8–14 Mati

Mataupu Faavae ma Feagaiga 23–26

“Faamalosia le Ekalesia”

A oe sauniuni e aoao atu, mafaufau i gaoioiga mo vaega uma o “Tamaiti Laiti” ma “Tamaiti Matutua”.

Tusi Faamaumau Ou Lagona Uunai

Valaaulia le Fefaasoaai

Faaali atu se ata o Ema Samita (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Valaaulia tamaiti e faasoa mai mea ua latou iloa e uiga ia te ia, e aofia ai mea na latou aoaoina a o suesue i le Mataupu Faavae ma Feagaiga 25 i le vaiaso ua tuanai.E mafai ona fesoasoani le “Mataupu 13: Iosefa ma Ema” (Tala o le Mataupu Faavae ma Feagaiga, 51–55)

Aoao atu le Aoaoga Faavae: Tamaiti Laiti

Mataupu Faavae ma Feagaiga 23:6; 26:1

E finagalo le Atua ou te tatalo ma aoao mai tusitusiga paia i aso uma.

Na fautuaina e le Alii uluai taitai ma uo a le Ekalesia e tatalo (tagai Mataupu Faavae ma Feagaiga 23:6) ma suesue i tusitusiga paia (tagai i le Mataupu Faavae ma Feagaiga 26:1). E mafai faapefea ona e fesoasoani i tamaiti ia faia le tatalo ma tusitusiga paia o se vaega o o latou olaga?

Gaoioiga e Mafai Ona Fai

• Faitau atu i tamaiti mai le Mataupu Faavae ma Feagaiga 23:6, amata i le “e tatau ona e tatalo.” Fesoasoani ia i latou e faailoa mai auala ma nofoaga na fetalai mai ai le Alii e tatau ona tatou tatalo ai. Valaaulia i latou e tusi se ata oi latou lava o tatalo i se tasi o na auala po o nofoaga.

• Afai e manaʻomia, faamatala atu i tamaiti pe faapefea ona tatalo. O se pese e faatatau i le tatalo, e pei “O Le Tatalo A Le Tamaititi” (Tusipese a Tamaiti, 6), e mafai ona fesoasoani.

• Faitau atu i tamaiti, “Tuu atu lou taimi e tuuto ai i le suesueina o tusitusiga paia” (Mataupu Faavae ma Feagaiga 26:1). Tau atu ia i latou le mafuaaga e te suesue ai i tusitusiga paia. Fesoasoani ia i latou e mafaufau i ni auala e mafai ona latou aoao mai tusitusiga paia, tusa lava pe e le o mafai ona latou faitau i le taimi nei.

• Usu faatasi “Saili, Mafaufau Loloto, ma Tatalo” (Tusipese a Tamaiti, 66) po o se isi pese e faatatau i le tatalo ma le suesueina o tusitusiga paia. Fesoasoani i tamaiti ia iloa faamanuiaga folafolaina i le pese. Tau atu ia i latou lagona faaleagaga na e mauaina pe a e tatalo ma faitau tusitusiga paia.

Mataupu Faavae ma Feagaiga 25:11–12

E fiafia Iesu “i le pese a le loto.”

Na fetalai mai le Alii o musika paia “e malie ia te au.” Fesoasoani i tamaiti ia latou iloa pesega e le na o se mea malie ae o se auala foi e tapuai atu ai ia te Ia.

Gaoioiga e Mafai Ona Fai

• Fai atu i tamaiti taitoatasi e faasoa mai se pese e sili ona ia fiafia i ai po o le pese a le Ekalesia, ma usu faatasi nisi o i latou. Faitau le Mataupu Faavae ma Feagaiga 25:12 i tamaiti, ma valaaulia i latou e toe fai le fuaitau “aua le masalosalo, aua le fefefe.

• Aoao i tamaiti se pese e faatatau i le pese, e pei o le “Sii Lou Leo Ma Pese” (Tusipese a Tamaiti, 124), po o se pese e faatatau ia Iesu Keriso, e pei o le “Na Ia Auina Mai Lona Alo” (Tusipese a Tamaiti, 20–21). Valaaulia i latou e usu le pese ma o latou aiga i lenei vaiaso.

  

  O le pese o se tasi lea o auala e mafai ona tatou faʻaalia ai lo tatou alolofa i le Atua.

Mataupu Faavae ma Feagaiga 25:13, 15.

E mafai ona ou saunia e faia feagaiga paia.

O tamaiti o loo e aoaoina o loo sauniuni e faia a latou uluai feagaiga ma le Tama Faalelagi pe a papatisoina i latou. E faapefea ona e fesoasoani ia latou iloa le taua o a tatou feagaiga?

Gaoioiga e Mafai Ona Fai

• Faitau le Mataupu Faavae ma Feagaiga 25:13 i tamaiti. Faamatala atu o le upu “pipii” i lenei fuaiupu o lona uiga o le pipiimau i se mea. Ina ia fesoasoani ia i latou ia malamalama, pasi se mea malo, pei o se maa (po o se ai uʻamea), faataamilo i le potu ma valaaulia tamaiti e uu mau i le mea sili latou te mafaia. Faamalamalama atu o le pipii atu ia tatou feagaiga o lona uiga o le taofimau i (po o le tausia) o folafolaga tatou te osia ma le Tama Faalelagi ma aua lava nei faamaamulu (pe aua le fiu).

• Faaaoga le itulau gaoioiga o lenei vaiaso e aoao ai tamaiti e uiga i taimi tatou te osi feagaiga ai ma le Tama Faalelagi. Faitau le Mataupu Faavae ma Feagaiga 25:15, ma faamatala atu o le “palealii o le amiotonu” o loo faatusaina ai le faamanuiaga o le toe foi atu e mau faatasi ma le Atua, lo tatou Tupu Faalelagi.

Aoao atu le Aoaoga Faavae: Tamaiti Matutua

Mataupu Faavae ma Feagaiga 23:3–7; 25:7

E finagalo Iesu ou te faamalosia i latou o siomia au.

Ina ua faatoa faatulagaina le Ekalesia, e le’i toatele tagata o le au paia. Na talosagaina e le Alii le Au Paia e atiina ae le Ekalesia e ala i le faasoa atu o le talalelei ma faamalolosia e le tasi le isi. E mafai ona tatou faia foi i le aso.

Gaoioiga e Mafai Ona Fai

• Fai i tamaiti e sue upu “apoapoaiga” ma “apoapoai” i totonu o le Mataupu Faavae ma Feagaiga 23:3–7; 25:7. Fesoasoani ia i latou e sue uiga o nei upu. E mafai faapefea e le apoapoai atu i se tasi ona faamalosia i latou? Valaaulia tamaiti e faatino le “apoapoai” i se tasi ae ia faia ma le alofa.

• E mafai faapefea ona sili atu lo tatou lelei i le galuega o le faʻamalosia o isi tagata o le Ekalesia? Ina ia faaalia lenei mataupu faavae, ia tuʻuina atu i se tamaitiiti se galuega e manaʻomia ai le tele o tagata e fesoasoani. Ona fai atu lea i isi tamaiti e fesoasoani, ma talanoa pe na faapefea ona sili atu le faigofie o le galuega. Faasoa atu se aafiaga na faamalosia ai oe e ala i le auaunaga o se uso a tagata o le Ekalesia.

Mataupu Faavae ma Feagaiga 24:1, 8

E mafai e le Faaola ona siitia au “mai luga [o oʻu] puapuaga.”

Na mafatia Iosefa Samita i le tele o tofotofoga, ae na mafai ona ia “onosai i puapuaga” aua na folafola mai e le Alii o le a faatasi pea o Ia ma ia.

Gaoioiga e Mafai Ona Fai

• Fesoasoani i tamaiti e lisi i luga o le laupapa nisi o faigata po o luitau na feagai ma Iosefa Samita ma isi uluai Au Paia (tagai i le “Mataupu 11: Ua Toatele Tagata ua Auai i le Ekalesia” Tala o le Mataupu Faavae ma Feagaiga, 46–47, po o le vitio talafeagai i luga o le ChurchofJesusChrist.org). Ona valaaulia lea o i latou e saili le mea na fetalai mai ai le Alii ia Iosefa e uiga i ona puapuaga i le Mataupu Faavae ma Feagaiga 24:1, 8. E faapefea ona tatou sailia le fesoasoani a le Faaola pe a tatou feagai ma se taimi faigata?

• Ina ia aoaoina tamaiti o nisi taimi tatou te manaomia ai le “onosai io [tatou] puapuaga,” e mafai ona e faaali atu le vitio “Continue in Patience” (ChurchofJesusChrist.org). Fai atu i tamaiti e mafaufau i se mea latou te mananao moni lava ae tatau ona faʻatali. Aisea e manaomia ai e le Alii i nisi o taimi le tatou onosai i taimi faigata i o tatou olaga? E faapefea ona Ia faailoa mai ia i tatou o loo Ia “faatasi ma i [tatou]” i taimi o o tatou puapuaga?

Mataupu Faavae ma Feagaiga 25:13

E mafai ona ou “pipii i feagaiga” na ou faia.

E lei leva ona papatisoina Ema Samita, ae taʻu atu e le Alii ia te ia, “Pipii i feagaiga na e faia.” Mafaufau pe mafai faapefea e lenei fautuaga ona faamanuiaina tamaiti o loo e aoaoina.

Gaoioiga e Mafai Ona Fai

• Faitau faatasi le Mataupu Faavae ma Feagaiga 25:13, ma fesili atu i tamaiti po o le a le uiga o lenei fuaiupu e “pipii i feagaiga” tatou te faia. Ina ia faaalia, pasi faataamilo mea faitino o loo faʻamau faʻatasi ma tuu tamaiti e taumafai e vavae ese. Aisea e talafeagai ai le upu “pipii” e faamatala ai tatou lagona e uiga ia tatou feagaiga?

• Afai e manaomia, toe faamanatu faatasi ma tamaiti feagaiga tatou te osia pe a tatou papatiso (tagai Mosaea 18:8–10; Mataupu Faavae ma Feagaiga 20:37). O le a le uiga o le “pipii” i nei feagaiga?

• Toe faamanatu nisi o vaega e te iloa e uiga i le olaga o Ema Samita (tagai i le “Mataupu 13: Iosefa ma Ema” [Tala o le Mataupu Faavae ma Feagaiga, 51–55], po o le vitio talafeagai i luga o le ChurchofJesusChrist.org). Tuu atu i tamaiti taitasi se fuaiupu se tasi pe lua mai le vaega 25, ma valaaulia i latou e faasoa mai pe faapefea e le fautuaga a le Alii ma tofiga ona fesoasoani ia Ema “pipii i feagaiga” na ia faia. E mafai faapefea ona tatou mulimuli i lana faataitaiga?

Fautuaina le Aoaoina i le Aiga

Valaaulia tamaiti e filifili se fuaiupu e sili ona e fiafia i ai na tou talanoaina faatasi, tusi i lalo le upu faasino, ma faasoa atu i se tagata o lou aiga po o se uo.

Faaleleia o Lo Tatou Aoao Atu

Fautuaina le migao. Fesoasoani i tamaiti ia malamalama o se vaega taua o le migao o le mafaufau lea i le Tama Faalelagi ma Iesu Keriso. E mafai ona e faamanatu i tamaiti o le migao o le usuusu lemu lea pe hamuina se pese pe faaalia se ata o Iesu.