tamaitai talavou o loo tatalo

9 Me

E Mafai Faapefea e le Agaga Paia ona Faamanuiaina Au i Aso Uma?

Mataupu Faavae ma Feagaiga 46–48

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O ai e manaomia la tatou fesoasoani ma tatalo? O le a se mea e mafai ona tatou faia e fesoasoani ai ia i latou? O ai e tatau ona tatou valaaulia i se gaoioiga o loo loma?

• O o tatou tiute po o matafaioi. O a ni tofiga ua tatou faataunuuina? O a ni tofiga e tatau ona tatou faia? Na faapefea ona tatou valaauliaina isi e o mai ia Keriso, ma e mafai faapefea ona tatou valaaulia isi i le taimi nei?

• O o tatou olaga. O a ni aafiaga lata mai ua faamalosia ai a tatou molimau? O a mea o loo tutupu i o tatou olaga, ma e faapefea ona tatou lagolago le tasi ma le isi?

I le faaiuga o le lesona, pe a talafeagai ai, faia mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

E toatele uluai tagata o le Ekalesia toefuataiina na faitau e uiga i faaaliga faaleagaga a le Agaga Paia i tusitusiga paia (tagai Galuega 2:1–4; 13:52; 1 Korinito 12:4–11; 3 Nifae 19). Ao suesueina e le korama po o tagata o le vasega le Mataupu Faavae ma Feagaiga 46–48 i lenei vaiaso, atonu na latou iloaina na naunau le Alii e aoao atu nei Au Paia e uiga i faamanuiaga e mafai e le Agaga Paia ona aumaia i o latou olaga. O a ni aafiaga na aoaoina ai oe i auala e faamanuia ai oe e le Agaga Paia? E faapefea ona fesoasoani le Agaga Paia ia i latou o loo e aoaoina i vaega uma o o latou olaga?

Ina ia fesoasoani ia te oe e sauni e musuia lau korama po o lau vasega e saili le uunaiga a le Agaga Paia, atonu e te toe iloiloina le “Matafaioi a le Agaga Paia” i le Faamaoni i le Faatuatua ([2004], 82) ma le savali a Elder Gary E. Stevenson “E Faapefea ona Fesoasoani le Agaga Paia ia te Oe?” (Liahona, Me 2017, 117–20).

tamaitai talavou o faitauina tusitusiga paia i le vasega

E mafai e le Agaga Paia ona fesoasoani ia i tatou ia malamalama ma aoao atu upumoni o le talalelei.

Aoao Faatasi

Ua tuuina mai i tusitusiga paia le tele o faataitaiga o meaalofa faaleagaga. E mafai faapefea ona e fesoasoani e atiina ae ia faatuatua o tagata o lau vasega e faapea, o nei meaalofa e mafai ona faaalia i o tatou olaga i le asō? E mafai ona e amata i le valaaulia o i latou e tusi i luga o le laupapa se meaalofa faaleagaga o loo faamatalaina i totonu o le Mataupu Faavae ma Feagaiga 46:7–33 ma talanoa pe na faʻapefea ona latou vaaia le faʻaalia mai i o latou olaga po o le olaga o se tasi latou te iloa.

I le faaopoopo atu i meaalofa a le Agaga, e faamanuiaina i tatou e le Agaga Paia i le tele o isi auala. E mafai ona e faʻaaoga se tasi poʻo le sili atu o gaoioiga o loʻo i lalo e fesoasoani ai i tagata o le korama po o le vasega ia malamalama atili i lenei mea.

• O nisi taimi tatou te manatu tatou te manaomia le Agaga Paia mo na o filifiliga taua po o mea taua i o tatou olaga. E mafai faapefea ona e fesoasoani ia i latou o loo e aoaoina ina ia iloa le tele o mea e mafai ona faia e le Agaga Paia mo i latou? E mafai ona e vaevaeina le korama po o le vasega i ni vaega laiti ma fai atu i vaega taitasi e faitau se tasi po o le sili atu o mau mai “Punaoa Lagolago.” E mafai e se tasi tagata mai vaega taitasi ona faasoa mai mea na latou aoaoina. Ona valaaulia lea o uso taitasi o le korama po o le vasega e fai se lisi o auala e mafai ai e le Agaga Paia ona faamanuiaina o latou olaga i aso taitasi. Ao latou faasoa atu a latou lisi, e mafai ona latou talanoa e uiga i mea e mafai ona latou faia e maua ai le Agaga Paia faatasi ma i latou i aso taitasi.

• O le isi auala e fesoasoani ai ia i latou o loo e aoaoina ina ia malamalama i le auala e mafai ona fesoasoani ai le Agaga Paia ia i latou, o le tusia lea o fesili nei i luga o le laupapa: O le a se mea tatou te iloa e uiga i le Agaga Paia? E mafai faapefea e le Agaga Paia ona fesoasoani ia i tatou? Ona mafai lea e tagata o le korama po o tagata o le vasega ona sailia tali i totonu o le savali a Elder Gary E. Stevenson “E Faapefea ona Fesoasoani le Agaga Paia ia te Oe?” (Liahona, Nov. 2017, 117–20). E mafai foi ona latou mauaina tali e ala i le iloiloina o le “Matafaioi a le Agaga Paia” i le Faamaoni i le Faatuatua (itulau 82). Pe a talafeagai ai, ia fetufaai atu ni mea na tutupu ia te oe ma le Agaga Paia, ma valaaulia le autalavou e faasoa mai ni aafiaga na latou maua.

• E mafai e tagata o le korama po o le vasega ona faitauina le “Faaaliga Faaletagata Lava Ia” po o le “Aoao ia Iloa Uunaiga a le Agaga” i le mataupu e 4 o le Tala’i La’u Talalelei ([2019], 95–96, 102–3). Ona mafai lea ona latou faafoliga o i latou o faifeautalai o loo aoaoina se tasi e lei faalogo lava i le auala e mafai ai e le Agaga Paia ona faamanuia o tatou olaga. O le a se latou tala e fai atu ia i latou?

Faatino i le Faatuatua

Ia uunaia sui o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• Ioane 14:16–27 (E aoao mai i tatou e Le Fesoasoani ma faamanatu mai foi o Ia ia te outou i mea uma ua Ou fai atu ai ia te outou)

• Ioane 15:26; Mataupu Faavae ma Feagaiga 42:17; Mose 1:24 (O le Agaga Paia e molimau e uiga i le Tama ma le Alo)

• Roma 8:16 (Ua molimau mai le Agaga o i tatou o fanau a le Atua)

• 2 Nifae 32:5; Mataupu Faavae ma Feagaiga 18:18 (O le a faaali mai e le Agaga Paia ia i tatou mea e ao ona tatou faia)

• 3 Nifae 27:20 (O le Agaga Paia e faapaiaina i tatou)

• Moronae 8:26 (O le a faatumuina i tatou e le Agaga Paia i le faamoemoe ma le alofa)

• Moronae 10:5 (Ua aoaoina i tatou e le Agaga Paia i le upumoni)

Aoao Atu i le Ala a le Faaola

Na faasoa atu e le Faaola ni tala faigofie, faataoto, ma ni faataitaiga moni o le olaga e aoao atu ai i se auala e malamalama ai Ona soo. O a aafiaga faaletagata lava ia e mafai ona e faasoa atu i le autalavou e fesoasoani ai ia i latou ia malamalama i matafaioi a le Agaga Paia ma lagonaina se manao e saili ia ituaiga aafiaga? (Tagai i le Aoao Atu i le Ala a le Faaola [2016], 22.)