Vaitafe o Sasikuana

Fepuari 8–14

Mataupu Faavae ma Feagaiga 12-13; Iosefa Samita—Talafaasolopito 1:66-75

“I Luga o Oulua O’u Uso a Auauna E”

Na maua e Iosefa Samita ma Oliva Kaotui le malamalama faaopoopo a o la tatalo e uiga i upumoni sa la aoaoina i tusitusiga paia (tagai Iosefa Samita--Talafaasolopito 1:68). E mafai faapefea ona e mulimuli i a la faataitaiga?

Tusifaamaumau Ou Lagona Uunai

O le toatele o tagata o le lalolagi e latou te le’i faalogo lava i se nofoaga e igoa ia Haramoni, Penisilevania. A e e tele ina filifilia e le Alii nofoaga e lē mailoa mo ni mea e tutupu sili na taua i Lona malo. I se vaega e tele ai laau e latalata i Haramoni i le aso 15 o Me, 1829, na faaali mai ai Ioane le Papatiso o se tagata toetu ia Iosefa Samita ma Oliva Kaotui. Ua tuu ona lima i luga o o la ua ulu ma faaee atu i ai le Perisitua Arona, valaau i la’ua “o’u uso a auauna e” (Mataupu Faavae ma Feagaiga 13:1).

I le ta’ua ai o se uso a auauna e pei o Ioane le Papatiso, o le na papatisoina le Faaola ma saunia le ala mo Lona afio mai (tagai Mataio 3:1--6, 13--17), o se mea e faalotomaulaloina ai, atonu ua sili ona lofituina ai nei alii talavou e toa lua ua silia ma le luasefulu tausaga le matutua. I lea taimi, e le’i mailoaina lava e ni isi Iosefa ma Oliva, faapei o le nuu o Haramoni. A e o auaunaga i le galuega a le Atua sa iloa lava e faatatau i le ala tatou te auauna ai, a e le faatatau po o ai o iloa mai. Po o le a lava le itiiti po o le lē mailoa mai o lau vaega i se taimi, o oe lava o se uso a auauna i le galuega tele a le Alii.

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 12

O loo manao mai le Alii ia te a’u e fesoasoani e faatu le faamoemoe o Siona.

Na feiloai Iosefa Knight Matua, ma lona toalua o, Polly, ia Iosefa Samita a o 20 ona tausaga, na amata ai ona ia galue i le la faatoaga i Kolesavile, Niu Ioka. Na faamatalaina e Iosefa Knight o ia o se tagata faigaluega sili ona lelei sa ia te ia. Na talitonu o ia i le molimau a Iosefa Samita e uiga i papatusi auro ma sa ia aveina Polly e asiasi atu ia Iosefa Samita a o ia faaliliuina le Tusi a Mamona i lona fale i Haramoni Penisilevania. Ua Ia talitonu i lea taimi. Mo le taimi uma o o la soifuaga, na tumau Iosefa ma Polly i le faamaoni i le talalelei toefuataiina. E silia ma le 60 tagata o le aiga o Knight na auai ma fesoasoani e faatu le Ekalesia i Niu Ioka, Ohaio, Misuri, Navu, ma oo atu ai i le Aai o Sate Leki.

Sa fia iloa e Iosefa Knight pe faapefea ona ia fesoasoani atu i le galuega a le Alii. O le tali a le Alii (i le taimi nei Mataupu Faavae ma Feagaiga 12) ua faatatau ia i “latou uma foi o e ua i ai manaoga e aumai i luma ma faatu lenei galuega” (fuaiupu 7) --e aofia ai ma oe. O le a le uiga ia te oe o le “e aumai i luma ma faatu le faamoemoe o Siona” ? (fuaiupu 6). E mafai faapefea e mataupu faavae ma uiga patino o loo i fuaiupu 7-9 ona fesoasoani ia te oe ia faia lea?

Tagai foi i “O Aiga o Knight ma Whitmer,” Ia Malamalama i Faaaliga, 20-24.

Mataupu Faavae ma Feagaiga 13

Na toe fuatai le Perisitua Arona e Ioane le Papatiso.

I le na’o le tasi o le fuaiupu, na faaalia mai ai e Ioane le Papatiso le tele o upumoni e uiga i le Perisitua Arona. Manatunatu e lisi mea uma ua e aoaoina mai lenei vaega (e aofia ai ma le ulutala o le vaega). Atonu e aoga ia te oe le suesue ni isi o faaupuga e te mauaina. O ni isi nei o faataitaiga e te amata ai:

• “O ki o le auaunaga a agelu”: 2 Nifae 32:2--3: Moronae 7:29--32; Jeffrey R. Holland,”O Le Auaunaga a Agelu,” Ensign po o le Liahona, Nov. 2008, 29--31; Taiala i Tusitusiga Paia, “Agelu,” scriptures.ChurchofJesusChrist.org

• “O ki o le talalelei o le salamo”: 3 Nifae 27:16–22; Mataupu Faavae ma Feagaiga 84:26–27; Dale G. Renlund, “O le perisitua ma le mana togiola a le Faaola,” Ensign po o le Liahona, Nov. 2017, 64–67

• “O atalii o Levi”: Numera 3:5–13; Mataupu Faavae ma Feagaiga 84:31–34; O le taiala i Tusitusiga Paia, “Perisitua Arona,” “Levi,” scriptures.ChurchofJesusChrist.org

O a ni faamanuiaga ua e mauaina e ala mai i sauniga o le Perisitua Arona?

O Iosefa Samita o loo papatisoina Oliva Kaotui

O Iosefa Samita o loo papatisoina Oliva Kaotui, saunia e Del Parson

Iosefa Samita—Talafaasolopito 1:66–75

O Sauniga e aumaia ia te a’u le ala i le mana o le Atua?

Na aoao mai e Tuafafine Carole M. Stephens, o le sa avea ma fesoasoani i le Au Peresitene Aoao o le Aualofa, e faapea: “Ua tuuina mai e sauniga ma feagaiga o le perisitua le avanoa tatou te mauaina ai le atoaga o faamanuiaga na folafola mai ia i tatou e le Atua, lea ua mafai ona o le Togiola a le Faaola. Latou te faaaupegaina ia atalii ma afafine o le Atua i le mana, ma tuuina mai ia i tatou le avanoa e maua ai le ola e faavavau” (“Pe O Tatou Iloa Ea Mea Ua Tatou Maua?” Ensign po o le Liahona, Nov. 2013, 56).

A o e faitau le Iosefa Samita—Talafaasolopito 1:66-75, e aofia ai le faamatalaga o loo i le faaiuga o le fuaiupu 71, manatunatu pe o le a le mea na musuia Iosefa ma Oliva e fesili ai e uiga i le papatisoga, ma manatua faamanuiaga ia na oo mai ia i la’ua ina ua mavae le auai i sauniga o le perisitua. Manatunatu e faitau tusiga mai tusitalaaga lea sa e ono tusia ina ua mavae le mauaina o sauniga po o le faamaumauina o mea na manatua o mea na tutupu. O a ni faamanuiaga ua e mauaina e ala mai sauniga o le perisitua?

Tagai foi Mataupu Faavae ma Feagaiga 84:20-22; Au Paia, 1:65–68.

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 12:8.Aisea e manaomia ai uiga patino ia o loo lisiina mai i le fuaiupu lenei pe a fai tatou te faia le galuega a le Alii?

Mataupu Faavae ma Feagaiga 13.Faamata o a mea e fausia ai le faatuatua o lou aiga i le toefuataiina o le Perisitua Arona? O le vitio “Toefuataiga o le Perisitua Arona” (ChurchofJesusChrist.org) po o le ata tusi lea e o faatasi ma lenei taiala e mafai ona fesoasoani i lou aiga e vaai faalemafaufau i le toefuataiina o le Perisitua Arona. Faamata e latou te fiafia e tusia se ata o le mea na tupu, e faavae lea i mea na latou faitau i ai i le Iosefa Samita—Talafaasolopito 1:68-74? E mafai foi ona latou faasoa mai a latou molimau e uiga i le mana o le perisitua i o latou olaga.

Tagai foi “Nofoaga o le Toefuataiga o le Perisitua” i le history.ChurchofJesusChrist.org.

Iosefa Samita—Talafaasolopito 1:68.E fa’apefea ona tatou mulimuli i le fa’ata’ita’iga a Iosefa Samita ma Oliva Kaotui e saili tali i a tatou fesili? Atonu a o outou faitau faatasi, e mafai ona e faia soo le taofi ma fesili atu pe i ai se tasi e i ai se fesili e uiga i mea o loo latou faitau iai.

Iosefa Samita—Talafaasolopito 1:71, manatua.O a mea lelei na maitauina e tagata o lou aiga e uiga i upu a Oliva Kaotui? O a ni isi o “aso e le mafaagaloina lava” a lou aiga?

Iosefa Samita—Talafaasolopito 1:73–74. O le a le aafiaga a le Agaga Paia ia Iosefa ma Oliva? O anafea na fesoasoani ai le Agaga i lou aiga ia malamalama i tusitusiga paia ma olioli ai i le Alii?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ua Toe Fuatai Mai Le Perisitua,” Tusipese a Tamaiti,60.

Faaleleia o Lo Tatou Aoao Atu

Suesue e faaaoga ai autu. I le avea ai o se aiga, filifili se autu e tou te mananao e suesue atili ma auiliili. Mo se faataitaiga, o lenei vaiaso e mafai foi ona outou faaaogaina le Topical Guide po o le O Le Taiala i Tusitusiga Paia (scriptures.ChurchofJesusChrist.org) e sue ai mau e uiga i le Perisitua Arona.

Faaee e Ioane le Papatiso le Perisitua Arona i luga o Iosefa Samita

I Luga o Oulua O’u Uso a Auauna e, saunia e Linda Curley Christensen