Iosefa Samita o loo tatalo

Na Ou Vaaia se Malamalama, na saunia e Jon McNaughton

10 Ianuari

Aisea e Taua ai le Uluai Faaaliga?

Faatomuaga i le Mataupu Faavae ma Feagaiga; Iosefa Samita—Talafaasolopito 1:1–26

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10-20 minute

I le amataga o le sauniga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O ai e manaomia la tatou fesoasoani ma tatalo? O le a se mea e mafai ona tatou faia e fesoasoani ai ia i latou? O ai e tatau ona tatou valaaulia i se gaoioiga o loo loma?

• O a tatou tiute po o matafaioi. O a ni tofiga ua tatou faataunuuina? O a ni tofiga e tatau ona tatou faia? Na faapefea ona tatou valaauliaina isi e o mai ia Keriso, ma e mafai faapefea ona tatou valaauliaina isi i le taimi nei?

• O o tatou olaga. O a ni aafiaga lata mai ua faamalosia ai a tatou molimau? O a mea o loo tutupu i o tatou olaga, ma e faapefea ona tatou lagolago le tasi ma le isi?

I le faaiuga o le lesona, pe a talafeagai ai, ia faia mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

E ui lava ua sili atu i le 200 tausaga talu mai le taimi muamua na tootuli ai Iosefa Samita e tatalo i le Vao Paia, o le tali na ia mauaina ua matuā aafia ai o tatou olaga i aso nei. Mafaufau loloto i faamanuiaga na oo mai i lou olaga ona na faaali atu le Tama ma le Alo ia Iosefa. Aisea e taua ai mo i latou o loo e aoaoina ona maua a latou lava molimau o le Uluai Faaaliga mai le Agaga Paia? O le a faapefea ona e fesoasoani ia i latou e faia lenei mea? Atonu e fesoasoani ia te oe le toe iloiloina o savali mai le konafesi aoao ia Aperila 2020, lea na faamanatu ai le 200 tausaga o lenei faaaliga mamalu.

tamaitai talavou i totonu o le vasega

E mafai e tagata talavou taitoatasi ona maua se molimau a le tagata lava ia e uiga i le Uluai Faaaliga.

Aoao Faatasi

Ona sa talavou Iosefa Samita i le taimi o le Uluai Faaaliga, o i latou o loo e aoaoina atonu o le a mafai ona fesootai i lana sailiga mo le upumoni. Tuu atu i le korama ma le vasega ni nai minute e faasoa mai ai o latou manatu ma lagona e uiga i le Iosefa Samita—Talafaasolopito 1:1–26. O gaoioiga nei e mafai ona fesoasoani ia i latou e faamalosia ai a latou molimau na faaali mai le Atua le Tama ma Iesu Keriso ia Iosefa Samita.

• O a upumoni o le talalelei ua tatou aoaoina mai le aafiaga o Iosefa Samita i le Vao Paia? E mafai e le korama po o le vasega ona faitau le tala a Iosefa i totonu o le Iosefa Samita—Talafaasolopito 1:7–20 ma faasoa upu moni latou te maua. (Mo se faataitaiga, e faafofoga ma tali mai le Atua i tatalo; o Satani ma lona mana e moni, ae o le mana o le Atua e sili atu; o faaaliga e le o muta.) Pe o faapefea ona faamanuiaina o tatou olaga i nei upumoni?

• E mafai foi ona e fai atu i tagata o le korama po o le vasega e toe iloilo ia savali e uiga i le Uluai Faaaliga mai le konafesi aoao o Aperila 2020 (tagai Liahona, Me 2020). Valaaulia i latou e faasoa mai mea na latou maua ma o latou lagona e uiga i le Uluai Faaaliga.

• Sa molimau Peresitene taitasi o le Ekalesia e uiga i le misiona paia a le Perofeta o Iosefa Samita. E mafai ona faamanuiaina korama po o vasega mai le faitauina o a latou molimau i se tasi o tusi lesona o Aoaoga a Peresitene o le Ekalesia . (O le tele o nei tusi lesona o loo aofia ai se mataupu e uiga i le Perofeta o Iosefa Samita. Mo se lisi o nei mataupu, tagai i Autu o le Talalelei, “Uluai Faaaliga,” topics.ChurchofJesusChrist.org.) I ni nai aso ao lei oo i le vasega, e mafai ona e valaauliaina tagata o lau korama po o le vasega e filifili se tasi o nei Peresitene ma faasoa atu se faamatalaga na ia faia e mafai ona latou faaaogaina e aoao atu ai se tasi e uiga i le Uluai Faaaliga.

• Mafaufau e valaaulia ia korama po o tagata o le vasega e suesue “O Le Toefuataiga o le Talalelei a Iesu Keriso e ala mai ia Iosefa Samita” i le mataupu 3 o le Tala’i La’u Talalelei ([2019], 36–38) ma ia faata’ita’i e a’oaʻo e le tasi le isi e uiga i le Uluai Faaaliga. E mafai ona e luiina i latou e faasoa atu le aafiaga o Iosefa Samita e faaaoga ai nisi o ana lava upu, o loo maua i totonu o le Iosefa Samita—Talafaasolopito 1:16–17.

• O iloa e i latou o loʻo e aʻoaʻoina e tele tala o le Uluai Faʻaaliga? O nei tala ta’itasi o lo’o tuʻuina mai ai auiliiliga tulaga ese e maua ai se malamalamaaga sili atu ona atoatoa o mea na tutupu i le Vao Paia. Atonu e te aoteleina le vaega o le “Aotelega” o le tusiga o Autu o le Talalelei “Tala o le Uluai Faaaliga” (topics.ChurchofJesusChrist.org). Ona mafai lea ona e fesili atu ia i latou o loo e aoaoina ina ia toe iloilo ia otootoga o tala e fa o loʻo maua i lalo o “Tala o le Uluai Faʻaaliga.” E mafai foi ona latou faitauina nisi o tala moni e ala i le faʻaaogaina o sootaga ua saunia. O le a se mea na latou maua na faamalosia ai a latou molimau e uiga i le Uluai Faaaliga? E mafai ona tou matamata i le vitio “Ole atu i le Atua: Uluai Faaaliga a Iosefa Samita” (ChurchofJesusChrist.org), o loo atagia ai le Uluai Faaaliga e ala i le faaaogaina o faamatalaga mai nei tala. Aisea e lelei ai le tele o tala o le Uluai Faʻaaliga? E faapefea ona fesoasoani nei tala ia i tatou e malamalama atili ai i le Tama Faalelagi ma Iesu Keriso?

Faatino i le Faatuatua

Ia uunaia tagata o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• Mataio 3:13–17; Galuega 7:54–60; 3 Nifae 11:3–10 (Ua faaali mai e le Atua le Tama ma Iesu Keriso i Laua lava i tagata i le lalolagi)

• Vitio “What do we learn about the nature of God from the First Vision?” mai le Talanoaga Faafesagai ma Peresitene Eyring ma Elder Holland (faasalalauga i le lalolagi atoa a le autalavou, 4 Mati, 2017), FacetoFace.ChurchofJesusChrist.org

Aoao Atu i le Ala a le Faaola

Na valaaulia e le Faaola Ona soo e molimau atu i le moni o Ana aoaoga. A o latou faia, na pai atu le Agaga i o latou loto. E mafai faapefea ona e faamalosia i latou o loo e aoaoina e tuuina atu a latou molimau? (Tagai i le Aoao Atu i le Ala a le Faaola [2016], 11.)

Tagai foi “Prepare to Teach” (vitio, ChurchofJesusChrist.org).