tamaitai talavou ma se alii talavou i luma o le malumalu

24 Ianuari

E Mafai Faapefea Ona Ou Saunia Au Lava e Auai i le “Galuega Ofoofogia” a le Atua?

Mataupu Faavae ma Feagaiga 3–5

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10-20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O a ni mea e mafai ona tatou faia e fausia ai le lotogatasi i totonu o le korama po o tagata o le vasega? O a sini tatou te mananao e galulue faatasi i ai?

• O a tatou tiute po o matafaioi. O a mea ua tatou faia e faasoa atu ai le talalelei? O a aafiaga ua tatou oo i ai i le faia o galuega o le malumalu ma talafaasolopito o aiga?

• O o tatou olaga. O faapefea ona tatou vaaia le aao o le Alii i o tatou olaga? O a mea ua musuiaina i tatou i ā tatou suesuega o tusitusiga paia i lenei vaiaso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Ina ua faatoa amata ona faalogoina e uluai Au Paia le savali o le talalelei toefuataiina, e toatele na mananao e iloa mea e mafai ona latou faia e fesoasoani ai i le galuega. O le tamā o le Perofeta o Iosefa Samita, o Iosefa Samita Matua, o se tasi o i latou na fesili ia iloa le finagalo o le Alii mo ia. O le tali a le Alii, o loo maua i totonu o le Mataupu Faavae ma Feagaiga 4, na amata musuiaina ai augatupulaga o tagata e auauna atu ma o latou “loto atoa, mafaufau, manatu ma le malosi” (fuaiupu 2). Pe auauna atu i se misiona pe auauna atu i soo se valaauga po o se tiutetauave i le Ekalesia, o agavaa mo le auauna atu e tutusa: o se manao e auauna atu i le Atua faatasi ai ma le faatuatua, faamoemoe, alofa mama, ma le alofa (tagai i le Mataupu Faavae ma Feagaiga 4:2–6). E mafai faapefea ona e fesoasoani i tagata o le korama po o tagata o le vasega ia faamalosia lo latou naunau e auauna atu i le Alii ma saunia mo avanoa i le lumanai e auauna atu ai?

Ina ia saunia oe lava e taitaia tagata o le korama ma le vasega i lenei suesuega, e mafai ona e faitau ma mafaufau loloto i se tasi pe sili atu foi o savali o loo maua i “Punaoa Lagolago.”

alii talavou o loo asiasi i se tamā matua

O le tausia o e lē tagolima o se vaega o le galuega o le faaolataga.

Aoao Faatasi

Atonu na musuia le korama po o tagata o le vasega e auauna atu ma le filiga i le Alii e ala i le faitauina o le Mataupu Faavae ma Feagaiga 3–5 i lenei vaiaso. Ina ia uunaia i latou e faasoa o latou manatu, e mafai ona e valaaulia i latou e mafaufau o loʻo latou talosaga mo se galuega. O a ni agavaa latou te tuuina pe talanoaina i se faatalanoaga o se galuega? E mafai ona latou iloiloina le Mataupu Faavae ma Feagaiga 4 ma faailoa mai ia agavaa e manaomia e le Alii mo i latou o e mananao e auai i Lana galuega. Filifili se tasi po o le sili atu foi o gaoioiga nei e fesoasoani ai ia i latou o loo e aoaoina ia mafaufau i mea e mafai ona latou faia ina ia auai atili ai i le “galuega ofoofogia” a le Atua (Mataupu Faavae ma Feagaiga 4:1).

• Ina ia fesoasoani ia i latou o loo e aoaoina ia aoao pe mafai faapefea ona latou auai i le faanatinatiina o le galuega o le faaolataga, tusi i luga o le laupapa le faauigaga lenei o le galuega o le faaolataga: Ua valaauliaina e le Atua tagata uma e o mai ia Keriso ma fesoasoani i Lana galuega e ala i le ola ai i le talalelei a Iesu Keriso, tausia o e le tagolima, valaauliaina tagata uma e talia le talalelei, ma tuufaatasia aiga mo le faavavau. Valaaulia sui o le korama po o le vasega e talanoaina pe faapefea e uiga o loo lisiina i totonu o le Mataupu Faavae ma Feagaiga 4 ona fesoasoani ia i latou e faia vaega taitasi o le galuega o le faaolataga. Vaevae le autalavou i vaega, ma tuu atu i vaega taitasi e talanoaina ni auala e mafai ona latou atiina ae ai nei uiga. O le a se mea e mafai ona tatou faia e avea ai le galuega o le faaolataga o se vaega e sili ona taua i o tatou olaga?

• Valaaulia sui o le korama po o le vasega e toe iloilo se tasi o savali o loo maua i “Punaoa Lagolago,” ma vaavaai mo se upusii e mafai ona latou faasoa atu e uiga i auala e auauna atu ai ma le faamaoni i le Alii i valaauga o le Ekalesia, tofiga, po o isi tiutetauave. Fai atu ia i latou e faasoa mai le upusii na latou filifilia ma pe aisea latou te manatu ai e taua. E faapefea ona latou faaaoga mea na latou aʻoaʻoina i le taimi nei ma i le lumana’i?

• O nisi tagata o le korama po o tagata o le vasega atonu o sauniuni e auauna atu o ni faifeautalai. E mafai ona e fai atu ia i latou e faasoa mai pe faapefea ona latou sauni e auauna atu. Ina ia faamalosia i latou i a latou taumafaiga, e mafai ona e faasoa atu le fesili na faapea mai Elder David A. Bednar e masani ona fesiligia ai o ia: “O le a se mea e mafai ona ou faia e saunia ai ma le atoatoa e auauna atu o se faifeautalai faamisiona?” (“Avea ma se Faifeautalai,” Liahona, Nov. 2005, 45). E faapefea ona tali e le korama po o le vasega lenei fesili? O a ni manatu na tuuina atu e Elder Bednar? E mafai ona e valaauliaina se tasi pe sili atu o ni faifeautalai ua mae’a misiona e faasoa atu mea na latou faia e saunia ai mo se misiona ma mea latou te moomoo maimau pe ana latou faia.

Faatino i le Faatuatua

Ia uunaia sui o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e sui o le korama po o tagata o le vasega ona faasoa atu o latou manatu.

Punaoa Lagolago

• Mataio 28:19–20; Mataupu Faavae ma Feagaiga 18:9–16; 50:13–14; 88:81(Ua ia i tatou se tiute e faasoa atu le talalelei)

• Dieter F. Uchtdorf, “O Lē Sili ia te Outou,” Liahona, Me 2017, 78–81

• Carl B. Cook, “Auauna Atu,” Liahona, Nov. 2016, 110–12

• “Preparing to Serve,” ChurchofJesusChrist.org/topics/missionary-preparation

Aoao Atu i le Ala a le Faaola

Sa valaaulia e le Faaola Ona soo e molimau atu, ma a o latou faia, sa pa’i atu le Agaga i o latou loto. Ao e aoao atu e uiga i le usiusitai, mo se faataitaiga, valaaulia uso o le korama po o le vasega e faasoa atu a latou molimau i le taua o le tausia o poloaiga. (Tagai i le Aoao Atu i le Ala a le Faaola [2016], 11, 32.)