o le aiga o loo suesue i tusitusiga paia

14 Mati

E Faapefea e Matafaioi Paia a Alii ma Tamaitai Ona Faaatoatoa le Tasi ma le Isi?

Mataupu Faavae ma Feagaiga 23–26

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O ai e manaomia la tatou fesoasoani ma tatalo? O le a se mea e mafai ona tatou faia e fesoasoani ai ia i latou? O ai e tatau ona tatou valaaulia i se gaoioiga o loo loma?

• O o tatou tiute po o matafaioi. O a ni tofiga ua tatou faataunuuina? O a ni tofiga e tatau ona tatou faia? Na faapefea ona tatou valaauliaina isi e o mai ia Keriso, ma e mafai faapefea ona tatou valaauliaina isi i le taimi nei?

• O o tatou olaga. O a ni aafiaga lata mai ua faamalosia ai a tatou molimau? O a mea o loo tutupu i o tatou olaga, ma e faapefea ona tatou lagolago le tasi ma le isi?

I le faaiuga o le lesona, pe a talafeagai ai, ia faia mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Na tuuina mai e le Tama Faalelagi i alii ma tamaitai ni matafaioi taua e faataunuu i Lana fuafuaga. O nei matafaioi e faaatoatoa e le tasi le isi. Ina ia fesoasoani i alii ma tamaitai e faataunuuina nei matafaioi, na Ia tuuina atu ia i latou meaalofa ma malosiaga tulaga ese. Atonu na suesue e tagata o le korama po o le vasega le Mataupu Faavae ma Feagaiga 25 i lenei vaiaso. I lenei faaaliga, na tuuina atu ai e le Alii le fautuaga ia Ema Samita e uiga i lana galuega taua i le Toefuataiina o le talalelei ma faamatala pe mafai faapefea ona lagolago e Iosefa ma Ema le tasi ma le isi. O a ni faataitaiga ua e vaaia ai alii ma tamaitai o galulue faatasi i auala felagolagomai e fai ai le galuega a le Alii? E faapefea ona e musuia alii ma tamaitai talavou o loo e aoaoina ina ia malamalama i o latou matafaioi paia ma galulue faatasi e fausia le malo o le Atua?

Ao e sauni e aoao atu, mafaufau e iloilo le “O le Aiga: O se Folafolaga i le Lalolagi” (ChurchofJesusChrist.org) ma le savali a Sister Linda K. Burton “O Le A Tatou O Ae Faatasi i Luga” (Liahona, Me 2015, 29–32).

tamaitai talavou ma se alii talavou o loo teuina se keke

E mafai e alii ma tamaitai talavou ona aoao e galulue faatasi i le fausiaina o le malo o le Atua.

Aoao Faatasi

Ina ia amataina se talanoaga e uiga i le auala e galulue faatasi ai alii ma tamaitai i le malo o le Atua, mafaufau e valaaulia uso o le korama po o le vasega e iloilo le Mataupu Faavae ma Feagaiga 25. O le a le fetalaiga a le Alii e uiga i tiutetauave na faia e Ema ma Iosefa i le tasi ma le isi? O le a se mea e mafai ona tatou aoao mai le vaega 25 e faatatau i ala e tatau ai ona galulue faatasi tane ma latou avā? E mafai ona e avatu ia i latou o e aoaoina ni pepa e tusi ai mea latou te mauaina ma tuu atu ia i latou e faasoa mai o latou manatu. Ona filifili mai lea i gaoioiga nei e fesoasoani latou te malamalama atili ai i auala e faamoemoe ai le Atua ia galulue faatasi ona atalii ma afafine.

• E mafai ona e mafaufau i se faʻataʻitaʻiga e fesoasoani ai i tagata o le korama po o tagata o le vasega ia malamalama pe o le a le uiga o le “faaatoatoa”? Mo se faʻataʻitaʻiga, e mafai ona latou talanoa e uiga i lanu talafeagai pe talanoa pe faʻapefea ona ese le matagofie o leo o se aufaipese. E faapefea ona faaatoatoa e matafaioi paia a alii ma tamaitai ia le tasi ma le isi? I le avea ai o se korama po o se vasega, faitau faatasi parakalafa muamua e lua o le vaega ua faaulutalaina “Siitiaina ma Fesoasoani i o Tatou Matafaioi e Faaatoatoa ai Isi” mai le savali a Sister Linda K. Burton “O Le A Tatou O Ae Faatasi i Luga” (Liahona, Me 2015, 30). Pe mafai foi ona e valaaulia se ulugalii faaipoipo e asiasi atu i lau korama po o le vasega ma talanoa e uiga i auala na fesoasoani ai le tasi i le isi e faataunuu a la’ua matafaioi ma pe na faapefea ona fesoasoani le Alii ia i la’ua. O le a se mea ua tatou aoaoina, mai le savali a Sister Burton po o le ulugalii, e uiga i auala e lagolagoina ai e alii ma tamaitai le tasi ma le isi i aiga?

• O mau o loo lisiina i le “Punaoa Lagolago” e mafai ona fesoasoani i tagata o le korama po o le vasega e aoao atili ai e uiga i tiutetauave o alii ma tamaitai i totonu o aiga. E mafai ona e tofia ia korama taitasi po o tagata o le vasega e faitau se tasi o mau nei. Valaaulia i latou e faasoa mai a latou fuaiupu ma talanoa e uiga i tiutetauave o loo faamatalaina. O a mea o loo aoao mai e nei mau e uiga i tiutetauave o mātua? E mafai faapefea e tane ma avā ona fesoasoani le tasi i le isi i le faataunuuina o nei matafaioi paia? E faapefea ona fesoasoani le Faaola ia latou manuia? E faʻapefea ona fesoasoani tamaiti ia i latou?

• Ina ia fesoasoani i lau korama po o le vasega ia malamalama i le ala e mafai ai e alii ma tamaitai ona faʻalagolago le tasi i le isi o se paaga tutusa, tusi ulutala nei i luga o le laupapa: Matafaioi a Tamā ma le Matafaioi a Tina. Fai atu i tagata o le korama po o le vasega e sue i le parakalafa lona fitu o le “O le Aiga: O se Folafolaga i le Lalolagi” ma tusi mea latou te maua i lalo o ulutala talafeagai. O a mea ua tatou aoaoina e uiga i matafaioi paia a tamā ma tina? O le a le uiga o tamā ma tina e fesoasoani le tasi i le isi “o se paaga tutusa” i le faataunuuina o nei matafaioi? O a ni faataitaiga e mafai ona tatou faasoa atu mai o tatou olaga e faaalia ai tamā ma tina i le faataunuuina o a latou matafaioi ma fesoasoani le tasi i le isi o se paaga tutusa? E mafai foi ona e talanoaina ni auala e mafai ai e le autalavou ona saunia nei mo nei matafaioi i le lumanai.

Faatino i le Faatuatua

Ia uunaia sui o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• Faataoto 22:6; Mataupu Faavae ma Feagaiga 68:25–28; 121:41–43 (Matafaioi o matua)

• Efeso 5:25; Mose 3:21–24; 5:1–12 (O tane ma ava e galulue faatasi o ni paaga tutusa)

• “The Women in Our Lives,” “Let Us Be Men” (vitio), ChurchofJesusChrist.org

Aoao Atu i le Ala a le Faaola

Sa saunia e le Faaola i latou na Ia aoaoina ma tuu atu ia i latou tiutetauave taua. E faapefea ona e saunia i latou o loo e aoaoina ina ia galulue faatasi o ni atalii ma ni afafine o le Atua? (Tagai i le Aoao Atu i le Ala a le Faaola [2016], 27–28.)