Chan ru roksinkil Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq

K’a’ru aj-e li ch’utlaak sa’ molam malaj sa’ tzoleb’aal?

Kanab’anb’il eere jun loq’laj k’anjel xb’aan li Qaawa’: A’an xk’e lee b’oqb’al chi k’anjelak sa’ jun awa’b’ejil re jun molam sa’ li Tijonelil re Aaron malaj jun awa’b’ejil re xtzoleb’aaleb’ li Saaj Ixq. Jun xraqal lee k’anjel, a’an xjolominkil li ch’utam sa’ lee molam malaj lee tzoleb’aal. Re xb’aanunkil a’in, aajel ru xtawb’al ru k’a’ru aj-e li ch’utam.

Moko juntaq’eet ta li ch’utam a’in rik’in li Dominkil Tzoleb’aal malaj li seminario. Sa’ li ch’utam a’in, ink’a’ junes tzolok naqab’aanu. Noko’aatinak b’an chirix li k’anjel k’eeb’il qe xb’aan li Dios, ut naqak’uub’eb’ li komon re taqab’aanu li k’anjel a’an sa’ li qochoch, li Iglees, malaj li qatenamit. Naru taqak’uub’ chan ru tootz’aqonq sa’ xch’utub’ankil Israel. Sa’eb’ li ch’utam a’in ink’a’ yal noko’aatinak chirix li k’anjel—naqak’uub’ b’an qana’leb’ chixb’aanunkil.

A’b’an ink’a’ naqakanab’ li tzolok junes choq’ re li Dominkil Tzoleb’aal. Relik chi yaal, jwal aajel ru xtzolb’al li evangelio sa’ li ch’utam a’in, xb’aan naq nokoxtenq’a chixtawb’al ru k’a’ru aj-e li k’anjel. Naq naqatzol li evangelio sa’ komonil, li na’leb’ naqatzol naru tixjal qach’ool. Naru taqanaw sa’ musiq’ej chan ru took’iiq “rik’in qana’leb’ ut rik’in qateram, sa’ chaab’ilal chiru Dios ut chiruheb’ li winq” (Lukas 2:52). Naq … najala li qach’ool choq’ re li Jesukristo ut lix evangelio, taqaj xtenq’ankileb’ li qas qiitz’in sa’ xb’ehil li sumwank, a’aneb’ li qajunkab’al, li qamiiw, ut eb’ li komon sa’ li qamolam malaj qatzoleb’aal.

Ani najolomin reheb’ li ch’utam a’in?

Li Dios xexxb’oq jo’ awa’b’ejil ut xk’e lee wankilal chi jolomink. Jo’kan naq chixjunileb’ li ch’utam tento te’jolomiiq xb’aan jun xkomon li awa’b’ejil. Eb’ li ninq te’xk’e lee tenq’ankil, a’b’an ink’a’ raj te’xb’aanu eeruuchil. Sa’ xtiklajik li junq tzolok sa’ li hu a’in, wan jun aatin choq’ re “K’uub’ank na’leb’ sa’ komonil.” Teeril li aatin a’an re teenaw k’a’ru aj-e junaq li ch’utam ut chan ru xb’eresinkil. Teek’uub’ li ch’utam a’an naq wankex sa’ xch’utam li awa’b’ejil.

Ani taak’utuq?

Jun jolominel li saaj malaj ninq, malaj yalaq saaj komon re li tzoleb’aal naru taak’utuq. Jo’ jun li saaj awa’b’ejil, aatinanqex rik’ineb’ li ninq aj jolominel chirix li ani taab’oqe’q chi k’utuk. Chijultiko’q eere naq li ninq aj jolominel wankeb’ naab’al xseeb’al. Sik’omaq eetzolb’al rik’ineb’. Chaab’il ajwi’ naq eb’ li saaj neke’xb’aanu li k’utuk—li k’utuk naru tixjal xch’ooleb’ ut tixtenq’a xkomonileb’ chirib’ileb’ rib’. Jo’kan naq chekanab’eb’ chi k’utuk, a’ut tz’ilomaq rix b’ar wan lix seeb’aleb’ ut k’a’ru na’ajman choq’ reheb’ li ani te’tz’aqonq. Wi ta jwal saajeb’ li saaj malaj jwal ak’eb’ sa’ xk’utb’al li evangelio, maare li ninq aj jolominel te’xb’aanu raj xk’ihal li k’utuk. Naq nab’oqe’ jun li saaj chi k’utuk, lix na’ xyuwa’ malaj jun li ninq aj komon tixtenq’a raj chixkawresinkil rib’.

Laj k’utunel naru tixkawresi rib’ rik’in rilb’al li aatin “Xk’utb’al li tzol’leb’ ” sa’ xtiklajik li junq tzolok. Aran wan li na’leb’ choq’ re xb’aanunkil li k’utuk, a’b’an ink’a’ tento naq laj k’utunel taaroksi junes li na’leb’ a’an. Jo’ b’eresinb’il xb’aan li Musiq’ej, laj k’utunel naru tixch’olob’ li tzol’leb’ a’ yaal jo’ chanru taatawmanq ru sa’ xyu’ameb’ li komon.

K’a’ru na’leb’ too’aatinaq wi’ sa’ li qach’utam?

Li na’leb’ sa’ xtiklajik li junjunq tzolok naxk’am rib’ rik’in li aatin xtzolman chiru li xamaan sa’ li Tzol’leb’ ut Sumwank, li wan resil sa’ Kim, Taaqehin—Choq’ reheb’ li komon ut li junkab’al. Jo’kan naq li aatinak sa’ ch’utam tixtenq’a li tzolok sa’ ochochnal.

Us ta yeeb’il xkutankil li junq na’leb’, toj naru tex’aatinaq chirix jalan chik li na’leb’ jo’ na’ajman choq’ reheb’ li saaj.

Li hu a’in naxk’e li na’leb’ choq’ re chixjunileb’ li domingo naq te’ch’utlaaq li saaj. Wan naq taasachq jun li tzolok xb’aan naq taawanq li ch’utub’aj-ib’ re oqech, malaj k’a’aq chik re ru.

K’a’ru xk’anjeleb’ li ninq aj jolominel?

Aajel ru xk’anjeleb’ li ninq aj jolominel sa’ xmolameb’ li Tijonelil re Aaron ut sa’ xtzoleb’aaleb’ li Saaj Ixq. Te’xk’e eeb’eresinkil ut eena’leb’ chirix lee b’oqb’al jo’ jolominel. Te’xk’e eetenq’ ut te’xwaklesi eech’ool naq nekeb’aanu li k’anjel sa’ lee molam malaj tzoleb’aal. Te’xk’ut li tzol’leb’ cheru, ut tex-osob’tesiiq xb’aan rilb’aleb’ lix b’aanuhom, lix yu’am, ut xnawom lix ch’ool.