Vao Paia, saunia e Greg K. Olsen

4–10 Ianuari

Iosefa Samita—Talafaasolopito 1:1–26

“Na Ou Vaaia ai se Malamalama Faaniutu”

A o e faitauina tusitusiga paia, mafaufau i tamaiti o e aoaoina. E mafai ona musuia oe e le Agaga Paia, e ala i lagona e te mauaina, ia iloa mea e taulai atu i ai i le vasega.

Tusi Faamaumau Ou Lagona Uunai

Valaaulia le Fefaasoaai

Valaaulia ni nai tamaiti e faasoa mai mea ua latou iloa e uiga ia Iosefa Samita ma lana tatalo i le Vao Paia (faaali atu se ata o le Uluai Faaaliga e mafai ona fesoasoani). Fesili i ai pe o a ni o latou lagona ina ua latou faalogo na asiasi atu le Tama Faalelagi ma Iesu Keriso ia Iosefa Samita. Afai e asiasi Iosefa Samita i la tatou vasega, o le a se mea tatou te fesili atu ai ia te ia e uiga i lana aafiaga?

Aoao atu le Aoaoga Faavae: Tamaiti Laiti

Iosefa Samita—Talafaasolopito 1:3–20

Na saunia Iosefa Samita e avea ma se perofeta a le Atua.

O le aoao e uiga i le olaga talavou a Iosefa Samita e mafai ona fesoasoani i tamaiti e malamalama ia te ia ma sauni e aoao mai i ana aafiaga. Atonu e mafai ona e fesoasoani ia i latou e iloa le ala na saunia ai Iosefa e avea ma se perofeta a le Atua ao avea ma se tamaitiiti.

Gaoioiga e Mafai Ona Fai

• Fai atu i se tamaitiiti e uu se ata o Iosefa Samita (tagai Tusiata o le Talalelei, nu.87) a o e faasoaina atu ni upu moni e faatatau ia Iosefa Samita o loo maua i le Iosefa Samita—Talafaasolopito 1:3-14 (tagai foi “Mataupu 1: O losefa Samita ma Lona Aiga,” Mataupu Faavae ma Feagaiga, 6–8, po o le vitio talafeagai i luga o le ChurchofJesusChrist.org). Fesoasoani ia i latou e faatusatusa faamatalaga e uiga i lona aiga ma lona olaga ia i latou lava. Faasoa atu lau molimau faapea na filifilia Iosefa e le Atua ma saunia e avea ma se perofeta (tagai “Leo o le Toefuataiga: Aiga a Iosefa Samita,” i le Sau, Mulimuli Mai ia te A’u—Mo Tagata Taitoatasi ma Aiga). A manaomia, aoao atu i tamaiti o le perofeta o se tagata e saunoa mo le Atua.

• Valaaulia se alii talavou mai le uarota e asiasi i lau vasega, ma faafoliga e pei o Iosefa Samita. Saunia ni nai fesili mo tamaiti e fesili atu ia te ia e mafai ona taliina i le Iosefa Samita—Talafaasolopito 1:3–20 (atonu e te manao e faasoa nei fesili ma le alii talavou ae lei oo i le taimi o le vasega). Ona valaaulia lea o le alii talavou e faitau ni faamatalaga a Iosefa Samita e faatatau i le Uluai Faaaliga (mo se faataitaga, Iosefa Samita–Talafaasolopito 1:25).

Iosefa Samita—Talafaasolopito 1:10–17

E faafofoga ma tali mai le Tama Faalelagi i au tatalo.

O le aafiaga a Iosefa Samita e mafai ona uunaia ai tamaiti e tatalo ma le faatuatua o le a faafofoga mai le Atua.

Gaoioiga e Mafai Ona Fai

• Tau atu i tamaiti fesili a Iosefa Samita sa i ai (tagai Iosefa Samita–Talafaasolopito 1:10). O a mea e mafai ona tatou faia pe a i ai ni a tatou fesili e faatatau i le Atua? Faaali atu i tamaiti se kopi o le Tusi Paia, ma faamatala atu ina ua faitauina e Iosefa Samita le Tusi Paia, na ia aoaoina ai e mafai ona ia “ole atu i le Atua” (Iakopo 1:5; tagai foi Tusiata o le Talalelei, nu. 89). Faasoa atu lau molimau e mafai ona tatou fesili atu i le Atua e ala i le tatalo.

• Faamatala e uiga i se aafiaga na e le mautonu ai, na e ole atu i le Atua mo le fesoasoani, ma mauaina se tali. Fesoasoani i tamaiti e mafaufau i taimi na taliina ai a latou tatalo. E mafai foi ona e faasoa atu se tala mai mekasini o le Ekalesia e faatatau i le taliina o se tatalo a se tamaitiiti.

Iosefa Samita—Talafaasolopito 1:17–19

Na vaai Iosefa Samita i le Tama Faalelagi ma Lona Alo, o Iesu Keriso.

E mafai ona e fesoasoani i tamaiti e faataatia le faavae mo se molimau malosi o le Uluai Faaaliga a Iosefa Samita. Faasoa atu ia i latou pe na faapefea ona e mauaina lau molimau e uiga i lenei mea taua.

Gaoioiga e Mafai Ona Fai

• Faaali atu le ata o le Uluai Faaaliga mai le otootoga o lenei vaiaso i le Sau Mulimuli Mai ia te Au—Mo Tagata Taitoatasi ma Aiga, ma faasoa atu i au oe lava upu le mea na tupu ina ua tatalo Iosefa. Valaaulia tamaiti e tusi ni a latou ata o le tala.

• Valaaulia tamaiti e valivali le itulau o gaoioiga o lenei vaiaso ma faaaoga e faamatala ai le tala o le Uluai Faaaliga (tagai foi “Mataupu 2: O Le Faaaliga Muamua na Oo Mai ia losefa Samita,” Tala o le Mataupu Faavae ma Feagaiga, 9–12, po o le vitio talafeagai i luga o le ChurchofJesusChrist.org).

• Faitau le Iosefa Samita—Talafaasolopito 1:17, ma faailoa atu i tamaiti upu na saunoa mai ai le Tama Faalelagi ia Iosefa Samita.

Aoao atu le Aoaoga Faavae: Tamaiti Matutua

Iosefa Samita—Talafaasolopito 1:10–13

E mafai ona tali mai le Atua i au fesili e ala mai i tusitusiga paia.

Na musuia Iosefa Samita i se fuaitau na ia faitauina i le Tusi Paia, lea na sosoo ai ma le Uluai Faaaliga ma le Toefuataiga o le Ekalesia a Keriso. Fesoaoani i tamaiti ia iloa le auala e fesoasoani ai le suesueina o tusitusiga paia i le mauaina o tali i a latou fesili faaleagaga.

Gaoioiga e Mafai Ona Fai

• Faaali atu i tamaiti tusi eseese (e pei o se tusi e faatatau i le lalolagi po o se tusi fai meaai), ma fesoasoani ia i latou e mafaufau i ni fesili e mafai e nei tusi ona taliina. Ona faaali atu lea ia i latou se kopi o tusitusiga paia. O a fesili e mafai ona tali e nei tusi? E mafai ona e tuuina atu se faataitaiga o se fesili o loo taliina i totonu o tusitusiga paia. Faitau faatasi le Iosefa Samita—Talafaasolopito 1:10–11 e saili ai po o a fesili a Iosefa Samita na i ai ma po o a tali na ia mauaina i totonu o tusitusiga paia.

• Fesoasoani i tamaiti e saili upu i le fuaiupu 12 o loo faamatala ai le aafiaga na oo ia Iosefa Samita ina ua ia faitauina le Iakopo 1:5. Faasoa sau aafiaga mai tusitusiga paia–mo se faataitaiga, ina ua e mauaina se tali i se tasi o au fesili e ala i le faitauina o tusitusiga paia. Usu faatasi “Saili, Mafaufau Loloto, ma Tatalo” (Tusipese a Tamaiti,66).

Iosefa Samita—Talafaasolopito 1:10–19

E faafofoga ma tali mai le Tama Faalelagi i au tatalo.

Na silafia e le Atua Iosefa Samita, ma ina ua tatalo Iosefa, na faafofoga mai le Atua ia te ia. E ui o aafiaga a tamaiti o e aoaoina e mafai ona ese mai ia Iosefa, e mafai ona e fesoasoani ia i latou ia lagona e silafia e le Atua i latou ma faafofoga mai pe a latou tatalo.

Gaoioiga e Mafai Ona Fai

• Valaaulia se tasi o matua o tamaiti e tutu i fafo o le potuaoga ma tali mai i fesili a tamaiti e faaaoga ai meatotia e pei o le lafoina o se feau tusitusi, faia o se telefoni, tusiina o se faamtalaga, po o le lafoina o se feau i luga o le initoneti. O a ni auala e ono fesootai mai ai le Tama Faalelagi ma i tatou? (tagai “Faaaliga,” Taiala i Tusitusiga Paia, scriptures.ChurchofJesusChrist.org). E tusa ai ma le Iosefa Samita—Talafaasolopito 1:16-19, na faapefea ona tali mai le Tama Faalelagi i le tatalo a Iosefa Samita? Na faapefea ona Ia tali mai i a tatou tatalo?

• Usu faatasi le “O Le Tatalo a le Tamaitiiti” (Tusipese a Tamaiti, 6–7).

  

  E faafofoga ma tali mai le Atua ia tatou tatalo.

Iosefa Samita—Talafaasolopito 1:14–19, 25

Sa afifio mai le Tama Faalelagi ma Iesu Keriso ia Iosefa Samita.

O tamaiti taitasi o e aoaoina e manaomia se molimau ia Iosefa Samita ma lana aafiaga i le Vao Paia. E mafai faapefea ona e fesoasoani ia i latou ia maua pe faamalosia a latou molimau?

Gaoioiga e Mafai Ona Fai

• Toe iloilo le tala o le Uluai Faaaliga, tusi ni aotelega o fuaiupu taitasi mai le Iosefa Samita—Talafaasolopito 1:14–19 i ni pepa eseese. Tuu pepa i totonu o se koneteina ma valaaulia tamaiti e filifili taitasi ma faatulaga i luga o le laupapa i le faasologa sao.

• Valaaulia tamaiti e tapuni latou mata ma vaai faalemafaufau pe faape’ī le avea ai e pei o Iosefa ao e faitauina vaega filifilia o le Iosefa Samita—Talafaasolopito 1:14–17. Fai i tamaiti e faasoa mai o latou manatu ma lagona e uiga i le aafiaga a Iosefa.

• Faaali le vitio “Ask of God: Joseph Smith’s First Vision” (ChurchofJesusChrist.org), ma fai atu i tamaiti e faasoa mai se mea na latou aoaoina e faatatau i le faaaliga a Iosefa o le Tama Faalelagi ma Iesu Keriso.

• Faitau faatasi ma tamaiti le molimau a Iosefa i le Iosefa Samita—Talafaasolopito 1:25. Fai i tamaiti e vaavaai mo upu ma fasifuaitau o loo faaalia ai le faatuatua a Iosefa. E mafai faapefea ona tatou tumau i le faatuatua i le Atua ma a tatou molimau pe a i ai isi tagata e le malilie mai ia i tatou?

Fautuaina le Aoaoina i le Aiga

Valaaulia tamaiti e faasoa le tala o le Uluai Faaaliga a Iosefa Samita ma se tasi–pe a mafai, ma se tasi e le’i faalogo i ai muamua. E mafai ona latou faaaogaina le itulau o gaoioiga o lenei vaiaso e fesoasoani ia i latou e faamatala ai le tala.

Faaleleia o Lo Tatou Aoao Atu

Fautuaina le migao. Ina ia faamanatu atu i tamaiti ia faʻaaloalo, e mafai ona e usuina pe hamuina [hum] se pese, faaali atu se ata o Iesu, pe faaaoga se faailo lima e iloa e tamaiti.