25–31 Ianuari

Mataupu Faavae ma Feagaiga 6–9

“O Le Agaga lenei o Faaaliga”

Amata au sauniuniga e aoao atu i le faitauina o le Mataupu Faavae ma Feagaiga 6–9. Sau, Mulimuli Mai ia te A’u—Mo Tagata Taitoatasi ma Aiga ma o lenei otootoga e mafai ona faʻaalia ai manatu e uiga i auala e aʻoaʻoina ai tamaiti i lau vasega.

Tusi Faamaumau Ou Lagona Uunaia

Valaaulia le Fefaasoaai

O iloa e tamaiti le tala ia Oliva Kaotui e uiga i le mauaina o se tali i le tatalo? (tagai i le Au Paia, 1:58–60). Masalo ua latou maua foi se aafiaga i le tatalo e mafai ona latou faasoa atu.

Aoao atu le Aoaoga Faavae: Tamaiti Laiti

Mataupu Faavae ma Feagaiga 6:5; 8:2; 9:7–9

E mafai ona fetalai mai le Tama Faalelagi ia i tatou e ala mai i le Agaga Paia.

Fesoasoani i tamaiti ina ia latou malamalama o loo i ai so latou Tama alofa i le Lagi o le e faafofoga ia latou tatalo ma tali atu ia i latou e ala i Lona Agaga.

Gaoioiga e Mafai Ona Fai

• Faaaoga le “Mataupu 5: Iosefa Samita ma Oliva Kaotui” (Tala o le Mataupu Faavae ma Feagaiga, 22–25, po o le vitio talafeagai i luga o le ChurchofJesusChrist.org) e tau atu ai i tamaiti e uiga ia Oliva Kaotui ma mea na ia aoaoina e uiga i le auala e talanoa mai ai le Tama Faalelagi ia i tatou. Fai atu i tamaiti e taʻu mai ia te oe vaega e sili ona fiafia i ai o le tala, ma tuu atu ia i latou e auauai e taʻu mai ia te oe e uiga ia Oliva Kaotui.

• Tau atu i tamaiti na taumafai Oliva Kaotui e faaliliu le Tusi a Mamona ae le mafai, o lea na fesili ai Iosefa i le Alii pe aisea. Faitau atu i tamaiti le tali a le Alii: “E ao ina e suesue i ai i lou mafaufau; ona ao lea ona e ole mai ia te au pe ua sao.” (Mataupu Faavae ma Feagaiga 9:8). Valaaulia i latou e faafoliga o loo latou suesue ma tatalo. Fesoasoani i tamaiti ina ia malamalama o le auala lenei tatou te maua ai foi tali mai le Alii—e ala i le suesue ma ole atu mo Lana fesoasoani.

  

  Oliva Kaotui, saunia e Lewis A. Ramsey

• Valaaulia tamaiti e paʻi i o latou ulu ma o latou fatafata ao e faitauina upu “mafaufau” ma le “loto” i totonu o le Mataupu Faavae ma Feagaiga 8:2. Fesoasoani ia latou malamalama e fetalai mai le Tama Faalelagi ia i tatou e ala i le Agaga Paia, o le na te tuuina mai ia i tatou manatu ma lagona. Usu faatasi se pese e uiga i le Agaga Paia, e pei o le “O Le Agaga Paia” (Tusipese a Tamaiti, (56). O le a se mea o aoao mai e le pese e uiga i le auala e talanoa mai ai le Agaga ia i tatou? Fetufaai atu se aafiaga na e lagonaina ai le Agaga Paia i lou mafaufau ma lou loto.

Mataupu Faavae ma Feagaiga 6:33–36

Faatasi ai ma le fesoasoani a le Faaola, e le manaomia ona ou fefe.

Na i ai ia Iosefa Samita ma Oliva Kaotui le tele o mafuaaga e fefefe ai—o sauaga ma le mativa o ni nai luitau na feagai ma i laua. O le savali a le Alii ia Iosefa ma Oliva e mafai ai foi ona uunaia tamaiti pe a latou lagona le fefe.

Gaoioiga e Mafai Ona Fai

• Fai atu i tamaiti e toe fai le fuaitau “aua le matatau, le lafu itiiti” (Mataupu Faavae ma Feagaiga 6:34) mo ni nai taimi. Faamatala atu o le lafu o se vaega o manu, e pei o mamoe. Faaali atu se ata o le Faaola o se leoleo mamoe (tagai Tusi Ata o le Talalelei nu. 64), ma molimau atu o loo Ia leoleo mai ia i tatou e pei o se leoleo mamoe o leoleoina Ana mamoe. Ona e alofa o Ia ia i tatou, e le tatau ona tatou fefefe.

• Tuu atu i tamaiti e faafoliga o i latou o se lafu mamoe matatau. O le a le mea e ono fefefe ai mamoe i nisi o taimi? Tuu atu i se tamaitiiti e faafoliga o ia o le leoleo mamoe o tausia ma le saogalemu mamoe. O le a le mea tatou te fefefe ai i nisi taimi? Tuu atu lau molimau o Iesu Keriso e pei o lo tatou leoleo mamoe ma e mafai ona Ia faatoafilemuina o tatou popolega. Usu faatasi se pese e faatatau i le Faaola, e pei o le “Little Lambs So White and Fair” (Children’s Songbook, 58).

• Faitau le Mataupu Faavae ma Feagaiga 6:36 i tamaiti, ma valaaulia i latou e toe fai mai le fuaitau “aua le masalosalo, aua le fefefe.” Fesoasoani i tamaiti e mafaufau i ni auala e mafai ai ona latou “vaai atu,” pe manatuaina, le Faaola i le gasologa o le vaiaso a sau (tagai foi i le itulau o gaoioiga o lenei vaiaso).

Aoao atu le Aoaoga Faavae: Tamaiti Matutua

Mataupu Faavae ma Feagaiga 6:5, 15–16, 22–23; 8:2; 9:7–9

E tautala mai le Agaga Paia i lo’u mafaufau ma lo’u loto.

O tamaiti e te aoaoina atonu na mauaina le meaalofa o le Agaga Paia. O latou malamalama i auala e iloa ai faaaliga faaletagata lava ia mai le Agaga?

Gaoioiga e Mafai Ona Fai

• Tusi i luga o le laupapa se ulu ma se fatu. Fesoasoani i tamaiti e faitau fuaiupu nei ma fuafua po o lē fea o faamatalaina mai ai le Agaga Paia o fetalai mai i o tatou mafaufau, i o tatou loto, po o ia mea uma e lua: Mataupu Faavae ma Feagaiga 6:15, 23; 8:2; 9:8; 9:9. Tau atu i tamaiti, mai ou aafiaga, pe faapei pe a talanoa le Agaga Paia i lou mafaufau ma lou loto.

• Faitau faatasi le Mataupu Faavae ma Feagaiga 6:5, ma valaaulia tamaiti e faasoa mai ni aafiaga sa latou maua i le tatalo ma le mauaina o tali. Fesoasoani ia i latou e mafaufau i faataitaiga a se tasi i totonu o tusitusiga paia na tatalo ma maua se tali i se fesili (tagai 1 Nifae 2:16; Enosa 1:1–6; Eteru 2:18–3:6).

• Tusi i luga o le laupapa E faapefea ona talanoa mai le Agaga Paia ia i tatou? Valaaulia tamaiti e saili i le Mataupu Faavae ma Feagaiga 6:15–16, 22–23; 8:2; 9:7–9 mo tali i le fesili. Faasoa atu ni aafiaga na e lagona ai le Agaga Paia o talanoa mai ia te oe.

Mataupu Faavae ma Feagaiga 6:33–37

“Aua le fefe e fai mea lelei.”

O tamaiti e te aoaoina e ono lagona le fefe i nisi taimi e tu ai mo le mea sao. Mataupu Faavae ma Feagaiga 6:33–37 e mafai ona musuia i latou ina ia lototetele, e oo lava i tulaga faigata.

Gaoioiga e Mafai Ona Fai

• Faitau faatasi le Mataupu Faavae ma Feagaiga 6:33, ma talanoa pe aisea e ono fefe ai se isi e fai le mea sao (tagai foi fuaiupu 28–29). Fesoasoani i tamaiti e sue upu po o fuaitau i fuaiupu 33–37 e fesoasoani e maua ai e i latou le lototele e faia ai mea lelei.

• Fesoasoani i tamaiti e fai ni ata e mafai ona latou faaalia i o latou fale e faamanatu ai ia i latou ina ia “vaai mai ia [Iesu Keriso] i mafaufauga uma” (fuaiupu 36). A o latou tusiina a latou ata, ia talanoaina pe o le a le uiga o le vaavaai atu i le Faaola ma le auala e mafai ai ona faasaogalemuina i latou.

• Usu faatasi se pese e faatatau i le lototele, e pei o le “Ia Fai Le Mea Tonu” (Tusipese a Tamaiti, 80) po o le “Fa‘amalosi ia i le Galuega Nei” (Viiga, nu. 152). Fai atu i tamaiti e sue i le pese nisi o mafuaaga e tatau ai ona tatou “le fefefe” (fuaiupu 6).

Mataupu Faavae ma Feagaiga 8:10

E mafai ona ou ole atu i le faatuatua.

I tusitusiga paia uma, ua faamanatu mai ai e le Alii ia i tatou ia faatuatua ia te Ia. E faʻapefea ona e fesoasoani i tamaiti o loʻo e aoaoina ia maua se faatuatua sili atu ia Iesu Keriso?

Gaoioiga e Mafai Ona Fai

• Tusi i luga o le laupapa A aunoa ma le e lē mafai ona e faia se mea; o lea ia ole mai ai i le . Valaaulia ia tamaiti e taumafai e mafaufau i se upu e fetaui i avanoa ia e lua. Ona faitau faatasi lea o le Mataupu Faavae ma Feagaiga 8:10 e sue ai le tali. O a nisi o mea e mafai ona tatou faia pe a i ai ia i tatou le faatuatua?

• A mavae le faitauga faatasi o le Mataupu Faavae ma Feagaiga 8:10, fesoasoani i tamaiti e mafaufau i ni mea e mafai ona latou ole atu ai i le Alii e fesoasoani mai ai. Valaaulia i latou e tusi se ata e fai ma sui o se mea e tatau ona latou ole atu ai. A o latou faaali atu latou ata i le vasega, tuu atu i isi tamaiti e mate po o le a le mea o suitulaga ai le ata.

Uunaia le Aoaoina i le Aiga

Fesoasoani i tamaiti e filifili se fuaitau puupuu mai le Mataupu Faavae ma Feagaiga 6–9 latou te mananao e faasoa ma se tasi i le latou fale, e pei o le “aua le fefefe e fai mea lelei” (6:33), “aua le masalosalo, aua le fefefe” (6:36), po o le “a aunoa ma le faatuatua e lē mafai ona e faia se mea” (8:10).

Faaleleia o Lo Tatou Aoao Atu

Faaaoga tala. O tala e fesoasoani i tamaiti ia malamalama ai i mataupu faavae o le talalelei aua latou te faaalia pe faapefea ona ola isi i na mataupu faavae. A o e aoao atu, saili auala e faaaofia ai ni tala—mai tusitusiga paia, mai talafaasolopito o le Ekalesia, pe mai lou oe lava olaga—lea e faamatalaina ai aoaoga faavae o loo i totonu o tusitusiga paia.