Ni Joseph Smith nga agkarkararag

Nakakitaak iti Lawag, ni Jon McNaughton

Enero 10

Apay a Napateg ti Umuna a Parmata?

Pakauna iti Doktrina ken Katulagan; Joseph Smith—Pakasaritaan 1:1–26

icon ti panagiinnuman

Agiinnuman

Idauluan ti maysa a miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Korum ti Aaronic Priesthood wenno ti Tema ti Young Women. Kalpasanna mangidaulo iti panaglilinnawag maipapan kadagiti banag kas iti sumaganad, ken mangplano kadagiti wagas a pangaramidan iti no ania ti paglilinnawaganyo (mabalinmo nga ikeddeng iti miting ti panguluen no ania dagiti banag a paglilinnawaganyo):

• Ti korum wenno klasetayo. Asino ti agkasapulan iti tulong ken karkararagtayo? Ania ti maaramidtayo a mangtulong kadakuada? Asino ti nasken nga awisentayo iti daytoy umay nga aktibidad?

• Dagiti pagrebbengan wenno responsibilidadtayo. Ania dagiti naituding nga aramiden a naipatungpaltayon? Ania dagiti naituding nga aramiden a nasken nga aramidentayo? Kasano nga inawistayo dagiti dadduma nga umasideg ken ni Cristo, ken kasano a maawistayo dagiti dadduma itan?

• Ti biagtayo. Ania dagiti nabiit pay a padas a nangpapigsa kadagiti pammaneknektayo? Ania ti mapaspasamak iti biagtayo, ken kasano a makapagsisinnuportatayo iti tunggal maysa?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Nupay nasuroken a 200 a tawen manipud pay idi umuna a nagparintumeng ni Joseph Smith tapno agkararag iti Sagrado a Kakaywan, ti sungbat a naawatna ti napalaus a mangapekto iti biagtayo iti agdama. Utobem dagiti bendision nga umay iti biagmo gapu ta nagpakita ti Ama ken ti Anak ken ni Joseph. Apay a napateg para kadagiti sursuruam a manggun-od iti bukodda a panagsaksi iti Umuna a Parmata manipud iti Espiritu Santo? Kasano a matulongamto ida a mangaramid iti daytoy? Mabalin a makatulong daytoy nga irebyum dagiti mensahe manipud iti sapasap a komperensia ti Abril 2020, a manglaglagip iti maika-200 nga anibersario ti nadayag a parmata.

agtutubo a babbai iti klase

Makaawat ti tunggal agtutubo iti bukod a pammaneknek maipapan iti Umuna a Parmata.

Aggigiddan a Masursuruan

Gapu ta agtutubo idi ni Joseph Smith iti panawen ti Umuna a Parmata, mabalin a kabaelan dagiti sursuruam a mangisarita iti panagsukisokna iti kinapudno. Ikkam dagiti miembro ti korum wenno klase iti sumagmamano a kanito a mangibinglay kadagiti kapanunotan ken impresionda maipapan iti Joseph Smith—Pakasaritaan 1:1–26. Makatulong kadakuada dagiti aktibidad iti baba a mangpapigsa kadagiti pammaneknekda a nagparang ken ni Joseph Smith ti Dios Ama ken ni Jesuscristo.

• Ania dagiti masursurotayo a kinapudno iti ebanghelio manipud iti padas ni Joseph Smith iti Sagrado a Kakaywan? Mabalin a basaen dagiti miembro ti korum wenno klase ti pakaammuan ni Joseph iti Joseph Smith—Pakasaritaan 1:7–20 ken mangibinglay kadagiti kinapudno a masarakanda. (Kas pagarigan, denggen ken sungbatan ti Dios dagiti kararag; pudno ni Satanas ken ti bilegna, ngem dakdakkel ti bileg ti Dios; saan pay a nagsardeng ti paltiing.) Kasano a nangbendision dagitoy a kinapudno iti biagtayo?

• Mabalin pay nga idawatmo kadagiti miembro ti korum wenno klase a mangrebyu kadagiti mensahe maipapan iti Umuna a Parmata manipud iti Abril 2020 sapasap a komperensia (kitaen iti Liahona, Mayo 2020). Kas pagarigan mabalinda nga irebyu ti mensahe ni Presidente Russell M. Nelson “Hear Him” (Liahona, Mayo 2020, 88–92). Awisem ida a mangibinglay no ania ti masarakanda ken ti riknada maipapan iti Umuna a Parmata.

• Pinaneknekan ti tunggal maysa kadagiti Presidente ti Simbaan maipapan iti nadiosan a mision ni Propeta Joseph Smith. Mabalin a pagsayaatan dagiti miembro ti korum wenno klase ti panangbasa kadagiti pammaneknekda iti maysa kadagiti Teachings of Presidents of the Church a manual. (Naglaon ti kaaduan kadagitoy a manual iti maysa a kapitulo maipapan ken ni Propeta Joseph Smith. Para iti listaan dagitoy a kapitulo, kitaen iti Gospel Topics, “First Vision,” topics.ChurchofJesusChrist.org.) Sumagmamano nga aldaw sakbay ti klase, mabalinmo nga awisen dagiti miembro ti korummo wenno klasem a pumili iti maysa kadagitoy a Presidente ken mangibinglay iti palawag nga insawangna a mabalinda nga usaren a mangisuro iti maysa a tao maipapan iti Umuna a Parmata.

• Ibilangmo ti panangawis kadagiti miembro ti korum wenno klase a mangadal iti “The Restoration of the Gospel of Jesus Christ through Joseph Smith” iti kapitulo 3 ti Preach My Gospel ([2019], 36–38) ken mangsanay iti panangisuro iti tunggal maysa maipapan iti Umuna a Parmata. Mabalinmo a kariten ida a mangibinglay iti padas ni Joseph Smith a mangus-usar ti sumagmamano kadagiti bukodna a balikas, a masarakan iti Joseph Smith—Pakasaritaan 1:16–17.

• Ammo kadi dagiti sursuruam nga adda sumagmamano a pakaammuan maipapan iti Umuna a Parmata? Mangipaay ti tunggal maysa kadagitoy a pakaammuan kadagiti naidumduma a detalye a mangted iti ad-adda a naan-anay a pannakaawat iti no ania ti napasamak iti Sagrado a Kakaywan. Mabalinmo a gupgopen ti “Overview” a benneg ti Gospel Topics essay “First Vision Accounts” (topics.ChurchofJesusChrist.org). Kalpasanna mabalinmo nga idawat kadagiti sursuruam a mangrebyu kadagiti pakagupgopan ti uppat a pakaammuan a masarakan iti babaen ti “Accounts of the First Vision.” Mabalinda pay a basaen ti sumagmamano kadagiti pudno a pakaammuan babaen ti panangusar kadagiti link a naited. Ania ti nasarakanda a mangpapigsa iti pammaneknekda maipapan iti Umuna a Parmata? Mabalinyo met a buyaen ti video “Ask of God: Joseph Smith’s First Vision” (ChurchofJesusChrist.org), a mangiladawan iti Umuna a Parmata babaen ti panangusar kadagiti detalye manipud kadagitoy a pakaammuan. Apay a nasayaat a maaddaan kadagiti sumagmamano a pakaammuan maipapan iti Umuna a Parmata? Kasano a matulongannatayo dagitoy a pakaammuan a makaawat a nasaysayaat iti Nailangitan nga Ama ken ni Jesucristo?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. Kasano a mainaig ti adalen ita nga aldaw kadagiti bukod a panggep a tun-oyen nga inaramidda? No kayatda, mabalin nga ibinglay dagiti miembro ti korum wenno klase dagiti kapanunotanda.

Dagiti Pangsuporta a Resources

• Mateo 3:13–17; Dagiti Aramid 7:54–60; 3 Nephi 11:3–10 (Iparangarang ti Dios Ama ken ni Jesucristo ti Bagbagida kadagiti tao iti daga)

• “Ania ti Masursurotayo maipapan iti Kinatao ti Dios manipud iti Umuna a Parmata?” manipud iti “Face to Face with President Eyring ken Elder Holland” (worldwide youth broadcast, Mar. 4, 2017), FacetoFace.ChurchofJesusChrist.org

Panangisuro iti Wagas ti Mangisalakan

Inawis ti Mangisalakan dagiti pasurotna a mangpaneknek kadagiti kinapudno dagiti pannursurona. Idi inaramidda, sinagid ti Espiritu ti puspusoda. Kasano a maallukoymo dagiti sursuruam a mangiburay kadagiti pammaneknekda? (Kitaen iti Panangisuro iti Wagas ti Mangisalakan [2016], 11.)

Kitaen met iti “Prepare to Teach” (video, ChurchofJesusChrist.org).