Tera ae a Riai n Oota Iai Kaain te Nakoanibonga n Tatabemaniia

Iroun Douglas D. Holmes

Te Moan Kauntira n te Beretitentii ni Kabuta n te Bootaki n Ataeinimwaane

Katabuam n te Nakoanibonga ae te Aaron bon aan buokakiia natin te Atua ni karekea mwaakan ana kamaiu Kristo.

Taari, bon te tibwanga n raoni ngkami n te maungatabu ae kakaongora aei. Ngke I riki bwa te moan Beretitenti, I kukurei ni butimwaaia ara moan kurubu ni mitinare aika boou. Tabeman mai irouia ara mitinare aika a mwaatai a katauraoi ibukin te maroro ae uarereke ma ngaiia. I nooria bwa a barongai aia kaintekateka ataei n te mronron ae iteranaki.

“Bukin tera kam kabonganai aia kaintekateka ataei aika uarereke?” I titiraki.

Taraan ae a maamaa n taetae, mitinare, a taku, Ibukiia mitinare aika boou.”

I kakoaua te kawai are ti taraia tabeman n ae kakaawaki iai mwiina n aia taratara bwa antai ngaiia ao te aekakira ae a na riki iai.¹ Ara mitinare aika boou a tekateka iaon kaintekateka ni ikawai n te bong anne.

N tabetai, I maaku, ti anganiia ara ataeinimwaane man te Nakoanibonga ae te Aaron kaintekateka bwa a na tekateka iaona nakon riki ae ti na buokiia n nooria bwa e a tia te Atua n anganiia te katabeaki ae tabu ao te mwakuri ae kakaawaki ae a na karaoia.

E reireiniira Beretitenti Thomas S. Monson bwa ataeinimwaane a riai n oota “tera ae nanonaki … n riki bwa taan uouota ana nakoanibonga te Atua. A kainnanoa te kairaki n aia atatai n te tamnei ibukin tabun weteaia are a katabuaki iai.”²

N te bong aei, I tataro bwa te Tamnei ae Raoiroi e na kairiira n tatabemaniira ni kakorakora ara atatai ni mwaakan te Nakoanibonga ae te Aaron ae tabu ao ni kaungai nanora bwa ti na botumwaaka ni kabanei riki nanora iaon ara beku n te nakoanibonga. Au rongorongo bon ibukiia kaain te Nakoanibonga ae te Aaron, n raonaki ma naake kaain te Nakoanibonga ae te Merekitereka.

E reirei Unimwaane Dale G. Renlund bwa oin te kantaninga n te nakoanibonga bon katauraoaia natin te Atua ni karekea mwaakan ana mwakuri ni kamaiu Iesu Kristo.³ Ni karekea mwaakan ana mwakuri ni kamaiu Kristo inanon maiura, ti riai n rairi nanora man ara bure, ni karaoi ao ni kawakin berita aika tabu rinanon otenanti, ao ni karekea te Tamnei ae Raoiroi.⁴ Tiaki aikai reirei aika ti karaoi n tii te taina, riki, a kaai ni mwakuri, ni kakorakoraia ao ni katei aroia i bon imarenaia n reitanako te rikirake n “nakomai nakon Kristo, ma ni kakororaoaki irouna.”⁵

Ngaia are, tera taben te Nakoanibonga ae te Aaron n aei? E kanga ni buokiira ni karekea mwaakan ana mwakuri ni kamaiu Kristo? I kakoaua te kaeka a kona ni kuneaki n taian kiing ake a tauaki mwiia n te Nakoanibonga ae te Aaron—kiing ibukin aia ibuobuoki anera ao katauraoan te euangkerio.⁶

Aia Mwakuri n Ibuobuoki Anera

Ti na moanna man aia mwakuri n ibuobuoki anera. Imwaain ae a karekea aia onimaki iroun Iesu Kristo natin te Atua, a riai ni kinaa ao n reireiaki Ana euangkerio. N aron ae e taku te Abotoro Bauro:

“A na iranna n onimakina Teuare a tuai n ongo taekana? ao a na iranna n ongo ngkana akea te tia taekinna?

“Ao a na iranna n taetaekinna ngkana aki kanakoaki? …

“Ma ngaia ae e reke te onimaki n te ongora, ao te ongora man rongorongoni Kristo.”⁷

Man moan waakin te tai, te Atua “e kanakoia anera bwa a na buokiia natia aomata, bwa a na kaota … rokon Kristo.”⁸ Anera bon aomata mai karawa ae a uouota ana rongorongo te Atua.”⁹ N te taetae n Ebera ao n Erene, mwakoron te taeka ae anera bon “te tia uarongorongo.”¹⁰

N aron naba kanakoaia anera aika taan uarongorongo aika kariaiakaki bwa a na taetaekina Ana taeka ao ni katea te onimaki, ngaira ake ti taua te nakoanibonga ae te Aaron ti a tia ni katabuaki n “anga reirei, ao ni kaoia ni kabane bwa a na nako nakon Kristo.”¹¹ N taetaekina te euangkerio bon ana beku te nakoanibonga. Ao te mwaaka are e irekereke ma te beku aei tiaki tii ibukiia burabeti ke ibukiia mitinare. Bon ibukim!¹²

Ngaia are ti na kanga ni karekea te mwaaka aei? E kanga te riikan ae 12 ana ririki—ke mai buakora—ni uota te onimaki inanon Kristo nako nanoia natin te Atua? Ti waaki man kawakinan Ana taeka ngaia are e memena mwaakana ibuakora.¹³ E berita bwa ngkana ti karaoia, ti na karekea “mwaakan te Atua ibukin anaakin nanoia aomata.”¹⁴ Bon te tai n angareirei n te boowi inanon te kooram ke ni kawarii mweengaia kaain te aro. Taraan ae te bwai ae aki katauraoaki arona, n aron te maroro ma te rao ke kaain te utu. Inanon waaki aikai, ngkana ti tauraoi, ti kona n reireia te euangkerio n aron are a karaoia anera: man mwaakan te Tamnei ae Raoiroi.¹⁵

I ongora iroun Jacob n te tai ae nako, kaain te Nakoanibonga ae te Aaron i Papua New Guinea, e kakoaua mwaakan ana Boki Moomon ao arona ni buokia n totokoa te buakaka ao n iriira te Tamnei ae Raoiroi. Ana taeka e karikirakea au onimaki ao aia onimaki tabeman. E rikirake au onimaki ngkai I ongora irouia kaain te Nakoanibonga ae te Aaron n reirei ao ni kakoaua ma te karinerine n aia boowi n te kooram.

Ataeinimwaane, ngkami taan uarongorongo aika kariaiakaki. Rinanon ami taeka ao ami mwakuri, kam kona ni uota onimakinan Kristo nako nanoia natin te Atua.¹⁶ Ngkai e taku Beretitenti Russell M. Nelson, “Kam na riki bwa anera n ibuobuoki nakoia.”¹⁷

Te Katauraoi n te Euangkerio

Rikiraken te onimaki iroun Kristo e kairiiri n taainako nakon te nano ni kan bitaki ke n rairannano.¹⁸ Ngaia e bon riai bwa kiing ibukin aia ibuobuoki anera e raonaki ma te kiing ni katauraoan te euangkerio, “te euangkerio n rairannano ao ni bwabetitio, ao kamaunaan buure.”¹⁹

Ngkai ko kamatebwaia ami beku n te Nakoanibonga ae te Aaron, kam na noora te tua ae mataata ni kaoia tabeman bwa a na rairi nanoia ao ni karaoiroia riki.²⁰ Tiaki nanon anne bwa ti na tei ni koonan te kawai n takaruaea, “Rairi nanomi!” N angin te tai, nanona bwa ti na rairi nanora, ti kabwarabure, ao ngkai ti buokiia tabeman, ti anga te kantaninga ao te rau are e uota te rairannano—ibukina bwa ti a tia n rinanona i bon iroura.

I a tia n raoniia kaain te Nakoanibonga ae te Aaron ngkai a kawariia kaain te kooram. I kakoaua bwa aia tararua e kamaraui naano ao ni buokiia tariia ma mwaneia n namakina ana tangira te Atua. I ongora n ana koaua temanna te ataeinimwaane nakoia rorona ni mwaakan te rairannano. N aron ae karaoia, a kamarauaki naano, a karaoaki taian motinnano, ao e namakinaki mwaakan ana kamaiu Kristo.

E reirei Beretitenti B. Hinckley: “Teuana te bwai bon te rairannano. Bon teuana naba ni karekea kamaunaan ara bure ke ni kabwaraaki ara bure. Te mwaaka ni kakoroa bukin aei e kuneaki n te Nakoanibonga ae te Aaron.”²¹ Te otenanti n te bwabetito ao te toa e kaota koauan ao bwaninin ara rairannano.²² E kamataata Beretitenti Dallin H. Oaks n te kawai aei: “Ti tuangaki bwa tina rairi nanora man ara bure ao n nakon te Uea ma nanora ae uruaki ao te tamnei ae raraoma ao ni kana te toa. … Ngkana ti kabooui ara berita n te bwabetito n te kawai aei, te Uea e kabooua mwiin kaitiakara n ara bwabetito.”²³

Taari, bon te tibwanga ae tabu karaoan otenanti ake a na uota kamaunaan buure nakoia ake a rairi nanoia man aia bure rinanon mwaakan ana kamaiu te Tia Kamaiu.²⁴

Ia tibwa kaongoaki rongorongon te ibonga, are e korakai n taetae ngke e kakabwaia te toa n te moantai. Ngkai e karaoia, e roko te tamnei ae mwaaka iaona ao kaain te taromauri. Imwiin te bootaki, e kaota ana koaua ae bebete ibukin mwaakan te Atua are e namakinna n tain te otenanti anne.

I Sydney, Aotiteria, aman kaain te kooram n ibonga a bwabetitoia kaain te utu ae Mbuelongo. Tinan temanna mai buakoia ibonga aikai e taekina korakoran mwiina ae riki nakon natina te mwaane. Ibonga aikai a moanna n oota n nanon “kariaiakaki mai roun Iesu Kristo.”²⁵

Ngkai kam ataia, ibonga a kona ngkai n tararua ni karaoan bwabetito ni bonomwii inanon te tembora. Natiu te mwaane ae 17 ana ririki e bwabetitoaki n te tai ae nako ibukiia ara bakatibu tabeman. Ti kaai n namakina te kakaitau ae bati ibukin te Nakoianibonga ae te Aaron ao te tibwanga ni mwakuri ibukin kamaiuaia natin te Atua.

Ataeinimwaane, ngkai kam nanomatoa ni kabaeaki n ami beku n te nakoanibonga, kam reitaki ma te Atua inanon Ana mwakuri “ni karekea te aki mamate ao te maiu ae akea tokina ibukin te aomata.”²⁶ Taneiai n aekakin aikai a na karikirakea nanom ao ni katauraoiko n reireia te rairannano ao ni bwabetitoia taan rairaki n aroia mitinare. A na katauraoiko naba ibukin mwakuri n ibuobuoki n abwakin maium te Nakoanibonga ae te Merekitereka.

Ioane te Tia Bwabetito, Ara Katoto

Kaain te Nakoanibonga ae te Aaron, iai tibwangara ao ara beku ae ti na karaoia n riki bwa taian toro ma Ioane te Tia Bwabetito. E kanakoaki Ioane bwa te tia uarongorongo ae e kariaiakaki ni kakoaua ibukin Kristo ao ni kaoia ni kabane bwa a na rairi nanoia ao ni bwabetitoaki—bon anne, e kabongana kiingin te Nakoanibonga ae te Aaron are ti maroroakinna. E taku Ioane, “I bon bwabetitoingkami ngai n te ran nakon rairan nanomi: ma Teuare e na roko imwiiu e korakora riki nako iu …: e na bwabetitoingkami n te Tamnei ae Raoirioi, ma te ai.”²⁷

N aron te Nakoanibonga ae te Aaron, ma kiing ni buobuoki mairouia anera ao te euangkerio ni katauraoi, e katauraoi kawaia natin te Atua ni karekea, rinanon te Nakoanibonga ae te Merekitereka, ana bwaintituaraoi te Tamnei ae Raoiroi, te bwaintituaraoi ae korakora ae ti kona ni karekea n te maiu aei.²⁸

Bon te katabeaki ae korakora ae e anga te Atua nakoia kaain te Nakoanibonga ae te Aaron!

Te Kakao ao te Berita

Kaaro ao taan kairiiri, kam kona n namakina kakaawakin ana reirei Beretitenti Monson ni buokiia ataeinimwaane n oota “tera ae nanonaki … n riki bwa taan uouota ana nakoanibonga te Atua”?²⁹ N oota ao ni kakorakora te Nakoanibonga ae te Aaron e na katauraoiia n riki bwa kaain te nakoaibonga aika a kakaonimaki, mitinare aika a kaonaki n te mwaaka, ao bumwaane ao kaaro aika raoiroi. Rinanon aia mwakuri n ibuobuoki, aki tii oota ma a na namakina koauan mwaakan te nakoanibonga, te mwaaka ni mwakuri n aran Kristo ibukin kamaiuakiia natin te Atua.

Ataeinimwaane, iai ana mwakuri te Atua ae kam na karaoia ibukina.³⁰ Katabuam n te Nakoanibonga ae te Aaron bon aan buokakiia natin te Atua ni karekea mwaakan ana mwakuri ni kamaiu Kristo. I berita bwa ngkai ko karaoi taian beku aika tabu aikai bwa aan maium, ko na namakina mwaakan te Atua n aron are ko tuai namakinna mai imwaaina. Ko na oota ni kinaakim bwa ngkoe natin te Atua, ko weteaki ma te nakoa ae tabu bwa ko na karaoa Ana mwakuri. Ao ko na buoka katauraoan te kawai ibukin okiia natina. Man koaua aikai I kakoaua n aran Iesu Kristo, amen.

Bwaai aika a na taraaki

1. Aei te bwai ae e riki nakon Mote. Imwiin kaitibona ae kamiimi ma te Atua, e moanna n iangoia bwa iai kaokorona—ngkai natin te Atua ngaia. Te taratara aei ibukiin totokoan Tatan, are e aranna bwa “natin te aomata” (taraa Mote 1:1–20). Taraa naba Thomas S. Monson, “See Others as They May Become,” Riaona, Nobembwa 2012, 68–71; Dale G. Renlund, “Through God’s Eyes,” Riaona, Nobembwa 2015, 93–94.

2. Thomas S. Monson, boowi ni kairiiri n te maungatabu ni kabuta, Maati 2011.

3. Taraa Dale G. Renlund, “The Priesthood and the Savior’s Atoning Power,” Riaona, Nobembwa 2017, 64–67.

4. Taraa 2 Nibwaai 31–32; 3 Nibwaai 11:30–41; 27:13–21; Ita 4:18–19; Mote 6:52–68; 8:24.

5. Moronaai 10:32; taraa naba Tataekina Au Euangkerio: Te Kairi nakon te Mwakuri ni Mitinare (2004), 6.

6. Taraa Reirei ao Berita aika Tabu 13:1; 84:26–27; 107:20.

7. I-Rom 10:14–15, 17. E reirei te aekaki ni koaua aei Iotebwa Timiti: “E roko te onimaki man ongoraean ana taeka te Atua, rinanon aia kakoaua ana toro te Atua; bwa te kakoaua e iriiri n taainako ma Tamnein te taetae ni burabeti ao te kaotioti” (Aia Anga reirei Beretitenti n te Ekaretia: Iotebwa Timiti [2007], 385).

8. Moronaai 7:22; taraa Aramwa 12:28–30; 13:21–24; 32:22–23; 39:17–19; Ereman 5:11; Moronaai 7:21–25, 29–32; Reirei ao Berita aika Tabu 20:35; 29:41–42; Mote 5:58; taraa naba Mataio 28:19; I-Rom 10:13–17.

9. Taraa George Q, Cannon, Gospel Truth sel. Jerreld L. Newquist (1987), 54.

10. Taraa James Strong, The New Strong’s Exhaustive Concordance of the Bible, (1984), Hebrew and Chaldee dictionary section, 66, Greek dictionary section, 7.

11. Reirei ao Berita aika Tabu 20:59.

12. Taraa Henry B. Eyring, “Bwa E Na Kakorakoraaki Naba,” Riaona, Nobembwa 2016, 75–78; Aramwa 17:3; Ereman 5:18; 6:4–5; Reirei ao Berita aika Tabu 28:3.

13. Taraa 1 Ioane 2:14; Aramwa 17:2; 26:13; 32:42. Kakoroan bukin Au Beku Ibukin te Atua: Ibukiia Kaain te Nakoanibonga ae te Aaron bon te bwai ni mwakuri ni buokia ni kakoroa bukin aei.

14. Reirei ao Berita aika Tabu 11:21; taraa naba Reirei ao Berita aika Tabu 84:85.

15. Taraa 2 Nibwaai 32:3; Reirei ao Berita aika Tabu 42:14; 50:17–22.

16. Taraa Moronaai 7:25.

17. Russell M. Nelson, “Honoring the Priesthood,” Ensign, Meei 1993, 40; taraa naba Aramwa 27:4.

18. Taraa Aramwa 34:17; Ereman 14:13.

19. Reirei ao Berita aika Tabu 84:27.

20. Taraa Reirei ao Berita aika Tabu 20:46, 51–59, 73–79. Kakoroan bukin Au Beku Ibukin te Atua: Ibukiia Kaain te Nakoanibonga ae te Aaron bon te bwai ni mwakuri ni buokia ni kakoroa bukin aei.

21. Gordon B. Hinckley, “The Aaronic Priesthood—a Gift from God,” Ensign, Meei 1988, 46.

22. E kamataata Unimwaane D. Todd Christofferson: “Te bwabetito n te ran bon te kabanea ke te bau ae te mwaneka ni waakin te rairannano. Totokoan te bure, n raonaki ma ara berita aika tabu n te ongotaeka, e kabwanina ara rairannano; ni koauana, e teimatoa n aki kona ni bwanin ngkana akea te rairannano n akea te berita anne” (“Building Faith in Christ” Riaona, Tebetembwa 2012). Taraa naba D. Todd Christofferson, “The Divine Gift of Repentance,” Riaona, Nobembwa. 2011, 38–41; Ana Raitaeka Iotebwa Timiti, Mataio 26:24 (inanon te abentekiti n te Baibara).

    Te otenanti n te toa e anganiira “te tai ni katoa wiiki ni kabooui ara berita aika tabu ake a na kona n riki bwa taan katongnga ana akoi n ana mwakuri ni kamaiu te Tia Kamaiu ma aekakin mwiin te kaitiakaki n te tamnei n te bwabetito ao te kamatoaaki” (“Understanding Our Covenants with God,” Liahona, Turai 2012, 21). Taraa naba Dallin H. Oaks, “Always Have His Spirit,” Ensign Nobembwa 1996, 59–61.

23. Dallin H. Oaks, “The Aaronic Priesthood and the Sacrament,” Riaona, Tianuare 1999, 44.

24. E kamataata Unimwaane David A. Bednar: “Otenanti ni kamaiu ao te karietataaki are e karaoaki n ana Ekaretia te Uea are e a tia ni kaokaki a kakaawaki riki nakon bukamaru ke mwakuri aika iai kanikinaeaia. Riki, a katea te anga ae kariaiakaki are a bwaro mai iai kakabwaia ao mwaakan karawa nakon maiura n tatabemaniira” (“Always Retain a Remission of Your Sins,” Riaona, Meei 2016, 60).

25. Reirei ao Berita aika Tabu 20:73.

26. Mote 1:39.

27. Mataio 3:11.

28. Angiina taan kairiiri n te Ekaretia a tia ni kinaa te Tamnei ae Raoiro bwa te kabanea ni korakora ni bwaintituaraoi n te maiu ae mamate.

    E taku Beretitenti Dallin H. Oaks, “N teimatoa ni karekea ana bwaintituaraoi te Tamnei ae Raoiroi bon te kabanea ni bwai ae kakaawaki ae ti kona ni karekea n te maiu ae mamate” (“Te Nakoanibonga ae te Aaron ao te Toa,” Riaona, Tianuare 1999, 44).

    E reirei Unimwaane Bruce R. McConkie: “N taetae ma te taratara ae akea tokina, te maiu ae akea tokina bon te kabanea ni korakora mai buakon ni kabane ana bwaintituaraoi te Atua. Ma kauarerekean tarataraakin te maiu aei, ana bwai n tituaraoi te Tamnei ae Raoiroi bon te bwaintituaraoi ae a kona ni kakukureiia iai aomata” (“Tera ae E Nanonaki n ‘Te Tamnei ae Tabu’?” Intiturakita, Beberuare 1965, 57).

    Beretitenti Wilford Woodruff e kakoaua: “Ngkana e memena te Tamnei ae Raoiroi iroum—ao aomata nako are a riai ni karekea—I kona n taekinna nakoimi bwa akea te bwaintituaraoi ae korakora riki, akea te kakabwaia ae korakora riki, akea te kakoaua ae korakora riki ae anganaki aomata iaon te aba. Kam bae ni karekea aia tararua anera; kam bae n noori kakai aika mwaiti; kam bae n tia n noori kamiimi aika mwaiti iaon te aba; ma I kaotia bwa ana bwaintituaraoi te Tamnei bon te bwaintituaraoi ae te kabanea ni korakora are a kona n anganaki aomata” (Aia Anga reirei Beretitenti n te Ekaretia: Wilford Woodruff [2004], 49).

    Ao e reitia Unimwaane David A. Bednar: “Ongotaekara n ana tua te Atua ao irakin aia reirei ae kaunganano taan kairiiri n te Ekaretia e boboto iaon karekean te Tamnei ae Raoiroi. N ae aanaki, n reirein ni kabane te euangkerio ao waaki ni kakukurei a boboto iaon te nakomai nakon Kristo ni karekea te Tamnei ae Raoiroi inanon maiura (“Karekea te Tamnei ae Raoiroi,” Riaona, Nobembwa 2010, 97).

29. Thomas S. Monson, boowi ni kairiiri n te maungatabu ni kabuta, Maati 2011.

30. Taraa Mote 1:6.