kopi o itulau o le uluai Tusi a Mamona.

1–7 Fepuari

Mataupu Faavae ma Feagaiga 10–11

“Ina ia Mafai Ona e Sau Ai o Lē Ua Manumalo”

Faitau ma le agaga tatalo le Mataupu Faavae ma Feagaiga 10–11, mafaufau loloto pe mafai faapefea ona e fesoasoani i tamaiti ia malamalama i upumoni i nei vaega. O manatu i lenei otootoga—mo tamaiti laiti ma tamaiti matutua—e mafai ona fesoasoani.

Tusi Faamaumau Ou Lagona Uunai

Valaaulia le Fefaasoaai

Fai atu i tamaiti e faasoa mai mea latou te manatuaina mai se lesona talu ai e uiga ia Matini Harisi ma itulau na leiloloa o le faaliliuga o le Tusi a Mamona. Faasoa atu soo se auiliiliga latou te le manatuaina. Atonu e te manao e faasino i le “Mataupu 4: O Matina Harisi ma Itulau na Leiloa” (Tala o le Mataupu Faavae ma Feagaiga, 18–21).

Aoao atu le Aoaoga Faavae: Tamaiti Laiti

Mataupu Faavae ma Feagaiga 10:5

Pe a ou tatalo e le aunoa, o le a faamanuiaina a’u e le Tama Faalelagi.

O nisi taimi e manatu tamaiti e mafai ona latou tatalo na o taimi ma nofoaga patino, ma pe a latou tootutuli pe tapuni o latou mata. E mafai faapefea ona e fesoasoani ia i latou ia aoao e “tatalo e le aunoa”?

Gaoioiga e Mafai Ona Fai

• Faaali ata o mea tatou te faia soo, pei o le ‘ai, moe, po o le taʻalo. E faapefea e nei mea ona fesoasoani ia i tatou? Faaali atu se ata o se tamaitiiti o loo tatalo a o e faitau atu i tamaiti mai le Mataupu Faavae ma Feagaiga 10:5 upu nei “tatalo e le aunoa.” Fai atu i tamaiti e fai faatele upu nei. E mafai faapefea ona fesoasoani le tatalo ia i tatou?

• Faaaoga le itulau o gaoioiga o lenei vaiaso e fesoasoani ai i tamaiti e mafaufau i le tele o nofoaga ma taimi e mafai ona tatou tatalo ai.

• Valaaulia tamaiti e tusi ni ata o latou lava po o o latou aiga o tatalo i taimi ma nofoaga eseese, e pei o le lotu, aʻo leʻi amataina le aʻoga, poʻo le taimi e momoe ai. Faamalamalama o le tatalo e le aunoa e mafai ona faauigaina o le tatalo soo i le aso. E faapefea ona tatou tatalo e tusa lava pe o siomia i tatou e isi tagata, e pei o le aʻoga po o le i ai faatasi ma tatou uo?

  

  E fesoasoani mai le Alii pe a tatou tatalo.

Mataupu Faavae ma Feagaiga 11:12–13

E taitai a’u e le Agaga Paia e faia mea lelei.

E oo lava i le laitiiti o tausaga, e mafai e tamaiti ona amata ona iloa pe a talanoa atu le Agaga ia i latou.

Gaoioiga e Mafai Ona Fai

• Nana se matauila po o se moliuila, ma se ata o se foliga fiafia i se mea i totonu o le potu. Valaaulia ia tamaiti e sue nei mea. Faitau le Mataupu Faavae ma Feagaiga 11:13, ma fesoasoani i tamaiti ia iloa upu e fetaui ma mea na latou mauaina. O a mea o loo aoao mai e nei upu e uiga i le ala e fesoasoani mai ai le Agaga Paia ia i tatou?

• Tuu atu i tamaiti ni tulaga se tele lea e ono manaomia ai lo latou faia o se filifiliga i le va o le saʻo ma le sese—e pei o le filifili e taʻu atu le mea moni pe pepelo, po o le filifili ia agalelei pe agaleaga foi. E faapefea ona tatou iloa po o le fea o filifiliga o le mea saʻo? Faitau faatasi le Mataupu Faavae ma Feagaiga 11:12, ma molimau atu o le Agaga Paia o le a fesoasoani ia i tatou i le faia o le filifiliga saʻo pe a tatou faalogo ia te Ia.

• Usu faatasi se pese e faatatau i le taitaiga a le Agaga Paia, e pei o le “Listen, Listen” (Children’s Songbook, 107). Fesili atu i tamaiti pe o le a se mea o aoao mai e le pese ia i latou e uiga i le auala e fesoasoani ai le Agaga Paia ia i tatou.

Aoao atu le Aoaoga Faavae: Tamaiti Matutua

Mataupu Faavae ma Feagaiga 10:5

A ou tatalo e le aunoa, e mafai ona ou faatoilaloina faaosoosoga a Satani.

E mafai ona e fesoasoani i tamaiti ia malamalama o le tatalo faifaipea latou te maua ai le mana e faatoilalo ai faaosoosoga.

Gaoioiga e Mafai Ona Fai

• Tusi upu po o fasifuaitau mai le Mataupu Faavae ma Feagaiga 10:5 i ni fasi pepa, ma fai atu i tamaiti e tuu i le faasologa sao. Fautuaina i latou e sue le fuaiupu pe a latou manaʻomia se fesoasoani. E tusa ai ma lenei fuaiupu, o a faamanuiaga e oo mai pe a tatou tatalo e le aunoa? E mafai faapefea ona fesoasoani ia i tatou le manatua e tatalo i aso uma, aemaise lava pe a faaosoosoina i tatou e faia se mea sese?

• Valaaulia tamaiti e fai se lisi o nisi o taimi e mafai ai ona tatou tatalo ma nofoaga e mafai ona tatou tatalo ai. Mo manatu faaopoopo, uunaia i latou e tagai i le Alema 34:17–27.

• Fesoasoani i tamaiti e fai se tamai faailoga po o se ata e faamanatu atu ai ia i latou ia tatalo e le aunoa. Valaaulia i latou e tautau a latou faailoga i o latou fale i se mea latou te vaai soo atu i ai.

Mataupu Faavae ma Feagaiga 11:12–13

E taitai a’u e le Agaga Paia e fai mea lelei.

E masani ona mafaufau tagata talavou pe faape’i le lagona o le taitaiga a le Agaga Paia. E mafai ona e faaaogaina le Mataupu Faavae ma Feagaiga 11 e aʻoaʻo ai tamaiti pe faapefea ona iloa “le Agaga lena lea na te taitai ia fai mea lelei” (fuaiupu 12).

Gaoioiga e Mafai Ona Fai

• Fesoasoani i tamaiti e faia se lisi o tagata latou te o i ai pe a latou manaʻomia se fesoasoani pe i ai se fesili. Aisea tatou te talitonu ai o nei tagata o le a fesoasoani ia i tatou? Valaaulia tamaiti e faitau le Mataupu Faavae ma Feagaiga 11:12 ma vaai po o le a le mea na taʻuina atu ia Ailama Samita ia talitonuina. O le a se mea ua tatou aoaoina mai lenei fuaiupu e uiga i le mafuaaga e tatau ai ona tatou faalagolago i le taitaiga a le Agaga Paia?

• Fai atu i tamaiti pe o le a se latou tala e fai atu i se uo na fesili atu ia i latou pe o le a sona lagona pe a talanoa le Agaga Paia ia i latou. Valaaulia tamaiti e faitau le Mataupu Faavae ma Feagaiga 11:12–13 e sue ai ni tali talafeagai.

• Faasoa atu i tamaiti nisi o mea na e oo i ai ma le Agaga Paia o taialaina oe e faia mea lelei. Valaaulia tamaiti e mafaufau loloto pe atonu latou te ono oo i ni aafiaga faapea ma faasoa atu o latou aafiaga pe afai latou te lagona le fiafia i le faataunuuina. Molimau atu e finagalo le Tama Faalelagi e taitaiina i tatou e ala i le Agaga Paia. Uunai tamaiti e matau i le vaiaso a sau pe a i ai ni o latou lagona e pei ona faamatalaina i totonu o le Mataupu Faavae ma Feagaiga 11:12–13.

Mataupu Faavae ma Feagaiga 11:21, 26

E tatau ona ou iloa le talalelei ina ia mafai ona ou fesoasoani i isi ia maua le upumoni.

O tamaiti o loo e aoaoina o le a tele avanoa e faasoa atu ai le talalelei. O nei fuaiupu e mafai ona aʻoaʻoina i latou i le auala e sauniuni ai mo nei avanoa.

Gaoioiga e Mafai Ona Fai

• Valaaulia tamaiti e faatino se tala pe o le a faapefea ona latou talanoa e uiga i le talalelei ma se tasi e lei faalogo i ai muamua. Mo se faataitaiga, e faapefea ona latou taliina fesili e uiga i le Tusi a Mamona? E faapefea ona latou faʻamatalaina po o ai Iesu Keriso? Faitau faatasi ma tamaiti le Mataupu Faavae ma Feagaiga 11:21,26. O le a le mea na taʻu atu e le Alii ia Ailama Samita e tatau ona ia faia ina ia mafai ona ia aoao atu le talalelei? O le a le uiga o le “maua” le afioga a le Atua, ma e mafai faapefea ona tatou faia lenei mea? E faapefea ona tatou “teu” le afioga a le Atua io tatou loto?

• Valaaulia tamaiti e faasoa mai se mau latou te fiafia i ai ma faamatala pe aisea latou te fiafia i ai. Tuu atu ia i latou e talanoa pe faapefea ona faamanuiaina e tusitusiga paia o latou olaga ma mea o loo latou faia e suesue ai afioga a le Atua i le fale. Fautuaina i latou e seti ni sini e faitau soo le afioga a le Atua.

• Usu faatasi se pese e faatatau i le faasoaina o le talalelei, e pei o le “Ou Te Fia Avea Nei Ma Faifeautalai” (Tusipese a Tamaiti,90). O le a se mea o aoao mai e lenei pese pe mafai faapefea ona avea i tatou ma faifeautalai i aso uma?

• Faasoa se vaega mai le “Hope of Israel” na saunia e Peresitene Russell M. Nelson ma Sister Wendy W. Nelson (faigalotu mo le autalavou i le lalolagi, aso 3 o Iuni, 2018, ChurchofJesusChrist.org) ia musuia tamaiti e fesoasoani e faapotopoto fanau a le Atua e ala i le faasoaina atu o le talalelei.

Fautuaina le Aoaoina i le Aiga

Valaaulia tamaiti e fai se talanoaga ma se tagata o le aiga e uiga i se mea na latou aoaoina mai i le Mataupu Faavae ma Feagaiga 10 po o le 11 i le aso. Mo se faʻataʻitaʻiga, e mafai ona latou faʻasoa pe faapefea ona latou fuafua e tatalo e le aunoa.

Faaleleia o Lo Tatou Aoao Atu

Saili faaaliga i aso uma. A o e sauniuni e aoao atu, tatalo ma mafaufau loloto i tusitusiga paia i le gasologa o le vaiaso. O le a e iloaina o le Agaga o le a “faapupula lou mafaufau” (Mataupu Faavae ma Feagaiga 11:13). O manatu ma lagona e uiga i le auala e aʻoaʻo atu ai e mafai ona oʻo mai ia te oe i soo se taimi ma soo se mea—a o e malaga i le galuega, fai feau i le fale, pe talanoa ma isi.