tamaitai talavou i totonu o le vasega

O le Faaaogaina o le Sau, Mulimuli Mai ia te A’u—Mo Korama a le Perisitua Arona ma Vasega a Tamaitai Talavou

O a ni faamoemoega o fonotaga a o tatou korama ma vasega?

Ua tuuina atu e le Alii ia te oe se faatuatuaga paia: Ua Ia valaauina oe e te auauna atu i totonu o se au peresitene o le korama a le Perisitua Arona po o se au peresitene o vasega a Tamaitai Talavou. O se vaega o lau matafaioi o le taitai ma faatautaia sauniga/fonotaga a lau korama po o le vasega i le Aso Sa. Ina ia faia lea, o le a fesoasoani le malamalama i le mafuaaga e tatou te faia ai nei sauniga/fonotaga.

O sauniga/fonotaga a korama o le Perisitua Arona ma vasega a Tamaitai Talavou e ese mai vasega a le Ekalesia e pei o le Aoga Sa po o le seminare. I totonu o sauniga/fonotaga a korama po o vasega, e sili atu mea tatou te faia ai nai lo na’o le su’esu’e o se autu o le talalelei. E tatou te aoao e uiga i le galuega ua tuuina mai e le Atua ia i tatou, ma e tatou te faatulaga sui o a tatou korama po o vasega ina ia faia lena galuega i totonu o o tatou fale, i totonu o le Ekalesia, ma i totonu o o tatou alalafaga. E tatou te fuafua, mo se faataitaiga, pe faapefea ona tatou faataunuu o tatou matafaioi o se vaega o le autau talavou a le Alii e fesoasoani e faapotopoto Isaraelu. I totonu o nei sauniga/fonotaga, e le na’o na tatou talanoa e uiga i le galuega—e tatou te faia le fuafuaga e faatino ai.

alii talavou i totonu o le vasega

A e o lenei faamamafa i le galuega, e le o le uiga e faapea e tatou te tuua ai talanoaga o mataupu faaleaoaoga faavae tau lava mo le Aoga Sa. O le mea moni, o le aoaoina o mataupu faavae i totonu o sauniga/fonotaga a korama ma Tamaitai Talavou e taua—e fesoasoani ia i tatou e malamalama ai i mafuaaga e tatou te faia ai le galuega. A o tatou su’esu’eina faatasi le talalelei, o upumoni tatou te aoaoina e mafai ona suia ai o tatou loto. E mafai ona tatou maua musumusuga e uiga i ala e tuputupu a’e ai “i le poto ma le tino, ma ua alofagia e le Atua atoa ma tagata” (Luka 2:52). A o tatou agaigai i le liua atili ia Iesu Keriso ma Lana talalelei, e tatou te lagonaina naunauga e fesoasoani i isi i luga o le ala o feagaiga, e aofia ai o tatou aiga, a tatou uo, ma o tatou sui o le korama ma vasega.

O ai e taitaia nei sauniga/fonotaga?

Ua valaauina outou o ni au peresitene o korama ma vasega ma tuuina atu ia te outou le pule e taitai ai. O le mafuaaga lena o sauniga/fonotaga uma o la tou korama po o le vasega e taitaia e se sui o le au peresitene o la tou korama po o le vasega. E tatau i taitai matutua ona ofoina atu taiala ma le lagolago, a e e le tatau ona latou puleaina. Tagai i le vaega o loo faaulutalaina “Fefautuaai Faatasi” o loo i le amataga o taiala taitasi i totonu o lenei punaoa mo manatu e fesoasoani ia te oe ia iloa le ala e taitai ai se sauniga/fonotaga ma ausia ai ona faamoemoega moni. Faaaoga fonotaga a au peresitene e fuafua ai le ala o le a outou taitaia ai nei sauniga/fonotaga o le Aso Sa.

O ai e tatau ona aoao atu le lesona?

O taitai matutua, o se sui o le au peresitene o le korama po o le vasega, po o soo se isi sui o le korama po o le vasega e mafai ona aoao atu le lesona. I le avea ma se au peresitene o le korama po o le vasega, talanoa ma o outou taitai matutua po o ai e tatau ona tofia e aoao atu lesona. Manatua o outou taitai matutua e tele mea e mafai ona latou ofoina atu e fesoasoani ai. Saili e aoao mai o latou aafiaga ma molimau. E i ai foi tulaga lelei o le fai atu i talavou e aoao atu—e mafai e le aoao atu ona fesoasoani e faalolotoina lo latou liua ma fausia fesootaiga malolosi ma isi sui o le korama po o vasega. O lea, tuu atu ia i latou avanoa talafeagai e aoao atoa atu ai po o se vaega o se lesona, ae ia manatua manaoga ma gafatia o tagata o loo i totonu o lau korama po o vasega. Mo se faataitaiga, o taitai matutua e mafai ona tele taimi e aoao atu ai i totonu o korama po o vasega faatasi ma talavou laiti po o talavou o e e itiiti se poto masani i le aoaoina atu o le talalelei. Pe a valaaulia se talavou e aoao atu, o se matua, po o se faufautua matua e tatau ona fesoasoani ia i latou ia saunia pe a manaomia.

O i latou o e ua tofia e aoao atu e mafai ona faaaoga le vaega o loo faaulutalaina o le “Aoao atu le Aoaoga Faavae” o loo i totonu o le taiala o loo i lenei punaoa ina ia fesoasoani ia i latou e saunia. O lenei vaega o loo i ai fautuaga mo aoaoga ma le talanoaina o le aoaoga faavae mo lena vaiaso, ae e tatau i faiaoga ona le faatapulaaina o latou lagona i nao nei fautuaga. A o taialaina ai e le Agaga, e mafai e faiaoga ona faaaoga nei manatu pe faaaoga a latou lava metotia e aoao atu ai i auala sili ona talafeagai ma manaoga o sui o le korama po o le vasega ma fesoasoani ia latou malamalama i le aoaoga faavae.

O a autu faaleaoaoga faavae o le a tatou talanoaina i totonu o a tatou sauniga/fonotaga?

O le autu o le otootoga o vaiaso taitasi o se mataupu faavae ua filifilia e ogatasi ma le faitauga o le Mataupu Faavae ma Feagaiga ua fautuaina mo lena vaiaso, ua maua i le Sau, Mulimuli Mai ia te A’u—Mo Tagata Taitoatasi ma Aiga. I lenei auala, o talanoaga faaleaoaoga faavae i totonu o sauniga/fonotaga a korama ma vasega o le a lagolagoina mea o loo aoaoina e talavou i o latou aiga.

E tusa lava pe faapea o taiala e tatau ona aoaoina i Aso Sa faatulagaina, o le a ia te oe lava le filfiliga e talanoaina ai isi autu faaleaoaoga faavae e tusa ma manaoga o lau korama po o vasega.

O lenei punaoa ua aofia ai otootoga mo vaiaso taitasi pe a faia sauniga/fonotaga a korama a le Perisitua Arona ma vasega a Tamaitai Talavou. Mai lea taimi i lea taimi, atonu e te ono manaomia ona faasee ese se lesona ona o konafesi a le siteki po o isi mafuaaga.

O le a le matafaioi a o tatou taitai matutua?

O o outou taitai matutua e taua le latou matafaioi i totonu o korama a le Perisitua Arona ma vasega a Tamaitai Talavou. O le a latou taialaina ma fautuaina oe i ou valaauga faaletaitai. O le a latou lagolago ma uunaia oe a o e faatino galuega a lau korama po o vasega. O le a latou aoao oe i mataupu faavae, o le a latou faamanuiaina oe e ala i a latou faataitaiga, aafiaga, ma molimau.