“15-21 Fepuari. Mataupu Faavae ma Feagaiga 14-17: ‘Tu Atu o se Molimau,’” Sau, Mulimuli Mai ia te A’u—Mo Tagata Taitoatasi ma Aiga: Mataupu Faavae ma Feagaiga 2021 (2020)
“15-21 Fepuari. Mataupu Faavae ma Feagaiga 14-17,” Sau, Mulimuli Mai ia te A’u—Mo Tagata Taitoatasi ma Aiga: 2021
15–21 Fepuari
Mataupu Faavae ma Feagaiga 14–17
“Tu Atu o se Molimau”
O nisi o taimi e fai atu ai tagata o le aiga ma uo a Iosefa Samita ia te ia e saili atu faaaliga e uiga i le finagalo o le Atua mo i latou. A o e faitauina nei faaaliga, maitau faatonuga a le Atua mo oe.
Tusifaamaumau Ou Lagona Uunai
E ui lava sa alualu lelei le galuega o le faaliliu, e oo atu ia Me 1829, o le tulaga i Haramoni ua amata ona faigata tele mo Iosefa, Ema ma Oliva. Ua faatupulaia le vevesi mai tuaoi a o le lagolago mai le aiga o Ema ua amata ona vaivai. I le lagona ai ua le o toe saogalemu Haramoni, o lea sa fesootai atu ai Oliva i se uo o se sa faailoa mai lona fia auai i le galuega a Iosefa: o Tavita Uitimera. Sa nofo faatasi Tavita ma ona matua ma ona uso ma tuafafine i Faiete, Niu Ioka, e tusa ma le 100 maila le mamao. Na la feiloai ma Oliva i le tausaga na muamua atu, ma na tusi atu i ai e Oliva ni tusi mai lena taimi ma faasoa atu i ai ona aafiaga i le galulue faatasi ai ma le Perofeta. E le’i feiloai lava Tavita po o se tasi o lona aiga ia Iosefa. Ae ina ua fesili atu i ai Oliva pe mafai ona la o atu ma Iosefa i le fale o Uitimera e faamaea ai le faaliliuina o le Tusi a Mamona, na faigofie lava e le aiga o Uitimera ona tatala mai o latou faitotoa. Ma na i ai i le Alii nisi fuafuaga mo le au Uitimera nai lo le na’o le nofo ai o le Perofeta. Sa ia te Ia ni faatonuga patino mo i latou, o loo maua i le Mataupu Faavae ma Feagaiga 14-17, ma i se taimi o le a avea ai i latou ma se tasi o aiga faavae o le Ekalesia ma molimau i le tatalaina o le Toefuataiga.
Mo nisi faamatalaga e uiga i le aiga o Uitimera, tagai Au Paia, 1:68–71.
Manatu mo Suesuega Faaletagata Lava Ia o Tusitusiga Paia
E mafai ona ou auai i le “galuega taua ma le ofoofogia” a le Atua.
Ina ua ia feiloai ia Iosefa Samita, o Tavita Uitimera o se alii talavou tuuto i lana galuega i le faatoaga a le aiga. Ae e ese le galuega na finagalo i ai le Alii mo Tavita—e ui i nisi itu ua pei o se faifaatoaga. A o e faitauina le Mataupu Faavae ma Feagaiga 14:1-4, vaavaai mo le auala na faatusa ai e le Alii Lana galuega i le ituaiga o galuega sa masani ai Tavita. O a mea ua e aoaoina mai e uiga i le galuega a le Alii mai lenei faatusatusaga?
E mafai faapefea ona e “sasau atu [lau] selesaito”? (fuaiupu 4). Manatua folafolaga o loo tuuina mai i lenei vaega ia i latou o e “saili e aumai i luma ma faatu … Siona” (fuaiupu 6).
Mataupu Faavae ma Feagaiga 14:2
O le upu a le Alii e “vave ma mamana.”
Na faatusa e le Alii Lana upu i se “pelu matalua” (Mataupu Faavae ma Feagaiga 14:2). O le a se mea ua fautuaina mai ia te oe i lenei faatusaga e uiga i le upu a le Atua? Mo se faataitaiga, o le a le ala ua vave, mamana, ma maai ai Lana upu? Ua faapefea ona oo mai ia te oe se aafiaga o le mana o le upu a le Atua?
Manatu i isi ala o loo faamatalaina ai e le Atua Lana upu. Mo se faataitaiga, o le a le mea ua e aoaoina e uiga i le upu a le Atua mai faatusatusaga o fasifuaitau nei?
Na faatusaina e le Alii Lana upu i se pelu.
Mataupu Faavae ma Feagaiga 14:7
O le ola e faavavau o “le meaalofa silisili lea o meaalofa uma a le Atua.”
A o e faitauina le Mataupu Faavae ma Feagaiga 14:7, mafaufau loloto pe aisea ua avea ai le ola e faavavau ma “meaalofa silisili lea o meaalofa uma a le Atua.” Atonu e mafai ona fesoasoani le malamalamaaga lenei mai ia Peresitene Russell M. Nelson: “ I le fuafuaga sili o le fiafia a le Atua, e mafai ai e aiga ona faamauina i malumalu ma sauniuni ai e toe foi atu e mafuta i Lona afioaga paia e faavavau. O le ola e faavavau lena!“ (“Ia Faafetaia le Atua,” Ensign po o le Liahona, Me 2012, 78).
Manatunatu e faaopoopo fesootaiga o mau i le fuaiupu 7 lea e mafai ona fesoasoani ia te oe ia malamalama atili e uiga i le ola e faavavau (tagai “Ola e Faavavau” i totonu O Le Taiala po o Taiala i Tusitusiga Paia, scriptures.ChurchofJesusChrist.org). O a ni mea ua e aoao mai ua musuia ai oe e te taumafai mo le ola e faavavau?
Mataupu Faavae ma Feagaiga 15–16
O le aumaia o agaga ia Keriso o le taua tele lea.
Na mananao uma Ioane ma Pita Uitimera ia la iloa po o le a le “mea lea ua sili ona taua” i o la olaga (Mataupu Faavae ma Feagaiga 15:4; 16:4). Pe na e mafaufau ea e uiga i lenei mea mo oe lava ia? A o e faitauina le Mataupu Faavae ma Feagaiga 15-16, mafaufau loloto pe aisea ua avea ai le aumaia o agaga ia Keriso ma mea ua sili lona taua. E mafai faapefea ona e valaaulia agaga e o mai ia Keriso?
Tagai foi Mataupu Faavae ma Feagaiga 18:10–16.
E faaaogaina e le Alii molimau e faatu ai Lana upu.
O le a le molimau? Aisea e faaaoga ai e le Alii molimau i Lana galuega? (tagai i le 2 Korinito 13:1). Mafaufau loloto i fesili nei a o e faitauina upu a le Alii i Molimau e Toatolu i totonu o le Mataupu Faavae ma Feagaiga 17. Atonu foi e ono fesoasoani le iloiloina “O le Mau a Molimau e Toatolu” o loo i totonu o le Tusi a Mamona. E faapefea e molimau ona fesoasoani e faataunuuina “faamoemoega amiotonu a le Atua”? (fuaiupu 4).
Pe sa e iloaina o Maria Uitimera foi sa mauaina se molimau o papatusi auro? Na faaali e le agelu o Moronae ia te ia o se faailoaina o osigataulaga sa ia faia a o nonofo ai Iosefa, Ema, ma Oliva i lona fale (tagai Au Paia, 1:70–71). O le a se mea ua e aoao mai i lona aafiaga e uiga i le mauaina o se molimau?
Tagai foi Au Paia, 1:73–75; Ulisses Soares, “The Coming Forth of the Book of Mormon,” Ensign po o le Liahona, Me 2020, 32-35.
Manatu mo Suesuega Faaleaiga o Tusitusiga Paia ma Afiafi Faaleaiga
-
Mataupu Faavae ma Feagaiga 14:1–4. Manatunatu e valaaulia lou aiga e saili fuaitau e fesootai i le faifaatoaga i totonu o nei fuaiupu. Faamata aisea na faatusaina ai e le Alii Lana galuega i se seleselega? O le a se mea e mafai ona tatou faia e fesoasoani ai i Lana galuega?
-
Mataupu Faavae ma Feagaiga 14:2.O le gaoioiga mo lenei fuaiupu o loo i le “Manatu mo Suesuega Faaletagata Lava Ia o Tusitusiga Paia” o loo lisi ai nisi o fuaitau o tustusiga paia e uiga i le upu a le Atua. Atonu e mafai e tagata o le aiga ona faitau i ai ma faasoa mai mea ua latou aoaoina. E faapefea e nei fuaitau o tusitusiga paia ona musuia i tatou e “ua’i mai” i le upu a le Atua?
-
Mataupu Faavae ma Feagaiga 15:6; 16:6.O nei fuaiupu e mafai ona musuia ai se talanoaga e uiga i mea ua sili ona taua i lou aiga (tagai foi Mataupu Faavae ma Feagaiga 18:10).
-
Mataupu Faavae ma Feagaiga 17.Atonu e ono fiafia lou aiga e tusi ata o mea taitasi na vaai i ai Molimau e Toatolu (tagai i le fuaiupu 1). A o e faitauina le vaega 17, vaavaai mo fasifuaitau ia o loo aoao mai e uiga i le taua o le Tusi a Mamona. E mafai faapefea ona avea i tatou ma molimau o le Tusi a Mamona? E mafai foi e lou aiga ona maimoa le vitio “A Day for the Eternities [O Se Aso mo le Faavavau]” (ChurchofJesusChrist.org).
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Pese Fautuaina: “Ou te Alu i Mea e te Tofia,” Viiga, nu. 169.
O Leo o le Toefuataiga
O Lusi Maka Samita ma Molimau e Toatolu ma le Toavalu.
Na faaali atu e le agelu o Moronae papatusi auro ia Iosefa Samita, Oliva Kaotui, Tavita Uitimera, ma Matini Harisi i le vao e lata ane i le fale o Uitimera i Feiete, Niu Ioka. Na asiasi atu matua o Iosefa i le au Uitimera i lea taimi. Na faamatala e Lusi Maka Samita, le tina o Iosefa, le aafiaga faavavega na oo i molimau:
“O le taimi o le va o le tolu ma le fa. Sa matou saofafai ma Mrs. Uitimera ma Mr. Samita i se potumoe. Sa ou saofai i le pito o le moega. Ina ua sau Iosefa i totonu sa ia faapau ifo i o’u autafa. ‘Tama! Tina!’ sa ia fai mai ai. ‘Lua te le iloa lo’u fiafia tele. Ua faia e le Alii ina ia faaali atu papatusi i nisi e toa 3 e ese nai lo a’u o e ua vaai foi i se agelu ma o le a molimau i le moni o mea sa ou fai atu ai. Aua ua latou iloa mo i latou lava ou te le o alu atu e taufaasese i tagata. Ma ua ou lagona ua pei ua tuumamaina se avega mamafatu, na toeitiiti lava ou le gafatia ona tauave. A e o le a latou tauaveina nei se vaega, ma ua faafiafiaina lou agaga ona ua le toe na’o au nei i le lalolagi.’ Ona sau lea i totonu o Matini Harisi. Na ia foliga mai ua toeitiiti a faatoilaloina i le taumasuasua o le olioli. Ona ia molimau mai lea i le mea na ia vaaia ma faalogo i ai, na faapea foi ona faia e isi, o Oliva ma Tavita. O a latou molimau na tutusa i mataupu e pei ona i ai i totonu o le Tusi a Mamona. …
“Ae mo Matini Harisi lava ia na foliga mai ua le mafai atoa ona ia faaleoina i upu ona lagona. Sa ia faapea mai, “Ua ou vaai nei i se agelu mai le Lagi o le ua molimau mautinoa mai i le moni o mea uma na ou faalogo i ai e faatatau i le talafaamaumau, ma na vaaia e o’u mata o ia. Ua ou vaaia foi papatusi ma taulimaina e o’u lima ma e mafai ona ou molimau i na mea uma i le lalolagi atoa. A e ua ou mauaina e a’u lava se molimau e le mafaia e upu ona faamatalaina, e le mafai e se laulaufaiva ona faamatala, ma ou te faamanu i le Atua i le faamaoni o lo’u agaga ona ua ia filifilia a’u,o a’u lava, o se molimau o le silisiliese o lenei galuega ma ana fuafuaga i le avea ai ma sui [o] fanau a tagata.’ Na auai faatasi ma ia, Oliva ma Tavita i le paia o le vivii i le Atua mo lona agalelei ma le alofa mutimutivale. Na matou toe foi i le fale [i Palamaira, Niu Ioka,] i le aso na sosoo ai o se mafutaga toalaiti ua faafiafiaina, ma olioli.”1
O Ata o Oliva Kaotui, Tavita Uitimera, ma Matini Harisi saunia e Lewis A. Ramsey
Sa i ai foi Lusi Maka Samita ina ua toe foi mai Molimau e Toavalu mai la latou aafiaga:
“I le mavae ai o le toe foi mai i le fale o nei molimau, na toe faaali mai le agelu ia Iosefa; na tuuina atu ai i le taimi lea e Iosefa papatusi i lima o le agelu. I lena afiafi na matou faia ai se fonotaga, lea na tuuina atu ai molimau a nei molimau uma e uiga i mea moni e pei ona tuuina atu i luga, ma o lo matou aiga uma, e oo lava ia Don Carlos [Samita], o le na’o le 14 tausaga le matua, na molimau i le moni o tisipenisione o aso e gata ai—lea ua o’o mai i lona atoatoa.”2
O le atavane o Iosefa Samita ma Molimau e Toavalu, saunia e Gary Ernest Smith
O le Agelu o Moronae o loo Faaali atu Papatusi Auro ia Iosefa Samita, Oliva Kaotui, ma Tavita Uitimera, saunia e Gary B. Smith