Fale o Pita Uitimera, saunia e Al Rounds

Mati 1–7

Mataupu Faavae ma Feagaiga 20–22

“O Le Fana’e Mai o le Ekalesia a Keriso”

A o e faitauina le Mataupu Faavae ma Feagaiga 20-22, ia nofouta i lagona uunai e te maua mai le Agaga Paia. Manatunatu e tusifaamaumau uunaiga ina ia mafai ona e toe foi atu i ai.

Tusifaamaumau Ou Lagona Uunai

Ua maea nei le galuega a le Perofeta o Iosefa Samita o le faaliliuina o le Tusi a Mamona. Ae o le galuega o le Toefuataiga ua faato’a amata. Na manino mai faaaliga muamua e faaopoopo atu i le toefuataiina o mataupu faavae ma le pule o le perisitua, sa finagalo le Alii e toefuatai se faatulaga aloaia---o Lana Ekalesia (tagai Mataupu Faavae ma Feagaiaga 10:53; 18:5). O lea, ia Aperila 6, 1830, e silia ma le 40 e na talitonu na faaofiofi i totonu o le fale laau o le aiga o Uitimera i Faiete, Niu Ioka, e molimau le faatulagaina o le Ekalesia a Iesu Keriso.

A e, sa tau manatunatu lava ni isi tagata, pe aisea e manaomia ai le faatulagaina o se Ekalesia? Atonu o se vaega o le tali e ono maua i ni faaaliga e fesootai atu i lena fonotaga muamua a le Ekalesia i le 1830. O loo faamatala ai i i, faamanuiaga e le ono maua pe a na le “faatulaga ma faatu tatau” le Ekalesia moni le Ekalesia a Iesu Keriso i aso e gata ai (Mataupu Faavae ma Feagaiga 20:1).

Tagai foi i Au Paia, 1;84--86, ma “Ati A’e Ai I Luga La’u Ekalesia,” Faaaliga i le Tulaga Tonu, 29--32.

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 20:1-36

O Le Ekalesia a Iesu Keriso o le Au Paia o Aso e Gata Ai, o loo faavaeina i luga o mataupu faavae moni.

Vaega 20 o loo faailoaina o se “faaaliga e faatatau i le faatulagaga ma le taitaiga o le Ekalesia” (ulutala o le vaega). A e muamua atu i aiaiga a le Ekalesia, tofi o le perisitua, ma ala e faatinoina ai sauniga, e amata lenei faaaliga i le aoaoina o mataupu faavae patino. A o e faitauina fuaiupu muamua e 36 o lenei faaaliga, fesili oe ia te oe lava, pe aisea ua faia ai faapena. Manatua e fai foi se lisi o upumoni o le talalelei ua e maua. O nisi nei o faataitaiga:

• O le matafaioi a le Tusi a Mamona i le Toefuataiga (fuaiupu 8--12)

• O le natura o le Atua (fuaiupu 17–19)

• O Le Togiola a Iesu Keriso (fuaiupu 20–27)

Aisea e taua ai le faamamafaina o nei upumoni a o faavaeina le Ekalesia?

Mataupu Faavae ma Feagaiga 20:37, 75-–79

O Sauniga Paia o ni vaega moomia o le Ekalesia Toefuataiina.

Ina ua faatulaga le Ekalesia, na aoaoina e le Alii Lana Au Paia e uiga i sauniga paia, e aofia ai le papatisoga ma le faamanatuga. A o e faitau i faatonuga “i le faiga o le papatisoga” i le fuaiupu 37, mafaufau i lou lava papatisoga. Pe sa ia te oe ni lagona o loo faamatalaina i lenei fuaiupu? Pe o ia te oe i le taimi nei? Mafaufau loloto i le mea e mafai ona e faia e tausia ai le olaola o lou “naunautai e auauna atu ia [Keriso] e oo i le iuga.”

A o e faitau e uiga i le faamanatuga i le Mataupu Faavae ma Feagaiga 20:75-79, taumafai e faitau nei tatalo paia mai le vaaiga a se tasi faatoa faalogo i ai mo le taimi muamua. O a ni malamalamaaga ua e maua mai e uiga i le faamanatuga? faatatau ia te oe? E faapefea e nei malamalamaaga ona aafia ai le ala e te sauni ai e taumafa i le faamanatuga i lenei vaiaso?

O le faamanatuga o se sauniga paia.

Mataupu Faavae ma Feagaiga 20:38–60

O auaunaga a le Perisitua e faamanuiaina ai tagata o le Ekalesia ma o latou aiga.

Afai e fesili atu se tasi ia te oe e ta’u mai tiute a sē e umia le perisitua, o le a lau tala e fai? Faitau le Mataupu Faavae ma Feagaiga 20:38–60, lea e lisi ai tiute o tofi eseese o le perisitua. O i ai se mea i nei fuaiupu e suia ai le ala e te mafaufau ai e uiga i tiute o le perisitua ma pe faapefea e le Faaola ona faia Lana galuega? Ua faapefea ona faamanuiaina oe e ala i le galuega o loo faamatala mai i nei fuaiupu?

Ina ia iloa pe faapefea e tamaitai ona faaaogaina le pule o le perisitua i totonu o le galuega a le Ekalesia, tagai i le Dallin H. Oaks, ““O Ki ma le Pule o le Perisitua,” Ensign po o le Liahona, Me 2014, 49--52.

Mataupu Faavae ma Feagaiga 21

O le Ekalesia a Iesu Keriso o loo taitaia e se perofeta soifua.

O le a se mea ua e aoao mai le Mataupu Faavae ma Feagaiga 21:4–9 e uiga i upu a perofeta a le Alii? Manatunatu i folafolaga o loo faamatalaina mai i totonu o le fuaiupu 6 mo i latou o e taliaina upu a le Alii e ala mai Lana perofeta. O le a le uiga o nei folafolaga ia te oe?

E mafai faapefea ona e taliaina le upu a le perofeta soifua “ua pei lava ua mai le fofoga o le [Atua]”? (fuaiupu 5). O le a le fautuaga ua tuuina mai e le perofeta o aso nei lea e mafai ona taitai atu ai i faamanuiaga ua folafola mai i totonu o le fuaiupu 6?

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 20.O le a se mea tatou te tau atu i se tasi e fesili mai ia i tatou pe aisea tatou te manaomia ai le Ekalesia? O a tali tatou te maua mai i totonu o le Mataupu Faavae ma Feagaiga 20? Tagai foi i le D. Todd Christofferson, “E Manaomia i Se A Le Ekalesia,” Ensign po o le Liahona, Nov. 2015, 108--11.

Mataupu Faavae ma Feagaiga 20:69O le a le uiga o le “[Savavali] ma le paia i luma o le Alii”? Atonu o le a maua le fiafia e tagata o le aiga ia tusia se ata po o le tusi foi i luga o fasipepa ni isi o mea lea e mafai ona fesoasoani ia i latou e savavali i le paia po o mea ia e mafai ona faalavelaveina i latou mai le faia o lena. Ona mafai lea ona latou fausia se ala e faaaoga ai pepa ma taumafai e savavali i luga o le ala, ia sitepu na’o i luga o le ata lea o le a aumaia ai i latou ia Keriso.

Mataupu Faavae ma Feagaiga 20:37, 71–74. Afai e i ai se tasi i totonu o lou aiga e le i papatisoina lava, o nei fuaiupu e mafai ona taitaia atu ai i latou i se talatalanoaga e uiga i le ala e saunia ai mo le papatisoga (tagai fuaiupu 37) ma pe faapefea ona faatinoina papatisoga (tagai fuaiupu 71--74). O tagata o le aiga e mafai ona faasoa mai ni ata po o ni mea o manatua mai aso o latou papatisoga.

Mataupu Faavae ma Feagaiga 20:75–79.E mafai faapefea e lou aiga ona faaaogaina nei fuaiupu e saunia ai mo se aafiaga anoa, faaaloalo i le faamanatuga? E ono fautuaina mai e nei fuaiupu mea e mafai ona e mafaufau loloto i ai i le taimi o le faamanatuga, ma tagata o le aiga e mafai ona maua pe tusia ata o nei mea. Pe a talafeagai, atonu e mafai ona aumaia na ata i la tou sauniga faamanatuga e sosoo ai o se faamanatu o le mea e mafaufau i ai i le taimi o le faamanatuga.

Mataupu Faavae ma Feagaiga 21:4–7.Manatunatu e valaaulia tagata o le aiga ia vaavaai mo upu ma fasifuaitau o loo i fuaiupu 4--5 lea e aoao mai tatou e uiga i le mulimuli i le perofeta a le Alii. O le a le uiga o le talia o upu a le perofeta i le onosai? I le faatuatua? O anafea na tatou maua ai faamanuiaga folafolaina o loo i totonu o le fuaiupu 6?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Le Ekalesia a Iesu Keriso,” Tusipese a Tamaiti,48.

Faaleleia o Lo Tatou Aoao Atu

Faataitai i le soifuaga o le Faaola. “O le mana a le Faaola e aoao ma siitia ai isi na sau mai le auala na Ia soifua ai ma le ituaiga o tagata na avea ai o Ia. O le filiga tele e te taumafai e ola ai e pei o Iesu Keriso, o le a atili ai ona mafai ona e aoao atu e pei o Ia” (Aoao Atu i le Ala a le Faaola,13).

Ua Faauu e Oliva Kaotui ia Iosefa Samita, saunia e Walter Rane