Nanon te Burabeti
Ti kona ni kukurei bwa ana burabeti te Uea e mena ni nnena ao e karaoaki ana mwakuri te Uea n te kawai are E a tia ni baireia.
I tataro ma nanou bwa te Tamnei ae Raoiroi e na raoniira n te bong aei n te tai ae riki aei mai karawa. Te bwai are ti kakoaua n ae bwanin e rang kakukurei bwa ka te 17 ni burabeti e a tia ni kamatoaki n te bootaki n taromauri.
Ngkai I ukora te kairiiri n ataia bwa tera atuun te reirei ae e na anganai te Uea bwa N na maroro iaona n te bong aei, e kairaki au iango nakon te maroro ae e a tibwa nako ma te Moan Beretitenti ae boou. N te kabwarabwara aei, temanna te kauntira e tibwauai taeka n aekakin naba aei: “Au kantaninga ae korakora bwa kainakin te Ekaretia e kona n oota ni korakoran te bwai ae riki ma wetean ara burabeti ae boou, Beretitenti Russell M. Nelson, ao kakawakin ma tabun te bootaki n taromauri are e na booaki n te maungatabu ni kabuta.” E taku imwiina, “E a koro 10 te ririki, ao angiina, ai moararariki kairake n te Ekaretia, aki uringnga ke a tuai n rinanon aei mai imwaaina.”
Aei e karikai bwa N na iangoi taneiai ake I a tia ni karekei. Te moan burabeti ae I uringnga bon Beretitenti David O. McKay. Bon 14 au ririki ngke e mate. I uringa namakinan te bua n irianaki ma matena, ao ranin matan tinau, ao te rawawata are a taonaki iai au utu ae bwanin. I uringnga e kanga te taeka “Taiaoka kakabwaia Beretitenti David O. McKay” n taekinaki bon man au tataro bwa ngkana I aki tabe iai, imwiin naba matena, N na kuneai ni kabonganai aekakin naba taeka akanne. I miimi ngkana au iango ma nanaou a na bitaki nakon te aekaki n namakin anne ao te onimaki ibukiia burabeti ake imwiina. Ma e kuri n aekakia kaaro ake a tangiriia natiia ni kabane, I kunea au tangira ibukin, au reitaki, ao au koaua ibukin Beretitenti Joseph Fielding Smith, are e rimwiin Beretitenti McKay, ao ibukiia burabeti ni kabane ake imwiina: Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, ao n te bong aei Beretitenti Russell M. Nelson. I kamatoaia burabeti ni kabane ma nanou ae koaua ma au kateibai—ao nanou ae tabekakirake.
Ngkai a tia ni mate ara burabeti n tatabemaniia, e bon riai bwa ti na namakina te rawawata ao te bua. Ma nanokawakira e kamarauaki n te kimwareirei ao te kantaninga are e roko ngkai ti rinanon teuana te kakabwaia ae korakora ibukin Kaokan te Euangkerio: ma weteaia ao kamatoakiia burabeti aika maiu iaon te aba.
Ibukin anne, N na taetae nakon te waaki aei ngkai e iraki n ae riaon 90 te ririki n nako. N na kabwarabwara inanon aua mwakoro: te moan, maten ara burabeti ae tangiraki ao tokin aia tai te Moan Beretitenti; te kauoua, kantaningaakin te tai ibukin manga katean te Moan Beretitentii ae boou; te kateniua, wetean te burabeti ae boou ao te Moan Beretitentii; ao te kaaua, kamatoaan te burabeti ae boou ao te Moan Bereitentii n te bootaki n taromauri.
Maten te Burabeti
N Tianuare 2, 2018, e a mate ara burabeti ae tangiraki Thomas S. Monson. E memena inanora n aki toki. Iango ake a tibwauaki iroun Beretitenti Henry B. Eyring ni maten Beretitenti Monson e kabwarabwara ara namakin ae kororaoi: “Ni kabotaua maiuna, n aron te Tia Kamaiu, bon tabeaiangana ae onoti ni karoko irouia aika kainnano, ake aoraki—ni kabane aomata—n te aonaaba ae bwanin.”1
E kamataata Beretitenti Spencer W. Kimball:
“Ngkai e inako temanna iaan te oraitan, e kaoti matan temanna, ao te mate e karika te maiu.
“Ana mwakuri te Uea bon akea tokina. E ngae ngkana e mate te tia kariiri ae mwaaka, tiaki ibukin kawaetataan te Ekaretia n akea te kairiiri, te kakaitau nakon ana katoronibwai ae akoi are e anga abanueana ae reitinako ao n teimatoa. Ngkai e a kaman riki … imwaain koron te bong aei, aomata a kaina te ruanimate, a kaoi ranninmataia, ao n tarai taai aika a na roko.”2
Te Tai Imarenan Maten te Burabeti ao Manga Katean te Moan Beretitentii ae Boou
Waakin te tai imarenan maten te burabeti are e kairiiri ao manga katean te Moan Beretitentii e atongaki bwa “maten te burabeti ao manga katean te Moan Beretitentii ae boou.” N te tai aei, te Kooram n te Tengaun ma Uoman, iaan ana kairiiri te bereitenti n te kooram, a kaai n taui kiing ni buoka kairan te Ekaretia. E taku Beretitenti Joseph F. Smith, “Iai atuun te Ekaretia n taainako, ao ngkana te Beretitentii n te Ekaretia a mwaing bwa a mate ke n iai bukina tabeua, ngkanne atuun te Ekareti are imwiina te Tengaun ma Uoman, ni karokoa are e manga kateaki te beretitentii.”3
Waakin te tai ni manga katean te Beretitentii ae boou ae nako aei e moanaki ngke e mate Beretitenti Monson Tianuare 2 ao e toki 12 te bong imwiina n te Tabati, Tianuare 14. N ingabongin te Tabati anne, te Kooram n Abotoro n te Tengaun ma Uoman a kaitibo n ruun te Salt Lake tembora ieta n tamnein te aki mamatam ao te taaro, iaan ana kairiiri Beretitenti Russell M. Nelson, te Abotoro ae e a maan ao te Bereitenti n te Kooram n Abotoro n te Tengaun ma Uoman.
Wetean te Burabeti ae Boou
N te boowi ae tabu aei man kauringaaba, n te katiteuanaaki ao n te boonnano, a tekateka Taari nakon maaniaa n nakoaia inanon 13 kaintekateka n te mronron ae uarereke a katei baia ni kamatoa manga katean te Moan Beretitentii ao imwiina ni kamatoa Beretitenti Russell Marion Nelson bwa te Beretitenti n Ana Ekaretia Iesu Kristo ibukiia Aika Itiaki ni Boong aika Kaitiria. E rimwiaki te kamatoa aei ma te Kauntira n te Tengaun ma Uoman ni kamironron ma baai aika toka iaon atuun Beretitenti Nelson, ni katabua ao ni kamatoa, ma te kabanea ni maan n Abotoro are imwiina ni mwakuri bwa bwanaana.
Ngkanne Beretitenti Nelson e araniia ana kauntira, Beretitenti Dallin Harris Oaks, Beretitenti Henry Bennion Eyring, ma Beretitenti Oaks bwa te Beretitenti n te Kooram n Abotoro n te Tengaun ma Uoman ao Beretitenti Melvin Russell Ballard bwa te Beretitenti ni Bonomwi n te Kooram n Abotoro n te Tengaun ma Uoman. N rimwian rinerine ni kamatoa aika ti te arona, a kamatoaaki Taari aikai n tatabemaniia nakon nakoaia aika karineaki iroun Beretitenti Nelson. Aio bon te namakin ae rangin tabu, ma korakoran te Tamnei inanon te roko. I angani ngkami au kakoaua bwa ana kantaninga te Uea, are ti tataroakinna ma korakorara, e oti korakorana inanon waaki ao taai ake a riki n te bong anne.
Ma katabuan Beretitenti Nelson ao manga katean te Moan Beretitentii, tokin tain maten te burabeti ao rineaia te Moan Beretitentii ae Boou, ao katean te Moan Beretitenti ae boou e moanna ni mwakuri n akea teuana naba te teekan ni katabetabe n tararuan uean te Atua iaon te aonaaba.
Bootaki n Taromauri
Te ingabong aei, te waaki ae tabu aei: iai mwiina ni kaineti ma te mwioko ni koroboki aika tabu: “Bwa a riai ni karaoaki bwaai ni kabane n aroia, ao man te bouoka ae tabangaki n te ekaretia, man te tataro n onimaki,”4 ao “teniman taan Tararua aika Ibonga aika Rietata, … a kamatoaki man nanon, ana onimaki ao ana tataro te ekaretia, are e karika ana kooram te Beretitentii n te Ekaretia.”5
E kabwarabwara Unimwaane David B. Haight te bwai are e riki mai imwaaina n te bwai ae ti iria n te bong aei:
“Ngaira taan kakoaua ao taan ira te bootaki ae tabu aei—te bootaki n taromauri ni kamwakuri bwaai mai karawa. N aron taai ake ngkoa, e mwaiti te aki mamatam ao te tataro ae karaoaki irouia Aomata aika Itiaki ni kabuta te aonaaba bwa a na karekea Tamnein te Uea, are e kakoauaki raoi… n te tai ae riki n te ingabong aei.
“Te Bootaki n Taromauri, ae kaotaki n arana, e kaota te tai ae tabu, ae karineaki, ao n rau ngke a bootaki Aomata aika itiaki iaan ana kaetieti te Moan Beretitentii.”6
Tariu ao mwaaneu, ti kona ni kimwareirei—n takaruaea “Otanna!”—bwa ana tia taetae te Uea, ana burabeti te Atua, e mena ni nnena ao e kukurei te Uea bwa e a tia raoi Ana mwakuri n te kawai are E baireia.
Beretitenti Russell M. Nelson
Te waaki ae katabuaki ae mai ieta ae kabwarabwaraaki e kaira wetean te burabeti. Ngkai Beretitenti Monosn temanna kaaina ae moan te kakannato n akoa te aonaaba aei, ao ai aron naba Beretitenti Nelson. E a kaman tauraoi ao n reireiaki iroun te Uea bwa e na kairiira n te tai aei. Ti rang kakabwaiaki ngkai n reken Beretitenti Russell M. Nelson bwa ara burabeti ae tangiraki—te ka 17 ni Beretitenti n te Ekaretia ni kabanean boong.
Beretitenti Nelson bon te mwaane ae rang kakateke. E reke au tai ni beku ma ngaia n te Kooram n te Tengaun ma Uoman bwa au beretitenti n te kooram e riaon uoua te ririki. I a tia ni mwamwananga ma ngaia ao ni miimi ni korakorana, n aron temanna ae riai ni waekoa ni mwaing ni karokoa n ana rangata! N ae bwanin e a tia ni kawari 133 aaba inanon maiuna.
E karoko irouia aomata ni kabane, ataei ao kaara. Taraan ae e ataia aomata ni kabane ao e kakateke ngkai e uringi araia. Ni kabane ake a kinaa a namakinna bwa ngaiia bon mamatennanona. Ao arona naba ma ngaira n tatabemaniira—ibukin ana tangira ae koaua ao taben nanona ibukiia aomata ni kabane.
E ngae ngke au reireitaki ma Beretitenti Nelson e riki inanon tibwangara n te ekaretia, I a a tia naba n taneiai ma te aekaki ni maiu are e kairia Beretitenti Nelson ngke e weteaki bwa te Mataniwi ni Kabuta. Ngkai e mwaiti iroumi ae ataia, Beretitenti Nelson bon te tia korokoro ae kinaaki n te aonaaba ao, ni moan ana mwakuri ni bwainaoraki, temanna te bwaeoniia ae ibuobuoki ni karaoa te mitiin ibukin te buroo. E mwakuri Beretitenti Nelson n te tiim ni kakae are e boutoka te moan korokoro iaon buroon te aomata, n te 1951, e kamanena te bwaibu ni kanakoraoa mwakurin te buroo-ao te maamaa. Beretitenti Nelson e karaoa te korokoro iaon buroon Spencer W Kimball e aki rangin maan imwaain ae e riki Beretitenti Kimball bwa te burabeti.
N aron ae e kakukurei, bwa wetean Beretitenti Nelson nakon te Tengaun ma Uoman 34 te ririki n nako e a katoka nakoana ae bwakuaku man mwaatai iaon bwainaoraki ni kamarurung ao ni karao buroo, e a reitanako ana mwakuri n te aro ae bane nanona ni kamarurungiia ao ni karaoi burooia tebwina tengaa aomata ake a tabekakirake ao ni kamarurungaki n ana taeka ao ana mwakuri, ana ibuobuoki, ao ana tangira.
Kanga Nanon Kristo
Ngkana I iangoa nanon Kristo n au mwakuri ni katoa tai, I noora Beretitenti Nelson. I tuai man kaitibo ma temanna are e kaotiota te anua aei n te rinan are rietaata riki nakon Beretitenti Nelson. E riki bwa te kaetieti ae kamiimi ibukiu n nakoau n noora nanon Beretitenti Nelsen n te moantai kanga nanon Kristo.
E aki maan imwiin weteau nakon te Tengaun ma Uoman n Okitobwa 2015, e reke au tai ni karaua n taraa maiun Beretitenti Nelson. I kaoaki bwa N na ira te bootaki ae boo ike e anganaki karineana ngkai te bwaeoniia ae te tia kororko n te buroo. Ngke I rin n te tabo anne, I miimi ngke I a nooria bwakuaku aika koro mwaitiia ikekei bwa a na karinea ao ni kinaa ana mwakuri Beretitenti Nelson are e a tia ni karaoia ririki aika mwaiti n nako mai imwaaina ngke te taokita ngaia iaon bwainaoraki ao te tia korokoro.
N te tairiki anne, a mwaiti bwakuaku n tei ao ni kaota aia karinerine ao aia tangira ibukin rianakon ana anganano Beretitenti Nelson are e karaoia n ana mwakuri ni bwainaoraki. N aron kukureira ngkai a kabwarabwara taan maroro n te tairiki anne iaon ana tokanikai Beretitenti Nelson, I a rootaki riki n ana maroro te mwaane are e tekateka irarikiu. E aki ataia bwa antai Ngai, ma e kinaa Beretitenti Nelson bwa Dr. Nelson, te tarekita ibukin te Burokuraem n taabo ni maeka ibukin te korokoro n te buua nakon te buroo n te Iuniwetiri i Utah n te Reirei n Taokita n te 1955.
Te mwaane aei bon raon n reirei Beretitenti Nelson mai imwaaina. E tibwauai ana ururing aika mwaiti. Ae kakaongora nakoiu bon ana kabwarabwara n aron tein ana anga reirei Beretitenti Nelson, are e taku bwa e uota te kinaaki ae mwaiti. E kamataata bwa mwaitin te reirei iaon te korokoro n te buroo e karaoaki n te ruu ni korokoro. Ikanne, a taraaki taan maeka ao ni karaoaki te korokoro iaan aia tararua taan kamwakuri, bwa te kiraatiruum ibukin te raeuburatori. E tibwauaia bwa te enwaromenta n te ruu ni korokoro iaan aia konabwai taan korokoro e mangaongao, e kaiangatoa, e karawawata, ao e tiorobeke. E kabwarabwara te mwaane aei kanga te enwaromenta ae kaangaanga, n tabetai naba e kamwiniba. N tokina, taan maeka aika taan korokoro a namakina aia mwakuri bwa a baireaki ni bwaai aika a riki.
E kamataata imwiina bwa te enwaromenta ae onoti e kuneaki n ana ruu ni korokoro Beretitenti Nelson. E bon rau, e mabu, ao ni karineaki. Taan maeka a butimwaeaki ma te karinerine. E ngae n anne, imwiin kaotakin te kawai aei, Dr. Nelson e kantaningaia bwa a na karaoaki kainibaire aika moan te rietaata mairouia taan maeka n tatabemaniia. E kabwarabwara e kanga mwiin te aoraki ao taan korokoro aika tamaroa aika otinako man ana ruu ni korokoro Dr. Nelson.
I aki rangin kubanako n aei. Aei te bwai ae I nooria n te moantai ao n tia ni kakabwaiaki iai n te Kooram n te Tengaun ma Uoman. Kanga I namakinna I a tia, n namakina, temanna ibuakoia “taan maeka ibukin te kataneiai.”
Iai ana kawai ae onoti Beretitenti Nelson n reirei ao ni kaetieti n te kawai ae tamaroa, ae karinerine ao ni kaunganano. Bon te aomata ae tei ibukin nanon Kristo ao te katoto ibukira ni kabane. Mai irouna, ti reiakinna bwa inanon bwaai nako ti kuneira, ara mwakuri ao nanora a kona ni booraoi ma reirein ana euangkerio Iesu Kristo.
Iai kabwaiara ae korakora ni kamatoa ara burabeti, Beretitenti Russell M. Nelson. Rinanon maiuna, e a tia ni kakorakorai ana beku aika moan te mwaiti n aron ae ataein te reirei, te karo, te burobeetia, te bumwane, te taokita, te tia kairiiri n te nakoanibonga, te tibu te unimwane, ao te Abotoro. E kakoroi bukin taian beku ngkanne—ao n reitinako ni karaoia—kanga nanon te burabeti.
Tariu ao mwaaneu, baike ti kakoauai ao n irii n te bong aei, te bootaki n taromauri, e kaira au koaua bwa Beretitenti Russell M. Nelson bon ana tia taetae te Uea ae maiu ibukiia aomata ni kabane. I reita naba au kakoaua ibukin te Atua te Tama, ibukin Iesu Kristo, ao Ana beku bwa ara Tia Kamaiu ao te Tia Kabooira. N aran Iesu Kristo, amen.