Maati 14

A Kanga Tabeia Mai Ieta Mwane ao Aine n Nakoraoi Imarenaia?

Reirei ao Berita aika Tabu 23–26

Te Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Kooram n te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro ibukin bwaai n aron akana imwiina, ao bairei kawai ake kona karaoi ni bwaai ake ko maroroakin (ko kona ni bairei bwaai ake a na maroroakinaki inanon te boowi ni beretitentii):

• Ara kooram ke ara kiraati. Antai ae e kainnanoa ara ibuobuoki ao ara tataro? Tera ae ti kona ni karaoia ni buokiia iai? Antai ae tina kaoa nakon te waaki ni kakukurei ae e na roko?

• Ara beku ke mwiokoara. Tera katabeara aika ti a tia ni kakoroi nanoia? Tera katabeara aika ti riai ni karaoi? E kanga aron kaoakiia tabeman nakon Kristo, ao ti na kanga ni kaoiia ngkai?

• Maiura. Tera te bwai ae ti a tia n rinanona mai mwaina ae e a tia ni kakorakora ara koaua? Baikara bwaai aika a riki inanon maiura, ao ti na kanga ni kateimatoaira ibon imarenara?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Tamara are i Karawa e anganiia mwaane ao aine tabeia aika kakaawaki ni kakoroa nanon Ana babaire. Taabe aikai a nakoraoi imarenaia. Ni buokiia mwaane ao aine ni kakoroi nanon kouru aikai, E anganiia bwai n tangira ao konabwai aika a onoti. A na bae kaain te kooram ke te kiraati n tia ni kamatebwaia Reirei ao Berita aika Tabu 25 n te wiiki aei. N te kaotioti aei, te Uea e anga reirei nakon Emma Smith iaon ana mwakuri ae kakaawaki ni Kaokan te euangkerio ao ni kabwarabwara bwa e kanga Iotebwa ao Emma ni boutokaia n tatabemaniia. Tera katooto aika koa tia n noori irouia mwaane ao aine ni uaia ni mwakuri ni kawai aika ibuobuoki ni karaoa ana mwakuri te Uea? Ko na kanga ni kaunga te ataeinimwaane ao te ataeinnaine are ko reireinna bwa e na ataa tabena mai ieta ao ni uaia ni mwakuri ni katea abanuean te Atua?

Ngkai ko katauraoi n anga reirei, iangoia n rinanon “Te Utu: Te Katanoata nakon te Aonaaba”” (ChurchofJesusChrist.org) ao Ana rongorongo Titita Linda K. Burton “Tina Ikotaki n Rierake” (Riaona, Meei 2015, 29–32).

A kona ataeinimwaane ao ataeinnaine n reiakinna ni uaia ni mwakuri ni katea abaneuan te Atua.

Te Uaia n Reirei

Ni moana te marooro bwa a na kanga mwaane ao aine ni uaia ni mwakuri ni katea abaneuan te Atua, iangoia ni kaoia kaain te kooram ke te kiraati n rinanon Reirei ao Berita aika Tabu 25. Tera ae taekinna te Uea ibukin te tabe are e a tia Emma ao Iotebwa ni karaoia imarenaia? Tera ae ti kona n reiakinna man mwakoro 25 bwa a kanga bumwaane ao buaine n riai ni bootaki ni mwakuri? Ko kona n anganiia naake ko reireiniia tabeua beeba bwa a na korea te bwai ae a kunea ao tuangiia bwa ana tibwauai aia iango. Ngkanne rineia mai ibuakon waaki ni kakukurei aikai ni buokiia n ataia raoi bwa e kanga te Atua ni kantaningaia Natina mwaane ao aine ni bootaki ni mwakuri.

• Ko kona n iangoa te katooto ni buokiia kaain te kooram ke te kiraati n ataia bwa tera nanon te taeka ae “boutokaia”? N aron te katooto, a kona n taetae iaon kaara aika renganaki ke ni maroroakina aron kakaokoron bwanaa n te kuaea ni kanakoraoa te katangitang. A kanga tabeia mwaane ao aine mai ieta n nakoraoi bon imarenaia? N te kooram ke te kiraati, bootaki ni wareki moan barakarabe ake uoua n te mwakoro ae atunaki “Lifting and Helping in Our Complementary Roles” man ana rongorongo Beretitenti Linda K. Burton “Tina Ikotaki n Rierake” (Riaona, Meei 2015, 30). Ke ko kona ni kaoia taanga bwa ana nakon am kooram ke te kiraati ao ni kabwarabwara bwa a kanga n tia n ibuobuoki bon imarenaia ni kakoroa nanon tabeia ao e kanga te Uea n tia ni buokiia. Tera ae ti reiakinna, man ana rongorongo Beretitenti Burton ke te taanga, bwa a kanga mwaane ao aine ni boutokaia imarenaia n utu nako?

• Kiibu aika koreaki n “Reitan Bwaai n Mwakuri” a kona ni buokiia kaain te kooram ke te kiraati n reiakina riki tabeia mwaane ao aine inanon te utu. Ko kona ni katabeia kaain te kooram ke te kiraati ni wareka teuana mai ibuakon kiibu man koroboki aika tabu aikai. Kaoia bwa ana tibwauai aia kibu ao n taetae iaon tabeia ake a kabwarabwaraaki. Tera ae a reiakinna kiibu aikai iaon tabeia kaaro? A kanga buumwaane ao buuaine ni buokiia bon irouia ni kakoroi nanon katabeaia mai ieta aikai? E na kanga te Tia Kamaiu ni kona ni buokiia bwa a na kakoroa bukina? A kanga ataei ni kona ni buokiia?

• Ni buoka am kooram ke am kiraati n ataia bwa a kanga mwaane ao aine ni kona ni buokiia bon irouia bwa raao aika ti tebo aroia, koroi taeka aikai iaon te burakibooti: Taben te Karo ao Taben te Tina. Tuangiia kaain te kooram ke te kiraati bwa ana kamatebwaia te kaitiua ni barakarabe n “Te Utu: Te Katanoata Nakon te Aonaaba” ao koroi bwaai aika a kunei iaan atuuia ake a tia ni baireaki. Tera ae ti reiakinna n tabeia kaaro ao tiina mai ieta? Tera ae nanonaki ae kaaro ao tiina a na uaia n ibuobuoki imarenaia “bwa raao aika ti tebo aroia” ni kakoroi nanon tabeia? Tera katooto aika ti kona n tibwauai man maiura are e na kaotia bwa a tia kaaro ao tiina ni kakoroi nanon tabeia ao n uaia n ibuobuoki bwa raao aika ti tebo aroia? Kam kona naba ni maroroakin kawai aika a kona kairake n aomata ni katauraoi ngkai ibukin mwioko aikai nakon taai aika ana roko.

Mwakuri inanon te Onimaki

Kaungaiia kain te kooram ke te kiraati ni iangoia ao ni korea mwiin te bwai are a na karaoia ni karaoi nanon namakin ake a karekei n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwauai aia iango.

Reitan Bwaai n Mwakuri

• Taeka n Rabakau 22:6; Reirei ao Berita aika Tabu 68:25–28; 121:41–43 (Tabeia kaaro)

• I-Ebeto 5:25; Mote 3:21–24; 5:1–12 (Bumwaane ao buaaine a uaia ni mwakuri bwa raao aika ti te arona aroia)

• Jean B. Bingham, “Katiteuanaaki ni Kakoroan Nanon Ana Mwakuri te Atua,” Riaona, Meei 2020, 60–63

• “The Women in Our Lives,” “Let Us Be Men” (witeo), ChurchofJesusChrist.org

Anga Reirei n Ana Kawai te Tia Kamaiu

E katauraoia te Tia Kamaiu naake E reireiniia ao n anganiia tabeia aika kakaawaki. Ko na kanga ni katauraoia naake ko reireiniia bwa a na uaia ni mwakuri bwa natin te Atua mwaane ao aine? (Taraa Reirei n Ana Kawai te Tia Kamaiu [2016], 27–28.)