15–21 Mati

Mataupu Faavae ma Feagaiga 27–28

“E Tatau Ona Faia Mea Uma i le Faatulagaga Tatau Ai”

O upumoni o loo aoaoina i le Mataupu Faavae ma Feagaiga 27–28 e mafai ona faamalosia ai molimau a tamaiti o loo e aoaoina. A o e mafaufau i manaʻoga o tamaiti, o a upumoni e te manatu e te taulai atu i ai i totonu o le vasega?

Tusi Faamaumau Ou Lagona Uunai

Valaaulia le Fefaasoaai

Faaali atu se ata o le Perofeta o Iosefa Samita ma se ata o le perofeta o loo i ai nei. Valaaulia tamaiti e tau mai igoa o tagata i ata ma faasoa mea o loo faia e perofeta.

Aoao atu le Aoaoga Faavae: Tamaiti Laiti

Mataupu Faavae ma Feagaiga 27:1–2

O le faamanatuga e fesoasoani ou te manatua ai Iesu Keriso.

E mafai e fanau laiti ona aoaoina le taua o le faamanatuga ma saili auala e manatua ai le Faaola i le taimi o lenei sauniga paia.

Gaoioiga e Mafai Ona Fai

• Faaali atu i tamaiti se ata o Iesu o loo tuuina atu le faamanatuga i Ana Aposetolo (tagai Tusi Ata o le Talalelei, nu. 54). Mata e faape’i le ‘aai ma le feinu faatasi ma le Faaola i le faamanatuga? (Tagai lei Mataupu Faavae ma Feagaiga 27:5). Faitau le Mataupu Faavae ma Feagaiga 27:2, amata i le “manatuaina o le Tama,” ma fai atu i tamaiti e faalogo mo mea e finagalo le Faaola ia tatou manatua pe a tatou aai ma feinu i le faamanatuga.

• Faaali atu i tamaiti sina falaoa ma le vai ma se ata o le Faaola. Tuu atu i tamaiti e uuina le ata ao e aoaoina i latou faapea o le faamanatuga e fesoasoani ia i tatou ia manatua ai Iesu Keriso.

• Fesoasoani i tamaiti e mafaufau i mea e mafai ona latou faia e manatua ai Iesu i le taimi o le faamanatuga. O le a se mea latou te fai e fesoasoani ai le tasi i le isi ia faʻaaloalo? Valaaulia tamaiti e tusi se ata latou te mafai ona tilotilo i ai i le taimi o le faamanatuga e fesoasoani latou te manatua ai le Faaola.

Mataupu Faavae ma Feagaiga 27:15–18

O le ofutau o le Atua e puipuia au.

Mafaufau i auala e mafai ai ona e fesoasoani i tamaiti o loo e aoaoina ia iloa pe faapefea ona pei le tausia o poloaiga e pei o le ofuina o le ofutau a le Atua.

Gaoioiga e Mafai Ona Fai

• Faaali atu i tamaiti se ata o le ofutau (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). A o e faitau i le Mataupu Faavae ma Feagaiga 27:15–18, fesoasoani i tamaiti e sue vaega o ofutau i luga o le ata. Tau atu i tamaiti le auala na fesoasoani ai le ofutau o le Atua ia te oe e “tetee atu ai i le aso leaga” (fuaiupu 15).

• O le otootoga mo Efeso i le Sau, Mulimuli Mai ia te A’u—Mo le Peraimeri: Feagaiga Fou 2019 e i ai lana itulau o gaoioiga e faatatau i le ofutau a le Atua. Oti ese vaega o le ofutau, ma tuu atu i tamaiti e tuu i luga o se tasi o ata ao e faitau le Mataupu Faavae ma Feagaiga 27:15–18. Fesoasoani i tamaiti ia malamalama i mea e mafai ona latou faia e ofuina ai le ofutau a le Atua, pei o le tatalo, filifili le mea tonu, auauna atu i isi, ma isi.

  

  E mafai ona ou ofuina le ofutau a le Atua.

Mataupu Faavae ma Feagaiga 28:2, 6–7

E taitai e le perofeta le Ekalesia.

Pe o iloa ea e tamaiti o loo e aoaoina le mafuaaga ua i ai a tatou perofeta? Faaaoga le Mataupu Faavae ma Feagaiga 28 e fesoasoani ia latou iloa o le perofeta na o le pau lea o le tagata e mafai ona taitaia le Ekalesia.

Gaoioiga e Mafai Ona Fai

• Faitau pe taʻu i au lava upu le tala ia Hiram Page (tagai i le “Mataupu 14: O le Perofeta ma Faaaliga mo le Ekalesia,” Tala o le Mataupu Faavae ma Feagaiga, 56–57). Faasoa atu lau molimau faapea na filifilia e le Tama Faalelagi ma Iesu Keriso Iosefa Samita e taitai le Ekalesia i ona aso (tagai i le Mataupu Faavae ma Feagaiga 28:2). Faasoa atu lau molimau o le perofeta o loo i ai nei ua valaauina e fesoasoani i le Alii e taitaia Lana Ekalesia io tatou aso.

• Fai atu i tamaiti e taaalo i le [taaloga o le] “mulimuli i le taitai”—e mafai ona tu i luma o le potu se tamaitiiti, a o isi tamaiti e mafai ona faataitai i soo se mea na te faia. O lenei mea e mafai ona taitai atu ai i se talanoaga e uiga i le mafuaaga tatou te mulimuli ai i le perofeta. E mafai ona e faaali atu se ata o Iesu Keriso ma faamamafa atu tatou te mulimuli i le perofeta aua e mulimuli o ia i le Faaola ma saunoa i upu a le Faaola.

Aoao atu le Aoaoga Faavae: Tamaiti Matutua

Mataupu Faavae ma Feagaiga 27:1–2

O le faamanatuga e fesoasoani ou te manatua ai Iesu Keriso.

E mafai faapefea ona fesoasoani le aoaoina o mataupu faavae o loo i le Mataupu Faavae ma Feagaiga 27:1–2 i tamaiti o loo e aoaoina ina ia i ai se aafiaga sili atu le anoa i le tagofia ai o le faamanatuga?

Gaoioiga e Mafai Ona Fai

• Valaaulia tamaiti e tusi i lalo mea latou te manatu e finagalo le Faaola latou te iloa e uiga i le faamanatuga. Afai e manaomia, e mafai ona latou faitauina le “Faamanatuga” i le Taiala i Tusitusiga Paia (scriptures.ChurchofJesusChrist.org). Tuu atu ia i latou e faasoa mai nisi o mea na latou tusia, ma fai atu ia i latou e faaopoopo ia latou lisi pe a uma ona faitau le Mataupu Faavae ma Feagaiga 27:1–2. E faʻapefea ona aafia i latou i luga o latou lisi le auala latou te tagofia ai le faamanatuga i Aso Sa taitasi?

• Fesoasoani i tamaiti e mafaufau i le uiga o le taumafa i le faamanatuga “ma le manatu tasi i le mamalu [o le Atua]” (fuaiupu 2). Ia talanoaina fesili e pei o nei: O a nisi o faatosinaga o o tatou mata po o mafaufau atonu e taulai atu i ai i le taimi o le faamanatuga? O le a se mea e mafai ona tatou faia e taulai atu ai lo tatou gauai atu i le Faaola ao tatou fetagofi atu i le faamanatuga? E faapefea ona fesoasoani lenei mea ia i tatou e mulimuli ia te Ia i aso uma?

Mataupu Faavae ma Feagaiga 27:15–18

O le ofutau a le Atua e fesoasoani ia te au e tetee atu ai i le leaga.

O tamaiti o loo e aoaoina o le a feagai ma le tele o aafiaga leaga io latou olaga atoa. E finagalo le Tama Faalelagi e fesoasoani ia i latou e tetee atu i le leaga. E faapefea ona e musuia i latou e ofuina le ofutau a le Atua?

Gaoioiga e Mafai Ona Fai

• Valaaulia tamaiti e faitau le Mataupu Faavae ma Feagaiga 27:15–18 ma tusi vaega o le ofutau na taʻua (pe a manaʻomia, e mafai ona latou vaʻai i le ata i totonu o le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). O a upu o loo faamatalaina ai vaega taitasi o le ofutau e aoao ai i tatou e uiga i mea tatou te manaomia e tau ai le leaga o siomia ai i tatou (mo se faataitaiga, amiotonu, faatuatua, faaolataga, ma isi)?

• Valaaulia tamaiti e mafaufau i mea e mafai ona latou faia e tetee atu ai i faaosoosoga o siomia ai i latou. Fai atu ia i latou e faauma le fuaiupu “Tatou te ofuina le ofutau o le Atua i aso uma i le …” ma o latou manatu. Fesoasoani ia latou iloa pe faapefea ona fesoasoani a latou taumafaiga e o mai ia Keriso ina ia latou ofuina le ofutau a le Atua.

Mataupu Faavae ma Feagaiga 28:1–7, 15

E taialaina au e le Tama Faalelagi e ala i le Agaga Paia.

E mafai e le Mataupu Faavae ma Feagaiga 28:1–7, 15 ona fesoasoani i tamaiti o loo e aoaoina ina ia malamalama e mafai e le Agaga Paia ona taialaina tagata uma, ae o faaaliga mo le Ekalesia o le a tuuina atu e ala i le perofeta.

Gaoioiga e Mafai Ona Fai

• Faamatala atu le tala ia Hiram Page o loo fai mai e maua faaaliga mo le Ekalesia (tagai i le “Mataupu 14: O le Perofeta ma Faaaliga mo le Ekalesia,” Tala o le Mataupu Faavae ma Feagaiga, 56–57). Faamata e faapefea ona tatou tali atu ia Hiram Page ma ana tautinoga? Faitau faatasi le Mataupu Faavae ma Feagaiga 28:1–7,15 mo nisi manatu.

• Fesoasoani i tamaiti e sue ia mau nei e fai ai se lisi o auala e mafai ai e le Agaga Paia ona taitaiina i latou: Mataupu Faavae ma Feagaiga 28:1, 4, 15; Ioane 14:26; Moronae 8:26; 10:4–5. Tuu atu ia i latou e galulue taitoalua pe afai e fesoasoani lena mea ia i latou. Aisea e taua tele ai le meaalofa o le Agaga Paia? Faasoa pe faapefea ona taialaina oe e le Agaga Paia.

Fautuaina le Aoaoina i le Aiga

Valaaulia tamaiti e fesili atu io latou matua pe mafai ona latou aoaoina se lesona o le afiafi faaleaiga i se mea latou te aoaoina i le vasega.

Faaleleia o Lo Tatou Aoao Atu

Faaaoga musika. O pese Peraimeri ma viiga e mafai ona fesoasoani i tamaiti o vaitausaga uma ia malamalama ma faafaigofie ia upumoni o le talalelei i se auala e le mafaagaloina. E mafai foi ona latou faʻamalosi tamaiti e auai i le aʻoga.