O le Taimi o le Seleselega i Farani, saunia e James Taylor Harwood

Ianuari 18–24

Mataupu Faavae ma Feagaiga 3–5

“O Le a Alu Pea i Luma La’u Galuega”

Tusi i lalo mea ua e aoaoina mai ma lagonaina a o e suesue i tusitusiga paia. O le a fesoasoani lenei mea e te manatua ai na lagona uunai ma faasoa atu ai i isi.

Tusifaamaumau Ou Lagona Uunai

I le gasologa o tausaga amata o se perofeta a le Alii, e le’i iloaina ai e Iosefa Samita mea uma e uiga i le “galuega ofoofogia” ua vaalauina o ia e fai. A e o le mea e tasi na aoaoina ai o ia e ana aafiaga na ia maua muamua o le ia agavaa lea mo le galuega a le Alii, o lana vaai e tatau lava ona “manatu tasi i le mamalu o le Atua” (Mataupu Faavae ma Feagaiga 4:1, 5). Mo se faataitaiga, afai e tuuina atu e le Alii ia te ia se fautuaga e feteenai ma ona ia lava manaoga, e moomia ona ia mulimuli i le fautuaga a le Alii. Ma e tusa lava pe ua ia maua “faaaliga e tele, ma le mana e fai ai galuega tetele,” afai o lona lava loto ua sili na taua ia te ia nai lo le finagalo o le Atua, o le a “pa’u o ia” (Mataupu Faavae ma Feagaiga 3:4). A e na aoaoina e Iosefa se isi mea e talitutusa le taua e uiga i le galuega a le Alii: “Ua alofa mutimutivale le Atua,” ma afai e salamo faamaoni Iosefa, ua “filifilia pea” o ia (fuaiupu e 10). O le galuega a le Atua, i le maea o mea uma, o se galuega o le togiola. Ma “e le mafai ona taofia,” lena galuega (fuaiupu 1).

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 3:1–15

E tatau ona ou faatuatuaina le Atua nai lo le fefe i le tagata.

I le popofou o le galuega a Iosefa Samita, sa faigata ona maua ni uo lelei---aemaise lava ni uo e pei o Matini Harisi, o se sa faaaloalogia, o se tagata maumea, o se sa i se tulaga e mafai ona tuuina atu se lagolago taua. Ma sa tuuina atu e Matini ma le loto i ai le lagolago ia Iosefa, e ui na muta ai le faaaloalogia o ia e ana uo ma manaomia le ositaulaga tautupe.

O lea e faigofie ona iloa le mafuaaga na manao ai Iosefa e faataunuu le talosaga a Matini e ave le vaega muamua o le Tusi a Mamona ua faaliliu e faaali i lona toalua, o lē na teena le moni o le Tusi a Mamona. Na faaauau ona fesili atu Iosefa i le Alii i lenei talosaga, e ui na Ia Faasaina, ma oo ai ina ua mavae ona fesili atu faatolu Iosefa, na faapea mai ai le Alii, ioe. O se mafatiaga, na leiloloa ia itulau a o i ai i a Matini, ma na matua aoaiina ai Iosefa ma Matini e le Alii (tagai Au Paia, 1:51-53).

A o e faitauina le Mataupu Faavae ma Feagaiga 3:1–15, manatunatu i ala o loo faa-aafia ai oe e manatu o isi tagata. E mafai foi ona e faamauina e faaopoopo atu i le aoaiina o Iosefa Samita, sa fetalai atu e le Alii upu o le alofa mutimutivale. O le a se mea ua e aoao mai i le ala a le Alii na ia faasa’oina ai ma faalototeleina ai Iosefa? O le a se fautuaga ua e maua lea e mafai ona fesoasoani ia te oe pe a tofotofoina oe ia sili na mata’u i isi tagata nai lo le Atua?

Tagai foi i le “O Fesoasoaniga a Matini Harisi,” Ia Malamalama i Faaaliga, 1–9 history.ChurchofJesusChrist.org.

Mataupu Faavae ma Feagaiga 4

Na talosaga mai le Alii ia te a’u ia ou auauna atu ia te Ia ma lo’u loto atoa.

Vaega 4 e tele ina faatatau i faifeautalai faamisiona. A e ui i lea, e taua ona faamauina o lenei faaaliga na tuuina atu muamua ia Iosefa Samita Le Matua., o le e lei valaauina i se misiona a e sa i ai pea le “manao e auauna atu i le Atua” (fuaiupu 3).

O se tasi ala e faitau ai lenei vaega o le mafaufau i ai o se lisi o galuega fai mo se tasi e manao e fai le galuega a le Alii. O a agavaa? Aisea e manaomia ai nei tomai ma uiga patino? Atonu e mafai ona e filifilia ma le agaga tatalo se mea se tasi e te faia ina ia siitia ai “[lou] agavaa mo le galuega” (fuaiupu 5.

Mataupu Faavae ma Feagaiga 5

E mafai ona ou maua sa’u lava molimau o le Tusi a Mamona.

Matini Harisi, saunia e Lewis A. Ramsey

Afai na valaau oe e molimau i se faamasinoga e uiga i le moni o le Tusi a Mamona, o a faamaoniga o le a e tuuina atu? O se fesili talitutusa faapea sa i le mafaufau o Matini Harisi ina ua avatu e Lusi, lona toalua se mau e faapea ua faaseseina e Iosefa Samita tagata i le faafoliga na ia faaliliuina papatusi auro (tagata Au Paia, 1:56-58). O lea na talosaga atu ai Matini ia Iosefa mo ni faamaoniga faaopoopo e moni papatusi auro. Mataupu Faavae ma Feagaiga 5 o se faaaliga e tali ai le talosaga a Matini.

O le a se mea ua e aoaoina mai le Mataupu Faavae ma Feagaiga 5 e uiga i mea nei:

• Lagona o le Alii e uiga ia i latou o e le talitonu i upumoni faaleagaga vagana ua ia i latou ni faamaoniga (tagai fuaiupu 5--8).; tagai foi Ioane 20:24--29).

• O matafaioi a molimau i le galuega a le Alii (tagai fuaiupu 11--15); tagai foi 2 Koronito 13:1).

• O le ala e maua ai se molimau o le Tusi a Mamona mo oe lava (tagai fuaiupu 16; tagai foi Moronae 10:3--5).

Mataupu Faavae ma Feagaiga 5:1–10

O le a maua e lenei tupulaga le afioga a le Alii e ala mai ia Iosefa Samita.

O a mea i le Mataupu Faavae ma Feagaiga 5:1-10 o loo aoao mai ia te oe e uiga i le taua o le matafaioi a Iosefa Samita i lo tatou tisipenisione--ma i lou olaga? Manatunatu i ala na e maua ai le upu a le Atua e ala mai i le Perofeta o Iosefa Samita.O le toefuataiga mai o le perisitua ma ki o le perisitua e ala mai i le Perofeta o Iosefa Samita. Manatunatu e faamaumau i se talafaamaumau pe faasoa atu i se tasi lou agaga faafetai mo upumoni ia na toefuatai pe na faamalamalamaina e ala mai ia te ia.

Tagai foi 2 Nifae 3:6–24.

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 3:1--4.Fai atu i se tagata o lou aiga e savali i se laina “pi’opi’o” ona savali lea i se laina “sa’o”. O le a le uiga mo lo tatou aiga ia iloa o “ala [a le Atua] e sasa’o”?

Mataupu Faavae ma Feagaiga 3:7–10.Pe a taumafai se tasi e faamalosi tatou ia le usitai i le Atua, o a upumoni o loo i nei fuaiupu e mafai ona fesoasoani ia i tatou ina ia tumau i le faamaoni? Atonu e mafai e tagata o le aiga ona faatino se tala o se tasi ua tumau i le faamaoni e ui lava na i ai le faamalosi ia le usitai i le Atua.

Mataupu Faavae ma Feagaiga 4.A o talanoaina e lou aiga le uiga o le galue i le fanua i le Atua, e mafai ona latou faia se galuega i se togalaau (po o le faataga fai), O a mea faigaluega e manaomia mo galuega i le togalaau? O le a le mea o loo faamatala mai e le Atua i le vaega 4 lea e mafai ona ta’ua o mea faigaluega e moomia mo Lana galuega? E mafai e lou aiga ona talanoaina pe aisea e taua ai mea faigaluega taitasi i le faatinoina o le galuega a le Alii.

Mataupu Faavae ma Feagaiga 5:7.O a ni nai faataitaiga o upumoni e tatou te talitonu i ai a e tatou te le o vaaia? E faapefea ona tatou tali atu i se uo o se e manao i faamaoniga e moni le Tusi a Mamona?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Le a Ou Lototoa,” Tusipese a Tamaiti,85.

Faaleleia o Suesuega Faaletagata Lava Ia

Tauloto se mau. “O le taulotoina o se mau o le fatuina lea o se faigauo fou. E pei lava o le mauaina o se tagata fou e mafai ona fesoasoani mai i se taimi o puapuaga, tuu mai musumusuga ma faamafanafanaga, ma avea o se punavai o uunaiga mo suiga manaomia.” (Richard G. Scott, “O Le Mana o Tusitusiga Paia,” Ensign po o le Liahona, Nov. 2011, 6).

Mamafatū Naua o Itulau e 116, ata na tusia e Kwani Povi Winder