tamaitai talavou o loo suesue

28 Fepuari

O le a le Uiga o le Salamo?

Mataupu Faavae ma Feagaiga 18–19

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O ai e fou mai i la tatou uarota, ma e faapefea ona tatou faia ia latou lagona ua taliaina i latou? O le a se mea o loo tatou faia e faaaoga tatau ai o tatou taimi i totonu o le korama po o fono faalevasega?

• O o tatou tiute po o matafaioi. O a nisi o tiute ma tiutetauave o ia i tatou i le avea ai o ni alii talavou po o ni tamaitai talavou? E mafai faapefea ona tatou faataunuuina lelei ia mea?

• O o tatou olaga. O a mea o loo tatou faia ia avea atili ai e pei o Iesu Keriso ma maua ai Lona mana i o tatou olaga? O a mea o loo tatou faia e fesoasoani ai i o tatou aiga ia o mai ia te Ia?

I le faaiuga o le lesona, pe a talafeagai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

E faigata ona faitau le Mataupu Faavae ma Feagaiga 19:16–19 ma lē lagonaina le alofa o le Faaola mo i tatou. I nei fuaiupu, na Ia faamatalaina ai puapuaga na oo ia te Ia ao Ia togiola mo a tatou agasala ma faaalia ai le mafuaaga na naunau ai o Ia e puapuagatia tele- “ina ia [tatou] le puapuagatia pe afai [tatou] te salamo.” O le salamo o se faamanuiaga na mafai ona maua ona o le Faaola. O se taumafaiga faifaipea, i aso uma e liliu ese mai le agasala ma liliu atu i le Atua. O se vaega o le fuafuaga a le Tama Faalelagi e fesoasoani tatou te toe foi atu ai ia te Ia. O le malamalama pe faapefea ona salamo e mafai ona fesoasoani ia i tatou ia faamamāina a tatou agasala, suia o tatou loto ma mafaufau, ma faalatalata atu ai i le Atua.

Na faapefea e le salamo ona fesoasoani ia te oe ia latalata atili atu i le Tama Faalelagi? E mafai faapefea ona e fesoasoani ia i latou e te aoaoina ia manao e salamo? E mafai faapefea ona e fesoasoani ia i latou ia iloa o le salamo o se taumafaiga i aso taitasi ma e le faapitoa mo agasala matuia? Ao e sauni e aoao atu, mafaufau e suesue le savali a Peresitene Russell M. Nelson “E Mafai Ona Tatou Faia Ia Lelei Atu ma Ia Tatou Lelei Atu” (Liahona, Me 2019, 67–69).

Iesu Keriso o loo tatalo

Keriso i Ketesemane, saunia e Harry Anderson

Aoao Faatasi

O perofeta uma talu mai le amataga ua valaau atu i tagata ia salamo. Ae ui i lea, atonu o le leai o se valaaulia e salamo o se mea e sili ona tiga e pei ona maua e le Faaola i le Mataupu Faavae ma Feagaiga 19:15–19, atonu na faitau e le autalavou i lenei vaiaso. Atonu e te fesili atu ia i latou mo ni mea ua latou aoaoina e uiga i le Faaola mai nei fuaiupu. O a mea o loo ta’u mai e nei fuaiupu e uiga i le taua o le salamo i fofoga o le Alii? O manatu nei e mafai ona fesoasoani ia i latou o loo e aoaoina ia iloa le salamo o se faamanuiaga i aso taitasi i o latou olaga.

• Ina ia fesoasoani i tagata o le korama po o le vasega ia malamalama pe faapefea ona faamanuiaina o latou olaga i le salamo, e mafai ona e amata i le fai atu o nei fesili: E faapefea ona ou iloa o aogā a’u taumafaiga ia salamo? E faapefea ona fesoasoani le Faaola ia ou suia? I le faaopoopo atu i le faamagaloga o agasala, o a isi faamanuiaga e oo mai ona o le salamo? Valaaulia tagata o le vasega e faitau se tasi po o le sili atu foi o mau i “Punaoa Lagolago,” e vaavaai ai mo tali i fesili. O a mea na latou mauaina? I le avea ai o se vaega o lenei talanoaga, e mafai ona e fa’aalia le vitio “Repentance: A Joyful Choice” (ChurchofJesusChrist.org).

• E toatele tupulaga talavou e le malamalama i le uiga o le salamo. Latou te ono fefefe i le salamo pe manatu foi e faatatau i na o agasala matuia. Ina ia fesoasoani e faasa’o lenei malamalamaaga sese, e mafai ona e valaauliaina tagata o le korama po o le vasega e suesue se vaega o le savali a Peresitene Russell M. Nelson “E Mafai Ona Tatou Faia Ia Lelei Atu ma Ia Tatou Lelei Atu” (Liahona, Me 2019, 67–69) vaavaai mo fuaitau e fesoasoani latou te malamalama ai i le uiga o le salamo. O a mea na latou mauaina na fesoasoani ia i latou e mafaufau ai e uiga i le salamo i se auala fou? O a faamanuiaga na folafola atu e Peresitene Nelson ia i latou o e salamo?

• E faapefea ona e fesoasoani ia i latou e te aʻoaʻoina ina ia malamalama pe aisea ma pe faapefea ona tatou salamo? E mafai ona fesoasoani le savali a Peresitene Dallin H. Oaks “Faamamāina e le Salamo” (Liahona, Me 2019, 91–94) . E mafai ona e vaevaeina le korama po o le vasega i ni vaega se fa ma tofi vaega taitasi e faitau se tasi o vaega e fa o le saunoaga a Peresitene Oaks. O vaega ta’itasi e mafai ona tuʻuina atu se otootoga o mea ua latou faitauina i isi vaega, faatasi ai ma soʻo se mau mai le savali e lagolagoina mea na latou aʻoaʻoina. E mafai ona e faaiuina i le fai atu i uso o le korama po o tagata o le vasega e faasoa atu a latou molimau i le taua o le salamo i le fuafuaga a le Atua.

Faatino i le Faatuatua

Ia uunaia sui o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• 2 Nifae 31:13; Enosa 1:5–9; Mosaea 4:9–12; 27:23–26, 35; Alema 19:33; 36:18–21, 24; 37:9; Helamana 15:7–8; Moronae 6:8; Mataupu Faavae ma Feagaiga 58:42–43; 64:9–10 (O mau e faatatau i le salamo)

• Mataupu Faavae ma Feagaiga 18:10–16 (O le salamo e aumaia le olioli)

• “Repentance,” i totonu o le Mo le Malosi o le Autalavou (2011), 28–29

• “O le salamo e ala i le Togiola a Iesu Keriso,” i le mataupu 3 o le Tala’i La’u Talalelei (2019), 51–52

• “Repentance Is a Blessing to All of Us,” “Atonement—Not a One-Time Thing” (vitio), ChurchofJesusChrist.org

Aoao Atu i le Ala a le Faaola

Sa valaaulia e le Faaola isi e galulue i le faatuatua ma ola i upumoni sa Ia aoaoina atu. O le a se mea e mafai ona e faia e fesoasoani ai ia i latou e te aoaoina ia iloa le mana o le salamo i aso uma? (Tagai i le Aoao Atu i le Ala a le Faaola [2016], 31, 35.)