‘’4–10 Ianuari. Iosefa Samita—Talafaasolopito 1:1–26: “Na Ou Vaaia ai se Malamalama Faaniutu,” Sau, Mulimuli Mai ia te A’u—Mo Tagata Taitoatasi ma Aiga: Mataupu Faavae ma Feagaiga 2021 (2020)
“4–10 Ianuari. Iosefa Samita—Talafaasolopito 1:1–26,” Sau, Mulimuli Mai ia te A’u—Mo Tagata Taitoatasi ma Aiga: 2021
Vao Paia, saunia e Greg K. Olsen
4–10 Ianuari
Iosefa Samita—Talafaasolopito 1:1–26
“Na Ou Vaaia ai se Malamalama Faaniutu”
A o e faitauina le Iosefa Samita—Talafaasolopito 1:1–26, o a ni savali ua e maua mo lou olaga? O le a le mea ua sili ona taua ia te oe ma lou aiga?
Tusifaamaumau Ou Lagona Uunai
O le Mataupu Faavae ma Feagaiga o se tusi o tali i tatalo: o le tele o faaaliga paia i totonu o lenei tusi na oo mai o ni tali i fesili. O lea e talafeagai ai ona amata le suesueina o le Mataupu Faavae ma Feagaiga i le manatunatu i le fesili lea na amata ai le liligi mai o faaaliga i aso e gata ai—le fesili na tuuina atu e Iosefa Samita i le togalaau i le 1820. O se “taua o upu ma vevesi o taofi” (Iosefa Samita—Talafaasolopito 1:10) na oo ai ia Iosefa le le mautonu e uiga i tapuaiga ma le tulaga o lona agaga; atonu e mafai ona e fesootai i lena mea. E tele manatu feteenai ma leo faatauanau mai i o tatou aso nei, ma pe a tatou manana’o e vailiili nei savali ma saili le mea moni, e mafai ona tatou faia faapei o Iosefa. E mafai ona tatou fai ni fesili, suesue i tusitusiga paia, mafaufau loloto, ma iu lava ina fesili atu i le Atua. I le tali mai i le tatalo a Iosefa Samita, na sau mai le lagi se malamalama faaniutu; na faaali mai le Atua le Tama ma Iesu Keriso ma tali mai i ana fesili. O le molimau a Iosefa i lena aafiaga faavavega na folafola malosi atu ai o soo se tasi “o se ua [leai] se poto ona ole atu i le Atua, ma maua mai” (Iosefa Samita—Talafaasolopito 1:26). E mafai ona tatou maua uma, a lē o se faaaliga vaaia faalelagi, ia tau o se faaaliga vaaia ua manino atili mai, ua faasusuluina atili e le malamalama faalelagi.
Manatu mo Suesuega Faaletagata Lava Ia o Tusitusiga Paia
Iosefa Samita—Talafaasolopito 1:1–26
O Iosefa Samita o le Perofeta o le Toefuataiga.
O le faamoemoe o le talafaasolopito o Iosefa Samita o le tuuina o i tatou “ia maua tala sa’o” ona o le mea moni e uiga ia Iosefa Samita ua tele ina ave seseina (Iosefa Samita—Talafaasolopito 1:1). A o e faitauina le Iosefa Samita—Talafaasolopito 1:1–26, o le a le mea ua faamalosia ai lau molimau e uiga i lona valaauga paia? Faamaumau faamaoniga ua e maua na saunia e le Alii ia Iosefa Samita mo lana misiona faaperofeta. A o e faitau, atonu e te mana’o e tusi faamaumau ou mafaufauga ma lagona e uiga ia Iosefa Samita ma lana molimau.
Tagai foi Au Paia, 1:3–19.
Iosefa Samita—Talafaasolopito 1:5–20
Afai ou te ole atu i le faatuatua, o le a tali mai le Atua.
Na i ai se taimi na e i ai i le “leai se poto” po o le lē mautonu e uiga i se faaiuga na e mana’omia ona fai? (Iosefa Samita—Talafaasolopito 1:13). O le a le mea ua e aoaoina mai le aafiaga o Iosefa Samita i le fuaiupu 5-20? Mafaufau i lou lava manaomia o le poto ma le malamalama sili, ma manatunatu pe faapefea ona e saili le mea moni.
Tagai foi 1 Nifae 10:17–19; 15:6–11; Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 93–96.
E mafai ona tatou fesili i le Atua a tatou fesili e ala i le tatalo.
Iosefa Samita—Talafaasolopito 1:15–20
Aisea ua i ai ai faamaumauga eseese o le Uluai Faaaliga?
I le gasologa o lona soifuaga, na faamaumau ai e Iosefa Samita lona aafiaga i le Togalaau Paia e le itiiti ifo ma le faafa, e tele ina faaaoga ai se tusi upu. E faaopoopo atu i ai, o nisi talafaamaumau na tusia e tagata na faalogo o talanoa Iosefa e uiga i lana faaaliga vaaia. E ui o nei faamaumauga e eseese i nisi o auiliiliga, e faalagolago i e na i ai ma le nofoaga na fai ai, ae o loo tutusa lava. Ma o ia faamaumauga taitasi ua faaopoopo ai auiliiliga ia e fesoasoani ia i tatou ia malamalama atili i aafiaga o Iosefa Samita, e faapei o Evagelia taitasi e fa lea e fesoasoani ia i tatou ia malamalama atili ai i le auaunaga a le Faaola.
Ina ia faitau i isi faamaumauga a Iosefa, tagai “Faamaumauga o le Ulua’i Faaaliga” (Autu o le Talalelei, topics.ChurchofJesusChrist.org). O a mea ua e aoaoina mai le faitauina o nei talafaamaumau uma?
Iosefa Samita—Talafaasolopito 1:15–20
O le Uluai Faaaliga na amatalia ai le Toefuataiga o le talalelei a Iesu Keriso.
Na mautinoa e Iosefa Samita o le a tali mai le Atua i lana tatalo, ae na te lei iloa o lena tali o le a suia ai lona olaga—ma le lalolagi. A o e faitau e uiga i le aafiaga o Iosefa, mafaufau pe na faapefea ona suia e le Uluai Faaaliga lou olaga. Mo se faataitaiga, atonu e te faaumaina le fuaiupu lenei i ni ala eseese: “Talu ai ona na tupu le Ulua’i Faaaliga, ou te iloa …” Ua faapefea ona faamanuiaina oe ona o le Uluai Faaaliga?
Tagai foi i le “Ole Atu i le Atua: O Le Uluai Faaaliga a Iosefa Samita,” vitio ChurchofJesusChrist.org; Saints, 1:14–19; Russell M. Nelson, “Faalogo ia te Ia,” Ensign po o le Liahona, Me 2020, 88-92.
Iosefa Samita—Talafaasolopito 1:21–26
E mafai ona ou tumau moni i mea ua ou iloa, e tusa pe teena a’u e isi.
O se tasi o faamanuiaga o tusitusiga paia o le i ai lea o faataitaiga musuia a alii ma tamaitai totoa o e na feagai ma luitau i le faatuatua ia Iesu Keriso. Ina ua feagai Iosefa Samita ma mea na faasagatau mai ona o lana faaaliga, na ia iloa faapei o le Aposetolo o Paulo, o le na sauaina foi i le faapea mai na ia vaai i se faaaliga. A o e faitau i faamaumauga a Iosefa, o le a se mea o loo musuia ai oe ia tumau moni i lau molimau? O a isi faataitaiga—mai tusitusiga paia po o tagata e te iloa—ua tuuina atu ia te oe le lototele e tumau moni ai i aafiaga faaleagaga na e mauaina?
Manatu mo Suesuega Faaleaiga o Tusitusiga Paia ma Afiafi Faaleaiga
-
Iosefa Samita—Talafaasolopito 1:6.E mafai faapefea ona tatou taulimaina feeseeseaiga e aunoa ma le i ai o finauga faapei o tagata o loo faamatala mai i lenei fuaiupu?
-
Iosefa Samita—Talafaasolopito 1:11–13.O le faitauina o nei fuaiupu e ono musuia ai tagata o le aiga e faasoa a latou aafiaga i se taimi na ootia ai o latou loto i se mau ma musuia i latou e faatino.
-
Iosefa Samita—Talafaasolopito 1:16–20.A o faitau e lou aiga nei fuaiupu, mafaufau e faaali le ata vali lea e o faatasi ma le taiala po o se isi ata o le Uluai Faaaliga (atonu o le a fiafia lou aiga e tusi sa latou lava ata e faatatau i ai). E mafai foi ona outou matamata i le vitio “Ole Atu i le Atua: O Le Uluai Faaaliga a Iosefa Samita” (ChurchofJesusChrist.org). E mafai ona outou taitasi ona tusi se lisi o upumoni ua tatou aoao mai lenei faaaliga, ona fefaasoaai lea o a outou lisi a le tasi ma le isi. Atonu o se taimi sili lenei mo tagata o le aiga e faasoa mai le ala na latou maua ai a latou molimau i le Uluai Faaaliga a Iosefa Samita.
-
Iosefa Samita—Talafaasolopito 1:17.Ina ua faaali le Atua ia Iosefa Samita, na Ia valaau Iosefa i lona igoa. O anafea na lagona patino ai e tagata o lou aiga e silafia i latou e le Tama Faalelagi?
-
Iosefa Samita—Talafaasolopito 1:21–26.E mafai faapefea ona tatou tali atu pe a fesiligia e tagata a tatou molimau?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
O le pese fautuaina: “O Le Talosaga Muamua a Iosefa Samita,” Viiga, nu. 14.
O Leo o le Toefuataiga
Aiga o Iosefa Samita
Ua matuai aafia loloto i tatou taitoatasi e o tatou olaga faaleaiga, ma e le’i ese mai ai Iosefa Samita i lea mea. O talitonuga faaletapuaiga a ona matua ma faatinoga na totoina ai fatu o le faatuatua lea na mafai ai le Toefuataiga . O loo faamaumauina i le tusi o talaaga a Iosefa lana saafi lenei: “O upu ma gagana [ua] le ‘a’u’a’u e faaalia ai le loto faafetai o loo o’u nofo aitalafu ai i le Atua mo le tuuina mai ia te a’u o ni augatuaa faamamaluina.”1
O le upusii lenei mai lona tina o Lusi Maka Samita; lona uso o Viliamu Samita; ma le Perofeta lava ia o loo tuuina mai ia i tatou se vaaiga i le aafiaga faaletapuaiga i totonu o le aiga o Samita.
Aiga o Iosefa Samita, saunia e Dan Baxter
Lusi Maka Samita
“[E tusa o le 1802], na ou ma’i ai. … Na ou faapea ifo ai ia te a’u lava, ou te le o saunia e oti aua ou te le iloa ala o Keriso, ma e foliga mai ia te a’u e pei o loo i ai se va pogisa tuutoatasia i le va o a’u ma Keriso lea ou te le fia taumafai e uia. …
“Na ou vaai atu i le Alii ma aioi ma talosaga i le Alii ina ia ia faasaoina lou ola ina ia mafai ona ou tausia la’u fanau ma faamafanafana i le loto o la’u tane; lea na ou taoto ai i le po atoa. … Na ou osi feagaiga ma le Atua [faapea] afai e na te tuu mai a’u ia ou ola, o le a ou taumafai ia maua lena tapuaiga lea o le a mafai ai ona ou auauna sa’o ai ia te ia, tusa pe o i totonu o le Tusi Paia po o fea lava e ono maua ai, pe afai foi e ono maua mai le lagi e ala i le tatalo ma le faatuatua. Mulimuli ane na oo mai ia te a’u se leo ma faapea mai “Ia outou saili ona outou maua ai lea, ia outou tu’itu’i atu, ona toina ai lea ia te outou. Ia faamafanafanaina lou loto. Ia outou faatuatua i le Atua, ia faatuatua mai foi ia te au.’ …
“Mai lea taimi agai atu i luma, na ou maua ai pea le malosi. E itiiti lava se upu na ou fai atu e uiga i mataupu tau tapuaiga e ui lava sa i ai pea lea i lo’u mafaufau, ma sa ou manatu o le a ou faia i le ma’elega uma i le taimi o le a mafai ai na ou saili atu i se tagata lotu o se e iloa ala a le Atua e aoao mai a’u i mea o le Lagi.”2
Viliamu Samita
“O lo’u tina, o se fafine sa sili ona malosi i le lotu ma sa manatu tele o ia i le manuia o lana fanau, iinei, ma pe a mavae lenei olaga, na ia galueaiina mea uma e mafai e lona alofa faamatua ona fautua mai ai, ia matou galulue ai e saili mo le faaolataga o o matou agaga, po o (e pei ona faaupu ai i na taimi) ‘ia maua le tapuaiga.’ Na malo o ia ia i matou ia auai i sauniga, ma na toeitiiti lava a manatu uma i ai le aiga i lea mataupu, ma avea ma ē saili i le mea moni.”3
“Ou te manatua le faia i taimi uma lava o a matou tatalo faaleaiga. Ou te manatuaina lelei sa aveina e tama lana mata faitautusi i totonu o le taga o lona ofu, … ma ina ua matou vaai atu i matou o tama o ia autago e saili lana mata, na matou iloa o se faailo lea e sauni mo le tatalo, ma afai matou te le iloaina, ona faapea mai lea o tina, ‘Viliamu’ pe o ai lava ua faatalale, ‘sauni mo le tatalo,’ A maea le tatalo e i ai se matou pese matou te usuina.”4
Na aoaoina e Iosefa Matua ma Lusi Samita lo la aiga e suesue tusitusiga paia.
Iosefa Samita
“Ou te fai atu nei, e le’i faia lava e [lo’u tama] se aga faatiga lea e ono faapea o se le alofa, i lona olaga, i lo’u iloa lea. Ou te alofa i lo’u tama ma ona manatuaga; ma manatuaga o ana galuega lelei, e i ai pea o ni vaaiga loloto i lou mafaufau; ma o le tele o ana upu agalelei ma faamatua ia te a’u, ua tusia i luga o le papa o lo’u loto. E paia ia te a’u, o mafaufauga ou te faamemelo i ai o le talafaasolopito o lona olaga, o loo faasolosolo pea i lo’u mafaufau ma na toto ai iina, mai mea sa ou maitauina talu lo’u fanau mai. … O lo’u tina foi o se tasi o tina iloga, ma o se ua sili i fafine uma.”5
O Le Ulua’i Faaaliga o le Toefuataiga, saunia e Michael Bedard