Ia Tootutuli Tulivae Uma, saunia e J. Kirk Richards

22–28 Mati

Mataupu Faavae ma Feagaiga 29

O Le A Faapotopotoina e Iesu Keriso Ona Tagata

E te iloa tamaiti o loʻo e aoaoina, ma e tele upumoni i totonu o le Mataupu Faavae ma Feagaiga 29 e mafai ona faamanuiaina ai i latou. Mulimuli i musumusuga a le Agaga ao e suesue i le vaega 29, ma faamaumau ni uunaiga e uiga i auala o le a e aoao atu ai le fanau i nei upumoni.

Tusi Faamaumau Ou Lagona Uunai

Valaaulia le Fefaasoaai

Mafaufau e valaaulia ni nai tamaiti e faasoa mai nisi o auala latou te aoaoina ai le talalelei i le fale—taitoatasi pe faatasi foi ma o latou aiga. Valaaulia se tasi pe sili atu foi tamaiti e faasoa mai a latou molimau e uiga i se mea sa latou aoaoina i lenei vaiaso i le fale.

Aoao atu le Aoaoga Faavae: Tamaiti Laiti

Mataupu Faavae ma Feagaiga 29:1–2

O le a faapotopotoina e Iesu Keriso ona tagata a’o le’i toe afio mai o Ia.

Ua faapotopotoina i tatou e le Faaola pe a tatou talia ma mulimuli i Ana aoaoga.

Gaoioiga e Mafai Ona Fai

• Tuu atu i tamaiti e valivali le itulau o gaoioiga mo lenei vaiaso ao e faaalia le vitio “Chicks and Hens” (ChurchofJesusChrist.org). Fai atu i tamaiti e faalogo pe faapefea ona puipuia e le moa ia tamai moa.

• A mavae ona faitau le Mataupu Faavae ma Feagaiga 29:1-2, faatino se tala faatusa o Keriso o loo faapotopotoina Ona tagata “e pei ona ofaofatai e se matuamoa lana toloai.” E toatasi se tamaitiiti e mafai ona faafoliga o le matuamoa ma filifili se tulimanu o le potu e tu i ai. A “tagi faamoa,” fai atu i tamaiti uma e faapotopoto faataamilo ia te ia. E mafai e tamaiti ona feauauaʻi e avea ma matuamoa. Uu i luga se ata o le Faaola ma valaaulia tamaiti e faapotopoto atu ia te Ia. Fetufaai ma tamaiti pe faapefea ona fesoasoani Iesu ia i tatou pe a tatou faapotopoto atu ia te Ia.

  

  How Many Times, saunia e Liz Lemon Swindle

Mataupu Faavae ma Feagaiga 29:2–11

E mafai ona ou saunia e feiloai ma le Faaola.

E i ai se aso, oi tatou taitoatasi o le a i ai i le afioaga o Iesu Keriso. E ui o lena aso atonu e mamao atu i le lumanaʻi, ae mafai lava e tamaiti ona mafaufau pe o le a le mea o le a tupu ma le auala e mafai ona latou saunia ai.

Gaoioiga e Mafai Ona Fai

• Faaali atu se ata o le Afio Mai Faalua (tagai i le Tusi Ata o le Talalelei, nu. 66), ma fesoasoani i se tamaitiiti e faitau le Mataupu Faavae ma Feagaiga 29:11. Fesoasoani i tamaiti e matau fasifuaitau i le mau o loo faamatalaina ai mea latou te vaaia i le ata. Faasoa ma tamaiti pe o le a lou lagona e uiga i le toe afio mai o Iesu Keriso i le lalolagi.

• E mafai foi ona outou usuina faatasi o se vasega, se pese e faatatau i le Afio Faalua Mai, e pei o le “Pe A Ia Toe Afio Mai” (Tusipese a Tamaiti, 46). Faaali atu i tamaiti ata o mea e mafai ona latou faia e saunia ai e feiloai ma le Faaola ma mau faatasi ma Ia e faavavau (tagai Tusiata o le Talalelei mo ni nai manatu). Fesoasoani ia i latou e saili isi auala e sauniuni ai i le Mataupu Faavae ma Feagaiga 29:2–10.

Aoao atu le Aoaoga Faavae: Tamaiti Matutua

Mataupu Faavae ma Feagaiga 29

Na saunia e le Tama Faalelagi se ata o le faaolataga mo au.

O le tele o le iloa e se tamaitiiti e uiga i le ata o le faaolataga a le Atua, o le tele foi lena o le mafai ona ia faaaogaina le faatuatua i le Tama Faalelagi ma Iesu Keriso e mulimuli ai i lena foafoaga. O a vaega o le fuafuaga e te lagona le faagaeetia e taulai atu i ai?

Gaoioiga e Mafai Ona Fai

• Fai atu i nisi o tamaiti e faasoa mai se faataitaiga o se taimi na latou faia ai se fuafuaga, e pei o se malaga po o le faatinoina o se galuega. E mafai foi ona e faʻasoa faʻataʻitaʻiga o fuafuaga, e pei o le kalena ma gaoioiga o tusia ai i luga poʻo faatonuga e faia ai se mea. Aisea e taua ai fuafuaga? Faasoa atu i tamaiti e i ai se fuafuaga a le Tama Faalelagi o le a mafai ai e i tatou ona avea faapei o Ia.

• Ina ia fesoasoani i tamaiti ia malamalama i le fuafuaga a le Atua, fai ni faailoga i faaupuga nei: muai olaga, o le Foafoaga, o le Pau, olaga faitino, ma le Afio Mai Faalua. A uma ona faamatalaina taʻitasi faaupuga (tagai i le Mataupu Faavae ma Feagaiga 29:9–45), tuu atu faailoga taitasi i se isi tamaitiiti, ma fai atu ia i latou e tutu i se laina i le faasologa sao e faaali atu ai le taimi e tutupu ai mea taitasi i le fuafuaga a le Tama Faalelagi. E mafai e tamaiti taitoatasi ona faasoa mea o loʻo ia iloa e uiga i le mea o loʻo i luga o lana faailoga. Fesoasoani i tamaiti ia iloa pe faapefea e le iloaina e uiga i le fuafuaga a le Tama Faalelagi ona fesoasoani ia i tatou ina ia avea atili e faapei o Ia ma le Faaola.

• Faaaoga se tasi pe sili atu o gaoioiga o loʻo i lalo e aoao atu ai upumoni e uiga i le fuafuaga ma le auala e faʻaaoga ai ia i tatou. Mafaufau e fai atu i nisi o tamaiti e o mai saunia e fesoasoani ia te oe e te aoao atu.

  • Faitalia. Fesoasoani i tamaiti ia malamalama na tuuina mai e le Tama Faalelagi ia i tatou le meaalofa o le faitalia—o le saolotoga e filifili ai—ma e tatou te tali atu mo a tatou filifiliga (tagai i le Mataupu Faavae ma Feagaiga 29:39–40). Fai ni faailoga se lua mo tamaiti taitoatasi: tasi e faatusa i le faia o se filifiliga lelei (mo se faataitaiga, o se foliga mata ataata) ma le tasi e faatusa i le faia o se filifiliga leaga (mo se faataitaiga, o se foliga faauu). Fefaasoaai i faataitaiga o filifiliga lelei ma filifiliga leaga, ma fai i tamaiti e tuu i luga le foliga sa’o. Fai i tamaiti e faasoa mai faamanuiaga e oo mai pe a tatou mulimuli ia Iesu Keriso. Aisea ua faatagaina ai i tatou e le Tama Faalelagi e faia a tatou lava filifiliga?

  • O poloaiga. Valaaulia tamaiti e fai se lisi i luga o le laupapa o nisi o poloaiga. (Mo ni faataitaiga, e mafai ona latou suʻeina Esoto 20:3–17 ma le Tusiata o le Talalelei, 103–15.) Aisea e tuuina mai ai e le Atua ia i tatou poloaiga? O le a se mea ua tatou aoao mai le Mataupu Faavae ma Feagaiga 29:35 e faatatau i poloaiga a le Tama Faalelagi?

  • O Le Togiola a Iesu Keriso. Fesoasoani i tamaiti ia latou iloa ua saunia e le Tama Faalelagi se ala mo i tatou ina ia faamagaloina pe a tatou faia ni filifiliga sese. Fai atu i tamaiti taitasi e faitau se tasi o fuaiupu i totonu o le Mataupu Faavae ma Feagaiga 29:1,42–43 ma faasoa mai mea o loo aoao mai e uiga i le Togiola a le Faaola. Saili se auala fatufatuaʻi e valaaulia ai tamaiti e faʻasoa mea latou te maua, e pei o le faasologa o o latou aso fanau, po o le pupuu i le pito i luga, ma isi.

Mataupu Faavae ma Feagaiga 29:1–2

O le a faapotopotoina e Iesu Keriso Ona tagata a’o le’i toe afio mai o Ia.

E faʻapefea ona e fesoasoani i tamaiti o loʻo e aoaoina ina ia fiafia e uiga i le fesoasoani i le faapotopotoina o Isaraelu?

Gaoioiga e Mafai Ona Fai

• Valaaulia tamaiti e faitau le Mataupu Faavae ma Feagaiga 29:1–2 ma vaai po o le a le mea e faatusatusa ai e le Alii o Ia. O a mea e mafaufau i ai tamaiti pe a latou faitau i lenei faatusatusaga? O le a le mea na fetalai le Alii e tatau ona tatou faia ina ia faapotopotoina mai ai e Ia?

• O se tasi auala e faafiafia ai tamaiti e uiga i le faapotopotoina o le faasoa atu lea o le tala o se tasi ua auai i le Ekalesia. Mo se faataitaiga, o ai na faʻalauiloaina lou aiga i le Ekalesia? Mafaufau e muai talosaga atu i tamaiti e saili e uiga i le uluai tagata o le Ekalesia i o latou aiga ma faasoa mai lana tala i le vasega.

• Valaaulia tamaiti e fai se lisi o auala e mafai ai ona latou fesoasoani i tagata e faapotopoto i le Faaola. Mo se faataitaiga, e mafai ona latou valaauliaina uo po o tagata o le aiga i se gaoioiga a le Peraimeri po o se afiafi faaleaiga faatasi ma o latou aiga.

• O le mataupu faavae o le faatuatua lona sefulu o loo talanoa e uiga i le faapotopotoina o Isaraelu. E i ai se tamaitiiti ua taulotoina lenei mataupu faavae o le faatuatua? Afai e i ai, valaaulia i latou e tauloto mo le vasega. A leai, fesoasoani ia i latou e seti se sini e taulotoina.

Fautuaina le Aoaoina i le Aiga

Valaaulia tamaiti e tusi i lalo se upumoni na latou aoaoina i le vasega. Fesili atu mo nai manatu o mea o le a latou faia e faasoa atu ai lenei upumoni io latou aiga.

Faaleleia o Lo Tatou Aoao Atu

Ia gauai atu. Faʻalogo lelei i auala o tali atu ai tamaiti i lau vasega i gaoioiga e aʻoaʻo ai. Afai e foliga mai ua lelavava le fanau, atonu o le taimi lea e taumafai ai se isi gaoioiga pe fai se savaliga puupuu. I le isi itu, afai o latou auai ma aoaoina, aua nei lagonaina le faamalosia e agai i luma.