Ua faaee mai e Ioane le Papatiso le Perisitua Arona

I Luga o Oulua O’u Uso a Auauna e, saunia e Linda Curley Christensen ma Mike Malm

14 Fepuari

O Le A Le Perisitua?

Mataupu Faavae ma Feagaiga 12–13; Iosefa Samita—Talafaasolopito 1:66–75

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i tulaga e pei ona taua i lalo, ma fuafua ni auala e galulue ai i tulaga tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O a ni gaoioiga na tatou faia talu ai nei? Pe na faamanuiaina? O a gaoioiga na lelei, ma e faapefea ona tatou faaleleia atili?

• O a tatou tiute po o matafaioi. O ai e manaomia la tatou auaunaga? E faapefea ona tatou fesoasoani ia i latou?

• O ō tatou olaga. O a sini o loo tatou galulue i ai faaletagata lava ia? O a aafiaga e mafai ona tatou faasoaina atu? O a ni faamanuiaga ua tatou mauaina?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

A o e faitau e uiga i le toefuataiga o le Perisitua Arona i le Mataupu Faavae ma Feagaiga 13, taumafai e faitau e ala i mata o i latou o loo e aoaoina. Pe o latou malamalama i le mana o le perisitua i o latou olaga? E faapefea e sauniga o le perisitua e pei o le papatisoga ma le faamanatuga ona fesoasoani ia te oe e maua le mana o le Faaola? Mafaufau i aafiaga e mafai ona e faasoa atu. Ina ia saunia oe lava e aoao atu e uiga i le perisitua, mafaufau e suesue ia mau o loo fautuaina i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga ma le “Perisitua” i le Taiala i Tusitusiga Paia (scriptures.ChurchofJesusChrist.org).

alii talavou o loo faitauina tusitusiga paia i totonu o le vasega

E fesoasoani tusitusiga paia ia i tatou ia malamalama pe faapefea ona faamanuiaina o tatou olaga e le perisitua.

Aoao Faatasi

Ina ia amataina se talanoaga e uiga i le perisitua, atonu e te valaauliaina ia uso o le korama po o le vasega e faasoa mai mea ua latou iloa e uiga i le toefuataiga o le Perisitua Arona, e aofia ai mea na latou faitauina i lenei vaiaso i le Mataupu Faavae ma Feagaiga 13 ma le Iosefa Samita—Talafaasolopito 1:66–75. E mafai foi ona e faaali atu se ata e faaalia ai le toefuataiga o le Perisitua Arona (e pei o le Tusi Ata o le Talalelei [2009], nu. 93) ma valaaulia sui o le korama po o le vasega e faasoa mai mea latou te iloa e uiga i lenei mea na tupu. Aisea tatou te faafetai ai ona ua toefuatai mai le perisitua? O gaoioiga nei e mafai ona fesoasoani ia i latou o loo e aoaoina ia malamalama atili ai i le mea o loo i ai le perisitua ma le auala ua faamanuiaina ai i tatou.

• E faapefea ona faamalamalama e le korama po o tagata o le vasega pe o le a le perisitua i se tasi e le’i faalogo i ai muamua? Ina ia fesoasoani ia i latou, e mafai ona e lisiina i luga o le laupapa nisi o fesili e ono i ai i tagata e uiga i le perisitua, e pei O le a le perisitua? E faapefea ona maua e se tasi le perisitua? E faapefea le amio a se tasi e umia le perisitua? O a mea e faia e le au perisitua? Valaaulia i latou o loo e aoaoina e saili mo tali e faaaoga ai mau ma isi punaoa o loo maua i “Punaoa Lagolago” ma tusi a latou tali i luga o le laupapa. E mafai ona e fai atu ia i latou e faasoa mai faamanuiaga na oo mai i o latou olaga ona o le perisitua. E mafai foi ona e faaalia ma talanoaina le vitio “How the Priesthood Works” (ChurchofJesusChrist.org; tagai foi Dale G. Renlund, “O Le Perisitua ma le Mana Togiola o le Faaola,” Liahona, Nov. 2017, 64–67).

• Afai e te aoaoina i latou o loo umia le Perisitua Arona, e mafai ona faamanuiaina i latou mai le iloiloina o le savali a Uso Douglas D. Holmes “O Mea e Ao ia i Latou Uma e Umia le Perisitua Arona ona Malamalama Ai” (Liahona, Me 2018, 50–53). E mafai ona e tofia tagata taitoatasi o le korama e toe iloilo uluai parakalafa o le savali po o se tasi o isi vaega e fa. Valaaulia tagata taitoatasi e vaavaai mo se mea na te lagona e tatau i tagata uma e umia le Perisitua Arona ona malamalama i ai. Tuu atu ia te ia se avanoa e faasoa atu ai mea na ia aoaoina ma faamatala pe aisea na ia filifilia ai lena aoaoga.

• Afai e te aoaoina tamaitai talavou, e mafai ona e faasoa atu le savali a Peresitene Russell M. Nelson “O Oa Faaleagaga,” lea na faatatau ia i latou (Liahona, Nov. 2019, 76–79). E mafai ona e fai atu i tagata o le vasega e suesue i lana savali e saili se mea e mafai ona latou faia ina ia sili atu ai ona “mauaina le mana o le Faaola” i o latou olaga (itulau 77). O le a le mea na aoao mai e Peresitene Nelson e uiga i le auala e mafai ai ona tatou mauaina le mana o le perisitua? E faapefea ona faamanuiaina i tatou e le mana o le perisitua? Uunaia ia tamaitai talavou e mafaufau i le auala latou te galulue ai i lenei valaaulia mai ia Peresitene Nelson: “Ou te aioi atu ia te outou ia suesue ma le agaga tatalo upumoni uma e te maua e uiga i le mana o le perisitua” (itulau 79).

Faatino i le Faatuatua

Ia uunaia sui o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• Mataupu Faavae ma Feagaiga 84:17–22; 107:1–5 (O le perisitua o le mana ma le pule a le Atua)

• Eperu 5:4; Mataupu Faavae o le Faatuatua 1:5 (O e umia le Perisitua ua valaauina e le Atua ma faauuina e se tasi o i ai le pule)

• Mataupu Faavae ma Feagaiga 121:34–46 (O le mana ma le pule o le perisitua e na o mataupu faavae o le amiotonu e faagaoioi ai)

• Mataio 3:1–6; 28:16–19; Ioane 15:16; Mataupu Faavae ma Feagaiga 12:3–4 (O alii ma tamaitai agavaa e talai le talalelei)

• Galuega 3:1–8; Iakopo 5:14–15 (O e umia le perisitua e tuuina atu faamanuiaga e faamalolo ai e mamai ma mafatia)

• 3 Nifae 11:21–22; 18:1–5; Mataupu Faavae ma Feagaiga 107:20 (O e umia le perisitua e faatautaia sauniga)

• Mataupu Faavae ma Feagaiga 65:2; 107:18–21 (O e umia le perisitua e fesoasoani e pulea le Ekalesia)

• Faamaoni i le Faatuatua, “Perisitua Arona,” “Perisitua Mekisateko,” “Perisitua,” 3–4, 101–2, 124–28

Aoao Atu i le Ala a le Faaola

Sa aoao e le Faaola Ona soo e liliu atu i tusitusiga paia mo tali i fesili ma ia maua ai le malosi faaleagaga. E mafai faapefea ona e faamalosia i latou o loo e aoaoina e liliu atu i tusitusiga paia e saili tali ia latou fesili ma luitau? (Tagai i le Aoao Atu i le Ala a le Faaola [2016], 30.)