5–11 Aperila

Mataupu Faavae ma Feagaiga 30–36

“Ua Valaauina Oe e Talai La’u Talalelei”

A o e suesue ma le agaga tatalo le Mataupu Faavae ma Feagaiga 30–36 ma mafaufau i tamaiti o lau vasega, e mafai e le Agaga ona avatu ia te oe manatu e uiga i auala e aoao ai i latou. Vaavaai mo ni manatu faaopoopo i lenei otootoga.

Tusi Faamaumau Ou Lagona Uunaia

Valaaulia le Fefaasoaai

Uu i luga se ata o faifeautalai, ma fai i tamaiti e faasoa mai mea latou te iloa e uiga i le galuega faafaifeautalai.

Aoao atu le Aoaoga Faavae: Tamaiti Laiti

Mataupu Faavae ma Feagaiga 33:2–3, 6–10

E mafai ona ou faasoa atu le talalelei a Iesu Keriso.

E oo lava i tamaiti laiti e mafai ona faasoa atu a latou molimau o le talalelei a Iesu Keriso. E faʻapefea ona e faʻaaogaina nei fuaiupu e fesoasoani e musuia ai i latou e faia lea mea?

Gaoioiga e Mafai Ona Fai

• Valaaulia tamaiti e taumafai e fai atu se fuaitau e pei o le “E alofa le Atua ia te oe” ao tapuni o latou gutu. Faailoa atu e le mafai ona tatou aoaoina tagata e uiga i le talalelei pe afai tatou te le tatalaina o tatou gutu. Faitau le Mataupu Faavae ma Feagaiga 33:8–10, ma valaaulia tamaiti e tatala o latou gutu i taimi uma latou te faalogo ai i le fuaitau “tatala o outou gutu.” Aisea e finagalo ai le Tama Faalelagi ia i tatou e tatala o tatou gutu ma faasoa atu le talalelei i isi?

• Musumusu atu ma le filemu se tala i tamaiti, e pei o le “o Iosefa Samita o se Perofeta a le Atua,” ma fai atu ia i latou e toe faimai le mea na e fai atu ai. Ona fai atu lea o le fuaitau lava lea e tasi i se leo leotele. Faitau le Mataupu Faavae ma Feagaiga 33:2. Fesoasoani i tamaiti ina ia malamalama o le “sii i luga o [tatou] leo” o lona uiga ia aua le fefe e taʻu atu i isi e uiga ia Iesu Keriso, le Tusi a Mamona, ma isi upumoni o le talalelei.

• Tuu solo pepe meataalo pepa po o ata o tagata i le potu. Valaaulia tamaiti e sue tagata ma faapotopoto i latou i luma o le potu. Faitau le Mataupu Faavae ma Feagaiga 33:6, ma faamatala pe o le a le uiga o le a “faapotopoto [e le Alii] [Lana] au filifilia.” Molimau atu e mafai ona tatou fesoasoani e faapotopoto tagata i le Alii ao tatou faasoa atu le talalelei.

• Usu faatasi se pese e faatatau i le faasoaina o le talalelei, e pei o le “Ou Te Fia Avea Nei Ma Faifeautalai” (Tusipese a Tamaiti,90). Fesoasoani i tamaiti e mafaufau i auala e mafai ona latou fesoasoani ai i isi tagata e aoao e uiga ia Iesu Keriso.

Mataupu Faavae ma Feagaiga 33:12–17

E mafai ona ou fausia loʻu olaga i luga o le talalelei a Iesu Keriso.

O le fautuaga na tuuina atu e le Alii ia Ezra Thayer ma Northrop Sweet e mafai ona fesoasoani i tamaiti o loo e aoaoina e fausia ai o latou olaga i luga o le talalelei a Iesu Keriso.

Gaoioiga e Mafai Ona Fai

• Faaali atu i tamaiti se ata o le faavae o se fale, ma fai i ai e faamatala mai. Aisea e manaomia ai e se fale se faavae malosi, ma mausali? Faitau ma tamaiti le Mataupu Faavae ma Feagaiga 33:12–13, ma faamatala atu e finagalo le Alii ia tatou fausia o tatou olaga i luga o Lana talalelei. Fesoasoani i tamaiti e mafaufau i ni auala e mafai ona latou fausia ai o latou olaga i luga o le talalelei a Iesu Keriso.

• Tuu atu i tamaiti ni mea faitino e mafai ona latou faaaogaina e fausia ai se ‘olo, e pei o poloka po’o ipuinu uga. Faailoga mea taitasi i se ata e fai ma sui o mea na fetalai i ai le Alii i le Mataupu Faavae ma Feagaiga 33:14–17. Valaaulia tamaiti e fausia se olo ao e talanoa ma i latou pe faapefea e nei mea ona fesoasoani ia i tatou e fausia o tatou olaga i le talalelei a Iesu Keriso.

Aoao atu le Aoaoga Faavae: Tamaiti Matutua

Mataupu Faavae ma Feagaiga 30:1–2

E tatau ona ou taulai atu i mea a le Atua nai lo mea o le lalolagi.

O le fautuaga a le Alii ia Tavita Uitimera o loo i le vaega 30 e mafai ona fesoasoani i tamaiti e te aoaoina ia tumau faamaoni i le talalelei a Iesu Keriso.

Gaoioiga e Mafai Ona Fai

• Faitau faatasi le Mataupu Faavae ma Feagaiga 30:1, ma fai i tamaiti e tauaofai, ia latou lava upu, le fautuaga na tuuina atu e le Alii ia Tavita Uitimera. O a ni auala atonu e i ai nisi taimi tatou te “fefefe [ai] i tagata,” pe popole foi i manatu o isi, nai lo le faia o mea ua tatou iloa e tatau ona tatou faia?

• Fai atu i tamaiti e taumafai e fai ni galuega se lua i le taimi e tasi, e pei o le taulotoina o se mataupu o le faatuatua ao tusi i lalo igoa o tamaiti uma o le vasega. Fesili ia i latou pe aisea na faigata ai ona mafaufau totoa i le gaoioiga muamua. O a nisi “mea o le lalolagi” (Mataupu Faavae ma Feagaiga 30:2) e mafai ona taitaiesea i tatou mai le manatuaina o Iesu Keriso ma Lana talalelei? E faapefea ona tatou tuu le tatou taulaiga ia te Ia nai lo o isi mea le taua tele?

Mataupu Faavae ma Feagaiga 30–34

E mafai on ou faasoa atu le talalelei a Iesu Keriso.

E toatele tamaiti i le Ekalesia e tepa taulai atu i le lumanai e auauna o se faifeautalai faamisiona po o se misiona o le auaunaga. O aafiaga a faifeautalai lea na faamatala i le vaega 30–34 e mafai ona fesoasoani i la latou sauniuniga.

Gaoioiga e Mafai Ona Fai

• Valaaulia se tagata o le uarota e aoao e uiga i se tasi o faifeautalai na valaauina i le Mataupu Faavae ma Feagaiga 30–34 ma faasoa atu i tamaiti mea na latou aoaoina (tagai “Voices of the Restoration: Early Converts” i le Sau, Mulimuli Mai ia te A’u—Mo Tagata Taitoatasi ma Aiga po o le “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” Revelations in Context, 54–69).

• Tusi se gutu lapoa i luga o le laupapa, ma fesoasoani i tamaiti e sue i le Mataupu Faavae ma Feagaiga 33:8–10 folafolaga a le Alii ia i tatou pe a tatala o tatou gutu e faasoa atu ai le talalelei. Tuu atu i tamaiti e tusi nei folafolaga i luga o le laupapa, ma fesoasoani atu ia i latou ia malamalama i le uiga o nei folafolaga. Fai i tamaiti taitasi e tusi i totonu o le gutu se upu moni o le talalelei e mafai ona latou faasoa atua i isi.

• Faaali atu se ata o se pu, ma talanoa e uiga i le uiga o le talai atu o le talalelei “e pei o le leo o se pu.” E faapefea ona tatou “siitiaina i luga” o tatou leo? (Mataupu Faavae ma Feagaiga 33:2; 34:6).

• Fai atu i tamaiti e faasoa mai pe o faapefea ona latou sauni e auauna atu faamisiona i se aso. Afai latou te iloa se tasi (atonu o se tagata o le aiga) o loʻo auauna atu, valaaulia i latou e faamatala mai ona aafiaga. Pe valaaulia faifeautalai, o se faifeautalai ua maea lana misiona, po o se tasi o sauniuni mo se misiona e faasoa atu lona naunautaiga mo le galuega faafaifeautalai. Faasoa atu nisi o ou aafiaga i le faasoaina atu o le talalelei, e aofia ai aafiaga i lou olaga i aso taitasi.

  

  E mafai ona ou faasoa atu le talalelei i a’u uo.

Mataupu Faavae ma Feagaiga 33:12–17

E mafai ona ou fausia loʻu olaga i luga o le talalelei a Iesu Keriso.

Afai e mafai e tamaiti ona aoao ao laiti pe faapefea ona fausia o latou olaga i luga o le talalelei a Iesu Keriso, o le a sili atu ona latou tumau faamaoni ia te Ia. O le fautuaga o loo tuuina atu i nei fuaiupu e mafai ona fesoasoani ia i latou.

Gaoioiga e Mafai Ona Fai

• Aumai i le vasega mea faitino e eseese malo, e pei o se meataalo e tumu i vavae, o se momi, omea, ma se papa. Faataga tamaiti e taulimaina taitasi. Valaaulia i latou e saili i le Mataupu Faavae ma Feagaiga 33:12–13 e saili ai le auala o loo faamatalaina ai e le Alii Lana talalelei. Aisea ua avea ai le “papa” ma upu lelei e faamatala ai le talalelei? E faapefea ona tatou fausia o tatou olaga i luga o le papa o le talalelei?

• Fesoasoani i tamaiti e faitau le Mataupu Faavae ma Feagaiga 33: 12–17 ma saili mea e mafai ona tatou faia e fausia ai o tatou olaga i luga o le talalelei a Iesu Keriso. Valaaulia tamaiti e tusi se ata o se mea latou te maua, ma tuu atu ia i latou e mate po o a mea o faaalia i ata a isi tamaitiiti.

Uunaia le Aoaoina i le Aiga

Valaaulia tamaiti e avea faapei o faifeautalai e ala i le faasoa atu i o latou aiga se mea na latou aoaoina i le Peraimeri i le taimi nei.

Faaleleia o Lo Tatou Aoao Atu

Molimau atu i faamanuiaga ua folafola mai. Pe a e valaaulia tamaiti e ola i se mataupu faavae patino, faasoa atu ia folafolaga ua faia e le Atua ia i latou o e ola ai i lena mataupu faavae. Mo se faataitaiga, e mafai ona e tuuina atu lau molimau i faamanuiaga e tuuina mai e le Alii ia i latou o e tatala o latou gutu ma faasoa atu le talalelei.