Mataupu Faavae ma Feagaiga 2021
25 Aperila. E Mafai Faapefea Ona Avea Atili Aʻu Faapei o Keriso i Laʻu Auaunaga i Isi? Mataupu Faavae ma Feagaiga 41–44


“25 Aperila. E Mafai Faapefea Ona Avea Atili Aʻu Faapei o Keriso i Laʻu Auaunaga i Isi? Mataupu Faavae ma Feagaiga 41–44,” Sau, Mulimuli Mai ia te A’u—Mo Korama a le Perisitua Arona ma Vasega a Tamaitai Talavou: Autu Faaleaoaoga Faavae 2021 (2020)

“25 Aperila. E Mafai Faapefea Ona Avea Atili Aʻu Faapei o Keriso i Laʻu Auaunaga i Isi?” Sau, Mulimuli Mai ia te A’u—Mo Korama a le Perisitua Arona ma Vasega a Tamaitai Talavou: O Autu Faaleaoaoga Faavae 2021

Ata
Ua mulumuluina e Iesu ia vae o Aposetolo

O Iesu o loo Mulumuluina Vae o Aposetolo, saunia e Del Parson

25 Aperila

E Mafai Faapefea Ona Avea Atili Aʻu Faapei o Keriso i Laʻu Auaunaga i Isi?

Mataupu Faavae ma Feagaiga 41–44

Ata
aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10-20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

  • O la tatou korama po o le vasega. O ai e fou mai i la tatou uarota, ma e faapefea ona tatou faia ia latou lagona ua taliaina i latou? O le a se mea o loo tatou faia e faaaoga tatau ai o tatou taimi i totonu o le korama po o fono faalevasega?

  • O o tatou tiute po o matafaioi. O a ni o tatou tiute ma matafaioi o i ai i le avea ai ma alii talavou ma tamaitai talavou? E mafai faapefea ona tatou faataunuuina lelei ia mea?

  • O o tatou olaga. O a mea o loo tatou faia ia avea atili ai e pei o Iesu Keriso ma maua ai Lona mana i o tatou olaga? O a tatou mea o loo fai e fesoasoani ai i o tatou aiga ia o mai ia te Ia?

I le faaiuga o le lesona, pe a talafeagai, fai mea nei:

  • Molimau atu i mataupu faavae sa aoaoina.

  • Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

Ata
aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Ina ua poloaiina e le Alii le Au Paia ina ia faapotopoto i Katelani, Ohaio, e toatele tagata na tuua ma le faamaoni o latou fale ma malaga atu iina. Ae o lenei mea e le na o le nofoia o se nofoaga fou—sa faatatau foi i le ola ai i se auala fou. Atonu na suesue tagata o le korama po o le vasega i le Mataupu Faavae ma Feagaiga 41–44 i lenei vaiaso ma aoao ai e uiga i le siitia atu o le Au Paia i Katelani ma le tulafono na faaali atu e le Alii ia i latou iina. Faatasi ai ma isi mea, na faamoemoeina e le Alii le Au Paia ina ia lotogatasi ao latou alolofa ma auauna le tasi i le isi (tagai Mataupu Faavae ma Feagaiga 42:30–31, 38–39, 45; 44:6). O a ni aafiaga e mafai ona e faasoa atu o le a fesoasoani i lau korama po o lau vasega ia lagonaina le taua o le auaunaga faaKeriso?

Ina ia fesoasoani ia te oe e sauniuni e aoao atu e uiga i le auaunaga faaKeriso, e mafai ona e iloiloina le “Auaunaga” i le Mo le Malosi o le Autalavou ([2011], 32–33) ma le savali a Peresitene Russell M. Nelson “O Le Poloaiga Lona Lua ma le Sili” (Liahona, Nov 2019, 96–100).

Ata
alii talavou ma se tamaitai matua o talie faatasi

E mafai ona tatou auauna atu i isi e pei ona faia e le Faaola.

Aoao Faatasi

Ina ia amataina se talanoaga e uiga i le auaunaga faaKeriso, e mafai ona e tusia i luga o le laupapa “Nonofo faatasi i le alofa” (Mataupu Faavae ma Feagaiga 42:45). Valaaulia lau korama po o le vasega e faitau le Mataupu Faavae ma Feagaiga 42:30–31, 38–39, 45; 44:6 ma lisi auala na finagalo le Alii i le Au Paia e auauna atu ai le tasi i le isi. O a avanoa ua tatou maua, i totonu o o tatou aiga ma fafo atu e auauna atu ai ia i latou o loo manaomia le fesoasoani faaletino, faalelagona, po o le faaleagaga? Filifili mai manatu o loʻo i lalo e musuia ai lau korama poʻo lau vasega e tuʻuina atu auaunaga faʻaKeriso i isi.

  • Ina ia fesoasoani i tagata o le korama po o le vasega ia aoao mai le faataitaiga a le Faaola o le auauna atu, e mafai ona e tofia tagata taitasi e faitau se mau e faatatau i le Faaola o loo auauna atu i se tasi (tagai i “Punaoa Lagolago”). E mafai e tagata taitoatasi ona tauaofai ia mau ma faamatala le mea na faia e le Faaola e auauna atu ai i isi. O a mea o aoao mai e nei faataitaiga e uiga i le auauna atu e pei ona sa faia e le Faaola? O le a le eseesega i le va o le auauna atu i le ala a le Faaola ma isi auala o le auauna atu? E mafai e tagata o le korama ma le vasega ona fetufaai atu ni mea na latou oo i ai ina ua latou taumafai e auauna atu e pei ona faia e le Faaola pe o isi foi na auauna atu ia i latou i lenei auala.

  • Atonu e aoga mo lau korama po o le vasega e toe iloilo mea ua aoao mai e le Faaola ma Ana perofeta e uiga i le auauna atu. O nai mau nei e mafai ona latou faitauina faatasi: Mataio 25:31–46; Luka 10:25–37; Ioane 13:34–35; Iakopo 1:27; Mosaea 2:17; 18:8–10. Fautuaina i latou e tusi i lalo mea ua latou aoaoina e uiga i le auauna atu i isi ma faasoa mai mafaufauga ma aafiaga e faatatau i mea ua latou aoaoina. Ona mafai lea ona latou fuafuaina ni auala e avatu ai auaunaga faʻaKeriso. (E mafai ona latou mauaina ni manatu mai le matamata o le tasi pe sili atu o vitio i “Punaoa Lagolago” po o le asiasi i le JustServe.org.)

  • Ina ia fesoasoani i tagata o le korama po o le vasega i a latou taumafaiga e auauna atu i isi, mafaufau e iloilo faatasi le savali a Sister Bonnie H. Cordon “Avea ma se Leoleo Mamoe” (Liahona, Nov. 2018, 74–76). E mafai ona e amata i le faaali atu o ni ata o auaunaga a le Faaola (sa faaalia e Sister Cordon ni nai ata i le taimi o lana savali). O a mea o loo aoao mai e nei ata e uiga i auala e mafai ai ona tatou auauna atu faaKeriso? Ona mafaufau lea e valaaulia ni sui o le korama po o ni tagata o le vasega e faitau taitoalua se tasi o vaega o le savali ma faasoa mai mea na latou aoaoina e uiga i auala e auauna atu ai faapei o le Faaola. E mafai foi ona latou faasoa mai mea ua latou aoaoina e uiga i le auaunaga faaKeriso ao latou auauna atu i isi.

Faatino i le Faatuatua

Ia uunaia sui o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e sui o le korama po o tagata o le vasega ona faasoa atu o latou manatu.

Punaoa Lagolago

Aoao Atu i le Ala a le Faaola

I le taimi o Lana auaunaga i le lalolagi, sa faaalu ai e Iesu Keriso Lona taimi e auauna atu ai ma fesoasoani ia i latou na siomia o Ia. O soo moni o Keriso latou te faia foi faapena (tagai i le Ioane 13:35). Vaai mo ni avanoa e valaaulia ai sui o le korama po o le vasega e faasoa mai pe na faapefea ona latou auauna atu i isi ma pe o le a foi le mea na musuia ai i latou e tuuina atu le auaunaga. (Tagai i le Aoao Atu i le Ala a le Faaola [2016], 4–5.)

Lolomi