Keriso o loo tatalo

Keriso i Ketesemane, saunia e Heinrich Hofmann

28 Mati

Aisea Ou te Manaomia ai le Togiola a Iesu Keriso?

Mataupu Faavae ma Feagaiga 29

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O a ni mea e mafai ona tatou faia e fausia ai le lotogatasi i totonu o le korama po o tagata o le vasega? O a ni sini tatou te mananao e galulue faatasi i ai?

• O o tatou tiute po o matafaioi. O a mea ua tatou faia e faasoa atu ai le talalelei? O a aafiaga ua tatou oo i ai i le faia o galuega o le malumalu ma talafaasolopito o aiga?

• O o tatou olaga. O faapefea ona tatou vaaia le aao o le Alii i o tatou olaga? O a mea ua musuiaina ai i tatou i ā tatou suesuega o tusitusiga paia i lenei vaiaso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Na aoao mai Peresitene Ezra Taft Benson: “E pei lava o se tagata e lē naunau i se meaai seiiloga ua fiaai, na te le naunau foi i le faaolataga a Keriso seiiloga ua ia iloa le pogai na te manaomia ai Keriso. E leai se tasi na te iloa lelei pe aisea na te manaomia ai Keriso sei vagana ua ia malamalama ma talia le aoaoga faavae o le Pa’ū ma ona aafiaga i tagata uma” (“O Le Tusi a Mamona ma le Mataupu Faavae ma Feagaiga,”,” Ensign, Me 1987, 85). Ao e suesueina le Mataupu Faavae ma Feagaiga 29 i lenei vaiaso, atonu na e matauina le faamatalaga a le Faaola e uiga i le Pa’ū ma pe faapefea ona faaolaina mai ai i tatou. Na faapefea ona e maua se molimau ia Iesu Keriso ma i Lana matafaioi i le avea ai ma o tatou Faaola ma Togiola? Mafaufau pe faapefea e le faamalosia o molimau a tagata o le korama po o le vasega ia te Ia ona suia ai i latou. Ao e tapena, mafaufau e iloilo le “Faitalia ma le Pa’ū o Atamu ma Eva,” “O Le Togiola a Iesu Keriso,” ma le “O Le Misiona Paia a Iesu Keriso” i le mataupu 3 o le Tala’i La’u Talalelei ([2019], 49–52, 60–61).

tamaitai talavou i totonu o le vasega

Talu ai na togiolaina i tatou e le Faaola mai le Pa’ū, ua mafai ona tatou maua le olioli.

Aoao Faatasi

Ina ia faailoa atu le talanoaga o lenei aso, e mafai ona e valaaulia i latou o loo e aoaoina e lisi i luga o le laupapa soo se mea latou te iloa e uiga i le Pa’ū o Atamu ma Eva. Mo se faataitaiga, o le a se mea latou te aʻoaʻoina e uiga i le Pa’ū mai le Mataupu Faavae ma Feagaiga 29:36–50? O a ni faʻamaoniga o le Pa’ū o loo tatou vaʻavaʻai i ai? O gaoioiga o loo i lalo o le a fesoasoani i lau korama po o le vasega ia iloa pe faapefea e le Togiola a Iesu Keriso ona fesoasoani ia i tatou e faatoilaloina aafiaga o le Pa’ū.

• Ina ia malamalama atili i le Pa’ū o Atamu ma Eva, e mafai e tagata o le korama po o tagata o le vasega ona faitau le “Pau” i le Faamaoni i le Faatuatua (56–59) po o le “Faitalia ma le Pa’ū o Atamu ma Eva” i le mataupu 3 o le Tala’i La’u Talalelei (49–50). Valaaulia i latou e vaai faalemafaufau e faapea na fesili se uo ia i latou, “Aisea ou te manaomia ai Iesu Keriso?” Valaaulia i latou e aoao e le tasi le isi pe faapefea ona latou taliina lena fesili e faavae i mea na latou aoaoina mai a latou faitauga.

• E faapefea ona e fesoasoani i tagata o le korama po o le vasega ia aoao mai tusitusiga paia i le mafuaaga latou te manaomia ai le Togiola a Iesu Keriso? O se tasi auala o le tusia lea o nisi o mau mai “Punaoa Lagolago” i luga o le laupapa ona tusi lea o faamatalaga otooto mo na mau i luga o fasipepa. Tufa atu i tagata taitoatasi o le korama po o le vasega se tasi o fasipepa. Valaaulia i latou e faitau ia mau o loo tusia i luga o le laupapa ma saili se mea e tutusa ma a latou otootoga o faamatalaga. (O nisi o faʻamatalaga e faatatau i le sili atu i le tasi le mau.) Valaaulia tagata taitoatasi o le korama po o le vasega e faitau leotele le mau e fetaui ma a latou faamatalaga ma faasoa atu mea na latou aoaoina e uiga i le mafuaaga tatou te manaomia ai le Togiola a le Faaola.

• Valaaulia sui o le korama po o tagata o le vasega e tali atu i fesili e pei o nei: E faapefea ona faamanuiaina au e ala i le Togiola a Iesu Keriso? O le a se mea o le a suia ai au e le Faaola ina ia mafai ai ona ou mauaina atili le atoatoa o faamanuiaga o Lana Togiola? Ona fai atu lea ia i latou e talanoaina faatasi le fesili muamua. E mafai ona latou iloilo le “O Le Togiola a Iesu Keriso” ma le “O Le Misiona Paia a Iesu Keriso” i le mataupu e 3 o le Tala’i La’u Talalelei (51–52, 60–61) ma se tasi pe sili atu o vitio i “Punaoa Lagolago.” Valaaulia i latou e faasoa mai mea na latou aoaoina.

Faatino i le Faatuatua

Ia uunaia sui o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e sui o le korama po o tagata o le vasega ona faasoa atu o latou manatu.

Punaoa Lagolago

• Mataupu Faavae ma Feagaiga 19:16–19 (Na totogiina e Iesu Keriso le tau mo a tatou agasala ina ia tatou le mafatia pe a tatou salamo)

• 2 Nifae 9:6–16; Alema 42:6–9 (Na laveaiina i tatou e Iesu Keriso mai le oti ma seoli)

• 2 Nifae 2:5–10; Helamana 14:15–17 (E na’o Iesu Keriso e mafai ai ona tatou toe foi atu i le Atua)

• Mosaea 3:7; Alema 7:11–13 (Ona na tauaveina e Keriso i Ona luga o tatou puapuaga ma agasala, Na te silafia le ala e fesoasoani ai ia i tatou)

• Mose 5:10–12 (Ona na togiolaina i tatou e le Faaola mai le Pa’ū, ua mafai ai ona tatou maua le olioli)

• Walter F. González, “O Le Pa’i a le Faaola,” Liahona, Nov. 2019, 90–92

• “Where Justice, Love, and Mercy Meet,” “Why We Need a Savior,” “The Atonement Enables Us” (vitio), ChurchofJesusChrist.org

Aoao Atu i le Ala a le Faaola

Sa tatalo le Faaola mo Ona soo ma faaauau ona auauna atu ia i latou. Na Ia maua avanoa e faatasi ai ma i latou ma faaali atu Lona alofa mo i latou. O a ni avanoa ua e maua e fai ai lenei lava mea ma i latou o e aoaoina? (Tagai i le Aoao Atu i le Ala a le Faaola [2016], 6.)