te ataeinnaine ae kamatebwai

Beberuare 28

Tera ae Nanonaki bwa Ko na Raira nanom?

Reirei ao Berita aika Tabu 18–19

te aikaon ibukin te uaia ni marooro

Uaia ni Marooro

Kairaki iroun kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro ibukin bwaai n aron akana imwiina, ao bairei kawai ake kona mwakuri iaon ake ko maroroakin (ko kona ni baireia tera bwaai ake a na maroroakinaki inanon te boowi ni beretitentii):

• Ara kooram ke ara kiraati. Antai aika a boou n ara uoote, ao ti na kanga ni kaotia nakoia bwa a butimwaeaki? Tera ae ti karaoia bwa e aonga ni manena ara tai n ara kooram ke ara kiraati?

• Ara beku ke mwiokoara. Baikara katabeara ao tibwangara ngkai ataeinimwane ao ataeinnaine ngaira? Ti na kanga ni kakoroi nanoia?

• Maiura. Tera ae ti karaoia bwa ti aonga ni katotonga riki Iesu Kristo ao ni karekea Mwakana inanon maiura? Tera ae ti karaoia ni buokiia ara utu n roko Nakoina?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon te baire ao te kakao are a karaoia n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

E kaangaanga warekan Reirei ao Berita aika Tabu 19:16–19 ao n aki namakina ana tangira te Tia Kamaiu ibukira. Inanon kiibu aikai, E kabwarabwara te korakai are E rinanona ngkai E mate ibukin ara bure ao ni kaotia bukin tera ngkai E tauraoi ni karawawataaki n ae moan te korakora—“bwa [ti] aonga n aki karawawataaki ngkana [ti] rairi nanora.” Te rairannano bon te kakabwaia are e reke mairoun te Tia Kamaiu. Bon te mwakuri ae reitinako, ni katoa bong ni kararoaira man te bure ao n oki nakon te Atua. Bon mwakoron ana babaire Tamara are i Karawa ni buoka okira Nakoina. N ataakina bwa e kanga te rairannano ni kona ni buokiira ni kaitiakaki man ara bure, ni bitii nanora ao ara iango, ao ni kaniaki riki ma te Atua.

E kanga te rairannano n tia ni buokiko ni kaniaki riki ma Tamara are i Karawa? Ko na kanga ni buokiia naake ko reireiniia n tangiria bwa a na rairi nanoia? Ko na kanga ni buokiia n nooria bwa te rairannano bon te mwakuri ae katoa bong karaoana ao tiaki tii te kawakinaki ibukin bure aika kakaiaki? Ngkai ko katauraoi n anga reirei, iangoia kamatebwaia ana rongorongo Beretitenti Russell M. Nelson “Ti Kona ni Karaoa ae Tamaroa ao ni Katamaroa Riki” (Riaona, Meei 2019, 67–69).

Iesu Kristo ngke e tataro

Kristo i Ketetemwane, iroun Harry Anderson

Te Uaia n Reirei

Ni kabane burabeti ni moan rikin te aonaaba a kaungai nanoia aomata bwa a na rairi nanoia. E ngae n anne, tao akea te kakao nakon te rairannano bon te bwai ae korakora te namakin iai n aron ana namakin te Tia Kamaiu are e kuneaki n Reirei ao Berita aika Tabu 19:15–19, are a bae n tia ni warekia kairake. Ko kona n titirakiniia tera ae a reiakinna ibukin te Tia Kamaiu man kiibu aikai. Tera ae a taekinaki ni kiibu aikai ni kakawakin te rairannano imatan te Uea? Iango akana imwiina a kona ni buokiia naake ko reireiniia n taraa te rairannano bwa te kakabwaia ni katoa bong inanon maiuia.

• Ni buokiia kaain te kooram ke kaain te kiraati ni kamatataaki bwa e kanga te rairannano ni kakabwaiai maiuia, ko na moanna man atongan titiraki aikai: N na kanga n ataia ngkana au kekeiaki n raira nanou e mwakuri? E na kanga ni buokai te Tia Kamaiu ni bitaki? N raonaki ma kabwaraakin buure, tera tabeua kakabwaia aika a roko man te rairannano? Kaoiia kaain te kiraati bwa a na wareka teuana ke ae mwaiti riki man koroboki aika tabu inanoin “Reitan Bwaai n Mwakuri,” ni kakaei kaekaan taian titiraki. Tera ae a kunea? Ngkai e riki bwa mwakoron te kabwarabwara aei, ko kona ni kaota te witeo: “Repentance: A Joyful Choice” (ChurchofJesusChrist.org).

• Angiina aomata aika kairake a aki rangi ni mataata raoi bwa tera ae nanonaki n te rairanano. A na bae ni maaka te rairannano ke n taku bwa e tii kaeinetinakon buure aika kakaiaki. Ni buoka kaetan te aki mataata aei, ko kona ni kaoiia kaain te kooram ke te kiraati bwa a na kamatebwaia mwakoron ana rongorongo Beretitenti Russell M. Nelson “Ti Kona ni Karaoa ae Tamaroa ao ni Katamaroaki Riki” (Riaona, Meei 2019, 67–69), ni kakaei kibuntaeka are a na buokaki iai ni kamataataki tera ae nanonaki n te rairannano. Tera ae a kunea are e buokiia n iangoa taekan te rairannano n te anga ae boou? Tera kakabwaia are e beritani Beretitenti Nelson nakoia naake a rairi nanoia?

• Ko na kanga ni buokiia naake ko reireiniia ni kamatataaki riki bukin tera ao ti na kanga n rairi nanora? Ana rongorongo Beretitenti Dallin H. Oaks “Kaitiakaki man te Rairannano” (Riaona, Meei 2019, 91–94) e kona n ibuobuoki. Ko kona ni bwenaua te kooram ke te kiraati nakon aua te kurubu ao ni katabeia kurubu n tatabeua bwa a na wareka teuana mai buakon mwakoron ana marooro Beretitenti Oaks. A kona kurubu n tatabeua ni kaota aia tiamwarii ibukin baike a warekia nakoia kurubu ake tabeua, n raonaki ma kiibu nako man te rongorongo are e boutoka te bwai are a reiakinna. Ko kona ni kainna man titirakiniia kaain te kooram ke te kiraati bwa a na tibwaua aia koaua ibukin kakawakin te rairannano n ana babaire te Atua.

Mwakuri inanon te Onimaki

Kaungaiia kain te kooram ke te kiraati ni iangoia ao korea mwiin te bwai are a na karaoia ni karaoa nanon te namakin are a karekea n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwa aia iango.

Reitan Bwaai ni Mwakuri

• 2 Nibwaai 31:13; Enoti 1:5–9; Motiaea 4:9–12; 27:23–26, 35; Aramwa 19:33; 36:18–21, 24; 37:9; Ereman 15:7–8; Moronaai 6:8; Reirei ao Berita aika Tabu 58:42–43; 64:9–10 (Koroboki aika tabu ibukin taekan te rairannano)

• Reirei ao Berita aika Tabu 18:10–16 (Te rairannano e uota te kimwareirei)

• “Rairannano,” inanon Ibukin Kakorakoraia Kairake (2011), 28–29

• Te Mangauti, Kamaiuaki, ao te Karietataaki,” ni mwakoro 3 n Taetaekina Au Euangkerio (2019), 62–63

• “Repentance Is a Blessing to All of Us,” “Atonement—Not a One-Time Thing” (witeo), ChurchofJesusChrist.org

Reirei n ana Kawai te Tia Kamaiu

Te Tia Kamaiu e kaoiia tabeman bwa a na mwakuri inanon te onimaki ao ni miauakin reirei ake E taekin. Tera ae ko kona ni karaoia ni buokiia naake ko reireiniia n noora mwaakan te rairannano ni katoa bong? (Taraa Reirei n ana Kawai te Tia Kamaiu [2016], 31, 35.)