8–14 Fepuari

Mataupu Faavae ma Feagaiga 12–13; Iosefa Samita—Talafaasolopito 1:66–75

“I Luga o Oulua O’u Uso a Auauna”

O tamaiti e te aoaoina e o mai mai tulaga eseese ma e eseese manaoga. A o e sauniuni, mafaufau i le auala sili e mafai ona fesoasoani ia i latou e iloa ai upumoni o loo aoaoina le Mataupu Faavae ma Feagaiga 12–13 ma le Iosefa Samita—Talafaasolopito 1:66–75.

Tusi Faamaumau Ou Lagona Uunai

Valaaulia le Fefaasoaai

Valaaulia tamaiti e faasoa mai ni taimi na latou vaaia ai se tagata ua papatisoina pe mauaina se faamanuiaga faaleperisitua. Na faapefea ona maua e Iosefa Samita ma Oliva Kaotui le perisitua?

Aoao atu le Aoaoga Faavae: Tamaiti Laiti

Mataupu Faavae ma Feagaiga 13

O Ioane le Papatiso na toefuatai maia le Perisitua Arona.

I le aso 15 o Me, 1829, na faaali ai Ioane le Papatiso ia Iosefa Samita ma Oliva Kaotui e tuuina atu ia te i laua le Perisitua Arona. E faʻapefea ona faamanuiaina tamaiti o loʻo e aʻoaʻoina i le aʻoaʻoina o lenei mea?

Gaoioiga e Mafai Ona Fai

• Tau atu i tamaiti pe na faapefea ona toefuatai mai le Perisitua Arona (tagai Iosefa Samita—Talafaasolopito 1:68–70; tagai foi “Mataupu 6: O Le Tuuina Mai o le Perisitua ia losefa ma Oliva,” Tala o le Mataupu Faavae ma Feagaiga, 26–27). Pe valaaulia se alii i le uarota e sau i le vasega ma faamatala le tala e pei o ia o Ioane le Papatiso, faitau i tamaiti le mea na tau atu e Ioane ia Iosefa Samita ma Oliva Kaotui.

• Faaali atu ata o Ioane le Papatiso o loo papatisoina le Faaola ma toefuatai mai le Perisitua Arona (Tusiata o le Talalelei, 35, 93; tagai foi i le ata otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Valaaulia tamaiti e faasoa mai mea latou te iloa e uiga i mea o tutupu i ata (tagai i le Mataio 3:13–17; Mataupu Faavae ma Feagaiga 13; Iosefa Samita—Talafaasolopito 1:68–70).

• Usu faatasi ma tamaiti se pese e faatatau i le perisitua, e pei o le “Ua Toe Fuatai Mai Le Perisitua” (Tusipese a Tamaiti, 60). Valaaulia tamaiti e savavali faataamilo i le potu ao latou pepese, feauauai i le uuina o le ata mai le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga.

Mataupu Faavae ma Feagaiga 13

O le perisitua o le mana a le Atua.

O lesona e uiga i le toefuataiga o le Perisitua Arona o taimi sili ia e fesoasoani ai i tamaiti ina ia malamalama lelei po o le a le perisitua ma pe mafai faapefea ona faamanuiaina ai i latou.

Gaoioiga e Mafai Ona Fai

• Aumai ni mea faitino i le vasega, e aofia ai se ki. Faaali atu mea faitino, ma fai atu i tamaiti e faalogo ao e faitauina le Mataupu Faavae ma Feagaiga 13 ma sue le mea faitino o loo taʻua i le mau. O le a se mea e mafai ona tatou faia i se ki? Faaali atu ata o mea e mafai ona tatou faia ona ua toefuatai mai le Perisitua Arona (tagai i le itulau o gaoioiga a lenei vaiaso; tagai foi i le Tusiata o le Talalelei, 103–4, 107–8). Tau atu i tamaiti pe faapefea ona faamanuiaina lou olaga e le perisitua.

• Ina ia fesoasoani i tamaiti e aoao le fuaitau O le perisitua o le mana o le Atua, fai atu ia i latou e patipati ao latou fai mai upu taitasi. Faaali atu se mea e manaomia ai se maa e galue ai, ma aoao atu, e pei o le malosiaga e aumai e le maa i le mea faitino, e aumaia e le perisitua le mana o le Atua io tatou olaga. Faasoa atu lau molimau e uiga i faamanuiaga ua oo mai ia te oe ona o le perisitua.

Iosefa Samita—Talafaasolopito 1:66–75

E mafai ona ou papatiso.

Na faitau Iosefa Samita ma Oliva Kaotui e uiga i le papatisoga i le Tusi a Mamona ma sa mananao e fia iloa atili. E mafai ona e fesoasoani i tamaiti o loo e aoaoina ia tepa taulai atu i lo latou papatisoga ma aoao atili e uiga i lenei sauniga paia.

Gaoioiga e Mafai Ona Fai

• Faaali le vitio “Restoration of the Aaronic Priesthood” (ChurchofJesusChrist.org). Taofi le vitio i nisi taimi e fesili atu ai i tamaiti fesili e pei o le “Aisea na o ai Iosefa Samita ma Oliva Kaotui i le togavao?” Ma le “O le a sou manatu i le lagona na oo ia Iosefa Samita ma Oliva Kaotui ina ua uma ona papatisoina?” Fai atu ia i latou e faasoa mai pe o le a so latou manatu po o le a so latou lagona pe a papatisoina i latou.

• Tau atu i tamaiti e uiga i le papatisoina o Iosefa Samita ma Oliva Kaotui (tagai i le Iosefa Samita—Talafaasolopito 1:68–74; tagai foi i le “Mataupu 6: O Le Tuuina Mai o le Perisitua ia losefa ma Oliva,” Tala o le Mataupu Faavae ma Feagaiga, 26–28). Faamamafa atu le olioli na lagonaina e Iosefa ma Oliva, ma tau atu i tamaiti e uiga i lau papatisoga. Valaaulia i latou e tusi se ata o i latou o loo papatisoina i se aso o i luma.

  

  E mafai ona ou papatiso e pei ona ua toefuatai mai le perisitua.

Aoao atu le Aoaoga Faavae: Tamaiti Matutua

Mataupu Faavae ma Feagaiga 13; Iosefa Samita —Talafaasolopito 1:66–72

O Ioane le Papatiso na toefuatai maia le Perisitua Arona.

O tala o le toefuataiga o le Perisitua Arona e mafai ona fesoasoani i tamaiti o e aoaoina ia malamalama i upumoni taua e faatatau i le perisitua ma faauuga o le perisitua.

Gaoioiga e Mafai Ona Fai

• Faitau faatasi le Iosefa Samita—Talafaasolopito 1:66–72, ma valaaulia tamaiti e tusi ni ata o mea o loo faamatala mai e nei fuaiupu. Tuu i tamaiti e faamatala le tala e faaaoga ai a latou ata. Valaaulia se tasi e faasoa mai se aafiaga na ia vaai ai i se tasi o faauuina i se tofi o le perisitua. Na faapefea ona tutusa lena ma le auala na faauuina ai Iosefa ma Oliva e pei ona faamatalaina i totonu o le Iosefa Samita—Talafaasolopito 1:66–72?

• Tuu atu i tamaiti ni nai minute e fai ai se lisi o mea uma latou te iloa e uiga ia Ioane le Papatiso, ona tuu atu lea ia i latou e faasoa mai mea na latou tusia. Valaaulia tamaiti e galulue taitoalua e faitau se tasi o fuaitau nei ma faaopoopo i la latou lisi: Mataio 3:13–17; Mataupu Faavae ma Feagaiga 13; Iosefa Samita—Talafaasolopito 1:66–72.

Mataupu Faavae ma Feagaiga 13

Ou te maua faamanuiaga e ala i le Perisitua Arona.

Tatou te mauaina le tele o faamanuiaga e ala i le Perisitua Arona. O le a se mea e mafai ona e faia e fesoasoani ai i tamaiti o loo e aoaoina ina ia malamalama o nei faamanuiaga e mafai ona maua aua ua toefuatai mai le perisitua?

Gaoioiga e Mafai Ona Fai

• Tuu ata o se papatisoga ma le faamanatuga i totonu o se koneteina e manaomia ai se ki e tatala ai. Ia talanoaina pe aisea e taua ai ki, ma tuu atu i tamaiti e faaaoga le ki e tatala ai le koneteina. Valaaulia tamaiti e faitau le Mataupu Faavae ma Feagaiga 13 ma saili upu ma fasifuaitau e aoao ai i latou po o a faamanuiaga e maua mai i le Perisitua Arona.

• Faaali le vitio “Blessings of the Priesthood” (ChurchofJesusChrist.org), ma fai atu i tamaiti e faailoa mai auala ua faamanuiaina ai tagata i le vitio ona o le perisitua.

IosefaSamita—Talafaasolopito 1:73–74

E mafai e le Agaga Paia ona fesoasoani ia te a’u ia ou malamalama i tusitusiga paia.

Ina ua maea ona papatisoina Iosefa Samita ma Oliva Kaotui, sa fesoasoani le Agaga Paia ia i laua ia malamalama lelei i tusitusiga paia. Atonu o se mea lea e uunaia ai tamaiti, o e o ono faigata ona malamalama i tusitusiga paia.

Gaoioiga e Mafai Ona Fai

• Aumai se paso faigofie i le vasega, ma valaaulia tamaiti e tuu faatasi. Ao latou faia, fai atu ia i latou pe faapefea ona tutusa le faitauina o tusitusiga paia ma le tuufaatasia o se paso. Faitau faatasi le Iosefa Samita—Talafaasolopito 1:73–74, ma valaaulia tamaiti e faasoa mai mea na fesoasoani ia Iosefa ma Oliva e malamalama ai i tusitusiga paia. O a ni mea e mafai ona e faia e saili ai le fesoasoani a le Agaga Paia a o e suesue i tusitusiga paia?

• Valaaulia tamaiti e fai se faailoga tusi e mafai ona latou tuu i totonu o a latou tusitusiga paia e faamanatu ai ia i latou e saili le fesoasoani a le Agaga Paia pe a latou faitau. Masalo latou te ono mauaina se fasifuaitau musuia i totonu o le Iosefa Samita—Talafaasolopito 1:74 e mafai ona latou tusia i luga o a latou faailoga tusi.

Fautuaina le Aoaoina i le Aiga

Afai e leai sou taimi mo tamaiti e faauma ai le itulau o gaoioiga i le vasega, mafaufau e ave ni kopi i le fale ina ia mafai e tamaiti ona galulue faatasi ma o latou aiga.

Faaleleia o Lo Tatou Aoao Atu

Ia fetuutuunai ma faalogo i le Agaga. Aua e te manatu e tatau ona e faʻaaoga manatu i lenei otootoga. E te iloa tamaiti e te aoaoina; ole atu i le Tama Faalelagi e taiala oe i auala sili e fesoasoani ai ia i latou e aoao mataupu faavae o le talalelei ma fausia lo latou faatuatua.