Te Reirei n te Mweenga—Te Tibwanga ae Tabu man Kakukurei

Iroun Devin G. Durrant

Te Moan ni Kauntira n te Beretitentii ni Kabuta n te Reirei n Tabati

I bubuti nako karawa ngkai ti kataia n riki n ai aron Kristo bwa taan reirei n te mweenga.

Kainnabau, Julie, ao ngai iai natira aika onoman aika a rang kakaawaki, ma n te tai aei ao aikoa maeka irarikira. I rang n tangiria natiu ni mweengara n te tai ae bwanin. I tangira reiakinau mai irouia ao reireinaia.

N te bong aei I kaineta au maroro nakoia kaaro ni kabane ao naake a tangiria n riki ni karo. A mwaiti iroumi aika a kaikawaia ataei n te tai aei. Irouia tabeman, te tai anne e na waekoa n reke. Ao bon ibukiia tabeman, te aro ni karo e na kona n riki bwa te kakabwaia n taai aika a na roko. I tataro bwa ti ataia ni kabane kakukurein ao tabun te tibwanga n reireinan te teei.¹

Ngkai kaaro, ti moan kaota Tamara are i Karawa ao Natina ae Iesu Kristo nakoia natira, ao Iesu Kristo. Ti buokiia natira n aia moan tataro. Ti anga te kairiiri ao te boutoka ngkai a rin ni kawain te berita² rinanon te bwabetito. Ti reireiniia n ongotaeka nakon ana tua te Atua. Ti reireiniia taekan Ana baire ibukiia Natina, ao ti buokiia bwa ana kina ana wirikiriki te Tamnei ae Raoiroi. Ti karakini rongorongoia burabeti ake ngkoa ao ni kaungaia bwa ana iririia ake a maiu. Ti tataro bwa a na tokanikai ao ni maraki ma ngaiia n aia tai ni kaitarai kanganga. Ti kaoti nakoia natira kakabwaia n te tembora, ao ti kataia ni katauraoia raoi bwa a na mitinare n ae bwanin taina. Ti anga reirei n tangira ngkai a riki natira bwa kaaro. Ma—man te tai anne—ti aki toki n riki bwa aia karo. Ti aki toki n riki bwa aia tia reirei. Ti aki kona ni kakerikakaki man wewete aikai ae akea tokiia.

N te bong aei tina iangoi tabeua tibwanga aika kakukurei ake iai iroura n reireiniia natira ni mweengara.

Reirei Ibukin Bootakin te Utu n te Tairiki

Tina waakinna man te kainutu n te tairiki, are e bon riai ni moanibwaiaki n te mweenga ae kaonaki n te onimaki are I kaikawaaki iai. I aki uringa raoi te reirei are e taekinaki n te kainutu, ma I uringnga bwa bon akea ara tai ae ti kabua n te wiiki.³ I ata te bwai ae kakaawaki irouia au karo.⁴

I uringa teuana te waaki ni kakukurei ae I tatangiria n te kainutu. Tamau e kaoa temanna natina bwa e na “Ukeuke.” E na bae n angan te ataei te kaetieti n aron, “Moan, nakon te umwanikuuka ao kauka te aitibaoki ao manga kainna. Ngkanne biri nakon au tabo ni matu ao ana teuana au titaokin inanon au kabwate. Imwiina oki nakoiu, kibakiba teniua te tai, ao kangai ‘Tamau, I a tia ni karaoia!’”

I kukurei ngkana e a roko n au tai. I tangiria bwa a na bane n eti bwaai, ao I ururinga te tai anne ngkana I kangai, “Tamau, I a tia ni karaoia!” Te waaki aei e buokai ni karekea onimakinau ao e kabebetea te ataeinimwaane ae aki kona n tekateka bukina n ongora ngkana a reirei te euangkerio Tamau ao Tinau.

Beretitenti Gordon B. Hinckley e reirei: “Ngkana iai am nanououa n raoiroin te kainutu n te tairiki, kataia. Ikotiia natim irarikim, reireiniia, kaota am koaua nakoia, wareki koroboki aika a tabu n ikotaki ao kaunga ami ikoikotaki.”⁵

N tainako ao e na kaoti te kaitara ibukin te kainutu n te tairiki.⁶ N aki taraa anne, I kaoi ngkami bwa kam na kakaea angami man te kanganga ao karika te kainutu bwa te moanibwai—ao karaoia bwa e na rang kaunga.

Reirei n Te Tataro n Utu

Te tataro n utu bon teuana naba te tai n reirei.

I tangira aron taman Beretitenti N. Eldon Tanner n reireinna n tain te tataro n utu. Beretitenti Tanner e taekina aei:

“I uringa te tairiki teuana ngke ti katorobubua n tataro n utu, tamau e taku nakon te Uea, ‘Eldon iai te bwai ae karaoia n te bong aei ae riai n aki karaoia, e kabwara ana bure, ao ngkana ko kabwara ana bure, e aki manga oki ni karaoi.’

“Anne are I a toki naba ni manga karaoia—e korakora riki nakon te katuaeaki are N na kona ni butimwaia.”⁷

Ngkai te ataeinmwane, n tabetai tia rawa n te tataro n utu ae mwaiti, n iango ibon irou, “Tiaki tibwa tataro tabeua te miniti n nako?” Ngkai, I a riki bwa te karo, I a ataia ti aki kona n tataro n rang kabatia inanon te utu.⁸

I kukurei n tainako iroun Tamara are i Karawa ao Natina n arona ni kaota natina bwa Natina ae Tangiraki.⁹ I kukurei n tataro ibukiia natiu n araia ngkai a kakauongo nakon au tataro nakon Tamara are i Karawa ni kaota tangiraia irou. Taraan ae akea riki te tai n reita te tangira nakoia natira ngkana ko tataro ma ngaiia ni kakabwaiaia. Ngkana a ikotaki utu n te tataro ae nanorinano, reirei aika a mwaaka aika ururingaki a taekinaki.

Te Reirei ae Kona ni Weteaki

Te reirei ni karo kaanga ai aron te Taokita are e kona ni weteaki. Ti riai n tainako n tauraoi n reireiniia natira ibukina bwa ti aki kona n ata te tai ae e na kaoti iai.

Ngaira kaanga ai aron te Tia Kamaiu, are e reirei n tainako “aki karaoia n te tinakoke ma n tabo nako, n tabo are e mena iai ni katoabong—ngkai e amwarake ma Ana reirei, itiran man te mwanibwa, ke n nakonako irarikin te kai te bero.”¹⁰

Ririki aika a nako, tinau e tibwaia bwa ana maroro iaon te euangkerio aika uatai ma tariu te ikawai, Matt, te taina ngke a rukumi kunnikai ao are teuana ngke a buti n te kaa nakon te tia karao wii bon te kabanea n tamaroa. Teuana te bwai ae I tatangiria iroun tinau bon tatauraoina n reireiniia natina.

Ana reirei ni karo bon akea tiana. Ngke I bitiobi, tinau, ai 78 ana ririki n te tai anne, e tuagai bwa I riai ni koroira. E ataia bwa I riai n riki bwa te banna ni katoto, ao e aki tataninga n tuangai anne. I ltangiriko, Mom!

Ngkai te karo, I kaunga te kamatebwai ao n iangoi koroboki aika a tabu bwa ti aonga ni kona ni kaeka ngkana natira ke tibura a roko n tain te reirei are e kona ni weteaki.¹¹ “Tabeua taai n reirei aika tamaroa e waaki bwa te titiraki ke te tabeaianga n te nano iroun kain te [utu].”¹² Ti kakauongo inanon taai akanne?¹³

I tangira ana kakao te Abotoro are Betero “Tauraoi n tainako ni kaeka te aomata [ao I karina, te ataei] are e titirakiningkami bukin te kantaninga ae mena i nanomi.”¹⁴

Ngke tebwi tabun au ririki, tamau ao ngai ti kan kakaboo ibon iroura bwa antai ae te kabanea ni korakora baina. Ti bon kooni baira ni kamatoatoa n te aro are e na maraki bain temanna. E aki rang kaunga karaoan ngkai, ma n te tai arei e kaunga. Imwiin te aitara, Tamau e tarai matau man taku, “A rang aintoa baim, natiu. Au kantaninga bwa baim n tainako iai korakorana n aki riinga te ataeinnaine n ae aki riai.” Imwiina e kaoai bwa N na itiaki n te rabwata ao ni buokiia tabeman ni karaoa naba anne.

Unimwaane Douglas L. Callister e tibwa aio iroun tamana: “Ngke I mwananga n oki man au mwakuri n te bongina Tamau e waekoa ni kangai, ‘I kabwaka au kabwianibwai n te bong aei. I koreia “ko rabwa” iaon te tieke n te kabwianibwai. I rang kakaitau nakon te Uea ibukin kakabwaian ara utu.’”

Unimwaane Callister imwiina e anga ana kakaitau nakon tamana are bon ana tia reirei naba: “E reireinai uoua te mwakuri ao te anua n ongotaeka.”¹⁵

I taku bwa e riai bwa tina titirakiniira n tainako, “Tera ae N na reireiniia, natiu man au mwakuri ao anua n ongotaeka?”

Kamatebwaian Reirei man Korbooki aika tabu n te Utu

Te kamatebwai ni booki aika tabu n utu bon te bootaki ae kakaawaki ibukin reiakinan reirei n te mweenga.

Beretitenti Russell M. Nelson e taku, “Kaaro aki ti irii ana taeka te Uea, ma iai tibwangaia mai karawa bwa a na reireia iai natiia.”¹⁶

Ngkai ngai ma Julie ti kaikawaia natira, ti kataia n teimatoa ao ni kakau iango. Te ririki teuana, ti baireia ni wareka ana Boki Moomon n taetae n Tibaeniti n utu. Tao anne bukina ngkai te Uea e weteia natira n tatabemaniia bwa a na beku n ae bwanin taina n te mition ae taetae n Tibaeniti? E bon kona.

I bon rang n riingaki ngke te Tari Brian K. Ashton e tibwaia ma ngai bwa ngaia ma tamana a wareki iteraniban nako ana Boki Moomon n ikotaki n ana kabanea n ririki n te reirei ngke 18 ana ririki. Tari Ashton e tatangiri koroboki aika a tabu. A koreaki n ana iango ao inanona. Ana karo e karikirakea te konabwai anne ngke te Tari Aston e kairake, ao te kora anne¹⁷ e a tia n rikirake inanon te koaua ae korakora. Tari Ashton e a tia naba ni karaoa anne ma natina are e a ikawai.¹⁸ Natina are waniua ana ririki e titirakinna, “Tamau, N na wareka ningai ana Boki Moomon ma ngkoe?”

Reirei n te Banna ni Katoto

Te kabane, ara reirei ni karo ae moan te anainano bon ara banna ni katoto. Reireiara bwa “Ko na riki bwa te banna ni katoto ibukiia taan onimaki, n te taeka, n te aro ni maeka, n te tangira, n te onimaki, ao n te itiaki”.”¹⁹

Ni mwanangara ae tia tibwa karaoia, Julie ao ngai ti ira te taromauri ao ti noora te kibu ae ni mwakuri. Te ataeinimwane, e nang waekoa n nakon ana mition, e taetae n tain bootakin te toa.

E taku, “Kam bane n taku bwa tamau bon te aomata ae tamaroa n te ekaretia, ma …” E toki, ao ngai I ingainga nakon are e na taekinna imwiina. E reitinako man taku, “Bon te aomata ae moan te tamaroa n te mweenga.”

I kaitaua te ataeinimwaane aei imwina ibukin ana kakaitau are e a tia ni karaoia nakon tamana. Imwiina I kunea bwa tamana bon te bitiobi n te uoote. E ngae ngke te bitiobi aei e kakaonimaki ni beku ibukin ana uoote, natina e namakinna ba e tamaroa riki arona n te mweenga.²⁰

Unimwaane D. Todd Christofferson e reirei: “A mwaiti ara anga are ti kona ni kabonganai n reireiniia … te roro ae rikirake, ao ti riai ni karaoi nakon tamaroan ara iango ao ara mwakuri ni katamaroai aroia. Man aikai ni kabane, ti riai n reitinako ni kaungaia ao ni buokiia kaaro bwa a na tamaroa riki ao n reitianako n reirei … riki man te banna ni katoto.”²¹

Anne aron te Tia Kamaiu n angareirei.²²

N te ririki ae nako, ngke ti motirawa ngai ma uoman natira aika kabanea n uarereke, Julie e iangoia bwa tina karaoa te bwabetito n te tembora i St. George ao San Diego. I ngurengure—ibon irou—n iango, “Ti nakon te tembora ni mweengara, ao ngkai tia motirawa. E aera ti aki karaoa te bwai teuana ae kaanga aron raoi te motirawa?” Imwiin te bwabetito, Julie e tangiria bwa tina rawetamnei i tinanikun te tembora. I ngure inanou—teuana riki te tai. Ko kona ni keetinna bwa tera are e riki imwiina: ti rawetamnei.

Julie e tangiria bwa natira a na uringa aron ae a tia iai ni buokiia ara bakatibu, ai ngaia are tia karaoia. Ti aki kainnanoa te reirei raoi ni kakaawakin te tembora. Ti bon maiuakinna—ti karabwaa te tina are e tangira te tembora ao e tangiriia natina bwa a na tibwa te tangira anne.

Ngkai kaaro a kakaitau imarenaia ao anga te banna ni katoto ae tamaroa, naati a kakabwaiaki n akea tokina.

Kabaneana

Ibukimi ni kabane ake kam kataia ni karaoa ami kabanea n tamaroa n reirei ni mweengami, au kantaninga bwa kam na karekea te rau ao te kukurei inanon ami mwakuri. Ao ngkana ko namakinna bwa ko kona ni katamaroa riki ke ko kainnannoa te katauraoi ae korakora riki, taiaoka kaeka ma te nanorinnano ngkai e wirikiriki te Tamnei nakoim ao katabeko karaoia.²³

Unimwaane L. Tom Perry e taku, “Marurungin te botannaomata, kukureia ana aomata, maiuraoia, ao aroia n rau e aanaki man reiakinaia ataei inanon te mweenga.”²⁴

Eng, natiu aikoa maeka ma ngaira ni mweengara, ma I teimatoa n tataninga te tareboon, n tauraoi ao n ingainga ni karekei riki taai aika a kakaawaki n reireiniia natiu aika a ikawai, natiia, ao n te bong teuana, bon tibutoruu.

I bubuti ana buoka karawa ngkai ti kataia n riki bwa taan reirei n ai aron Kristo inanon mweengara. N aran Iesu Kristo, amen.

Bwaai aika a na taraaki

1. Taraa Reirei ao Berita aika Tabu 68:25; 93:40.

   Unimwaane L. Tom Perry taught: “Korakoran te kakaitara e rang butanako ao e oro, ni kataia ni kabuakaka ao ni kamauna aan ara botanaomata, riki te utu. Kaaro a riai n ataia bwa te reirei n te mweenga bon te bwai ae moan te tabu ao te beku ae rang kakaawaki.” (“Mothers Teaching Children in the Home,” Liahona, May 2010, 30).

   Te Moan Beretitentii n te Kooram n te Tengaun ma Uoman n Abotoro a tia n reirei: “Buumwaane ao buuaine iai tibwangaia n tangiriia ao n tararuaia ibon irouia ao natiia. ‘Ataei bon ana bwai n tituaraoi te Uea’ (Taian Areru 127:3). Iai tabeia kaaro ae tabu ni kaikawaia natiia n te tangira ao te kororaoi, ni karekei bwaai ibukin kainnanoia n te aro n rabwata ao n tamnei, n reireiniia n tangira ao ni beku ibukin temanna ibon ibukiia, ni kawakin ana tua te Atua, ao n riki bwa aomata aika a kawakina te tua n taabo ake a maeka iai. Buumwaane ao buuaine—tiina ao kaaro—a na bukintaeka imatan te Atua ibukin karaoan tibwanga aikai” (“Te Utu: Te Katanoata Nakon te Aonaaba,” Riaona, Meei 2017, 145).

2. Taraa Russell M. Nelson, “As We Go Forward Together,” Liahona, Eberi. 2018, 7.

3. E taku Unimwaane David A. Bednar: “N te bong aei ngkana ko kan titirakina natira te ikawai bwa tera ae a uringa n taekan te tataro n utu, kamatebwaian koroboki aika tabu, ao bootakin te utu n te tairiki, I kakoaua bwa I ata aroia ni kaeka. A na bon aki kona n uringa teuana te tataro ke te tai ni kamatebwai ni koroboki aika tabu ke te reirei ae nano ni bootakin te utu n te tairik n aron te tai ae a riingaki iai nanoia n rikiraken maiuia n tamnei. Tera ae a na taekinna ae a uringnga bwa n utu a bon teimatoa” (“More Diligent and Concerned at Home,” Liahona, Nob. 2009, 19).

4. Taraa “Home Can Be a Heaven on Earth,” Anene, nambwa. 298.

5. Teachings of Presidents of the Church: Gordon B. Hinckley (2016), 171.

6. Taraa 2 Nibwaai 2:11.

7. N. Eldon Tanner, “Never Be Ashamed of the Gospel of Christ,” Ensign, Beb. 1980, 4.

8. Taraa 3 Nibwaai 18:21.

9. Taraa Mataio 3:16–17; 3 Nibwaai 11:6–8; Reirei ao Berita aika Tabu 18:34–36; Iotebwa Timiti—Rongorongo 1:17.

10. “Take Advantage of Spontaneous Teaching Moments,” Teaching in the Savior’s Way (2016), 16. Teaching in the Savior’s Way e kairii aekakin nako iango ao bwaai n angareirei n te mweenga.

11. Taraa Reirei ao Berita aika Tabu 11:21; 84:85.

12. Teaching in the Savior’s Way, 16.

13. Taraa “Listen,” Preach My Gospel: A Guide to Missionary Service (2004), 185–86.

14. 1 Betero 3:15.

15. Douglas L. Callister, “Most Influential Teacher—Emeritus Seventy Pays Tribute to Father,” Aokati. 29, 2016, news.lds.org.

16. Russell M. Nelson, “Set in Order Thy House,” Liahona, Tian. 2002, 81.

17. Taraa Aramwa 32:28–43.

18. Titita Melinda Ashton e onomwi n te kare ngke buuna, Tari Ashton, e nako n te taun.

19. 1 Timoteo 4:12; taraa naba Aramwa 17:11.

20. Bitiobi Jeffrey L. Stewart serves in the Southgate Second Ward in St. George, Utah. Samuel, natina te mwaane, e mitinare ngkai i Colombia Medellín Mition.

21. D. Todd Christofferson, “Kakorakorakin te Onimaki ao te Marooro ae Teimatoa n te Roro ae Rikirake,” n te bowi ni kairiiri n te maungatabu ni kabuta, Tebete. 27, 2017.

22. Taraa 3 Nibwaai 27:21, 27.

23. Taraa Reirei ao Berita aika Tabu 43:8–9.

24. L. Tom Perry, “Mothers Teaching Children in the Home,” 30.