Ma Ane e Nanomwaaka ni Karokoa te Toki, Bon Ngaia Are e na Kamaiuaki
Ti na kakaonimaki nakon te bwai are ti kakoaua ao n ataia.
Mauri tariu ao mwaaneu, I rang kakaitau ibukin te tibwanga are N na kaota iai tabeua au namakin nakoimi.
Tabeua te ririki n nako, kainnabau ao Ngai ti roko n te bukamaru ni moan aia kaotibwai ataei n ana Miutiam te Ekaretia i Salt Lake City. Ni banen te bukamaru, Beretitenti Thomas S. Monson e nakonako ni kainetiira, ao ngke e taua baiu, e taku, “Teimatoa, ao kona tokanikai”—te reirei ae tamaroa ao te koaua are, n te koaua, ti kamatoa ni kabane.
Iesu Kristo e kakoaua nakoira “ane e nanomwaaka ni karokoa te toki ao e na kamaiuaki.”1
N nanomwaaka nanona “n tiku n teimatoa inanon te kabaeaki ni kokoaua nakon ana tua te Atua n aki taratarai kariiri, kataaki, ke kaitara.”2
Riki naake a tia ni karekea te namakin n tamnei ae mwaaka ao n tia n anga aia beku ae kakaonimaki a kona n te bong teuana n tionako ke ni bwaka nakon te aki kakaonimaki ngkana aki teimatoa ni karokoa te toki. Ti na iangoia n tainako n ara iango ao inanora te kibuntaeka aei “Aio e na aki riki nakoiu.”
Ngke e reirei Iesu Kristo i Kaberenaum, “a keerikaki ana reirei aika bati, ao aikoa manga airi ma Ngaia.
“Imwiina Iesu e taku nakoia uaake tengauni ma uoman, Ao ngkami kam kan nako naba?”3
I kakoaua bwa n te bong aei, Iesu Kristo e titirakiniira ni kabane naake a tia ni karaoi berita aika a tabu ma Ngaia, “Ao ngkami kam na nako naba?”
I tataro bwa ngaira ni kabane, ma te ururing ae tamaroa ibukin bwaai ake a tauraoi ibukira ae akea tokina, ti na kona ni kaeka n ai aron Timon Betero: “Te Uea, ti na nako n antai? e mena i Roum taekan te maiu are aki toki.”4
Ti na kakaonimaki n te bwai are ti kakoaua ao ti ataia. Ngkana ti aki maiuakina te bwai are ti ataia, ti na bitaki. Taan bure ake a teimatoa inanon aia bure, ao aki rairinanoia, a na iinako riki inanon te buakaka, ni karokoa a reke iroun Tatan, riki ngkana a taotaona aia tai n rairannano, ni kabwaraaki aia bure, ao ni kakabwaiaki ma kakabwaia ni kabane ae akea tokina.
I a tia n ongo motikitaeka aika a mwaiti mai irouia naake a toki n iriira te Aro ao a tia ni kabua te taratara n te kantaninga are tera bukin mwanangara n te aonaaba aei. I kairiia bwa a na uringnga ao a na oki, ibukina bwa akea ae e kona ni karaoa angana ni birinako mairoun ara Uea, Iesu Kristo.
Ngke ti bwabeitoaki, ti karaoi berita—tiaki nakoia aomata ma nakon ara Tia Kamaiu, ni kariaia ni “katoka [iaora] aran Iesu Kristo, n teimatoa ni beku ibukina ni karokoa te toki”5
Irirakin te bootaki n toa bon teuana kiingin te kawai are ti kona iai ni katinei nanomwaakara ni beku ibukina, kakorakoraan tamneira, ao rikiraken ara onimaki iroun Iesu Kristo.
Butimwaean te toa bon te bwai ae rang ni kakaawaki are ti karaoia n te bong ae te Tabati. Te Uea e kabwarabwara te otenanti aei nakoia Ana Abotoro bon imwaain ae E mate. E karaoa naba anne iaon aban Amerika. E tuangiira bwa ngkana ti karoa te otenanti aei, e na riki bwa te kakoaua nakon te Tama bwa ti na uringnga n tainako, ao E berita bwa ti na karekea Tamneina bwa e na raoraoniira.6
N ana reirei Aramwa te teei nakon natina Tiburon, ti na karekei reirei aika wanawana ao kauring ake a na buokiira n teimatoa ni kakaonimaki nakon ara berita:
“Taraia bwa kam na aki tabekaki rake n te kainikatonga; eng, taraia bwa kam aki kamoamoa n oin wanawanami, ke ibukin mwaitin korakorami.
“Ninikoria, man tai kairoro, ao taraia naba bwa ko taotaona angin am namakin, bwa ko na kaonaki n te tangira; taraia bwa ko toki man te kabane tai.”7
Tabeua te ririki n nako, ngke I motirawa, I tangiria ni buti n te waa n te moantai. I kabooa tangoan te waa, ao ni kaonaki n te ingainga, I karuoa i taari.
Imwiin tabeua te miniti, te nao e raira te waa. Ma te korakora ae bati, n taua te kai ni buuru ni baiu teuana ao te waa n are teuana, I a kona ni karekea manga butiu.
I kataia ni manga bwennarina waau, ma ti inanon tabeua te miniti imwiina, e manga ranga naba te waa. I imanono ni kataia, ma I bon aki tokanikai, ni karokoa e roko temanna ae ataa arona e bae n tuangai bwa iai te uruaki n te bora ao te waa e bae n onrake n te ran, are e a kaangaanga bwa e na beti ao e na aki kona ni kamwakuraki. I katika te waa nako aon te bike ao ni kanakoa te bonota, ao n te koaua, e tinako te ran ae bati.
I iango bwa inanon taai ti waaki nako rinanon te maiu ma bure ake, n aron te raran ni waau, e kamemerea rikiraken te tamneira.
Ngkana ti reitinako inanon ara bure, ti mwaninga berita ake ti karaoi ma te Uea, e ngae ngke ti teimatoa n tineaki ibukin te aki baeranti man buure ake ti karaoi inanon maiura.
N ai aron te raran ni waau, te raran inanon maiura a riai n rinanoaki raoi. Tabeua buure a kantaningai mwakuri aika mwaiti nakoia tabeman bwa a na rairannano mai iai.
Ma ngaia are ti riai n titirakiniira. Ti na mena iaa ni kaineti ma anuara nakon te Tia Kamaiu ao Ana mwakuri? Ti na riki n aron Betero ngke e kakea Iesu Kristo? Ke ti a tia ni karoko n te mwaneka are ti a karekea te anua ao te nanomatoa are e karekea imwiin te “mwakuri korakora” are e karekea mairoun te Tia Kamaiu?8
Ti riai ni kataia n ongotaeka nakon tua ni kabane ao n tarataraia naake a kaangaanga iroura bwa ti na kawakiniia. Te Uea e na mena irarikira, ni buokiira inanon ara tai ni kainnano ao ni mamaara, ao ngkana ti kaota nanora ao ara mwakuri ma are e kantaningaaki, E na “kakorakorai mamaaraia nakoia.”9
Te ongotaeka e anganiira te korakora n tokanikai iaon te bure. Ti riai naba n ota bwa kataakin ara onimaki e kantaningaira bwa ti na ongotaeka, n aki ataa mwiina.
N na kaota te kawai are e na buokiira n teimatoa ni uaa te toki:
-
Ni katoa bong, tataro ao wareki koroboki aika a tabu.
-
Ni katoa wiiki, butimwaea te toa ma te nano ae uruaki ao te tamnei ae raraoma.
-
Kabwakai ara kabwianibwai ao ara aki mamatam ni katoa namwakaina.
-
Ni katoa uoua te ririki—ni katoa ririki ibukiia kairake—kabooua ara rekomente nakon te tembora.
-
Inanon nako bongin maiura, ibuobuoki n ana mwakuri te Uea.
E bia teimatoa te koaua ae korakora n ana euangkerio n tiku n ara iango, ao ti na kawakinna inanon maiura n aki uruakaki bwa e na mano mwanangara rinanon te marawa n te maiu aei.
Are tokanikai n ana kawai te Uea ao e na iai kanuangana, ao tii aron karekeana bwa kona rinanona n te bwai are e kantaningaki.
Ai kukureira Ngai ngkai ara Tia Kamaiu e nanomatoa ni uaa te toki, ni katia Ana anganano ae korakora n ana Mwakuri ni Kamaiu.
E korakai ibukin ara bure, e maraki, e rawawata, e korakai, e mamaara, ao e maaku, ngaia are E ataa arona ni buokiira, ni kaungaira, arona ni karaunanora, ao aron kakorakorakira bwa ti aonga ni kona n nanomatoa ao ni karekea te bauniuea are e kawakinaki ibukiia ake aki taenikai.
Te maiu e kaangaanga iroura n tatabemaniira. Ti bane n iai ara tai ni kataaki, ara tai ni kukurei, ara tai ni karaoi babaire, ara tai n tokanikai iaon kaangaanga, ao ara tai ni kukurei n reken tibwangara.
Tera arora are ti mena inanona, I kakoaua bwa Tamara are i Karawa e teimatoa ni kangai, “I tangiriko. I kamatoako. I raoniko. Tai bwarannano. Raira nanom ao teimatoa inanon te kawai are I a tia ni kaotia nakoim. Ao N na kakoaua nakoim bwa ti na manga kaitibo ni mweengara n te tiretio.” N aran Iesu Kristo, amen.