alii talavou o loo autilo i le telefoni

11 Aperila

E Mafai Faapefea Ona Ou Valaaulia Tagata Uma e O Mai ia Keriso?

Mataupu Faavae ma Feagaiga 30–36

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ma, i le faaopoopo atu i le fautuaina e uiga i pisinisi faapitoa a le korama po o le vasega, atonu e te manao e talanoaina uunaiga ma autu mai konafesi aoao. Atonu o le a fesoasoani fesili nei.

• O a autu po o savali na tulagaese ia i tatou?

• O le a le mea na tatou lagonaina le musuia e fai ona o mea na tatou aoaoina pe lagona?

• O a mea e mafai ona tatou faia o se korama po o se vasega e faatino ai se fautuaga na tatou faalogo i ai i le konafesi aoao?

I le faaiuga o le lesona, pe a talafeagai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Na o ni masina talu ona faatulagaina le Ekalesia toefuataiina i le aso 6 Aperila, 1830, i Feiete, Niu Ioka, na amata ai e le Alii ona valaauina faifeautalai e faapotopoto mai le “au filifilia mai itu e fa o le lalolagi” (Mataupu Faavae ma Feagaiga 33:6). O le mea na amataina o ni taumafaiga a se vaega toaitiiti o tagata faatoa liliu mai i totonu o se vaega faatapulaa o se eria faafaafanua ua avea ma se autau o faifeautalai o loo folafola atu le talalelei i le lalolagi atoa. Ae o le galuega faafaifeautalai e le faatapulaaina ia i latou o loo auauna atu faafaifeautalai. E finagalo le Alii ia i tatou taitoatasi e valaaulia i latou o siomia i tatou e o mai ia te Ia.

O a ni aafiaga na e maua i le valaauliaina o isi e aoao e uiga i le talalelei a le Faaola? O le a se mea e mafai ona e faia e musuia ai tagata o le korama po o tagata o le vasega e faataunuu o latou tiute o le aumaia o agaga ia Iesu Keriso? Aʻo e sauniuni e aʻoaʻo atu, mafaufau e iloilo le “O Le a Loʻu Faamoemoega o se Faifeautalai?” i le Talaʻi Laʻu Talalelei ([2019] 1-16) ma le savali a Elder Dieter F. Uchtdorf “Galuega Faafaifeautalai: Faasoaina Atu o Mea o Loo i totonu o Lou Loto,” Liahona, Me 2019, 15–18).

tamaitai talavou o loo taliē

E ala i le valaauliaina o a tatou uo e auai i sauniga po o gaoioiga a le Ekalesia, tatou te fesoasoani ai ia i latou e aoao e uiga ia Keriso.

Aoao Faatasi

O loo ta’ua i le Mataupu Faavae ma Feagaiga 30–36 igoa o nisi o tagata na valaauina i misiona i uluai aso o le Ekalesia. I ni nai aso ao lumanai lau fonotaga, e mafai ona e tuuina atu i sui taitoatasi o le korama po o le vasega se tasi o nei igoa (tagai i ulutala i vaega 30–36) ma valaaulia o ia e aoao po o le a le fautuaga na tuuina mai e le Alii e fesoasoani ai i lena tagata e faasoa atu le talalelei. E faʻapefea ona tatou faʻatatauina lena fautuaga ia i tatou lava? O manatu nei e mafai ona musuia atili ai i latou o loo e aoaoina e valaaulia i latou o siomia i latou e o mai ia Keriso.

• O malamalama i latou o loo e aoaoina i le uiga o le o mai ia Keriso? E mafai ona e fai atu ia i latou e faasoa mai o latou manatu. Afai e aogā, e mafai ona e faasoa atu lenei faamalamalamaga: “Ina ia o mai i le Faaola, e tatau i tagata ona i ai le faatuatua ia te Ia e oo i le salamo—faia suiga talafeagai ina ia ogatasi o latou olaga ma Ana aoaoga” (Tala’i La’u Talalelei, 2). E mafai foi e le korama po o tagata o le vasega ona faitau mau e aofia ai fuaiupu e pei o le “o mai ia te au” po o le “o mai ia Keriso” e fesoasoani ai e tali lenei fesili—mo se faataitaiga, Mataio 11:28–30; Ominae 1:26; Moronae 10:32; Mataupu Faavae ma Feagaiga 20:59. Aisea tatou te mananao ai i tagata e o mai ia Keriso? O a nisi o mea faigofie e mafai ona tatou faia e fesoasoani ai ia i latou? E mafai e le korama po o tagata o le vasega ona faia ni fuafuaga e valaaulia ai se tasi latou te iloa ina ia sau ma faalatalata atili atu ia Keriso.

• O le aoaoina e uiga i le auala na faasoa ai e isi le talalelei o se auala sili lea e musuia ai i latou o loo e aoaoina. E mafai ona e faʻaalia se tasi pe sili atu foi o vitio o loʻo maua i lalo o “Punaoa Lagolago” pe valaaulia sui o le korama po o le vasega e faitau fautuaga ma faataitaiga o loʻo maua i le savali a Sister Cristina B. Franco “Mauaina o le Olioli i le Faasoaina Atu o le Talalelei” (Liahona, Nov. 2019, 83–86). O le a se mea ua tatou aoao mai i nei faataitaiga? Ia talanoaina faatasi mea e mafai e lau korama po o lau vasega ona fai e valaaulia ai isi e o mai ia Keriso.

• Pe a oo i le faasoaina atu o le talalelei, na saunoa mai Elder Dieter F. Uchtdorf o nisi o i tatou atonu e “lagona le le mautonu pe faapefea ona fai. Pe atonu tatou te lagona le le mautonu e uiga i le alu i fafo atu o la tatou sone e saogalemua ai” (“Galuega Faafaifeautalai: Faasoaina Atu o Mea o Loo i totonu o Lou Loto,” Liahona, Me 2019, 16). Afai e faapea lagona o le korama po o le vasega, o fautuaga faigofie e lima na tuuina mai e Elder Uchtdorf i lana savali, e mafai ona fesoasoani ia i latou. E mafai ona e valaaulia tagata taitoatasi o le vasega e faitau e uiga i se tasi o ana fautuaga ma faasoa mai mea sa latou aoaoina.

Faatino i le Faatuatua

Ia uunaia sui o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e sui o le korama po o tagata o le vasega ona faasoa atu o latou manatu.

Punaoa Lagolago

• 1 Timoteo 4:12 (Fai ma faaa’oa’o o e ua faatuatua)

• Alema 17:2–4 (Sa saunia e atalii o Mosaea i latou lava e faasoa atu le talalelei)

• Mataupu Faavae ma Feagaiga 42:6–7 (Tala’i atu le talalelei e ala i le mana o le Agaga)

• Russell M. Nelson ma Wendy Nelson, “Faamoemoe o Isaraelu” (faigalotu a le autalavou i le lalolagi atoa, 3 Iuni, 2018), faaopoopoga i le New Era ma le Ensign, HopeofIsrael.ChurchofJesusChrist.org

• “Inviting All to Come unto Christ: Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’” (vitio), ChurchofJesusChrist.org

Aoao Atu i le Ala a le Faaola

Na valaaulia e le Faaola isi e molimau atu i upumoni ina ia mafai ona paʻi atu le Agaga i o latou loto. “A o outou pe se a la outou upu ia te au po o ai?” Sa Ia fesili ai. A o tali atu Peteru, sa faamalosia ai lana molimau: “O Oe o le Keriso, o le Alo o le Atua soifua” (Mataio 16:15–16). E mafai faapefea i le faasoa atu o le talalelei ona faamalolosia molimau a uso o le korama po o tagata o le vasega?