29 Mati–4 Aperila

Eseta

“O Aʼu O Lē O Ola, O Aʼu O Lē Na Fasia”

O se vasega o le Peraimeri mo le Aso Sa o le Eseta o se avanoa sili lea e fesoasoani ai i tamaiti e faamalosia lo latou faatuatua ia Iesu Keriso ma Lana Togiola. Saili le taitaiga a le Alii pe faapefea ona faia lena mea. Atonu e mafai ona e maua ni manatu aoga i lenei otootoga.

Tusi Faamaumau Ou Lagona Uunai

Valaaulia le Fefaasoaai

Tuu atu i tamaiti e fefaasoaaʻi ma oe mea latou te iloa e uiga i le mafuaaga tatou te faamanatu ai le Eseta. Fesili atu ia i latou po oa mea o latou aiga e fai e faamanatu ai le Toetu o Iesu Keriso i le taimi o le Eseta. Pe tuu atu ia i latou e faasoa mai mea ua latou aoaoina e uiga ia Iesu Keriso i le fale ma totonu o tusitusiga paia.

Aoao atu le Aoaoga Faavae: Tamaiti Laiti

Mataupu Faavae ma Feagaiga 138:11–17

Ona o Iesu Keriso, o le a ou toetu ai.

Ao e aoaoina tamaiti e uiga i le Toetu o Iesu Keriso, Mataupu Faavae ma Feagaiga 138:11–17 e mafai ona fesoasoani ia te oe e faamalamalama le uiga o le toetu. O nei fuaiupu e mafai foi ona fesoasoani e fausia lo latou faatuatua o le a latou toetutu i se aso.

Gaoioiga e Mafai Ona Fai

• Faaali ni ata o le maliu, falelauasiga, ma le Faasatauroga o le Faaola (tagai Tusi Ata o le Talalelei, nu. 57, 58, ma le 59). Fesili i tamaiti pe o le a se mea latou te iloa e uiga i nei mea na tutupu. Molimau atu na maliu Iesu mo i tatou ma toetu mai le oti ina ia mafai ona tatou toetutu uma pe a tatou feoti.

• Mafaufau i se lesona faatino lea e mafai ona fesoasoani i tamaiti ia malamalama i le mea e tupu pe a tatou oti (e tuueseese o tatou agaga ma tino) ma pe a tatou toetutu (toe tuufaatasi o tatou agaga ma tino). Mo se faʻataʻitaʻiga, o le a le mea e tupu pe a tatou aveeseina le maʻa mai se moliuila po o le vaega e i ai le mata o se peni? O le a le mea e tupu pe a toe faatasia nei mea?

• Faitau atu i tamaiti mai le Mataupu Faavae ma Feagaiga 138:17: “O le agaga ma le tino [o le a] toe faatasia e lē mafai ona toe tuueseeseina, ina ia mafai ona latou maua se atoatoaga o le olioli.” Aisea tatou te loto faafetai ai mo tatou tino? Faasoa atu le fiafia e te lagona e iloa ai o le a tatou toetutu uma ma toe maua o tatou tino.

• Usu se pese e faatatau i le Toetu, e pei o le “Pe Na Toe Soifua Moni Mai ea Iesu?” po o le “Ua Toe Tu mai o Ia” (Tusipese a Tamaiti, 45, 44). Tuu atu i tamaiti ni ata e suitulaga i upu poʻo fuaitau i le pese (mo faʻataʻitaʻiga, tagai Tusiata o le Ekalesia, nu. 59, 60, ma le 61), ma valaaulia i latou e uu i luga latou ata pe a latou usuina na upu.

Mataupu Faavae ma Feagaiga 76:11–24; 110:1–7; Iosefa Samita—Talafaasolopito 1:14–17

Na vaai le Perofeta o Iosefa Samita ia Iesu Keriso.

O se tasi auala e fesoasoani ai i tamaiti e faamalosia lo latou faatuatua i le Faaola o le faasoa atu lea ia i latou le molimau a Iosefa Samita: “O loo soifua o Ia! Aua na ma vaai ia te ia, i le itu taumatau o le Atua” (Mataupu Faavae ma Feagaiga 76:22–23).

Gaoioiga e Mafai Ona Fai

• Faaali i tamaiti se ata o le Uluai Faaaliga a Iosefa Samita (tagai i le otootoga o Ianuari 4–10 i le Sau, Mulimuli Mai ia te A’u—Mo Tagata Taitoatasi ma Aiga). Valaaulia tamaiti e tau mai ia te oe le mea o loo tupu i le ata, ma fai atu ia i latou e sue Iesu Keriso. Fesili i tamaiti pe latou te iloa e uiga i isi taimi na vaai ai Iosefa Samita i le Faaola. I au lava upu, taʻu atu mea na tutupu o loʻo faamatalaina i totonu o le Mataupu Faavae ma Feagaiga 76:11–24; 110:1–7. Tau atu i tamaiti pe faapefea ona fausia e nei mau lou faatuatua ia Iesu Keriso.

• A o valivali e tamaiti le itulau o gaoioiga o lenei vaiaso, ia faitau atu ia i latou mau o loo faatatau i ai. Faailoa atu auiliiliga i ata o loo faamatalaina i fuaiupu. Molimau atu i tamaiti na vaai le Perofeta o Iosefa Samita ia Iesu Keriso, ma o le tasi lea o mafuaaga tatou te iloa ai o loo soifua Iesu.

Aoao atu le Aoaoga Faavae: Tamaiti Matutua

Mataupu Faavae ma Feagaiga76:11–24; 110:1–10; Iosefa Samita—Talafaasolopito 1:14–17

Na molimau mai le Perofeta o Iosefa Samita o loo soifua Iesu Keriso.

O le misiona sili ona taua a se perofeta o le molimau lea ia Iesu Keriso. Fesoasoani i tamaiti e atiina ae lo latou faatuatua i le Faaola e ala i le aoao mai le molimau a Iosefa Samita e uiga ia te Ia.

Gaoioiga e Mafai Ona Fai

• O fuaiupu nei o loo faamatalaina ai taimi na faaali atu ai Iesu Keriso ia Iosefa Samita: Mataupu Faavae ma Feagaiga 76:11–24; 110:1–10; Iosefa Samita—Talafaasolopito 1:14–17. I luga o le laupapa, lisi nisi upumoni tatou te aoaoina e uiga i le Faaola mai nei fuaiupu. Valaaulia tamaiti e faailoa po o a fuaiupu o aoao mai upumoni o loo lisiina i luga o le laupapa. O le a se isi mea ua tatou aoaoina e uiga ia Iesu Keriso mai aafiaga o Iosefa Samita?

• I le itulau o gaoioiga i lenei vaiaso, fesoasoani i tamaiti e faafetaui ia ata ma fuaiupu o mau. Aisea ua avea ai o se faamanuiaga le iloa na vaai Iosefa Samita i le Faaola toetu? Faasoa atu lau molimau o loo soifua Iesu Keriso ma o Iosefa Samita o se perofeta.

Mataupu Faavae ma Feagaiga 63:49; 88:14–17, 27; 138:11, 14–17

Ona o Iesu Keriso, o le a ou toetu ai.

E faapefea ona e fesoasoani i tamaiti ia faateleina lo latou talisapaia o le meaalofa a le Faaola o le toetu ia i tatou uma lava?

Gaoioiga e Mafai Ona Fai

• Tofi atu i tamaiti taitoatasi se fuaitau o mau nei: Mataupu Faavae ma Feagaiga 63:49; 88:14–17, 27; 138:11, 14–17. Valaaulia tamaiti e suesue a latou fuaiupu e sue ai se fasifuaitau latou te lagona e pueina ai le savali o le Eseta. Tuu atu ia i latou e faasoa mai o latou manatu. Afai e lava le taimi, tuu atu ia i latou e fai ni kata e faʻaalia ai fuaitau latou te maua e mafai ona latou avatu i tagata o le aiga poʻo uo.

• Fai atu i tamaiti pe o le a faapefea ona latou faamatala atu i se uso laitiiti po o se uo le uiga o le toetu. Mo manatu, faitau faatasi le Mataupu Faavae ma Feagaiga 138:14–17, ma mafaufau fesili faapenei: O le a le mea e tupu io tatou agaga ma tino pe a tatou feoti? O le a le mea e tupu pe a tatou toetutu? Na faapefea ona mafai e Iesu Keriso ona toe faataunuu le toetū?

• Faaali le vitio “Because He Lives” (ChurchofJesusChrist.org), ma tuu atu i tamaiti e fetufaai mai o latou lagona e uiga i le mea na faia e le Faaola mo i latou.

  

  Lord of Prayer, saunia e Yongsung Kim

Mataupu Faavae ma Feagaiga 18:10–13; 19:16–19; 45:3–5; 58:42–43

E mafai ona faamagaloina a’u i a’u agasala, ona o Iesu Keriso.

I le faaopoopo atu i le laveaiina oi tatou mai le oti faaletino, na saunia ai e Iesu Keriso se ala mo i tatou ina ia faasaoina mai le oti faaleagaga—i se isi faaupuga, faamagaloina a tatou agasala ma toe foi atu i le afioaga o le Atua.

Gaoioiga e Mafai Ona Fai

• Tusi i luga o le laupapa ia ulutala e lua e talitutusa ma nei: O mea na faia e le Faaola ma le O mea e tatau ona ou faia. Valaaulia tamaiti taitasi e suesue se tasi o fuaitau nei e sue ai se mea e taua i lalo o ulutala nei: Mataupu Faavae ma Feagaiga 18:10–13; 19:16–19; 45:3–5; 58:42–43. Faasoa atu lou olioli ma le agaga faafetai mo mea na faia e le Faaola mo i tatou.

• Fesoasoani i tamaiti e tauloto le mataupu faavae lona tolu o le faatuatua. E mafai ona e fesoasoani ia i latou e taulotoina e ala i le faʻaalia o ata e ō faatasi ma fuaitau autu.

• Faaali le vitio “The Shiny Bicycle” (ChurchofJesusChrist.org), pe faamatala se tala e patino ia te oe e faatatau i se tamaitiiti na faia se filifiliga sese ma na mulimuli ane salamo. Fesoasoani i tamaiti e talanoaina po o le a le mea na faia e le tamaitiiti i le tala ina ia maua ai le faamagaloga. Na faapefea ona faia e le Faaola ina ia mafai ai mo i tatou ona faamagaloina?

Fautuaina le Aoaoina i le Aiga

Fesoasoani i tamaiti e mafaufau i se mea e mafai ona latou faia e taʻu atu ai i isi tagata—ae maise lava tagata o o latou aiga—mea ua faia e Iesu Keriso mo i tatou. O le isi taimi tou te feiloai ai, fai atu ia i latou e faasoa mai ia te oe mea na latou faia.

Faaleleia o Lo Tatou Aoao Atu

E manuia tamaiti i le faifaafia. Aua le fefe e fai ma toe fai ia gaoioiga, aemaise ma tamaiti laiti. O le faisoo o le a fesoasoani i tamaiti e manatua ai mea o loo latou aoaoina.