agtutubo a babbai iti klase

Panangusar iti Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women

Ania dagiti panggep dagiti miting ti korum ken klasetayo?

Inikkannakayo ti Apo iti sagrado a panagtalek: Inawagannakayo nga agserbi iti panguluen iti korum iti Aaronic Priesthood ken panguluen iti klase ti Young Women. Paset ti pagrebbenganyo ti mangidaulo ken mangiturong kadagiti miting ti korum wenno klaseyo iti Domingo. Tapno maaramid daytoy, makatulong no maawatanyo no apay nga addaantayo kadagitoy a miting.

Dagiti miting ti korum ti Aaronic Priesthood ken klase ti Young Women ket maiduma kadagiti klase iti Simbaan kas iti Sunday School wenno seminary. Kadagiti miting ti korum wenno klase, ad-adda pay ti aramidentayo ngem iti agadal iti topiko ti ebanghelio. Masursurotayo maipanggep iti aramid nga inted ti Dios kadatayo, ken buklentayo dagiti miembro ti korum wenno klasetayo a manngaramid dayta a trabaho kadagiti pagtaengantayo, iti Simbaan, ken iti komunidadtayo. Kas pagarigan, planuentayo, no kasano a maipatungpaltayo dagiti akemtayo kas paset ti buyot dagiti agtutubo ti Apo a tumulong a mangummong iti Israel. Kadagitoy a miting, saantayo laeng a pagsasaritaan maipapan iti trabaho—agplanotayo pay a mangaramid iti daytoy.

agtutubo a lallaki iti klase

Ngem daytoy a panangyunay-unay iti aramid saan a kayat a sawen nga iti Sunday School laeng a paglilinnawagantayo ti maipapan iti doktrina. Kinapudnona, napateg ti panagsursuro iti doktrina kadagiti miting ti korum ken klase ti Young Women—matulongannatayo a makaawat kadagiti gapu no apay nga aramidentayo ti trabaho. Bayat ti aggigiddan a panagadaltayo iti ebanghelio, mabalbaliwan dagiti pusotayo gapu kadagiti kinapudno a masursurotayo. Makaawattayo kadagiti parikna maipapan kadagiti wagas a mapadur-as “iti kinasirib ken kinatayag, ken ti gundaway iti Dios ken iti tao” (Lucas 2:52). Bayat ti panagbalintayo nga ad-adda a napasurot ken ni Jesucristo ken iti ebangheliona, mariknatayo dagiti tarigagay a tumulong iti dadduma nga agturong iti dana ti katulagan, pakairamanan dagiti pamiliatayo, gagayyemtayo, ken padatayo a miembro ti korum ken klase.

Asino ti mangidaulo kadagitoy a miting?

Inawagannakayo ti Dios kas panguluen ti korum ken klase ket inikkannakayo ti turay a mangidaulo. Dayta ti gapu no apay a tunggal miting ti korum wenno klaseyo ket nasken nga iturong ti maysa a miembro ti panguluen ti korum wenno klaseyo. Nasken a mangidiaya dagiti nataengan iti pannarabay ken suporta, ngem nasken a saanda nga aramiden para kadakayo. Kitaen iti benneg a napauluan iti “Agiinnuman” iti rugi ti tunggal balabala iti daytoy a resource para kadagiti kapanunotan a mangtulong kadakayo a mangammo no kasano ti mangidaulo iti maysa a miting ken mangipatungpal kadagiti pudno a panggepna. Usaren dagiti miting ti panguluen nga agplano no kasano nga iturongyonto dagitoy a miting iti Domingo.

Siasino ti nasken a mangisuro iti adalen?

Mabalin a mangisuro kadagiti adalen dagiti nataengan a lider, maysa a miembro ti panguluen ti korum wenno klase, wenno asino a miembro ti korum wenno klase. Kas panguluen ti korum wenno klase, makiuman kadagiti nataengan a lideryo maipanggep no siasino ti nasken a dutokan a mangisuro kadagiti adalen. Laglagipenyo nga adu ti maidiaya dagiti nataengan a lideryo. Agkalikagum nga agsursuro manipud kadagiti padas ken pammaneknekda. Adda pay dagiti pagsayaatan no idawat kadagiti agtutubo a mangisuroda—ti panangisuro ket makatulong a mangpauneg iti kumbersionda ken mangbangon iti natibtibker a panaglalangen kadagiti dadduma a miembro ti korum wenno klase. Isu nga ikkanyo ida kadagiti maitutop a gundaway a mangisuro iti amin wenno paset ti adalen, ngem laglagipenyo dagiti kasapulan ken kabaelan dagiti tao iti korum wenno klaseyo. Kas pagarigan, ad-adda a masansan a makaisuro dagiti nataengan a lider kadagiti korum wenno klase a kadua dagiti naub-ubing nga agtutubo wenno kadua dagiti agtutubo a nakurang pay laeng ti padasna iti panangisuro ti ebanghelio. No maawis dagiti agtutubo a mangisuro, nasken a tulongan ida nga agsagana ti maysa a nagannak wenno ti maysa a nataengan a mamalbalakad no kasapulan.

Mabalin nga usaren dagiti napusgan a mangisuro iti benneg a napauluan iti “Isuro ti Doktrina” iti tunggal balabala itoy a resource tapno mangtulong kadakuada nga agsagana. Naglaon daytoy a benneg kadagiti singasing para iti panagisuro ken panangilawlawag iti doktrina para iti dayta a lawas, ngem nasken a saan koma a marikna dagiti mannursuro a limitado dagitoy a singasing. No iturong ti Espiritu, mabalin nga ibagay dagiti mannursuro dagitoy a kapanunotan wenno usarenda ti bukodda a mangisuro iti wagas a kasayaatan a makaited kadagiti kasapulan dagiti miembro ti korum wenno klase ket tulonganda ida a makaawat iti doktrina.

Ania dagiti topiko a mainaig iti doktrina a paglilinnawagantayonto kadagiti mitingtayo?

Ti topiko iti balabala ti tunggal lawas ket maysa a pagbatayan a mainaig iti doktrina a napili a mainugot iti panagbasa iti Doktrina ken Katulagan a naisingasing iti dayta a lawas, a masarakan iti Umaykayo, Sumurot Kaniak—Para Kadagiti Indibidual ken Pamilia. Iti kastoy a wagas, dagiti panaglilinnawag a mainaig iti doktrina kadagiti miting ti korum ken klase ti mangsuportanto no ania ti masursuro dagiti agtutubo iti pagtaengan.

Nupay nasken a maisuro dagiti balabala kadagiti maitudo a Domingo, mabalinyo latta met ti mangisuro kadagiti sabali pay a topiko a mainaig iti doktrina a maibatay kadagiti kasapulan ti korum wenno klaseyo.

Nairaman iti daytoy a resource dagiti balabala para iti tunggal lawas no maangay dagiti miting ti korum ti Aaronic Priesthood wenno klase ti Young Women. No dadduma, kasapulan a laktawanyo ti maysa nga adalen gapu iti komperensia ti stake wenno sabali pay a gapu.

Ania ti akem dagiti nataengan a lidertayo?

Napateg ti papel nga ak-akmen dagiti nataengan a lider kadagiti korum ti Aaronic Priesthood ken klase ti Young Women. Isuda ti mangiwanwan ken mangbalakadto kadakayo kadagiti takemyo a mangidaulo. Suportaran ken paregtaendakayonto bayat ti panangaramidyo iti trabaho iti korum wenno klaseyo. Suruandakayonto iti doktrina, ken bendisionandakayonto babaen ti pagwadan, padas, ken pammaneknekda.