o alii o loo galulue i le fanua

Harvest Time in France, saunia e James Taylor Harwood

18–24 Ianuari

Mataupu Faavae ma Feagaiga 3–5

“O Le A Agai i Luma Laʼu Galuega”

A o e suesue i le Mataupu Faavae ma Feagaiga 3–5, e mafai ona e maua ni uunaiga e uiga i mea e tatau ona malamalama i ai tamaiti o loo e aoaoina. E mafai foi ona tuuina atu e gaoioiga o loʻo i lenei otootoga ni manatu ia te oe.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Faaali atu le ata o Iosefa Samita mai le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga, ma fesoasoani i tamaiti e fefaasoaaʻi mea latou te iloa e uiga i le tala o loʻo faʻaalia. Fesoasoani ia i latou e manatua le tala ia Matini Harisi lea na leiloloa ai itulau muamua o le faaliliuga o le Tusi a Mamona (tagai i le “Mataupu 4: O Matina Harisi ma Itulau na Leiloa,” Tala o le Mataupu Faavae ma Feagaiga, 18–21; po o le Au Paia, 1:51–56).

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 3:7–10

E mafai ona ou filifili le mea tonu pe a taumafai isi e tulei aʻu e faia le mea sese.

Fesoasoani i tamaiti e aoao mea na aoaoina e Iosefa Samita: afai latou te talitonu i le Tama Faalelagi, o le a Ia “faatasi ma [i latou] i taimi uma o faalavelave” (Mataupu Faavae ma Feagaiga 3:8).

Gaoioiga e Mafai Ona Fai

• Toe faamanatu le tala ia Matini Harisi ma itulau na leiloloa (tagai i Tala o le Mataupu Faavae ma Feagaiga, 18–21, po o le vitio talafeagai i luga o le ChurchofJesusChrist.org). Fetufaai ma tamaiti nisi tulaga atonu e ono faaosoosoina ai i latou e fai se mea latou te iloa e le saʻo. E faapefea ona fesoasoani le Tama Faalelagi ia i tatou e filifili le mea sa’o? (Tagai i le Mataupu Faavae ma Feagaiga 3:8).

  Matini Harisi

  Martin Harris, saunia e Lewis A. Ramsey

• Faitau upu nei mai le Mataupu Faavae ma Feagaiga 3:8: “Semanu e faaloaloa atu e ia lona aao ma lagolago ia te oe.” Valaaulia tamaiti e tutu i luga ma faaloloa o latou lima ao e toe faitauina le fuaiupu. Faasoa atu ia i latou ni auala e faaloaloa mai ai e le Alii Lona aao e fesoasoani ia i latou pe a taumafai isi e faaosooso i latou e faia mea sese. Tuu atu ia i latou e auauai e faaloaloa o latou lima ao latou faamatala mai isi auala ua faaloaloa mai ai e le Alii Lona aao e fesoasoani ia i tatou.

Mataupu Faavae ma Feagaiga 4

E manaomia a’u e le Alii e fai Lana galuega.

E mafai e tamaiti ona “o atu i le galuega a le Atua” (Mataupu Faavae ma Feagaiga 4:2) i le tele o auala, ma e mafai ona latou saunia i le taimi nei mo avanoa faaopoopo i le lumanai.

Gaoioiga e Mafai Ona Fai

• Faitau le Mataupu Faavae ma Feagaiga 4:1 i tamaiti. Aumai ni ata e faaalia ai le “galuega ofoofogia” a le Atua i aso e gata ai (e pei o ata o faifeautalai, malumalu, ma le Tusi a Mamona). Tuu atu i tamaiti e auauai e filifili se ata ma talanoa e uiga i ai. Faasoa atu pe aisea e ofoofogia ai le galuega a le Alii ia te oe.

• Fesoasoani i tamaiti e mafaufau i taga po o le tusia o ata e faaalia ai le fuaitau “auauna atu ia te ia ma lou loto atoa, mafaufau atoa, manatu atoa ma le malosi atoa” (Mataupu Faavae ma Feagaiga 4:2). Faasoa atu se faataitaiga o se tasi e te iloa o loo auauna i le Atua i lenei auala.

• Usu faatasi se pese e faatatau i le galuega faifeautalai, e pei o le “Ou Te Fia Avea Nei Ma Faifeautalai” (Tusipese a Tamaiti, 90). Ia talanoaina mea o loo aoao mai e le pese e uiga i auala e mafai ai ona tatou fesoasoani i le Atua e faia Lana galuega.

Mataupu Faavae ma Feagaiga 5:10

Ua tatou mauaina le afioga a le Atua e ala mai ia Iosefa Samita.

E faapefea ona e fesoasoani i tamaiti e faamalosia a latou molimau o Iosefa Samita ma isi perofeta o aoao atu le afioga a le Atua?

Gaoioiga e Mafai Ona Fai

• Nana se ata o Iosefa Samita i le potu (tagai Tusiata o le Talalelei, nu. 87). Faitau le Mataupu Faavae ma Feagaiga 5:10, ma valaaulia tamaiti e vaavaai mo le ata e iloa ai po o ai o loo faatatau i ai le upu “oe”. Tuu atu lau molimau na tatou mauaina le afioga a le Atua e ala mai ia Iosefa Samita.

• Faaali atu i tamaiti kopi o le Tusi a Mamona ma le Mataupu Faavae ma Feagaiga. Faamatala atu na tuuina mai e le Atua ia i tatou nei tusitusiga paia e ala mai ia Iosefa Samita. Faasoa atu nisi o au fuaiupu e sili ona e fiafia i ai mai nei tusi, ma taʻu mai pe aisea ua e faafetai ai mo i latou.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 3:5–10; 5:21–22

E tatau ona sili atu ona ou popole i le faamalieina o le finagalo o le Atua nai lo le faamalieina o isi.

A o aoao tamaiti e uiga i le aafiaga o Iosefa Samita i itulau na leiloloa o le faaliliuga o le Tusi a Mamona, e mafai ona musuia i latou e tumau i le faamaoni pe a faaosoosoina i latou e isi ia lē usiusitai.

Gaoioiga e Mafai Ona Fai

• I ni nai aso muamua, valaaulia se tasi o tamaiti e sau i le vasega ua saunia e faasoa atu le tala ia Iosefa Samita ma Matini Harisi ma le leiloloa ai o itulau muamua o le faaliliuga o le Tusi a Mamona (tagai i Tala o le Mataupu Faavae ma Feagaiga, 18–21; po o le Au Paia, 1:51–56). Faitau faatasi le Mataupu Faavae ma Feagaiga 3:5–8; 5:21–22, ma vaavaai mo faamanuiaga e oo mai pe a tatou tumau faamaoni i le Atua.

• Tuu atu i tamaiti le taimi e mafaufau ai e uiga i se taimi na taumafai ai se uo e tulei i latou e fai se mea sese. Valaaulia tamaiti e saili se fuaitau i le Mataupu Faavae ma Feagaiga 3: 5–8; 5:21–22 e mafai ona fesoasoani ia i latou i na tulaga. Faatino nisi o na faataitaiga.

Mataupu Faavae ma Feagaiga 4

E manaomia a’u e le Alii e fai Lana galuega.

E mafai ona musuia e le Mataupu Faavae ma Feagaiga 4 tamaiti e avea ma se vaega o le “galuega ofoofogia a le Alii” (fuaiupu 1).

Gaoioiga e Mafai Ona Fai

• Tusi i luga o le laupapa le Auauna i le Atua. Valaaulia tamaiti e suesue i le Mataupu Faavae ma Feagaiga 4 ma fai se lisi o mea latou te aoaoina e uiga i le auauna atu i le Atua. Fai atu ia i latou e faaopoopo i le lisi mea na latou aoaoina mai le pese “O Le a Ou Lototoa” (Tusipese a Tamaiti, 85) po o se isi pese e faatatau i le auauna atu i le Atua.

• Aumai ni meafaigaluega (po o ata o meafaigaluega) e mafai e se tasi ona faʻaaoga e galue ai i se fanua. E faapefea ona fesoasoani nei meafaigaluega ia i tatou? Fesoasoani i tamaiti e sue mea i totonu o le Mataupu Faavae ma Feagaiga 4:5–6 lea e mafai ona avea ma meafaigaluega mo le faia o le galuega a le Atua.

• Valaaulia faifeautalai faamisiona po o faifeautalai o le uarota e faasoa mai se mea mai le Mataupu Faavae ma Feagaiga 4 lea na musuia ai i latou e faia le galuega a le Atua. O a mea e mafai ona tatou faia e fesoasoani ai i le galuega a le Atua?

Mataupu Faavae ma Feagaiga 5:1–7, 11, 16, 23–24

E mafai ona avea a’u ma se molimau e moni le Tusi a Mamona.

Na folafola atu ia Matini Harisi e mafai ona avea o ia ma se tasi o molimau o papatusi auro pe afai e faamaoni o ia. O le a tatou le vaai i papatusi e pei ona vaai i ai Matini, ae e mafai ona tatou maua se molimau faaleagaga o le Tusi a Mamona. E mafai faapefea ona e fesoasoani i tamaiti e atiina ae ma faasoa atu a latou lava molimau o le Tusi a Mamona?

Gaoioiga e Mafai Ona Fai

• Tusi fesili e pei o fesili nei i luga o le laupapa, ma fesoasoani i tamaiti e saili tali i totonu o le Mataupu Faavae ma Feagaiga 5:1–3, 7, 11: O le a le mea na manao Matini Harisi ia iloa? O ai na mafai ona faaali atu i ai e Iosefa Samita ia papatusi auro? Aisea e le lava ai le vaai i papatusi e faatalitonuina ai se tasi e moni le Tusi a Mamona?

• Fesili atu i tamaiti pe o le a le molimau ma pe aisea e taua ai se molimau. O le a le mea na manaomia e Matini Harisi e fai e avea ma molimau i papatusi auro? (Tagai i Mataupu Faavae ma Feagaiga 5:23–24). E ui lava tatou te lei vaai i papatusi, o le a se mea e mafai ona tatou faia e avea ai ma molimau o le Tusi a Mamona? (Tagai i Mataupu Faavae ma Feagaiga 5:16; Moronae 10:3–5).

aikona o le aoaoina

Fautuaina le Aoaoina i le Aiga

Uunaia tamaiti e tusi a latou molimau i le Tusi a Mamona ma faasoa atu i se tasi latou te iloa.

Faaleleia o Lo Tatou Aoao Atu

Fetuunai gaoioiga ina ia taulimaina fanau e i ai manaoga faapitoa. O fetuunaiga laiti i gaoioiga e mafai ona mautinoa e mafai e tamaiti uma ona aʻoaʻo mai ai. Mo se faʻataʻitaʻiga, afai o se gaoioiga e fautuaina ai le faʻaalia o se ata, e mafai ona e usuina se pese e fesoʻotaʻi faʻatasi ma tamaiti e i ai ni faʻaletonu o lo latou vaaiga.

itulau o gaoioiga: E mafai ona ou fesoasoani e faia le galuega a le Alii