakora ara Tia Karikibwai ae tatangira, te mition n Ana Ekaretia e na buokiia natin te Atua ni karekei kakabwaia mai eta ni karietataaki n abanuean tiretio, are e kona n ti karekeaki rinanon te mare imarenan te mwaane ao te aine (taraa Reirei ao Berita aika Tabu 131:1–3). Ti kamatoa ana reirei te Uea bwa “te Mwaane te Aine bon ngaia oin anuan temanna n te maiu n tamnei, n rabwata, ao kinakim ao te kaantaninga ae akea tokina.” ao “te mare imarenan te mwaane ao te aine e kakawaki ibukin Ana babaire ae akea tokina.”5
Te kabane, ana tangira te Atua e rang korakora n te aro are, ti irouia ake tabeman ake a kan riki bwa naake natin betetion, E a tia ni karekea tokin te kawai ae mimitong ibukiia Natina ni kabane. “Natina ni Kabane” n ikotaki ma ni kabane ake a tia ni mate. Ti karaoi otenanti ibukiia n onomwi ibukiia n ara tembora. Te kantaninga n Ana Ekaretia Iesu Kristo ibukiia Aika a Itiaki ni Boong aika Kaitira bwa a na tau Natina ibukin te kabanea n rietata ni mimitong, are te tabekakirake ke te maiu ae akea tokina. Ibukiia naake aki tangirai ke aki tau, E a tia ni katauraoa mimitongina rinanon mimitongin abanuea ake a uarereke riki.
Te aomata are e ota ni koaua aika akea tokiia aikai e kona n ataia bwa bukin tera kain Ana Ekaretia Iesu Kristo Ibukiia Aika a Itiaki ni Boong aika Kaitira a iango n aron ae ti karaoia ao ni karekei anua aika ti karaoi.
III.
N na taekin tabeua bwaai aika a kaineti ma koaua aika akea tokiia aikai are ti kona n tii mataata n ana baire te Atua.
Te moan, ti karinea inaomatan temanna n rinerine. Angiina aomata a ataa ana mwakuri are e kabutanako ni boutoka inaomatan te aro n te United States ao ni kabuta te aonaaba. Mwakuri aikai aki boutoka ti ara kantaninga, ma ni kaineti nakon Ana baire, n ukoukouriia ni kabane natin te Atua bwa a na kukurei n te inaomata n rinerine.
Te Kauoua, ngaira bon aomata aika mitinare. Ti titirakinaki n tabetai bwa bukin tera ti kanakoia mitinare nakon aba aika a mwaiti, riki bon ibuakoia te botanaomata aika Kiritian. Ti karekei naba titiraki aekakin akanne n taekan mirion taara aika a mwaiti n te mwane ni buoka nakoia aomata ake a tiaki kain ara Ekaretia ao bukin tera ti aki tomai buoka aikai nakon aia mwakuri mitinare. Ti karaoa aei ibukina bwa ti karineia aomata ni kabane bwa bon natin te Atua—tarira ao mwanera—ao ti tangiria n tibwai kaubwai n tamnei ao n rabwata ma aomata nako.
Te Kateniua, te maiu e rang n tabu iroura. Kabaeakira nakon ana baire te Atua e kantaningaia bwa ti na totoko nakon kabwakaan te teei ao tiringan te aomata are akea katokan aorakina.
Te Kaaua, tabeman a tabeaianga n tein te Ekaretia iaon te mare ao ataei. Ara atatai n ana baire te Atua are e kaotaki e kantaningaira bwa ti na kaitarai angiin kairoro man te tautaeka aika ngkai man te mare n te katei, ke bitaki ake a kamino nano ke ni bita tein te mwaane ke te aine ke ni kamauna te kaokoro imarenan te mwaane ao te aine. Ti ataia bwa te aro n reitaki, kinaaki, ao aia mwakuri mwaane ao aine a kakaawaki ibukin katian ana baire ae korakora te Atua.
Te Kanimaua, Iai naba ara taratara ae e onoti iaoia ataei. Ti taraa karikaia ao nabeakiia ataei ngkai mwakoron ana baire te Atua, te tibwanga ae kakukurei man tabu irouia ake a anganaki te mwaaka ni karaoa nanona. N ara taratara, ti kakoaua bwa te kaubwai ae korakora iaon te aba ao i karawa bon natira ao bon kabwaiara. Ngaia are, ti riai n reirei ao ni katani reirei ao waaki ake a karekea mwiin ae tamaroa ibukin karikirakean ao kakukureia ataei—ni kabane ataei.
Kabaneana, Ngaira bon natin Tamara are i Karawa, are e a tia n reireiniira te aro ni mwaane ao n aine, te mare imarenan te mwaane ao te aine, ao karikaia ao nabeakiia ataei a bane ni kakaawaki n Ana baire ae korakora ibukin te kakukurei. Nnera iaon bwaai aika a aanaki n angiin te tai e karekea te kakaitara nakon te Ekaretia. Ti arana anne bwa e a kaman ataaki. Te kakaitara bon mwakoron te baire, ao Tatan ana kakaitara ae karaoaki ma te korakora e kairaki ni bwaai nako aika a rang ni kakaawaki n ana baire te Atua. E ukoukora kamaunaan ana mwakuri te Atua. Oin ana kawai bon kabuakakaan te Tia Kamaiu ao mwaakana mai karawa, ni kamaunai bitaki n ana Mwakuri ni kamaiu Iesu Kristo, n aki kaunga te rairannano, ni kaoti aro ni kewe n te kaotioti, ao ni kakea te bukintaeka iroun temanna ma temanna. E ukoukora naba kamangaoan te riki n aine ao ni mwaane, n uruani taian mare, ao n aki kaunga karikakia ataei—riki irouia karo ake a na kaikawaia ataei inanon te koaua.
IV.
Ana mwakuri te Uea e na waaki nako e ngae ngke a kateaki kakaitara ao a teimatoa ake a kaitaraira ngkai ti kataia ni maiuakina reirein ana Ekaretia Iesu Kristo Ibukiia aika a Itiaki ni Boong aika Kaitira. Ibukiia naake a bwaka ian te kakaitara anne, I anga teniua iango aikai.
Te Moan, uringa te reirei n te rairannano are e kona ni karaoaki man te mwaaka ae akea kabotauana n ana Mwakuri ni Kamaiu Iesu Kristo. Ngkai Unimwaane Neal A. Maxwell e bubuti, tai mena ibuakoia “ake a na kataia ni bita te Ekaretia nakon ae a na bitiia”6
N aron are e bubuti Unimwaane Jeffrey R. Holland:
Taui ni kamatoai bwaai ake ko a kaman atai ao n tei ni matoatoa ni karokoa a roko atatai riki tabeua. …
“… N te Ekaretia aei, te bwai are ti ataia e kakaawaki riki nakon bwaai n kabane ake ti aki atai.” 7
Kamwakura te onimaki iroun te Uea Iesu Kristo, are te moan reirei n te euangkerio.
Kabaneana, ukoukora te ibuobuoki. Ara taan kairiiria tangiri ngkami ao a ukoukori kairi n te maiu n tamnei bwa a na buoki ngkami. Ti katauraoi bwaai n ibuobuoki aika a mwaiti n aron are kam kona ni kunea rinanona LDS.org, ao boutoka tabeua ibukin kamatebwaian te euangkerio n te mweenga. Ao iai naba taari n ibuobuoki ao titita ake a weteaki bwa a na anga te ibuobuoki ma te tangira.
Tamara arei i Karawa ae tatangira, e tangiriia Natina bwa a na karekea te kimwareirei are bon oin te kantaninga ibukin karikara. Tokin kawaira ae kakukurei n te maiu ae akea tokina, are ti kona ni karekea man teimatoa ni waaki nako n iriira ara burabeti, Beretitenti Russell M. Nelson, are e aki toki n aranna “kawain te berita.” Aio te bwai ae e taekinna n ana moan rongorongo ngke te Beretitenti n te Ekaretia: “Teimatoa iaon kawain te berita. Am motinnano n ira te Tia Kamaiu man karaoan berita aika tabu ma Ngaia ao ni kawakin berita aika tabu aikanne e na kauka te mataroa nakon kakabwaia n tamnei ni kabane ao te tai ae tauraoi nakoia mwaane, aine, ao ataei n taabo ni kabane.”8
I kakoaua bwa bwaai ake I a tia n taekini a bon koaua, ao a kona n reke man ana reirei ao ana Mwakuri ni Kamaiu Iesu Kristo, are a kona ni karaoaki bwaai ni kabane iaan ana baire ae korakora te Atua, Tamara ae Akea tokina. N aran Iesu Kristo, amen.