Faatoaga a Matini Harisi

Faatoaga a Matini Harisi, saunia e Al Rounds

Fepuari 22–28

Mataupu Faavae ma Feagaiga 18–19

“Ua Tele Lava le Taua o Agaga”

O faaaliga i totonu o le Mataupu Faavae ma Feagaiga na tuuina mai o ni tali patino e tusa ma lea taimi e tusa ma le 200 tausaga talu ai, a o mataupu faavae o loo aoao mai ai e le muta lona faatatauga i le vaitaimi. Vaai mo nei mataupu faavae a o e faitauina, ma manatunatu pe faapefea ona faatatau ia te oe.

Tusifaamaumau Ou Lagona Uunai

O le faatoaga a Matini ma Lusi Harisi o se tasi o faatoaga mataina i Palamaira, Niu Ioka. E feololo nai tausaga na faaaluina e faatau ai, na mafai ai ona amatalia se aiga, ma na aumaia ai se tulaga lelei mo i la’ua i lea aai. A e i le 1829, na amata manino mai ai pau le ala o le a mafai ai ona lomia le Tusi a Mamona pe a mokesi e Matini lana faatoaga e totogi ai le lomitusi. Na i ai le molimau a Matini Harisi i le Tusi a Mamona, a o Lusi, e leai. Afai e faaauau e Matini ona mokesi lana faatoaga a e le lelei le alumia o le Tusi a Mamona, e ono goto ai lana faatoaga ma faaletonu ai lana faaipoipoga. E oo mai lava ia i tatou i lea taimi i lea taimi, fesili ia talitutusa e pei o fesili na feagai ma Matini: O le a le taua o le talalelei a Iesu Keriso ia te a’u? O le a le mea o loo o’u naunau e ositaulaga e fesoasoani ai e fausia le malo o le Atua? E mafai ona fesoasoani ia i tatou ina ia manatua e leai se tasi ua totogiina se tau ua sili atu e faamanuiaina ai le fanau a le Atua nai lo Iesu Keriso, “o le ua silisili i tagata uma” (Mataupu Faavae ma Feagaiga 19:18).

Ua faia e Matini le faaiuga e mokesi lana faatoaga. O lana ositaulaga na totogiina ai le tau o le 5,000 o kopi o le lomiga muamua o le Tusi a Mamona. Ma i le taimi nei, ua silia ma le 190 miliona kopi mulimuli ane ua faamanuiaina ai le miliona ma miliona o agaga i le salafa o le lalolagi.

Mo faamatalaga faaopoopo e uiga i le lomiga o le Tusi a Mamona, tagai i le Au Paia, 1:76-84.

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 18:10-16

E olioli le Alii pe a tatou salamo.

Manatua le tele o taimi o loo faaaoga ai upu o le salamo ma le salamo i le faasologa o le Mataupu Faavae ma Feagaiga 18 ma le 19, ma mafaufau loloto i mea ua e aoaoina mai nei upu i taimi uma o loo faaaoga ai. Manatunatu faapitoa lava i le Mataupu Faavae ma Feagaiga 18:10--16; pe faapefea e nei fuaiupu ona aafia ou lagona e uiga i le salamo--lou lava salamo ma le tiute e valaaulia isi ia salamo?

Tagai foi Alema 36:18–21; Dale G. Renlund, “Salamo: O Se Filifiliga Fiafia,” Ensign po o le Liahona, Nov. 2016, 121–24.

Mataupu Faavae ma Feagaiga 18:34–36

E mafai ona ou faalogoina le siufofoga o le Alii i totonu o le Mataupu Faavae ma Feagaiga.

Afai e fesili atu se tasi ia te oe pe faape’i le siufofoga o le Alii, o le a lau tala e fai? Mafaufau i le fesili lea a o e faitauina le Mataupu Faavae ma Feagaiga 18:34--36. O le a le mea ua aoao mai e uiga i le siufofoga o le Alii mai le Mataupu Faavae ma Feagaiga? O le a se mea e mafai ona e faia ia faalogoina ai ma manino atili Lona Siufofoga?

Mataupu Faavae ma Feagaiga 19:15–20

Na mafatia Iesu Keriso ina ia mafai ai ona ou salamo ma sau ia te Ia.

O loo faamatalaina e le Feagaiga Fou mafatiaga a le Faaola i Ketesemane mai le vaaiga a i latou o e na vaai iai. I le Mataupu Faavae ma Feagaiga 19:15--20, na faamatalaina ai e Iesu Keriso e uiga i Lona mafatiaga i Ana lava upu. I lenei faamaumauga paia patino ia te Ia, vaavaai mo upu ma fuaitau na o loo faamatalaina ai mafatiaga o le Faaola. Manatunatu po o a mea o loo aoao ai oe e ia upu ma fasifuaitau taitasi. Aisea na naunautai ai le Faaola e mafatia? Manatunatu ia faamaumauina ou lagona e uiga ia Iesu Keriso ma Lana taulaga mo oe.

Tagai i le Ioane 15:13; Mosaea 3:7; Alema 7:11–12; Mataupu Faavae ma Feagaiga 18:10–13.

O Iesu o loo siiina se tamaitiiti laitiiti

Taua o se Agaga, saunia e Liz Lemon Swindle

Mataupu Faavae ma Feagaiga 19:26--27, 34--41

O faamanuiaga a le Atua ua sili atu nai lo oa o le lalolagi.

O le Tusi a Mamona e le’i lelei ona alumia i Palamaira, ma o se taunuuga, na i’u ina faatauina e Matini Harisi se vaega tele o lana faatoaga ina ia totogi ai le aitalafu (tagai “O le Sao o Matini Harisi,” Faamaninoga o Faaaliga, 7--8). Manatunatu i lena osigataulaga--ma faamanuiaga ua e maua ona o lena osigataulaga--a o e faitau nei fuaiupu. E mafai foi ona e mafaufau e uiga i mea ua talosagaina ai oe e le Alii e ositaulaga. O a ni mea ua e maua i nei fuaiupu ua musuia ai oe e faia nei osigataulaga ma le “olioli” ma le “fiafia”? (tagai foi fuaiupu 15–20).

Mataupu Faavae ma Feagaiga 19:23

E oo mai le filemu mai le aoao e uiga ia Iesu Keriso ma mulimuli ia te Ia.

Manatunatu i le valaaulia a le Faaola “A’oa’o mai ia te a’u.” O le a le mea ua e aoao mai e uiga ia Iesu Keriso mai le Mataupu Faavae ma Feagaiga 19? Faamaumau ou mafaufauga, ma mafaufau loloto pe faapefea e nei upumoni e uiga ia Iesu Keriso ona fesoasoani ia te oe ia maua le filemu. O le a le uiga ia te oe o le “savali i le agamalu o [Lona] Agaga”?

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 18:1--5.Atonu e mafai e tagata o le aiga ona faasoa mai le “tele o taimi” (fuaiupu 2) lea na faaalia ai e le Agaga ia i latou e moni tusitusiga paia, e pei lava na Ia faia mo Oliva Kaotui. E mafai faapefea e lou aiga ona “faalagolago i mea ua tusia” (fuaiupu e 3) i totonu o tusitusiga paia? E mafai faapefea ona e faatuina le faavae o lou aiga i luga o “papa” (fuaiupu 4) o le talalelei?

Mataupu Faavae ma Feagaiga 18:10–13; 19:16–19. E mafai e tagata taitoatasi o le aiga ona faitau Mataupu Faavae ma Feagaiga 18:10--13 ma sui ai lona igoa i le mea o loo i ai ia upu nei “agaga” ma “tagata uma.” Ona mafai lea ona outou talanoaina le ala ua fesoasoani ai nei fuaiupu ia i tatou ia malamalama lo tatou taua i le Tama ma le Alo (tagai Mataupu Faavae ma Feagaiga 19:16--19).

Mataupu Faavae ma Feagaiga 18:21--25.E i ai ni uiga faapitoa o igoa o tagata o lou aiga? Atonu e mafai ona outou talanoa e uiga i le mafuaaga e taua ai igoa ma le uiga o le tauaveina i o tatou luga le suafa o Iesu Keriso (tagai Mosaea 5:7). E mafai ona avea lenei ma se avanoa lelei e fesoasoani ai i tagata taitoatasi o le aiga e saunia e ave le suafa o Keriso i o latou luga pe a papatisoina i latou.

Mataupu Faavae ma Feagaiga 19:15–20.Ina ia fesoasoani i lou aiga ia anoa aafiaga latou te maua i nei fuaiupu, atonu e mafai ona e faitauina a o faaalia le ata o Iesu Keriso (o loo i ai se ata faatasi ma lenei taiala). Ona mafai lea e tagata o le aiga ona faasoa mai o latou lagona e uiga i le Faaola. O se viiga e fiafia i ai e uiga i le Faaola e mafai foi ona valaaulia ai le Agaga.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ou te Tu ma Ofo,” Viiga, nu. 107.

Faaleleia o Suesuega Faaletagata Lava Ia

Fai fesili. O Le Mataupu Faavae ma Feagaiga o se faamaoniga lea o fesili e taitai atu ai i faaaliga. A o e suesue i tusitusiga paia, faamaumau fesili ia e oo mai ia te oe. Ona manatunatu loloto lea ma tatalo e saili tali.

O Iesu o loo tatalo i le Faatoaga o Ketesemane

O Keriso o loo Tatalo i le Faatoaga o Ketesemane, saunia e Hermann Clementz