Fale o Peteru Uitimera

Fale o Peteru Uitimera, saunia e Al Rounds

1–7 Mati

Mataupu Faavae ma Feagaiga 20–22

“O Le Tulai Mai o le Ekalesia a Keriso”

A o e suesueina le Mataupu Faavae ma Feagaiga 20–22 i lenei vaiaso, e mafai ona oo mai ni manatu e aoao atu ai i lou mafaufau. E mafai ona e maua nisi manatu e aoao atu ai i lenei otootoga.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Faaali atu le ata mai le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga, ma fai atu i tamaiti e faasoa mai mea ua latou iloa e uiga i le faatulagaina o le Ekalesia. Mo se fesoasoani, tagai i le “Mataupu 9: O Le Ekalesia Moni a lesu Keriso” (Tala o le Mataupu Faavae ma Feagaiga, 40–42).

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 20–21

Ua toefuataiina mai le Ekalesia a Iesu Keriso.

O le aso 6 o Aperila, 1830, na faapotopoto ai Iosefa Samita ma Oliva Kaotui faatasi ma isi e faatulaga le Ekalesia toefuataiina a Iesu Keriso. E faapefea ona e fesoasoani i tamaiti o loʻo e aoaoina ia malamalama i le taua o lenei mea na tupu?

Gaoioiga e Mafai Ona Fai

• Faaaoga le ulutala o le vaega mo le Mataupu Faavae ma Feagaiga 21 po o le mataupu 9 o le Tala o le Mataupu Faavae ma Feagaiga e faamatala puupuu atu ai i tamaiti le mea na tupu i le aso na faatulagaina ai le Ekalesia. Ina ia fesoasoani ia i latou ia malamalama i lenei mea na tupu, faaali le vitio “Organization of the Church” (ChurchofJesusChrist.org).

• Taʻu atu i tamaiti pe aisea ua e faafetai ai ona ua tatou maua Le Ekalesia a Iesu Keriso o le Au Paia o Aso e Gata Ai. Faamatala atu o le avea ma se tagata o le Ekalesia e saunia ai i tatou e toe nonofo faatasi ma le Atua. Fesoasoani ia i latou e toe fai le fuaitau “ou te auai i le Ekalesia a Iesu Keriso” mo ni nai taimi pe usu le pese “Ekalesia a Iesu Keriso” (Tusipese a Tamaiti, 48).

Mataupu Faavae ma Feagaiga 20:37, 71–74

O loo ou sauni e papatiso.

O tamaiti o loo e aoaoina o loo sauni e papatiso. Fesoasoani ia i latou ia malamalama i le uiga o le papatisoina ma mea e mafai ona latou faia e sauni ai.

Gaoioiga e Mafai Ona Fai

• Faaali se ata o se tamaitiiti o papatiso (tagai Tusi Ata o le Talalelei, nu.104), ma fai i tamaiti e faasino mai mea latou te matauina. Faitau pe aotele le Mataupu Faavae ma Feagaiga 20:71–74, ma fesoasoani i tamaiti ia iloa pe faapefea ona tutusa le ata ma faatonuga i nei fuaiupu. Molimau atu e tatau ona tatou mulimuli i le faataitaiga a le Faaola ma ia papatisoina i le ala na Ia poloaiina.

• Aotele le Mataupu Faavae ma Feagaiga 20:37. O le a se mea tatou te aʻoaʻoina mai lenei fuaiupu e uiga i tagata e fia papatiso? Faaali atu ata o auala e mafai ona saunia ai tamaiti mo le papatisoga, e pei o le auauna atu i isi ma le tatalo.

• Usu se pese e uiga i le papatisoga, e pei o le “Pe A Ou Papatiso” (Tusipese a Tamaiti, 53), pe matamata i le “The Baptism of Jesus” (biblevideos.ChurchofJesusChrist.org). Valaaulia ni nai tamaiti e faasoa mai o latou lagona e uiga i le papatisoina.

Mataupu Faavae ma Feagaiga 20:75–79

O le faamanatuga e fesoasoani ou te manatua ai Iesu Keriso.

E mafai faapefea ona e fesoasoani i tamaiti ia malamalama atili pe aisea tatou te aai ma feinu ai i le faamanatuga i vaiaso taitasi?

Gaoioiga e Mafai Ona Fai

• Faitau le Mataupu Faavae ma Feagaiga 20:77 i tamaiti. Fai atu ia i latou e tutu pe a latou faalogo i mea e tatau ona tatou manatua pe a tatou aai i le falaoa o le faamanatuga. Toe fai mo le fuaiupu 79. (Atonu e te manao e faailoa atu, tatou faaaogaina le vai nai lo le uaina.) E faapefea ona tatou faʻaali atu tatou te manatua Iesu?

• Taʻu i tamaiti se taimi na e faia ai se folafolaga ma tausia. Valaaulia i latou e faamatala atu ni tala e faatatau ia i latou lava. Faamalamalama atu afai tatou te tagofia le faamanatuga, tatou te faia ni folafolaga. Faitau le Mataupu Faavae ma Feagaiga 20:77, faamamafa atu folafolaga tatou te faia ia “manatua pea o ia” ma “tausi ana poloaiga.” Valaaulia tamaiti e faasoa mai se taimi na latou manatuaina ai le Faaola pe usiusitai i se poloaiga.

  tamaiti o loo aai ma feinu i le faamanatuga

  O le faamanatuga e faamanatu mai ai ia te au ou te mafaufau ia Iesu Keriso.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 20–21

Ua toefuataiina mai le Ekalesia a Iesu Keriso.

I le usiusitai i le poloaiga a le Alii, na faatulagaina ai e Iosefa Samita, Oliva Kaotui, ma isi le Ekalesia toefuataiina a Iesu Keriso i le aso 6 o Aperila, 1830. Mafaufau i auala e fesoasoani ai i tamaiti e iloa pe na faapefea e lenei mea na tupu ona faamanuiaina ai o latou olaga.

Gaoioiga e Mafai Ona Fai

• Faamanatu i tamaiti nisi o mea taua na latou aoaoina—e pei o le toefuataiga o le perisitua ma le faaliliuga o le Tusi a Mamona. Aisea na tatau ai ona tupu nei mea ao le i faavaeina le Ekalesia?

• Faaali atu ata o mea tatou te faia i le Ekalesia o loo faamatalaina i le vaega e 20, e pei o le aoao e uiga i le Atua ma Iesu Keriso, auauna atu, papatiso, ma le taumafa i le faamanatuga. Fesoasoani i tamaiti e faatusatusa nei ata i mau o loo faamatalaina ai, e pei o Mataupu Faavae ma Feagaiga 20:17–21, 47, 70, 72–74, 75–79, ma le ulutala mo le vaega 21. O a faamanuiaga tatou te maua ona o i tatou o tagata o le Ekalesia?

• Usu faatasi le “O Le Ekalesia a Iesu Keriso” (Tusipese a Tamaiti, 48).

Mataupu Faavae ma Feagaiga 20:37, 77, 79

Ina ua ou papatiso, sa ou folafola atu e mulimuli ia Iesu Keriso.

O le toatele o tamaiti o lau vasega ua papatisoina. Faamanatu ia i latou le feagaiga na latou faia “e ave i o latou luga le suafa o Iesu Keriso” (Mataupu Faavae ma Feagaiga 20:37).

Gaoioiga e Mafai Ona Fai

• Valaaulia ni nai tamaiti e o mai saunia e faasoa mai o latou lagona na oo i ai ina ua papatisoina i latou. Masalo e mafai ona latou aumaia se ata mai le aso o le papatisoga e faʻaali atu ai i le vasega. Aisea na latou filifili ai e papatiso? Na faapefea ona faamanuiaina i latou i le papatisoina ma le mauaina o le Agaga Paia?

• Faitau faatasi le Mataupu Faavae ma Feagaiga 20:77, ma fai atu i tamaiti e faailoa mai folafolaga tatou te faia i le taimi o le faamanatuga. Ina ia fesoasoani i tamaiti ia malamalama o loo i ai mea e mafai ona latou faia i aso uma e “manatua pea” Iesu Keriso, valaaulia se tamaitiiti e faatino se mea e mafai ona ia faia e manatua ai le Faaola. Fai atu i isi e mate po o le a le taga. E tusa ai ma le fuaiupu 77, e faapefea ona faamanuiaina i tatou pe a tatou manatua pea le Faaola?

• Fesoasoani i tamaiti e faatusatusa le Mataupu Faavae ma Feagaiga 20:37 ma le fuaiupu 77 e sue ai le fasifuaitau o loo maua uma i mau e lua. Faaali atu i tamaiti se mea o i ai se igoa (e pei o se igoa lauiloa po o se igoa patino o le tagata lava ia). O le a le mea e tau mai e le igoa e uiga i le aitema? Faitau faatasi le Mataupu Faavae ma Feagaiga 20:37 e iloa ai po o ai le igoa tatou te tauaveina i o tatou luga pe a tatou papatiso. O le a le uiga o le tauaveina o le igoa a Iesu Keriso i o tatou luga? E faapefea ona tatou mafaufau ma galulue ona ua tatou maua lenei igoa?

Mataupu Faavae ma Feagaiga 21:4–6

E faamanuiaina a’u pe a ou mulimuli i le perofeta.

E faapefea ona e fesoasoani i tamaiti ia maua faamanuiaga folafolaina i nei fuaiupu ia i latou o e mulimuli i le perofeta?

Gaoioiga e Mafai Ona Fai

• Tusi i luga o le laupapa Poloaiga ma Faamanuiaga. Valaaulia tamaiti e faitau le Mataupu Faavae ma Feagaiga 21:4–6, ma saili mo poloaiga na tuuina mai e le Alii ma faamanuiaga na Ia folafola mai. Fai atu ia i latou e tusi i le laupapa mea na latou mauaina.

• Faaali atu se ata o le perofeta o loo i ai nei, ma valaaulia tamaiti e faasoa mai se mea na latou aoaoina pe na faalogo i ai mai ia te ia talu ai nei. Faitau faatasi le Mataupu Faavae ma Feagaiga 21:5. Valaaulia tamaiti e tusi pe tusi se ata o se mea e mafai ona latou faia e mulimuli ai i le perofeta. Faasoa atu lau molimau afai tatou te mulimuli i le perofeta, ua tatou mulimuli i le Faaola.

aikona o le aoaoina

Fautuaina le Aoaoina i le Aiga

Valaaulia tamaiti e fai se lisi o mafuaaga latou te faafetai ai mo le Ekalesia toefuataiina a Iesu Keriso. Fautuaina i latou e faasoa atu a latou lisi i se tagata o le aiga po o se uo.

Faaleleia o Lo Tatou Aoao Atu

Faaaoga tala e aoao atu le aoaoga faavae. “E fesoasoani tala i tamaiti e vaai ai pe faapefea ona faaaoga mataupu faavae i aso uma o le olaga. … Pe a aoaoina tamaiti laiti, fuafua ni auala e faaaofia ai i latou i le tala; mo se faataitaiga, e mafai ona latou uuina ni ata, toe fai ni fuaiupu, pe faatino ni vaega” (Aoao Atu i le Ala a le Faaola, 25).

itulau o gaoioiga: sa faatulagaina le Ekalesia i le 1830.