15–21 Fepuari

Mataupu Faavae ma Feagaiga 14–17

“Tu Atu o se Molimau”

E faapefea ona e fesoasoani i tamaiti e tutu o ni molimau o le talalelei? O gaoioiga o loʻo i lenei otootoga e mafai ona tuʻuina atu ia te oe ni manatu.

Tusi Faamaumau Ou Lagona Uunai

Valaaulia le Fefaasoaai

Mafaufau e valaaulia ni nai tamaiti e faasoa mai se mea na latou aoaoina i lenei vaiaso, i le fale po o le Peraimeri, latou te talitonu e moni.

Aoao atu le Aoaoga Faavae: Tamaiti Laiti

Mataupu Faavae ma Feagaiga 14:1–7

E mafai ona ou fesoasoani i le Alii e fai Lana galuega.

Mafaufau pe faapefea e upu a le Alii ia Tavita Uitimera ona fesoasoani i tamaiti ia malamalama i le auala e mafai ai ona latou auai i le galuega a le Atua.

Gaoioiga e Mafai Ona Fai

• Faasoa faapuupuu atu ni nai auiliiliga e uiga i le aiga o Uitimera (tagai i le Au Paia, 1:68–71 po o le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Mo se faataitaiga, fetufaai pe o ai Tavita Uitimera ma le auala na fesoasoani ai o ia ma lona aiga ia Iosefa Samita ao ia faaliliuina le Tusi a Mamona.

• Fesoasoani i tamaiti ia malamalama i faatusatusaga i le va o le galue i se fanua ma le auai i le “galuega sili ma le ofoofogia a le Atua” (fuaiupu 1). Mo se faataitaiga, o le seleseleina o se seleselega e mafai ona faatusa i le aumaia o agaga ia Keriso. E mafai ona e faʻaalia se ata o se faifaatoʻaga, aumai ofu faifaatoaga mo tamaiti e faataitai, pe talanoaina galuega masani e faia e tagata faifaatoaga. Faamalamalama atu o Tavita Uitimera o se faifaatoaga na manao e iloa pe mafai faapefea ona ia fesoasoani i le Alii. Faitau le Mataupu Faavae ma Feagaiga 14:3–4 i tamaiti, ma fesoasoani ia latou iloa le mea na taʻu atu e le Alii ia Tavita Uitimera e fai. E mafai faapefea ona tatou fesoasoani atu i le galuega a le Alii?

• Faaaoga se meaalofa e aoao ai tamaiti e uiga i le meaalofa a le Atua o le ola e faavavau. Mo se faʻataʻitaʻiga, faʻaali atu i tamaiti se meaalofa faʻatasi ma se pepa i totonu e faitauina, “Ola e Faavavau” (Mataupu Faavae ma Feagaiga 14:7). Tuu atu i se tamaitiiti e tatalaina le meaalofa, ma faitau leotele le Mataupu Faavae ma Feagaiga 14:7. Faasoa atu o le ola e faavavau o lona uiga o le ola e faavavau ma le Atua ma ia avea faapei o Ia. Faasoa atu lau molimau i faamanuiaga o le tausia o poloaiga ma le mauaina o le ola e faavavau.

  

  O le galuega faafaifeautalai o se tasi lea o auala e mafai ai ona tatou fesoasoani i le Alii e fai Lana galuega.

Mataupu Faavae ma Feagaiga 15:6; 16:6

E mafai ona ou fesoasoani i isi ia latalata atili ia Iesu Keriso.

O Ioane Uitimera ma Peteru Uitimera le Itiiti o uso o Tavita Uitimera. E pei o Tavita, latou te fia iloa pe mafai faapefea ona latou fesoasoani i le Alii. Sa ia fai atu ia i latou e fesoasoani e “aumaia agaga ia te” Ia.

Gaoioiga e Mafai Ona Fai

• Fai atu i tamaiti e faamatala se mea e taua ia i latou (e pei o se meataalo, tusi, po o se taaloga). Faitau le Mataupu Faavae ma Feagaiga 15:6 po o le 16:6, ma fai atu i tamaiti e sii o latou lima pe a latou faalogo i le mea na fetalai mai le Alii “e sili ona taua.”

• Faatasi ma tamaiti, fai se lisi o auala e mafai ona latou fesoasoani ai i se tasi e mulimuli ia Iesu Keriso, e pei o le avea ma uo i isi, faasoa atu tusitusiga paia ma se uo, po o le tatalo mo se tasi o loo manaomia le fesoasoani. Ina ia tuuina atu i tamaiti ni manatu, e mafai ona e faaali atu ni ata talafeagai mai mekasini a le Ekalesia po o le Tusiata o le Talalelei. Pe mafai e tamaiti ona tusi a latou lava ata. Valaaulia i latou e faataitai ona faatino se mea oi luga oa latou lisi i le aluga o le vaiaso.

Mataupu Faavae ma Feagaiga 17

E mafai ona avea a’u ma se molimau o mea ua faia e le Atua mo au.

Sa avea Tavita Uitimera ma se tasi o Molimau e Toatolu o le Tusi a Mamona, ma o ona uso e toafa sa avea ma nisi o Molimau e Toavalu. E pei o Tavita ma ona uso, e mafai e i tatou taitoatasi ona “tutu o se molimau” o le upumoni (Mataupu Faavae ma Feagaiga 14:8).

Gaoioiga e Mafai Ona Fai

• Tau atu i tamaiti e uiga i Molimau e Toatolu ma le Toavalu (tagai i le “Mataupu 7: Ua Vaai ni Molimau i Papa Tusi Auro” [Tala o le Mataupu Faavae ma Feagaiga, 31–33], po o le vitio talafeagai i luga o le ChurchofJesusChrist.org). Valaaulia tamaiti e tusi se ata o molimau o vaai i papatusi.

• Valaaulia tamaiti e valivali le itulau o gaoioiga a lenei vaiaso, ma faaaoga e faamatala ai le tala o Molimau e Toatolu.

• Uu i luga se kopi o le Tusi a Mamona, ma faitau atu i tamaiti le laina mulimuli o le Mataupu Faavae ma Feagaiga 17:6: “Ma e pei ona soifua lo outou Alii ma lo outou Atua, ua moni ia.” Tau atu i tamaiti pe faapefea ona e iloa e moni le Tusi a Mamona. Valaaulia tamaiti e avea ma molimau o le Tusi a Mamona e ala i le faitauina ma tatalo ia iloa pe moni pe a faasoa atu a latou molimau i isi.

Aoao atu le Aoaoga Faavae: Tamaiti Matutua

Mataupu Faavae ma Feagaiga 14–16

E mafai ona ou fesoasoani i le Alii e fai Lana galuega.

A o outou talanoaina faaaliga i uso Uitimera, e mafai ona outou faasoa atu nisi o auala ua valaaulia ai e le Alii i tatou taitoatasi e fesoasoani ia te Ia i Lana galuega.

Gaoioiga e Mafai Ona Fai

• Faasoa atu tala e uiga ia Tavita Uitimera ma lona aiga e te lagona o le a musuia ai le fanau (tagai Au Paia, 1:68–71). Na faapefea ona faaaoga e le Alii ia le au Uitimera e fesoasoani ai e fausia Lona malo?

• I luga o ni fasipepa, ia tusia ni fesili faigofie ma mau fesootai mai i le Mataupu Faavae ma Feagaiga 14–16. Mo se faataitaiga: E faapei le afioga a le Atua? (14:2). O le a le meaalofa sili a le Atua? (14:7). O le a le mea na fetalai mai le Alii e taua tele? (15:6; 16:6). Valaaulia tamaiti taitoatasi e filifili se fesili ma saili tali i fuaiupu.

• Tusi ni ulutala se lua i luga o le laupapa: Galuega Faifaatoaga ma le O le Galuega a le Alii. Fesoasoani i tamaiti e sue le Mataupu Faavae ma Feagaiga 14:3–4 mo fasifuaitau e faatatau i galuega faifaatoaga, ma tusi i lalo o le ulutala muamua. O a mea o loo aoao mai e nei fasifuaitau e uiga i le galuega a le Atua? Tusi tali a tamaiti i lalo o le ulutala lona lua. E faapefea ona tatou fesoasoani i le galuega a le Alii?

Mataupu Faavae ma Feagaiga 17

E mafai ona avea a’u ma se molimau o mea ua faia e le Atua mo a’u.

I le Mataupu Faavae ma Feagaiga 17, na taʻu atu e le Alii ia Oliva Kaotui, Tavita Uitimera, ma Matini Harisi o le a avea i latou ma Molimau e Toatolu o le Tusi a Mamona. Fesoasoani i tamaiti ia latou iloa auala e mafai ai ona avea i latou ma molimau o le mea moni.

• Valaaulia se tamaitiiti e sau saunia e faasoa atu le tala o Molimau e Toatolu (tagai i le “Mataupu 7: Ua Vaai ni Molimau i Papa Tusi Auro” [Tala o le Mataupu Faavae ma Feagaiga, 31–33], po o le vitio talafeagai i luga o le ChurchofJesusChrist.org). O le a se mea e mafai ona tatou aʻoaʻoina mai lenei tala e uiga i auala e avea ai ma molimau totoa? E mafai ona e faaali atu foi vaega filifilia mai le vitio “A Day for the Eternities” (ChurchofJesusChrist.org; o le vaega e faatatau i Molimau e Toatolu e amata i le pe a ma le 15:00).

• Faitau faatasi le folafolaga a le Alii i le Mataupu Faavae ma Feagaiga 17:1–3, ma fesoasoani i tamaiti e saili lana faataunuuga i le “O Le Mau a Molimau e Toatolu” i le Tusi a Mamona.

• Faitau faatasi le Mataupu Faavae ma Feagaiga 17:3–5 e saili po o le a le mea na talosagaina Oliva Kaotui, Matini Harisi, ma Tavita Uitimera e fai pe a uma ona vaai i papatusi auro. O a nisi upumoni e mafai ona tatou molimau atu ai? Faamatala pe na faapefea ona e faasoa atu lau molimau i isi, ma valaaulia tamaiti e faasoa mai soo se aafiaga na latou maua.

Fautuaina le Aoaoina i le Aiga

Valaaulia tamaiti e tutu o ni molimau o se mea na latou aoaoina i le vasega i le aso. Fai atu ia i latou e faasoa mai pe na faapefea ona latou faia lenei vaega i le vasega o le vaiaso a sau.

Faaleleia o Lo Tatou Aoao Atu

Tuu tamaiti ia gaoioi. E mafai ona e fausia i luga o uiga ola o fanau e ala i le valaauliaina o i latou e faatino se tala pe faatino ni amioga e fetaui ma se pese po o se fuaitau o mau. (Tagai Aoao Atu i le Ala o le Faaola, 25–26).