Na Ia Ta’u Mai A’u i Lo’u Igoa, saunia e Michael Malm

11–17 Ianuari.

Mataupu Faavae ma Feagaiga 2; Iosefa Samita —Talafaasolopito 1:27–65

“O Le a Liliu atu Loto o Fanau i o Latou Tamā”

Sauni au tapenapenaga i le faitauina o le Mataupu Faavae ma Feagaiga 2 ma le Iosefa Samita—Talafaasolopito 1:27–65. O manatu i lenei otootoga e mafai ona fesoasoani ia te oe i le aoaoina atu o upumoni i nei fuaitau.

Tusi Faamaumau Ou Lagona Uunai

Valaaulia le Fefaasoaai

E mafai ona e amataina le vasega i le fesili atu i tamaiti e faasoa mai mea latou te iloa e faatatau i le asiasiga a le agelu o Moronae ia Iosefa Samita.

Aoao atu le Aoaoga Faavae: Tamaiti Laiti

Iosefa Samita—Talafaasolopito 1:27–54

Na valaauina e le Tama Faalelagi ia Iosefa Samita e fesoasoani ia te Ia e faia Lana galuega.

O le talisapaia e tamaiti o le Perofeta o Iosefa Samita e mafai ona loloto ao latou aoao e uiga i le galuega na valaauina ai o ia e le Atua e fai.

Gaoioiga e Mafai Ona Fai

• Faaali se ata o Moronae o asiasi atu ia Iosefa Samita (tagai i le Tusiata o le Talalelei, nu. 91). Fai atu i tamaiti e faailoa atu mea o latou vaaia i le ata. Aotele le tala o asiasiga a Moronae ia Iosefa. Pe a manaomia, tagai i le Iosefa Samita—Talafaasolopito 1:27–54 ma le “Mataupu 3: O Le Agelu o Moronae ma Papa Tusi Auro” (Tala o le Mataupu Faavae ma Feagaiga, 13–17). Valaaulia tamaiti e faafoliga o Iosefa Samita i vaega eseese o le tala e ala i le piilima o latou lima e pei o latou tatalo, faafoliga o loo aea le Mauga o Kumora, ma isi.

• Faitau leotele le Iosefa Samita—Talafaasolopito 1:33, ma fai atu i tamaiti e tutu i luga pe a latou faalogo i le fuaitau “o i ai i le Atua se galuega mo aʼu ou te faia.” O le a se mea na finagalo le Atua e faia e Iosefa? O le a le mea ua Ia poloai mai ia tatou faia? Tuu atu i tamaiti e tusi ata o mea e finagalo le Atua latou te faia, e pei o le tatalo, auauna atu, po o le faitauina o tusitusiga paia.

Mataupu Faavae ma Feagaiga 2

Na tuu atu e Elia ia Iosefa Samita le mana e faamau faatasi ai aiga .

O le aoao e uiga i le mana o le faamauga na toefuatai e ala ia Iosefa Samita e mafai ona fesoasoani i tamaiti ia talisapaia ia faamanuiaga o aiga e faavavau.

Gaoioiga e Mafai Ona Fai

• Fesoasoani i tamaiti e tau le igoa “Elia” mo ni nai taimi. Fai atu ia i latou e faalogo mo lenei igoa ao e faitauina le Mataupu Faavae ma Feagaiga 2:1. Faamalamalama atu o upu nei a Moronae ia Iosefa Samita, ma latou te aoao atu o Elia o le a sau e toefuatai mai le pule o le perisitua. Na mulimuli ane faaali atu Elia ia Iosefa i le Malumalu i Katelani ma tuuina atu i le Perofeta le mana e faamau faatasi ai aiga.

• Valaaulia tamaiti e faamatala atu ia te oe mea latou te fiafia ai i o latou aiga. Faaali se ata o se aiga o i ai autafa o se malumalu (tagai i le Tusi Ata o le Talalelei, nu. 120). Molimau atu e finagalo le Tama Faalelagi tatou te faatasi ma o tatou aiga e faavavau, ma o le mafuaaga lea e tasi na Ia tuuina mai ai ia i tatou malumalu.

• Usu faatasi le pese “E Mafai Ona Faavavau Aiga” (Tusipese a Tamaiti, 98). O le a se mea o fai mai lenei pese e mafai ona tatou faia e mafuta ai ma o tatou aiga e faʻavavau?

Mataupu Faavae ma Feagaiga 2

O le aoao e uiga i o’u tuaa e mafai ona aumaia le olioli ia te au.

E oo lava i tamaiti laiti e mafai ona fiafia ma lagona le olioli o talafaasolopito o aiga.

Gaoioiga e Mafai Ona Fai

• Valaaulia se matua o se tasi o tamaiti e sau i le vasega ma faasoa mai se tala e faatatau i se tuaa (ma faaali se ata pe a maua). Talanoa e uiga i le fiafia e te lagonaina pe a e aoao e uiga i lou talafaasolopito o aiga.

• Tuu atu i tamaiti taitoatasi se pepa fatu. Fesoasoani ia i latou e tusi latou igoa ma “Ou te folafola atu e manatua o’u tuaa” i luga o na pepa fatu. Faitau le Mataupu Faavae ma Feagaiga 2:2., ma faamalamalama atu o Elia na sau e liliu o tatou loto i o tatou tuaa.

Aoao atu le Aoaoga Faavae: Tamaiti Matutua

Iosefa Samita—Talafaasolopito 1:28–29

E mafai ona ou tatalo ina ia faamagaloina.

O tamaiti e te aoaoina atonu e lagona i nisi taimi “le tausalaina i o [latou] vaivaiga ma lē atoatoa” (Iosefa Samita—Talafaasolopito 1:29) e pei o Iosefa Samita. Fesoasoani ia latou malamalama e mafai ona latou liliu atu i le Tama Faalelagi mo le faamagaloga.

Gaoioiga e Mafai Ona Fai

• Faitau faatasi ma tamaiti le Iosefa Samita—Talafaasolopito 1:29. Na faapefea lagona a Iosefa Samita e uiga i lana measese? O le a le mea sa ia faia e uiga i ai? O le a se mea e mafai ona tatou aoao mai le faataitaiga a Iosefa e mafai ona fesoasoani ia i tatou pe a tatou faia ni measese? Fesili i tamaiti pe o a ni o latou lagona i le iloa ai o Iosefa na valaauina e le Atua e ui sa le atoatoa o ia.

• Aisea e taua ai le mafaufau e uiga i le tatou “tutu ai i luma o [le Atua]”? (Iosefa Samita—Talafaasolopito 1:29). Tau atu i tamaiti le mea e te faia pe a e manatu e faatatau i le mea e te tu ai ma le Atua.

Iosefa Samita—Talafaasolopito 1:30–54

Na valaauina Iosefa Samita e le Atua e fai se galuega taua.

O le suesue i le feau a Moronae ia Iosefa Samita e mafai ona fesoasoani i tamaiti e faamalosia ai a latou molimau e faatatau i le valaauga paia a Iosefa.

Gaoioiga e Mafai Ona Fai

• Valaaulia tamaiti e faatino pe tusi ata o mea na tutupu mai le Iosefa Samita—Talafaasolopito 1:30–54, e pei o le faaali atu o Moronae ia Iosefa (fuaiupu 30–47), talanoa atu Iosefa i lona tama (fuaiupu 48–50), ma le mauaina e Iosefa o papatusi (fuaiupu 51–54). O a ni mea e mafai ona tatou aoao mai i lenei tala e uiga i le galuega na valaauina Iosefa e fai?

• Faitau faatasi ma tamaiti Iosefa Samita—Talafaasolopito 1:33–35, ma fai atu ia i latou e faalogo mo le mea na manao Moronae e iloa e Iosefa e uiga i le galuega na valaauina Iosefa e fai. E faapefea ona faamanuiaina i tatou ona sa faataunuuina e Iosefa Samita lana galuega o se faaliliu o le Tusi a Mamona? Valaaulia tamaiti e faitau soo le Tusi a Mamona.

Mataupu Faavae ma Feagaiga 2

E finagalo le Tama Faalelagi e faamau aiga i le malumalu.

Na tau atu e Moronae ia Iosefa Samita o le a sau Elia e “faaali … le Perisitua” (fuaiupu 1). E faatatau lenei i le mana o faamauga o le perisitua lea e mafai ai ona tuufaatasia aiga e faavavau ma mafai ai ona tatou maua sauniga mo o tatou tuaa i le malumalu.

Gaoioiga e Mafai Ona Fai

• Fai atu i tamaiti e faitau le valoaga i le Mataupu Faavae ma Feagaiga 2:1. Fai atu ia i latou e vaai po o ai le tagata o le a auina mai e le Alii i aso e gata ai ma le mea o le a faailoa e lena tagata. Faaali se ata o Elia i totonu o le Malumalu o Katelani (tagai i le Tusiata o le Talalelei, nu. 95), ma talanoa e faatatau i le auala na faataunuuina ai lena valoaga i le mavae ai o le 13 tausaga talu le asiasiga a Moronae (tagai Mataupu Faavae ma Feagaiga 110:13–15).

• Faamatala atu na toefuataiina e Elia ki o le perisitua lea e mafai ai ona faamauina faatasi aiga e faavavau. Faaali ni meafaitino e mafai ona fesoasoani i tamaiti e malamalama i le uiga o le faamauina o se mea, e pei o se meaai tuu apa po o se ato teu meaai e i ai se sipi e loka ai. E faapefea ona fesoasoani nei meafaitino ia tatou malamalama i le uiga o le faamauina o se aiga?

• Faaali se ata o se malumalu, ma fesoasoani i tamaiti e taʻu mai nisi o mea tatou te faia i totonu o malumalu. Faamatala atu o papatisoga mo e ua maliliu, faaipoipoga e faavavau, ma le faamauina o aiga i totonu o le malumalu ua mafai ona faataunuuina ona o ki o le perisitua ua toefuataiina e Elia.

• Valaaulia se tamaitai po o se alii talavou i le uarota e faasoa mai se aafiaga lea na ia mauaina ai se igoa o se tuaa ma na papatisoina mo lena tuaa i totonu o le malumalu.

  

  Ua faamauina aiga i totonu o le malumalu i le mana toefuataiina na auala mai ia Elia.

Fautuaina le Aoaoina i le Aiga

Uunaia tamaiti e fesili atu i o latou matua e faamatala atu se tala e faatatau i se tasi o latou tuaa pe fesoasoani ia i latou e tapena se meaai e sili ona fiafia i ai se tasi o latou tuaa ma aai faatasi.

Faaleleia o Lo Tatou Aoao Atu

Fesoasoani i tamaiti laiti e aoao mai tusitusiga paia. Ina ia fesoasoani i tamaiti e aoao mai tusitusiga paia, taulai i se fuaiupu se tasi o le mau pe na o se fasi fuaitau autu foi. E mafai ona e valaaulia tamaiti e tutu i luga pe sii o latou lima pe a faalogo i lena upu po o le fasifuaitau. (Tagai Aoao Atu i le Ala a le Faaola, 21.)