Te Tangira ae Itiaki: Bon te Kanikina ae Koaua irouia Ana Reirei ni Koaua Iesu Kristo
Ao ana euangkerio Iesu Kristo e aanaki n ana tangira te Tama ao te Tia Kamaiu ao ara tangira Ibukiia ao i bon imarenara.
Ti tangira ao n ururinga Beretitenti Monson, ao ti tangira ao ni kamatoa Beretitenti Nelson. E rangin n onoti Beretitenti Nelson irou.
Ngke te kairake n tama ngai, natira te mwaane ae uarereke, ae nimaua ana ririki, e oki man te reirei n te bong teuana ngke e titirakina tinana, “Tera ana mwakuri Tamau ae karaoia?” E kabwarabwara nakoina ae raona n reirei aika boou a moanna ni kauntaeka ibukin tamaia. Temanna e taku bwa e rangin ni kakawaki tamana n te tabo ni bureitiman, ngke are temanna e taetae ni kamoamoa ao e taku bwa e rangin ni kakawaki tamana n te kambwana ae bubura.
Ngaia are ngke e titirakinaki ibukin tamana, e taku natiu, “E mwakuri tamau n aobitin te kaombiuta.” Ngkanne, n taekinana bwa aki rangin n anaaki nanoia raoraona n ana kaeka, e reitia, “Ma ni bon arona, tamau e rangin ni kakawaki n te aonaaba.”
Au katautau bwa anne tokin te marooro.
I tuanga kainnabau, “Ti a reireinna tabeua kabwarabwaraan te babaire ni kamaiu ao antai raoi te kabanea ni kakawaki n aomata n te aonaaba.”
Ma ti reireiniia ara ataei te babaire ni kamaiu, aia tangira ibukin te Tama are i Karawa e rikirake ngkana a reiakinna bwa bon te babaire n tangira. Ao ana euangkerio Iesu Kristo e aanaki n ana tangira te Tama ao te Tia Kamaiu ao ara tangira Ibukiia ao ibukiia aomata n tatabemaniia.
E taku Unimwaane Jeffrey R. Holland: “Te moan korakora n tua ae akea tokina bon tangiran te Atua ma nanora, kantaninga, iango, ao korakorara ni kabane—anne te moan tua ae korakora. Ma te moan ni korakora ni koaua n akea tokina bwa te Atua e tangiriira ma nanona, ana kantaninga, ana iango, ao korakorana ni kabane. Te tangira anne bon aan te reirei ae akea tokina, ao e riki bwa aan reireira ni maiura ni katoa bong.”1
N riki bwa aan reireira ni katoabong, te tangira ae itiaki e bon kainnanoaki irouia ana reirei Iesu Kristo.
E reirei te burabeti Moomon, “Ngaia are, tariu aika kam tangiraki irou, tataro nakon te Tama ma korakoran nanomi ni kabane, bwa kam na kaonaki n te tangira aio, are e a tia ni katoka i aoia ni kabane ake taan irira Natina, are Iesu Kristo.”2
Te tangira bon te kanikina ae koaua ibukiia ana reirei ni koaua Iesu Kristo.
Ana reirei ni koaua a tangiria ni beku. A ataia ae te beku bon kaotakin te tangira ni koaua ao te berita ae a karaoia n te bwabetito.3 N aki taraa te wewete n te Ekaretia ke katabeaia n te kaomiuniti, a namakina te nano n tangira ao ni kan buoka te Uea ao boni ngaia n tatabemaniia.
Ana reirei ni koaua a tangira te kabwarabure. A ataia bwa Ana Mwakuri ni Kamaiu te Tia Kamaiu e kona ni kabonganaki nakon ara bure ao ara kairua ni kabane. A ataia bwa te boo are E kabwakaa bon boon bwaai ni kabane.” Angabwai n tamnei, taian roo, komition, ao tiati aika reitaki ma buure, kairua, ao mwakuri aika bure a bane n rin inanona. Ana reirei Iesu ni koaua a waekoa ni kabwarabure ao ni waekoa ni bubuti ibukin te kabwarabure.
Tariu ao mwaaneu aika tangiraki, ngkana ko korakai ni kakaea te korakora ni kabwarabure, tai iangoi bwaai ake a tia tabeman ni karaoia nakoim, ma iangoa te bwai ae e a tia ni karaoia te Uea nakoim, ao ko na kunea te rau n ana kakabwaia ni kabooira n Ana Mwakuri ni Kamaiu.
Ana reirei ni koaua a tangiria n anga ngaia nakon te Uea ma te rau inanoia. A nanorinano ao n ongotaeka ibukina bwa a Tangiria. Iai aia onimaki ni kariaia Ana kantaninga, tiaki n ae E ti karaoia ma ni kanga ao n ningai. Ana reirei ni koaua ataia bwa kakabwaia ni koaua tiaki te bwai ae a tangiria ma te bwai ae tangiria te Uea ibukiia.
Ana reirei ni koaua a tangira riki te Uea nakon te aonaaba ao a matoatoa ao n teimatoa n nene n aia onimaki. A tiku ni korakora ao ni matoatoa inanon te aonaaba ae bibitaki ao ni kamangaongao. Ana reirei ni koaua a tangiria n ongora nakon bwanaan te Tamnei ao burabeti ao aki kamangaoaki ma bwanaan te aonaaba . Ana reirei ni koaua a tangiria n tiku n taabo aika tabu”4 ao n tangiria ni karaoia bwa e na tabu. Te tabo are a nako iai, a uota ana tangira ao ana rau te Uea nakon nanoia tabeman. Ana reirei ni koaua a tangiria ni karinei ana tua te Uea, ao a karinei bukina bwa a tangira te Uea. Ngkana a tangiria ao ni kawakin aia berita, a kaboouaki nanoia ao kateia a bitaki.
Te tangira ae itiaki bon te kanikina ae koaua irouia ana reirei ni koaua Iesu Kristo.
I reirei te tangira ae itiaki mairoun tinau. Bon tiaki kain te Ekaretia.
Te bong teuana, n ririki aika mwaiti n nako, I kawara tinau, are e aorakina te kaentia. I ataia ae na mate, ma I tabeaianga bwa e korakai. Akea te bwai ae I taekinna, ma kinakiu raoi irouna, ao e taku, “I noria bwa ko tabeaianga.”
Ni miimiu, e titirakinai ma te bwanaa ae maraara, “Ko kona n reireinai n tataro? I tangiria n tataro ibukim. I ataia bwa ko moa n taekina ‘Te Tama ae Tangiraki i Karawa,’ ma tera ae I riai n taekinna imwiina?”
I katorobubua irarikin ana kainiwene ao e tataro ibukiu, I namakina te tangira ae I tuai n namakinna mai imwaina. E bebete, e koaua, te tangira ae itiaki. E ngae ngke e aki ataa te babaire ni kamaiu, iai ana babaire ae onoti n tangira, iroun te tina ibukin natina te mwaane. E rootaki n te maraki, ni kekeiaki ni kakaea te korakora n tataro. I kuri n aki kona n ongo bwanaana, ma I namakina ana tangira.
I uringnga n iango, “E kanga te aomata ae korakora marakina n tataro ibukin temanna? Boni ngaia temanna ae kainnanoia.”
E roko te kaeka ae mataata nakon au iango: te tangira ae itiaki. E rangin tangirai are e a mwaninga iai taekana. N ana tai ae rangin ni kaangaanga, e tangirai riki nakon are boni tangirakina.
Ngkai, tariu ao mwaaneu aika tangiraki, tiaki aei te bwai ae karaoia te Uea? Ngaia anne, inanon te taratara are akea tokina ao e rababa riki. Ma inanon marakina ae E moan te korakora, n te onaroka n te tairiki anne, boni Ngaia ae kainnanoa te ibuobuoki, ni korakai n te kawai are tiaki kona n iangoia ke n ataia. Ma n te kabane, E mwaninga Taekana ao e tataro ibukira ni karokoa E kabooa ni boona ae kororaoi. E kanga ni kona ni karaoia? Ibukin Ana tangira ae itiaki ibukin te Tama, are E kanakoa, ao ibukira. E tangira te Tama ao ngaira riki nakon ae bon Ngaia.
E kabooa te bwai ae E tuai karaoia. E kabooi buure aika E tuai karaoi. Bukin tera? Te Tangira ae Itiaki. Ngke e a tia ni kabwaka boona ae bwanin, E a tauraoi n anganiira te kakabwaia n te bwai are E kabooa ibukina, ngkana ti na rairinanora. Bukin tera E anga te bwai aei? Te tangira ae itiaki.
Te tangira ae itiaki bon te kanikina irouia ana reirei ni koaua Iesu Kristo.
E taku Beretitenti Thomas S. Monson: “Ti nang waaki ngkai, n te bong aei, ni kaota te tangira nakoia natin te Atua, bwa tao kain ara utu, raoraora, ara reitaki, ke irua ni kabane. Ngkana ti uti ni katoa moaningabong, ti riai n iangoia ni kaeka ma te tangira ao te akoi nakon te bwai ae kona n riki.”5
Tariu ao mwaaneu, ana Euangkerio Iesu Kristo bon te euangkerio n tangira. Te kabanea ni korakora n tua bon te tangira. Irou, te kantaninga ibukin te euangkerio bon taekan te tangira. Ana tangira te Tama, are e anga karea iroun Natina ibukira. Ana tangira te Tia Kamaiu, are e anga karea ni kabane ibukira. Tangiran te tina ke te karo are e na anga te bwai ibukin natiia. Tangiraia naake a beku n aki ataaki n aia mwakuri ao n aki kinaaki nakoia angiira ma a kinaaki iroun te Uea. Tangiraia naake a mwaninga taekan bwaai ni kabane ao n tainako. Tangiraia aomata ake anga ae mwaiti riki nakon are a karekea.
I tangira Tamau are i Karawa. I tangira au Tia Kamaiu. I tangira te euangkerio. I tangira te Ekaretia. I tangira au utu. I te tangira te maiu ae kakukurei aei. Irou, bon te kantaninga ibukin te tangira.
Au kantaninga bwa te bong n ururinga Mangautin te Tia Kamaiu e na riki bwa te bong ni kaboouan tamneira. Au kantaninga bwa e na riki te bong aei bwa moan te maiu ae onrake n te tangira,“aan maiura ni katoabong.”
Au kantaninga bwa a na kaonaki nanora ma ana tangira Kristo ae itiaki, te kanikina ni koaua irouia Ana reirei ni koaua Iesu Kristo. Aio au tataro n aran Iesu Kristo, amen.