Sa Fetalai Mai o Ia ia Te Au i Lo’u Igoa , saunia e Michael Malm

11–17 Ianuari

Mataupu Faavae ma Feagaiga 2; Iosefa Samita —Talafaasolopito 1:27–65

“O Le a Liliu atu Loto o Fanau i o Latou Tamā”

O le Agaga Paia e mafai ona aoao oe i taimi uma e te faitau ai tusitusiga paia—e oo lava i mau sa e faitauina i le tele o taimi ua tuanai. O lea ia tatala le avanoa mo ni vaaiga ma musumusuga fou.

Tusifaamaumau Ou Lagona Uunai

Ua atoa le tolu tausaga talu na faaali le Atua le Tama ma Lona Alo, o Iesu Keriso, ia Iosefa Samita i le togavao, a e e le’i maua e Iosefa Samita se faaaliga faaopoopo talu mai lena taimi. Ua amata ona ia manatunatu e uiga i lona tulaga i luma o le Alii. E faapei o tatou uma, na ia faia ni mea sese, ma na ia lagona le ta’usalaina e ia mea. Ae na i ai lava le galuega a le Atua mo ia e fai. Ma o le galuega na valaauina Iosefa e fai e fesootai ma le mea o loo talosaga mai le Atua e ao ona tatou fai. O le a aumaia e Iosefa le Tusi a Mamona; o le a le mea ua talosagaina tatou e fai i ai? O le a mauaina e Iosefa ki o le perisitua e liliu atu ai loto o fanau i o latou tama; o faapefea ona tatou liliu atu o tatou loto i o tatou augatuaa? Ua ta’u atu ia Iosefa valoaga o le a vave faataunuuina; o le a le tatou vaega e fesoasoani ai i le faataunuuina o na valoaga? Pe a tatou auai i le galuega a le Atua, e mafai ona tatou iloa o le a tatou feagai ma e faasagatau mai e oo lava i le sauaina, faapei na oo i le Perofeta. Ae e mafai foi ona tatou faatuatua o le a faaaogaina e le Alii i tatou o ni mea faigaluega i Ona aao, faapei na Ia faia ia Iosefa.

Tagai foi Au Paia, 1:20–48.

Manatu mo Suesuega Faaletagata Lava Ia o Tusitusiga Paia

Iosefa Samita—Talafaasolopito 1:27–33

O loo i ai i le Atua se galuega mo aʼu ou te faia.

A o e faitauina le Iosefa Samita—Talafaasolopito 1:27–33, manatunatu o loo i le Atua se galuega mo oe e faia, faapei ona Ia faia mo Iosefa Samita. Mafaufau loloto i le valaaulia lenei mai ia Peresitene Russell M. Nelson: ‘Ole atu i lou Tama Faalelagi i le suafa o Iesu Keriso po o a Ona lagona e uiga ia te oe ma lau misiona iinei i le lalolagi. Afai e te ole atu ma le manatu moni i ai, e oo mai le taimi o le a musumusu mai e le Agaga ia te oe le upumoni e suia ai le olaga. … Ou te folafola atu ia te oe afai o le a amata ona e mauaina tau lava o se vaaiga i le ala e silasila ai le Tama Faalelagi ia te oe ma mea o loo Ia faamoemoe mai ia te oe e faia mo Ia, o le a le toe tutusa lou olaga!“ (“Avea ma Meleniuma Moni” [faigalotu i le lalolagi atoa mo talavou matutua, 10 Ian. , 2016], broadcasts.ChurchofJesusChrist.org).

Atonu e te lagona i nisi taimi le auala na faia e Iosefa i le fuaiupu 28–29. O le a se mea e mafai ona e aoao mai le faataitaiga a Iosefa e uiga i le mea e fai pe a le ogatusa au faatinoga ma le galuega ua valaauina oe e le Atua e fai?

Iosefa Samita—Talafaasolopito 1:34–65

O le Tusi a Mamona o loo i ai “le atoatoaga o le Talalelei e faavavau.”

A o e faitauina le Iosefa Samita—Talafaasolopito 1:34–65, manatunatu po o a auiliiliga i totonu o nei fuaiupu e ono tulagaese ia te oe pe ana fai e te lei faalogo muamua lava i le Tusi a Mamona. I le avea ai ma se tagata talitonu, aisea e taua ai lenei faamaumauga i lau molimau i le Tusi a Mamona?

Manatunatu pe o faapefea e le Tusi a Mamona ona faataunuuina le valoaga o loo i totonu o le Isaia 29:4, 11–18.

Iosefa Samita—Talafaasolopito 1:36–41

O Le Toefuataiga o le talalelei ua faataunuuina ai valoaga anamua.

Na sii mai e Moronae ia Iosefa upusii ma nisi o valoaga o le Feagaiga Tuai ma le Feagaiga Fou, e pei o le Isaia 11; Galuega 3:22–23; ma le Ioelu 2:28–32. Aisea e ono taua ai mo Iosefa le iloa o nei valoaga? Aisea e taua ai mo oe ona iloa nei valoaga?

Mataupu Faavae ma Feagaiga 2

O le a le mea na toefuatai e Elia?

Na saunoa mai Peresitene Henry B. Eyring: “E taua ona tatou iloa le mafuaaga na folafola mai ai e le Alii e auina mai Elia. O Elia o se perofeta maoae sa i ai le mana maoae na tuuina i ai e le Atua. Sa ia umia le mana silisili na tuuina mai e le Atua i Ana fanau: sa ia umia le mana e faamau ai, o le mana e fusifusia ai i le lalolagi ma fusifusia ai foi i le lagi” (“O Loto ua Fusia Faatasi,” Ensign, po o le Liahona, Me 2005, 78).

Tagai foi i le Mataupu Faavae ma Feagaiga 110:13-16; David A. Bednar, “Ia Fausia Lenei Fale mo Lo’u Igoa,” Ensign po o le Liahona, Me 2020, 84–87.

Malumalu o Palamaira Niu Ioka. E faamauina aiga i totonu o le malumalu e le mana na toefuatai mai e ala mai ia Elia.

Mataupu Faavae ma Feagaiga 2

Na oo mai Elia e liliu atu lo’u loto i o’u augatuaa.

Aisea i upu e pei o le “totō,” “loto,” ma le “liliu” i totonu o lenei vaega ona aoaoina oe e uiga i le misiona a Elia ma faamanuiaga o ki o le perisitua na ia toefuatai mai? Ua faapefea ona e lagona ua liliu atu lou loto i ou augatuaa? Mafaufau i ala e mafai ona aafia soo ai oe i nei lagona. Atonu e mafai ona e fai atu i se tasi e te lua aiga e faasoa mai se tala ia te oe e uiga i se tasi o ou augatuaa—pe sili na lelei foi ona e faamaumauina lea. Atonu e mafai ona e iloa se tasi o ou augatuaa ua maliu o se na lei mauaina sauniga o le talalelei ma faatino lea o lena galuega i totonu o le malumalu.

Manatu mo Suesuega Faaleaiga o Tusitusiga Paia ma Afiafi Faaleaiga

Iosefa Samita—Talafaasolopito 1:28–29.O a lagona o Iosefa Samita e uiga i ana mea sese? O le a le mea sa ia faia e tali atu ai i na lagona? O le a se mea ua tatou aoao mai ia te ia e uiga i le mea e fai pe a tatou faia ni mea sese?

Iosefa Samita—Talafaasolopito 1:33–54.E mafai ona e fai atu i se tagata o le aiga e faitau leotele faafa se vaega po o le vaega atoa o le savali a Moronae mai le Iosefa Samita—Talafaasolopito 1:33–42 (ona e faafa ona tusia e Moronae lenei savali). I le va o ia faitauga taitasi, fai atu i isi tagata o le aiga e faasoa mai mea na latou manatuaina mai lenei savali, e aunoa ma le vaai i tusitusiga paia. Aisea e ono fai soo ai e le Alii savali taua? O a nisi o auala o loo aoao ai tatou e le Alii e ala mai i le faia soo?

Mataupu Faavae ma Feagaiga 2:2.Ina ia fesoasoani i lau fanau ia malamalama i “folafolaga na faia i tama,” e mafai ona outou faitau faatasi le Aperaamo 2:9–11 pe matamata le vitio “Molimau Faapitoa o Keriso—Peresitene Russell M. Nelson” (ChurchofJesusChrist.org). Ia iloa folafolaga na faia e le Atua o se vaega o Lana feagaiga ma Aperaamo. E mafai faapefea ona tatou “totō” nei folafolaga i o tatou loto?

Mataupu Faavae ma Feagaiga 2:2–3.Ina ia fesoasoani i tagata o le aiga e liliu atu o latou loto i o latou tama (po o augatuaa), e mafai ona e valaaulia i latou e aoao e uiga i se tuaa ma faasoa se mea na latou aoao mai i le isi vaega o le aiga. Aisea e manao ai le Alii ia i tatou e aoao e uiga i tagata o tatou aiga ma faia sauniga o le malumalu mo i latou? E faapefea ona faamanuiaina i tatou pe a tatou auai i galuega o le malumalu ma talafaasolopito o aiga? (tagai Dale G. Renlund, “Talafaasolopito o Aiga ma le Galuega o Malumalu: Faamauga ma le Faamalologa,” Ensign po o le Liahona, Me 2018, 46–49).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Talafaasolopito—O Lea Ou Te Faia,” Tusipese a Tamaiti,100.

Faaleleia o Suesuega Faaletagata Lava ia

Faaaoga fesoasoaniga mo le suesueina o tusitusiga paia. O mea faigaluega e pei o vaefaamatalaga, Lolomi Fefiloi o le Tusi Paia, O Le Taiala i Tusitusiga Paia, ma le ChurchofJesusChrist.org e mafai ona fesoasoani ia te oe ina ia sili ai lou malamalama i tagata, mea na tutupu, ma faaupuga i totonu o tusitusiga paia.

Maua e Iosefa ia Papatusi, saunia e Gary E. Smith